Hlaya Ni Vana Va Wena

Hi ku ya hi magazini wa le Brazil lowu vuriwaka Veja, vana va vatswari lava hisekelaka ku hlaya va tala ku rhandza ku hlaya tibuku ku tlula vana va vatswari lava nga riki xikombiso lexinene xa ku hlaya ekaya. Martha Hoppe, la nga ni ntokoto wa ku kula ka vana, u ri: “Ku hlaya swin’we ku tiyisa vunakulobye exikarhi ka vatswari ni vana naswona ku pfuna n’wana leswaku a tolovelana ku antswa ni leswi hlayiwaka etibukwini teto.”

Ku hlayela vana va wena swi twakala swi tlhela swi ku nyika nkarhi wa ku hlamula swivutiso. Mi nga vulavula hi swifaniso swin’wana ni swin’wana leswi fambisanaka ni mhaka leyi mi yi hlayaka. Hoppe u ri: “Loko n’wana a ya a twisisa leswi nga etibukwini, u ta ya a susumeleteka ku lava lomu ti nga kona loko a lava ku tiva swin’wana.”

Vatswari vo tala va Timbhoni ta Yehovha va swi tsakela ku hlaya ni vana va vona. Va nga ha hlaya tibuku to fana na Buku Yanga Ya Timhaka Ta Bibele, Listening to the Great Teacher na Nghwazi Leyi Tshameke Yi Hanya.a Tibuku to fana ni leti a ti pfuni vana leswaku va va vahlayi lavanene ntsena, kambe ti tlhela ti endla leswaku va yi tsakela ngopfu buku leyi xavisiwaka ku ti tlula hinkwato emisaveni—ku nga Bibele yo Kwetsima. Hikokwalaho, loko u ri mutswari, vekela vana va wena xikombiso lexinene hi ku va muhlayi la hisekaka wa Rito ra Xikwembu. (Yoxuwa 1:7, 8) Naswona hi tindlela hinkwato, tinyike nkarhi wa ku va hlayela!

[Nhlamuselo ya le hansi]