“Ku Fana Ni Nghala Leyi Bongaka”

XANA wa pfumela leswaku Sathana u kona? Vo tala namuntlha a va pfumeli. Swi tikomba onge va xiya vonelo ro tano tanihi “leri nga riki ra xisayense.” Hambi ku ri khale hi 1911, Encyclopædia Britannica yi te: “Sayense yi hlamusele maendlelo yo tala lama voniwaka ya ntumbuluko ni vutomi bya munhu kambe yi nga hlamuseli hi tirhelo ra Sathana.” Vativi va ntivo-vukwembu va anakanye leswaku Sathana o va mfungho ntsena, ntsheketo. The World Book Encyclopedia yi ri: “Vativi va ntivo-vukwembu va manguva lawa va xiya Diyavulosi tanihi mfungho wa matimba ya vubihi, wa timfanelo leti biheke swinene eka munhu.”

Kambe ke, vumbhoni hi byihi? Loko u yi kholwa Bibele, u fanele u pfumela leswaku Sathana i wa xiviri. Yesu a nga pfumelangi ntsena leswaku u kona kambe u n’wi vule “mufumi wa misava.” (Yohane 14:30) Muapostola Pawulo u vule Sathana ‘xikwembu xa mafambiselo lawa ya swilo.’ (2 Vakorinto 4:4) Naswona Yohane, muapostola la khalabyeke u te: “Misava hinkwayo yi le hansi ka matimba ya Lowo biha.”—1 Yohane 5:19.

Loko u nga pfumelelani na Yohane, anakanya hi matimu ya sweswinyana. Xiya mintlawa yo dlaya vanhu ni tihulumendhe leti tirhisaka nxaniso. Tsundzuka tinyimpi ni ku lovisiwa ka vanhu hi ku kongoma loku voniweke hi rixaka ra hina. Kutani ku vuriwa yini hi vugevenga lebyi chavisaka lebyi nga tinhloko-mhaka eka maphepha-hungu ya hina—ku dlaya vanhu vo tala, ku pfinya, ku dlaya loku landzelelanaka, ku khomiwa ka vana hi ndlela yo biha hi tlhelo ra rimbewu, ku boxa swi nga ri swingani ntsena? Xana u kona un’wana handle ka Sathana la nga xikwembu xa misava leyi?

Muapostola Petro wa Mukreste u tsundzuxile: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.” (1 Petro 5:8) Loko nghala a yi ri ku famba-fambeni ekusuhi ni laha u tshamaka kona, xana u nga vulavula hi vukona bya yona kumbe e-e? Kumbe u ta tsutsuma u ya tumbela?

Tiyiseka leswaku Sathana u kona. U hava tintswalo u ni vukarhi naswona wa hi tlula hi matimba. Kutani ke, tsutsumela eka Loyi a nga ni matimba lamakulu. “V̌oko ra Yehova i khokholo ro tiya. L’a lulameke o tŝhav̌ela ka rona, o ṭhama e ku tlakukeni.” (Swivuriso 18:10) Tumbela eka Yehovha Xikwembu naswona u swi tiva leswaku ku nga ri khale vanhu va ta ntshunxiwa eka nkucetelo wa lowo biha, Sathana. Wolowo wu ta va ntshunxeko lowu tsakisaka swonghasi!—Nhlavutelo 20:1-3.