Lexi Endlaka Van’wana Va Cinca Vukhongeri Bya Vona

Eka vo tala, vukhongeri byo va mfungho ntsena. Byi nga ha kombisa laha minkarhi yin’wana munhu a yaka kona hi Sonto, laha a nghenelaka vukati kona ni laha a nga ta lahliwa kona. Kambe a byi kombisi muxaka wa munhu loyi a nga yena kumbe leswi a swi tivaka ni ku swi pfumela. Hi xikombiso, nkambisiso wun’wana wu paluxe leswaku 50 wa tiphesente ta lava tivulaka Vakreste a va nga swi tivi leswaku i mani la nyikeleke Dyondzo ya le Ntshaveni. Phela, hambi ku ri murhangeri wa Muindiya la dumeke Mohandas Gandhi, loyi a ri Muhindu a yi tiva nhlamulo ya kona!

XANA swa hlamarisa leswi vanhu va sukaka evukhongerini hikwalaho ka leswi vo tala va tivaka switsongo hi vukhongeri bya vona? E-e, a swi hlamarisi. Hambiswiritano, swa papalateka. Lava va amukeleke mpfuno wo dyondza hi Bibele hakanyingi va hlamarisiwa hi ku vona ndlela leyi yi va pfunaka ha yona. Bibele hi yoxe yi ri: “Hi mina Yehova, Šikwembu ša wena l’a ku dyonḍisaka, a ku pfuna, a ku fambisa e ndleleni leyi u faneleke ku famba ha yona.” (Xiitaliki i xerhu.)—Esaya 48:17.

Xana lava nga ni ndlala ya moya leyi nga xurhisiwiki va fanele va endla yini? A va fanelanga va tshika ku tirhela Xikwembu! Ematshan’weni ya sweswo, va fanele va kambisisa Bibele ivi va vona leswi Xikwembu hi xoxe xi endlaka va swi kuma.

Tinhlamulo Ta Swivutiso Swo Nonon’hwa

Loko Bernd a ri ni malembe ya nkombo hi vukhale u vone mana wa yena a fa.a Evutsongwaneni bya yena hinkwabyo u tivutisile, ‘Xana Manana u kwihi? Ha yini ndzi fanele ndzi kula ndzi nga ri na yena?’ Loko a ha ri n’wana wa kondlo-a-ndzi-dyi, Bernd a ri xirho xa kereke lexi hisekaka. Hikwalaho ko khumbeka hi ku xaniseka ka vanhu, a a tiyimisele ku tirha ntirho wo hluvukisa tiko hi mpfuno wa matiko man’wana. Hambiswiritano, a a karhatiwa hi swivutiso leswi kereke ya yena a yi nga ri na tinhlamulo leti enerisaka eka swona.

Kutani Bernd u vulavule ni mudyondzi-kulobye loyi a ri un’wana wa Timbhoni ta Yehovha. Muntshwa loyi u kombise Bernd eBibeleni leswaku mana wa yena a a nga twi nchumu, a etlele vurhongo bya rifu. Bernd u kume tindzimana to tala eBibeleni leti hlamuselaka mhaka leyi, to tanihi Eklesiasta 9:5 leyi nge: “V̌afi a v̌a tiv̌i ntšhumu.” Kutani Bernd a nga ri na xivangelo xo vilela hi leswaku mana wa yena wa xaniseka epagatori ya muxaka wo karhi—kumbe leswi tlulaka sweswo. Hambileswi dyondzo ya ku nga fi ka moya-xiviri yi dyondzisiwaka evukhongerini byo tala, Bernd u swi vone eBibeleni leswaku moya-xiviri wa munhu ko va munhu. Loko munhu a fa, moya-xiviri wa fa. “[Moya-xiviri] lo’wu dyohaka, hi wona lo’wu nga ta fa!”—Ezekiyele 18:4.

Nakambe Bernd u dyondze hi ntshembo lowu hlamarisaka wa vafi. U tihlayerile ebukwini ya Bibele ya Mintirho: “Ku ta va ni ku pfuxiwa ka lava lulameke ni ka lava nga lulamangiki.” (Mintirho 24:15) Wa nga vona ndlela leyi a nyanyuke ha yona ku kuma leswaku ku pfuxiwa loku ka vafi ku ta endleka laha misaveni, leyi Xikwembu xi nga ta yi vuyetela yi va paradeyisi!—Pisalema 37:29; Nhlavutelo 21:3, 4.

