A Hi Tiphuphu Leti Hlamarisaka Ntsena

Vaendzi va hlamarisiwa hi tiphuphu leti nga eLwandle ra Mediteraniya le Khezariya, hlaluko ra khale ra le ribuweni ra Israyele. Hlaluko leri ri akiwe hi Heroda Lonkulu ivi a ri thya vito leri xiximaka Khezari Awugusto.

Vayimburi va yimbule xiphemu lexikulu xa muti lowu, ku katsa ni holo leyikulu ya mintlango. Naswona va nghene ni le matini leswaku va vona ndlela leyi hlaluko leri ro rharhangana ri akiweke ha yona eribuweni leri ra sava.

The New York Times (January 8, 1991) yi vike leswaku ku kumiwe tiphuphu eka leswi saleke swa yindlu ya vuhosi leyi khale a yi akiwe elwandle. Tona ti hlawulekile hi mhaka ya leswi eka tona ku tsariweke mavito ya vafumi van’wana va Rhoma lava khale a va nga tiviwi. “Mulanguteri” wa swikepe na yena wa boxiwa, leri ku nga “tsalwa ro sungula leri tshameke ri kumiwa leri vulavulaka hi hlaluko leri.”

Swichudeni swa Bibele swa swi tiva leswaku Pawulo u tlutele eka hlaluko leri eku heleni ka maendzo mambirhi ya vurhumiwa. Laha u tshame na Filipi muevhangeli, naswona mintokoto yakwe yi fanele yi va khutazile swinene vadyondzisiwa. (Mintirho 18:21, 22; 21:7, 8, 16) Hi nga hlaya mintokoto leyi yo tala leyi nyanyulaka ebukwini ya Bibele, ya Mintirho ya Vaapostola.

Kutani ke, tiphuphu leti nga eribuweni a hi swilo swa matimu leswi nga vuliki nchumu. Swi tsundzuxa Vakriste hi vamakwavo va khale, lava va hangalaseke mahungu lamanene hi ku chivirika emahlalukweni ni le handle “ku ya fika emakun’wini ya misava.”—Mintirho 1:8.

[Laha Xifaniso Xi Humaka Kona eka tluka 32]

Garo Nalbandian