Dyondzo Leyi Humaka Eka Tinyenyana Ni Swiluva

I YINI lexi vanhu va karhatekaka ngopfu ha xona namuntlha? Hi xitalo, va lwela ku kuma mali leyi eneleke ku wundla mindyangu ya vona kumbe leswaku va kota ku antswisa xiyimo xa vona.

Ku lwela ku kuma ntsena mali yo ringana ku tiwundla, a ku ri mhaka leyikulu loko Yesu Kreste a ha ri emisaveni. Kambe u tsundzuxile leswaku mhaka leyi leyi faneleke, yi nga ha hundzuka ku vilela lokukulu loku khubumetaka swilo swa moya. Leswaku a kombisa yinhla leyi, Yesu u byele vadyondzisiwa va yena leswaku va xiyisisa swinene tinyenyana ni swiluva.

Tinyenyana ti fanele ti dya siku rin’wana ni rin’wana—kumbexana hi xiringaniso ti dya ku tlula hina hi mhaka ya leswi mpfuvelo wa tona wu hatlisaka. Ku tlula kwalaho, a ti swi koti ku byala mbewu, ku tshovela kumbe ku veka swakudya ti swi vekela nkarhi lowu taka. Kambe, hi laha Yesu a vuleke ha kona, “Tata wa n’wina wa le tilweni wa ti fihluta.” (Matewu 6:26) Hi laha ku fanaka, Xikwembu xi ambexa “swiluva swa le nhoveni” swo saseka, hi ndlela yo hlamarisa swinene.—Matewu 6:28-30.

Yesu wa hi tiyisekisa leswaku loko hi veka swilaveko swa nyama endhawini ya swona ivi hi rhangisa swilo swa moya, Xikwembu xi ta endla leswaku hi swi kuma swakudya ni swiambalo leswi hi swi pfumalaka. Loko Yehovha Xikwembu a ti khathalela tinyenyana ni swiluva, hakunene u ta va khathalela lava va n’wi rhandzaka va tlhela va hambeta va “tilavela Mfumo wa yena ni ku lulama ka yena.” (Matewu 6:33) Xana u rhangisa swilaveko swa Mfumo wa Xikwembu evuton’wini bya wena?