Misava Leyintshwa—Yi Tshinele Swinene!

MISAVA leyi yi le switlhavini swa yona swa rifu! Xana sweswo swi nga va ntiyiso hakunene? Kambisisa swiyimo swa misava hi vukheta.

Ku ni matlhari lama aneleke ya nyutliya ku herisa vaaki hinkwavo va misava hi makhamba yo hlayanyana. Nyimpi ya xin’wana-manana ya tlhekeka ematikweni yo tala, yo tanihi Angola na Mozambique. Ku ni minkwetlembetano ya vuhedeni eAfrika Dzonga, Sri Lanka ni matiko man’wana. Vutherorisi ni ndlala na swona swi koxa vutomi byo tala bya vanhu.

Ku vuriwa yini hi ntungu wa AIDS? Sunday Times, ya Afrika Dzonga ya October 25, 1987, yi byi vule “rifu lerintshwa ra ntima” naswona yi te: “Sweswi nchavo lowu teleke wa Aids ya la Afrika wu paluxiwile: Ematikweni man’wana vanhu va tsevu eka va khume va nga ha fa hi 1994.”

Ku chava ka tala hikwalaho ka swiyimo swo tano. Hi laha muwini wa sagwadi ra Nobel Harold C. Urey a vuleke ha kona malembe ma nga ri mangani lama hundzeke a ku: “Hi ta dya ku chava, hi etlela hi ku chava, hi hanya eku chaveni naswona hi fa hi ri eku chaveni.” Xa nkoka swinene, Yesu Kriste, muprofeta lonkulu swinene la tshameke a va kona emisaveni, u vhumbe leswaku emasikwini ya makumu ya misava leyi, vanhu a va ta “titivala hi ku chava ni ku ehleketa leswi nga ta humelela la misaveni.”—Luka 21:26.

Kambe vo tala a va chavi. Ematshan’wini ya sweswo, va tsaka. Ha yini? Hikuva va swi tiva leswaku mafambiselo lawa ya misava (hayi planete ya Misava) ya le kusuhi ni makumu ya wona, kambe misava leyintshwa yi tshinele swinene. Xana va nga tiyisekisa ku yini hi ndlela leyi? Hikwalaho ka ku hetiseka ka vuprofeta byo tala swinene bya Bibele.

Hi xikombiso, loko Yesu Kriste a vutisiwe lexi a xi ta va xikombiso xa vukona bya yena ni xa makumu ya misava, u te: “Tiko rin’wana ri ta pfukela tiko rin’wanyana, mfumo wun’wana wu ta lwa ni mfumo wun’wana.” Hi 1914, Nyimpi yo Sungula ya Misava yi tlhekekile. Yi vange ku lahleka lokukulu swinene ka vutomi enyimpini ku fikela hi nkarhi wolowo. I yini lexi koxiweke hi tinyimpi? Kwalomu ka 9 000 000 va file, handle ka timiliyoni ta vaaki! Kambe Nyimpi ya Vumbirhi ya Misava a yi tlurisa swinene hi ku lovisa, yi koxa vutomi bya kwalomu ka 55 000 000! Yesu u kombise leswaku hinkwaswo leswi a swi ta fambisana ni ku pfumaleka ka swakudya, ku tsekatseka ka misava, mintungu ni vuhomboloki.—Matewu 24:7-13; Luka 21:10, 11.

Muapostola Pawulo wa Mukriste na yena u vhumbe swiyimo swa misava ya namuntlha hi ku pakanisa. U tsarile a ku: “Emasikwini ya makumu, ku ta fika minkarhi yo nonon’hwa. Hikuva vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu. Va ta tiendla onge hi loko va ri ni vukhongeri, kambe va ta ala matimba ya byona. Fambela kule ni vanhu lavo tano.” (2 Timotiya 3:1-5) Pawulo a a ta swi kota ku vhumba swiyimo swa siku ra namuntlha hi ku pakanisa hikuva Xikwembu xi n’wi huhutele ku tsala marito lawa.

Malunghana ni marito ya yena n’wini ehenhleni ka nkarhi wa makumu, Yesu u te: “Loko mi vona swilo sweswo swi humelela, mi ta tiva leswaku Mfumo wa Xikwembu wu le kusuhi.” (Luka 21:31) Timiliyoni ti tirhisa Xikhongelo xa Yesu xa Xikombiso ivi va kombela Mfumo wa Xikwembu ku ta. (Matewu 6:9, 10) Kambe loko va vutisiwa, “Xana Mfumo lowu kahle-kahle wu ta endla yini?” va hava nhlamulo. Hi laha ku hambaneke, timiliyoni leti dyondzaka Bibele hi ku chivirika ti kume leswaku Mfumo wu ta tisa makumu eka misava leyi ya khale kutani wu simeka misava leyintshwa leyi nga ta tisa minkateko leyi nga hlayekiki eka vanhu hi laha ku tiyeke. Kambe njhani? Rini?