Xiviko Xa Vahuweleri Va Mfumo

Ntshunxeko Wa Moya Le Colombia

KU SUKELA loko Mapaniya ma hlule Amerika, Vukhatoliki byi ve ni nkucetelo lowukulu wa vukhongeri le Amerika Dzonga. Le Colombia byi ve vukhongeri bya Tiko lebyi pfumeleriweke ximfumo. Hi malembe ya 105 lama hundzeke, Vatican yi endle ntwanano ni hulumendhe ya Colombia leswaku yi sirheleta kereke naswona yi nyikiwa malunghelo lama hlawulekeke hi tlhelo ra dyondzo ni vukati.

Hi December 1990 vanhu va le Colombia va hlawule ntlawa wa vanhu leswaku va simeka milawu leyintshwa, leyi hetisekeke exikarhi ka 1991. Milawu leyintshwa yi cinca xiyimo xa vukhongeri le Colombia. Sweswi vukhongeri hinkwabyo se byi ni timfanelo leti ringanaka enawini naswona vuleteri hi ta vukhongeri a byi nge he sindzisiwi eka vana eswikolweni swa mani na mani. Ntwanano wa hulumendhe na Vatican wu fanele wu tlhela wu kambisisiwa malunghana ni ku hundzuka loku ka milawu.

Ntshunxeko lowu lowukulu wa vukhongeri wu ta hunguta nkucetelo wa Kereke ya Khatoliki, wu olovisela va timbilu letinene leswaku va kuma vutivi bya Bibele naswona va fikelela ntshunxeko wa moya.

Loko ta ha langutele ntshunxeko lowu wa moya, Timbhoni ta Yehovha ta 51 000 etikweni hinkwaro a ti ri karhi ti endla malunghiselelo yo khathalela vabaleki va moya. Rhavi ra vona lerintshwa leri nga ni miako leyi kurisiweke leyi katsaka muchini wo kandziyisa wa rivilo ra le henhla, hi mivala leyi heleleke, ri le kusuhi no hela. Maphayona yo hlawuleka ya nkarhinyana ma rhumeriwe eswidorobanini swa kwalaho leswaku ma ya lava tinyimpfu ta Yehovha leti lahlekeke naswona ma endle ntirho lowu hlamarisaka wo dyondzisa Bibele. Eka madoroba ya 63, laha rin’wana ni rin’wana ri nga ni vaaki va 10 000, ku vumbiwe mavandlha ni mintlawa leyintshwa ya 47.

Loko moya wa Yehovha wu hambeta wu susumetela vanhu va timbilu to tshembeka, ni vantshwa vo tala va angula kahle. Buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka yi tikombe yi ri xipfuno lexi nga ringanisiwiki na nchumu, eka lavantshwa ni le ka vatswari va vona. Loko un’wana wa Mbhoni a ri karhi a famba hi yindlu na yindlu, u hlangane ni wanuna loyi a nga hlaya swiphemu swa buku leyi, loyi a a lombiwe kopi hi muakelani. U tsakisiwe swinene hi vutlharhi lebyi tirhaka lebyi tirhisiweke eku kaneleni hi swiphiqo swa ndyangu. Ngopfu-ngopfu ndzima 4, “Ha Yini Mama Na Papa Va Hambanile?” yi n’wi tsakise swinene, tanihi leswi yena ni nsati wa yena a va ri ekusuhi no hambana. U te buku leyi yi n’wi ponise eka khombo lerikulu. Sweswi yena ni ndyangu wa yena va dyondza Bibele ni Timbhoni ta Yehovha naswona va hlanganyela minhlangano hinkwayo ya vandlha. Va byi tlangela swinene vutlharhi lebyi Yehovha a byi nyikelaka hi Bibele ni nhlengeletano ya yena.

Ntokoto lowu wu kombisa ntshunxeko wa moya lowu nga kona le Colombia loko Timbhoni ta Yehovha ti ri karhi ti pfuna lava nga ni ndlala ya moya leswaku va dyondza hi swikongomelo leswi tsakisaka swa Yehovha ni misava ya yena leyintshwa, leyi tshineleke swinene sweswi.—2 Petro 3:13.