Hi ku hatlisa swilaveko swa moya swa Bernd swi enerisiwile hi vutivi bya xiviri bya Bibele. Bernd a nga byi tshikangi vukhongeri. Ematshan’weni ya sweswo, u siye kereke leyi a yi nga yi xurhisi ndlala ya yena ivi a amukela muxaka wa vukhongeri lebyi sekeriweke eBibeleni hilaha ku tiyeke. U ri: “Sweswo swi humelele malembe ya 14 lama hundzeke, naswona a ndzi tisolanga hi goza leri ndzi ri tekeke. Sweswi ndza swi tiva leswaku Muvumbi a hi yena a vangaka ku xaniseka. Sathana hi yena xikwembu xa mafambiselo lawa, kutani hi yena a faneleke a voniwa nandzu hi swiyimo leswi hi rhendzeleke. Kambe ku nga ri khale Xikwembu xi ta lulamisa swilo hinkwaswo leswi onhiweke hi misava ya Sathana. Manana na yena u ta pfuxiwa eku feni. Mawaku ntsako lowu sweswo swi nga ta va wona!”

Nkateko wa kona, Bernd u fikelele pakani ya yena yo tirha entsungeni leswaku a pfuna van’wana. U tirha etikweni rimbe a pfuna van’wana ku dyondza hi Mfumo wa Xikwembu, ntlhantlho wa xiviri wa maxangu ya vona. Ku fana na Bernd, timiliyoni ta vanhu ti dyondze leswaku ku nga ri khale Xikwembu xi ta herisa ku xaniseka ka vanhu. Va tsaka ku kuma leswaku ku ni vukhongeri lebyi enerisaka xilaveko xa vona xa moya.—Matewu 5:3.

Hi Xihi Xikongomelo Xa Vutomi?

Tanihi leswi matiko ya le Vupela-dyambu ma yaka ma hundzuka swinene, vo tala va vutisa, ‘Hi xihi xikongomelo xa vutomi?’ Nhlamulo yi kumeka eBibeleni, hilaha Michael a swi xiyeke hakona. Exikarhi ka va-1970, Michael a a lava ku joyina ntlawa wa matherorisi. A a ri ni pakani yin’we ntsena evuton’wini—ku hlasela vanhu lava a a va languta tanihi lava vangeke vuhomboloki bya fambiselo ra vukhepitali. U ri: “A ndzi nga humi ekaya ndzi nga ri na xona xibalesa xa mina. Kungu ra mina a ku ri ku dlaya van’watipolitiki lava dumeke ni vaseketeri vo tala va vukhepitali hilaha ndzi nga kotaka hakona. A ndzi ta nyikela ni vutomi bya mina hikwalaho ka xivangelo lexi.”

Michael a a nghena kereke, kambe ku hava ni un’we ekerekeni ya ka vona loyi a a kota ku n’wi hlamusela xikongomelo xa xiviri xa vutomi. Kutani loko Timbhoni ta Yehovha ti fikile ekaya ka yena ivi ti n’wi kombisa tinhlamulo ta Bibele eka swivutiso swa yena, Michael u yingisele hi vukheta. U sungule ku va kona eminhlanganweni ya vugandzeri eHolweni ya Mfumo ya kwalaho ya Timbhoni ta Yehovha.

Vanghana va Michael a va rhandza ku tiva lexi endleke leswaku a sungula ku tsakela Bibele. Michael u va khutazile a ku: “Tanani enhlanganweni hi Sonto leyi. Tshamani nkarhinyana. Loko mi nga swi tsakeli leswi mi swi twaka, tlhelelani ekaya.” Kunene, endzhaku ka nkulumo leyi sekeriweke eBibeleni ya 45 wa timinete, vo tala va vanghana va yena va humile eholweni. Kambe un’we—Susan—u sarile. Wansati loyi u nyanyuriwe hi leswi a swi tweke. Endzhakunyana Michael na Susan va tekanile ivi va khuvuriwa va va Timbhoni ta Yehovha. Michael u ri: “Sweswi se ndza swi tiva leswaku ha yini hi ri laha misaveni. Hi vumbiwe hi Yehovha. Xikongomelo xa hina xa xiviri evuton’wini i ku n’wi tiva ni ku endla ku rhandza ka yena. Sweswo hi swona swi tisaka ku eneriseka ka xiviri!”

Vanhu va timiliyoni va ni ripfumelo rin’we na Michael. Va tsundzuka marito ya Bibele lama nge: “A hi yingiseni makumu ya timhaka hikwato: Tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.”—Eklesiasta 12:13.

Ku Langutana Ni Swiphiqo Swa Vutomi

Hinkwerhu hi langutana ni ku hetiseka ka vuprofeta lebyi kumekaka eka 2 Timotiya 3:1: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona.” Ku hava loyi a nga balekelaka swiphiqo swa “minkarhi [leyi] ya mangava.” Kambe Bibele ya hi pfuna ku langutana na swona.

