Wa Tsundzuka Xana?

Xana u kume minkandziyiso ya sweswinyana ya Xihondzo xo Rindza yi ri ya nkoka lowu tirhaka eka wena? Manuku ha yini u nga kambeli mianakanyo ya wena hi leswi landzelaka?

◻ Xana Yesu a a vula yini loko a vula leswaku a ku na loyi a nga ta va mudyondzisiwa wa yena handle ka loko a ‘venge tata wa yena ni mana wa yena, ni nsati, ni vana, ni makwavo, hambi byi ri vutomi bya yena’? (Luka 14:26)

Yesu a a nga vuli swona leswaku un’wana wa valandzeri va yena u fanele a venga maxaka ya yena kumbe vutomi bya yena n’wini hi ku kongoma. Ematshan’wini ya sweswo, a a vula leswaku mudyondzisiwa u fanele a rhandza van’wana kumbe vutomi bya yena n’wini ku nga ri ku tlula rirhandzu ra yena eka Yesu.—1/1, tluka 8.

◻ I tinhla tihi tinharhu leti pfuneteke eku humeleleni ka ntirho wa vurhumiwa wa ku nyikela Vumbhoni, lowu hundzeke ni wa sweswi?

Yin’wana i ku tihlanganisa ka munhu hi xiyexe ni vanhu emakaya ya vona. Yin’wana i rungula ra Mfumo leri kongomeke ni leri olovaka leri sekeriweke eBibeleni. Ya vunharhu i rirhandzu ro fana ni ra Kriste leri kombisiweke hi varhumiwa eku hanyisaneni ni vanhu.—1/1, tluka 14.

◻ Ha yini Xikwembu xi engetele ntwanano wa Nawu eka ntwanano wa Abrahama swa nkarhinyana?

Ntwanano wa Nawu wu tiyise leswaku Vaisrayele a va ri vadyohi lava a va lava muprista wa nkarhi hinkwawo ni gandzelo leri hetisekeke. Wu hlayise nxaxamelo wa Rixaka naswona wu pfune ku hlamusela leswaku Rixaka rero a ku ri mani. Nakambe wu kombe leswaku siku rin’wana Xikwembu xi ta va ni tiko ra tihosi ni vaprista.—2/1, tluka 16.

◻ Xana hi yihi mintwanano ya Xikwembu ya nkombo leyi nga emahlweni leyi yisaka eminkatekweni leyi nga heriki eka hinkwerhu?

Ntwanano wa Edeni, ntwanano wa Abrahama, ntwanano wa Nawu, ntwanano wa muprista ku fana na Melkisedeke, ntwanano wa Davhida wa Mfumo, ntwanano lowuntshwa ni ntwanano wa Mfumo.—2/1, tluka 19.

◻ Xana magidi ya ku hambana eka matsalwa ya Bibele ya tsanisa ku hlamusela ka Bibele leswaku i Rito ra Xikwembu?

E-e. Swichudeni swa Bibele swi hi byela leswaku kwalomu ka ku hambana loku hinkwako i ka nkoka wuntsongo eka tsalwa. Ku tirha ntsena ku tiyisa xikombiso xa ntiyiso wa Matsalwa. (Psalma 119:105; 1 Petro 1:25)—2/1, matluka 29, 30.

◻ Xana rito leri nge “nthyeketo” ri huma kwihi, naswona ri tirhisiwa njhani eBibeleni?

“Nthyeketo” ri huma eka rito ra Xigriki leri nge aʹgno·stos, leswi vulaka “la nga tiviwiki.” Pawulo u tirhise xivumbeko xa rona eka nkulumo ya yena eka Vaathena loko a kombetela eka altari ya vuhedeni leyi nyikeriweke “Eka Xikwembu lexi nga tiviwiki.” (Mintirho 17:23)—2/15, tluka 5.

◻ Hi fanele hi endla njhani loko vukongomisi byin’wana bya Matsalwa byi vonaka byi amukela mianakanyo leyi hambaneke?

Hi fanele hi kombisa langutelo ro titsongahata leri kombisiweke hi Vakriste vo sungula, hi amukela swiboho ni vukongomisi leswi humaka ebandlheni ra Xikwembu. (Mintirho 15:6-29)—2/15, tluka 20.

◻ Xana Yesu a a vula yini loko a ku: “Tiendleleni maxaka hi xuma xa misava leyi, leswaku loko mi tshuka mi pfumarile, va mi amukela emintsongeni leyi nga heriki”? (Luka 16:9)

Hi fanele hi chivirikela ku tirhisa xuma xihi na xihi lexi hi nga ha vaka na xona ku seketela timhaka ta Mfumo ivi xisweswo hi hlakulela vunghana na Yehova ni N’wana wa yena. Hi vona ntsena va nga hi nyikaka mintsonga ya hina etilweni kumbe emisaveni ya paradeyisi loko rifuwo leri vonekaka ri hluleka kumbe ri hela.—3/1, tluka 9.

◻ I swilo swihi swinharhu leswi lavekaka eka hina loko hi ta pfuneka hi vutlhari lebyi Yehova a endlaka ku byi kumeka?

Hi fanele hi tlangela nhlengeletano ya Yehova; hi fanele hi dyondza Rito ra Xikwembu nkarhi na nkarhi ni mimpfuno leyi nyikiweke, leyi hi pfunaka ku ri twisisa; naswona hi fanele ku anakanyisisa hi leswi hi swi dyondzeke ni ndlela leyi hi nga swi tirhisaka ha yona evuton’wini bya hina bya siku na siku.—3/15, tluka 14.

◻ Ha yini vanhu va Israyele wa khale va endle hi ku kala ku twisisa konghasi?

Va hluleke ku anakanyisisa hi ndlela yo tlangela ehenhla ka swilo hinkwaswo leswi Yehova a va endleleke swona. (Psalma 106:7, 13)—3/15, tluka 17.

◻ I yini leswi yimelaka hi ‘mavuthu ya vagadi va tihanci’ lama ku vulavuriweke ha wona eka Nhlavutelo 9:16?

Tihanci leti to fanekisela a ti yimeli masalela lama hungutekaka ya lava totiweke ntsena kambe ti tlhela ti yimela “ntshungu lowukulu” wa “tinyimpfu tin’wana” lowu kulaka ni wa matimba. (Nhlavutelo 7:9; Yohane 10:16)—4/1, tluka 19.