Nsirhelelo Wa Xiviri—Pakani Leyi Nga Fikelelekiki Hi Ku Olova

ARNOLD a a ri n’wana loyi a rhandza yingwe ya yena yo tlangisa. Kun’wana ni kun’wana laha a ya kona, a a famba-famba na yona—eku tlangeni, eku dyeni ni le ku etleleni. Eka yena, yingwe yoleyo a yi n’wi chavelela, ni ku n’wi sirhelela. Siku rin’wana, swilo swi sungule ku tika. Yingwe a yi lahlekile!

Loko Arnold a ri karhi a rila, mana wakwe, tata wakwe ni vabuti vakwe vanharhu va ngundzuvanye yindlu ya ka vona leyikulu leswaku va kuma yingwe yoleyo. Eku heteleleni, un’wana wa vona u yi kumile yi ri endzeni ka dirowara. Entiyisweni, Arnold a a yi veke kwalaho kutani hi ku hatlisa a rivale laha a yi veke kona. Yingwe yi kumekile, ivi Arnold a tisula mihloti. U titwe a tsakile ni ku sirheleleka nakambe.

Mayana ndlela leyi swi nga vaka swi ri swinene ha yona loko swiphiqo hinkwaswo a swi nga tlhantlhiwa hi ku olova hi ndlela yoleyo—hi ndlela yo olova ku fana ni ku kuma yingwe yo tlangisa edirowarini! Hambiswiritano, eka vanhu vo tala timhaka ta nsirhelelo i nchumu lowukulu swinene ni lowu rharhanganeke ku tlula sweswo. Kun’wana ni kun’wana, vanhu va tivutisa, ‘Xana ndzi ta hlaseriwa hi vugevenga kumbe madzolonga? Xana ndzi le khombyeni ro lahlekeriwa hi ntirho wa mina? Xana ndyangu wa mina wa tiyiseka leswaku wu ta va ni swakudya leswi eneleke? Xana vanhu van’wana va ta ndzi papalata hikwalaho ka vukhongeri bya mina kumbe hikwalaho ka ndhavuko wa rixaka ra mina?’

Nhlayo ya vanhu lava pfumalaka nsirhelelo i yikulu swinene. Hi ku ya hi Nhlangano wa Matiko, kwalomu ka magidi manharhu ya timiliyoni a to tsandzeka ku tshungula mavabyi lama tolovelekeke ntsena kambe ti tsandzeka hambi ku ri ku kuma mirhi. Ku tlula gidi ra timiliyoni ta vanhu va xaniseka evuswetini. Kwalomu ka gidi ra timiliyoni ta vanhu, hambileswi va tirhaka, a va na ntirho lowunene. Nhlayo ya vabaleki ya tlakuka. Eku heleni ka 1994, eka vanhu van’wana ni van’wana va 115 emisaveni, un’we wa vona u boheke ku baleka ekaya rakwe. Timiliyoni ta vanhu ta dlawa hikwalaho ka ku xavisiwa ka swidzidzirisi leswi endlaka 1,8 wa tibiliyoni ta tirhandi hi lembe leswi vangaka nhlayo ya ntsandza-vahlayi ya vugevenga ni madzolonga. Nyimpi yi dlaya vanhu va timiliyoni. Hi 1993 ntsena, matiko ya 42 ma hlanganyele eka mimpfilu-mpfilu leyikulu, kasi 37 ya wona ma tokote madzolonga ya tipolitiki.

Nyimpi, vusweti, vugevenga ni minxungeto yin’wana eka nsirhelelo wa munhu swa fambisana, naswona swi ya swi andza. Ku hava mintlhantlho yo olova eka swiphiqo swo tano. Entiyisweni, vanhu a va nge swi tlhantlhi hinkwaswo ka swona.

Rito ra Xikwembu, Bibele ra tsundzuxa: “Mi nga tiṭhembeleni tihosi, hambi v̌a ri v̌ana v̌a v̌anhu la’v̌a hlulekaka ku ponisa.” Kutani i mani loyi hi nga tshembelaka eka yena? Tsalwa leri ri ya emahlweni: “Ku katekile loyi Šikwembu ša Yakob, wu nga matimba ya yena, loyi ku ṭhemba ka yena ku nga ka Yehova, Šikwembu ša yena. O endlile matilo ni misav̌a, e lwandle ni hikwaŝo le’ŝi nga ka rona.”—Pisalema 146:3-6.

Hikwalaho ka yini hi fanele hi tshembela eka Yehovha leswaku a tisa nsirhelelo emisaveni leyi? Xana swa koteka leswaku ku va ni nsirhelelo, ntsako evuton’wini bya sweswi? Xana Xikwembu xi ta swi susa njhani swihinga eka nsirhelelo wa munhu?