Anakanya hi Steven na Olive, mpatswa lowu tekaneke. Loko va sungule ku dyondza Bibele ni Timbhoni ta Yehovha, ku fana ni van’wana vo tala a va ri ni swiphiqo swa vukati. Steven wa hlamusela: “A hi hambana. A hi ri ni tipakani ni ku tsakela swilo leswi hambaneke.” I yini lexi va pfuneke leswaku va tshama swin’we? Steven u ya emahlweni a ku: “Timbhoni ta Yehovha ti hi kombe ndlela leyi hi nga tirhisaka misinya ya milawu ya Bibele evuton’wini bya hina ha yona. A ku ri ro sungula hi dyondza leswi swi vulaka swona ku pfumala vutianakanyi ni ku khathala. Ku tirhisa misinya ya milawu ya Bibele swi hi hlanganisile. Sweswi hi ni vukati lebyi tsakisaka, lebyi tshamisekeke.”

Vuxaka Lebyikulu Na Xikwembu

Hi ku ya hi vulavisisi bya Gallup bya sweswinyana, 96 wa tiphesente ta vanhu va le Amerika va pfumela eka Xikwembu, naswona vo tala va vona va xi khongela. Kambe, vulavisisi lebyi hambaneke byi kombise leswaku nhlayo ya lava vaka kona ekerekeni ni le sinagogeni sweswi yi ehlile swinene eka hafu leyi ya lembe-xidzana. Tiphesente ta kwalomu ka 58 ta vanhu va le Amerika va vula leswaku va ya ekerekeni kan’we hi n’hweti kumbe va tlurisa tin’hweti. Swi le rivaleni leswaku vukhongeri a byi va tshinetanga ekusuhi ni Xikwembu. Naswona xiphiqo lexi a xo va eUnited States ntsena.

Linda u kulele eBavaria. A a nghena Khatoliki naswona a khongela nkarhi na nkarhi. Hi nkarhi lowu fanaka, a chava vumundzuku. A nga tivi nchumu hi xikongomelo xa Xikwembu hi vanhu. Loko a ri ni malembe ya 14 hi vukhale, Linda u hlangane ni Timbhoni ta Yehovha, naswona wa vika: “Leswi va swi vuleke a swi tsakisa, kutani ndzi teke swipfuneto swimbirhi swo dyondza Bibele naswona ndzi swi hlaye hi nkarhi wolowo.” Endzhaku ka malembe mambirhi, Linda u sungule ku dyondza Bibele ni Timbhoni ta Yehovha. U ri: “Xin’wana ni xin’wana lexi ndzi xi dyondzeke hi Xikwembu eBibeleni a xi twala.” Linda u tshike kereke ya yena naswona u khuvuriwe tanihi Mbhoni ya Yehovha loko a ri ni malembe ya 18.

I yini lexi susumeteleke Linda ku cinca vukhongeri bya yena? Wa hlamusela: “Kereke ya mina yi ndzi pfune ku vona leswaku ku ni Xikwembu, naswona ndzi dyondze ku pfumela eka xona. Kambe a xi nga ri munhu naswona a xi ri ekule. Dyondzo ya mina ya Bibele a yi tiyisekisanga ripfumelo ra mina eka Xikwembu ntsena kambe yi tlhele yi ndzi pfuna leswaku ndzi xi tiva ni ku xi rhandza. Sweswi ndzi ni vuxaka bya risima bya munhu hi xiyexe na Xikwembu, ku nga nchumu lowu nga wa nkoka swinene ku tlula nchumu wihi na wihi.”

Vukhongeri Bya Ntiyiso I Bya Nkoka!

Xana vukhongeri bya wena bya ku nyika nkongomiso wa moya ni ku ku kombisa ndlela leyi Bibele yi nga ku pfunaka ha yona ku langutana ni swiphiqo swa vutomi? Xana bya wu dyondzisa ntshembo wa Bibele hi vumundzuku? Xana byi endla leswaku u va ni vuxaka bya le kusuhi ni Muvumbi, lebyi sekeriweke eka vutivi lebyi kongomeke bya Bibele? Loko byi nga endli tano, u nga tshiki. Ematshan’wini yo fularhela vukhongeri, lavisisa muxaka wa vugandzeri lebyi sekeriweke byi tiya eBibeleni. Kutani u ta fana ni lava ku profetiweke ha vona ebukwini ya Bibele ya Esaya: “Hikokwalaho Hosi Yehova a v̌ulav̌ula ŝeŝo, a ku: Maŝiv̌o, malanḍa ya mina ma ta dya . . . malanḍa ya mina ma ta nwa . . . malanḍa ya mina ma ta ṭaka . . . malanḍa ya mina ma ta yimbelela hi ku ṭaka ka timbilu ta wona.”—Esaya 65:13, 14.

[Nhlamuselo ya le hansi]

[Swifaniso leswi nga eka tluka 4, 5]

Bibele yi hi pfuna ku tiva ni ku rhandza Xikwembu