Xana I Mukhuva Lowu Nga Vuliki Nchumu?

MUKHUVA wa ku tivula swidyoho, se ku hundze malembe-xidzana yo tala wu ri karhi wu endliwa hi Makhatoliki. Kambe, vo tala va vona ku ri mukhuva lowu nga pfuniki nchumu. Loko yi tsundzuka vuntshwa bya yona, nhloko ya xikolo xa le henhla leyi vitaniwaka Bob yi ri: “A ndza ha ri n’wana wa kondlo-a-ndzi-dyi naswona a ndzi nga wu voni wu ri wa nkoka.” Ha yini? Eka yena, ku tivula swidyoho se a ku hundzuke mukhuva lowu nga vuliki nchumu. Wa hlamusela: “Ku tivula swidyoho a ku fana ni ku yisa nhundzu ya wena hinkwayo leyi nga lo mphaa, hi swidyoho, eka muhakerisi wa swibalo exitichini xa swihaha-mpfhuka. U ku vutisa swivutiso hi swidyoho swa wena ivi a ku pfumelela u hundza endzhaku ko hakela xo karhi u hakelela nhundzu ya manyunyu leyi u yi xaveke loko u ri endzhandzeni.”

Hi laha ku fanaka, Frank Wessling, loko a tsala eka U.S. Catholic, u hlamusela mukhuva wa ku tivula swidyoho tanihi “ndlela leyi tlhandlamanaka, leyi vevukisiweke swinene yo susa swidyoho leswi tolovelekeke hi ku tirhisa swikhongelo leswi nhlokohatiweke swa ku tisola, hi ku landza nawu wa vukhongeri, lowu ngo va mukhuva lowu nga nyawuriki wa ku tisola.” Xana Wessling u gimetisa ku yini? “Ndza tiyiseka leswaku ku Tivula Swidyoho swa wu pfuna moya-xiviri,” ku vula yena. “Kambe ndlela leyi Makhatoliki ma endlaka ha yona, hi yona yi nga ni xiphiqo.”

Bibele yi hlamusela ku tivula swidyoho hi ndlela leyi hambaneke swinene ni leyi. Xa nkoka swinene i ku tivula swidyoho eka Xikwembu. (Pisalema 32:1-5) Naswona mudyondzisiwa wa Vukreste, Yakobo, u tsarile: “Xana ku ni loyi a vabyaka exikarhi ka n’wina? A a vitane vakulukumba va kereke leswaku va ta n’wi khongelela, va n’wi tota mafurha hi vito ra Hosi. Hikokwalaho, byelanani ku dyoha ka n’wina, mi khongelelana leswaku mi ta hanya.”—Yakobo 5:14, 16.

Mukreste la tikeriwaka hi xidyoho u vitana valanguteri va vandlha, lava va nga ta nyikela ndzayo ya munhu hi xiyexe ni leyi tirhaka yo huma eBibeleni, ku pfuna mudyohi leswaku a tshika ndlela ya yena ya vudyoho. Valanguteri va nga nyikela xikhutazo lexi faneleke loko va ri karhi va langutela nhluvuko wa loyi a vabyaka emoyeni. Vona ku hambana loku nga kona exikarhi ka leswi ni mukhuva wa ku tivula swidyoho lowu endliwaka hi tikereke namuntlha! Hi ku tiyisiwa hi mpfuno wa vakulu va vandlha, vadyohi lava tisolaka va nga kuma ku wisa loku Davhida a veke na kona, hi laha a swi hlamuselaka ha kona eka pisalema: “Nḍi ku tiv̌isile šidyoho ša nga, a nḍi fihlanga ku homboloka ka nga; nḍi te: Nḍi ta tiv̌ula ka Yehova e ku dyoha ka mina; kutani u hlangurile nanḍu wa šidyoho ša nga.”—Pisalema 32:5.