Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w99 5/1 matl. 26-27
  • Tiko Ra Vhenda Leri Tswalaka Mihandzu

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Tiko Ra Vhenda Leri Tswalaka Mihandzu
  • Xihondzo xo Rindza Xi Huwelela Mfumo Wa Yehovha—1999
  • Swihloko
  • Ririmi Ro Tika
  • Mihandzu Ya Moya
Xihondzo xo Rindza Xi Huwelela Mfumo Wa Yehovha—1999
w99 5/1 matl. 26-27

Tiko Ra Vhenda Leri Tswalaka Mihandzu

MALEMBE ya khume lama hundzeke, mina kun’we ni nsati wa mina hi tirhe tanihi vavuri va evhangeli va nkarhi hinkwawo exikarhi ka Vavhenda. Vavhenda va tshama edzongeni wa Nambu wa Limpopo en’walungu wa Afrika Dzonga, naswona tiko ra vona ri hlanganisa tinxaka to tala leti tsemakanyeke nambu wa Limpopo malembe-xidzana lama hundzeke. Vavhenda van’wana va vula leswaku vatata wa vona va ake laha ku tlula malembe ya 1 000 lama hundzeke.

Kunene, xifundzha lexi xi tshame xi va xiphemu xa tiko ra khale leri vitaniwaka Mfumo wa Mapungubwe. A ku ri xidorobana xo sungula lexikulu eAfrika Dzonga, naswona a xi fuma ndhawu ya Nambu wa Limpopo hinkwayo, ku sukela eBotswana hi tlhelo ra vupela-dyambu ku ya eMozambhiki hi tlhelo ra vuxa. Ku sukela kwalomu ka 900 C.E. ku ya eka 1100 C.E., Mapungubwe a wu nyika van’wamabindzu va Maarabu timhondzo ta tindlopfu, timhondzo ta timhelembe, madzovo ya swiharhi, koporo, hambi ku ri nsuku. Swilo leswi vatliweke swa ribye leswi a swi sasekisiwe hi nsuku swi yimburiwile exilahlweni xa vuhosi exintshabyanini lexi vitaniwaka Mapungubwe. Leswi hi swin’wana swa “swikombiso swo sungula swa ku ceriwa ka nsuku edzongeni wa Afrika,” ku ringanyeta yin’wana ya tinsonga-vutivi.

Nsuku a wa ha ceriwi laha. Namuntlha, tiko ra Vhenda ri tiveka hi mihandzu ya rona. Edzongeni wa Tintshava ta Soutpansberg ku ni nambu lowu nyukaka, laha mihandzu yo fana ni maavhakhado, mabanana, mimango ni magwava swi nga tala kona. Handle ka timanga leti vitaniwaka ti-pecan na ti-macadamia, ku na ni miroho yo tala. Leyi katsaka muroho wa nhova, lowu nantswo wa wona wu fanaka ni xipinichi naswona wu tsakeriwaka swinene hi vanhu va kwalaho.

Vavhenda i rixaka leri rhuleke ni leri nga ni malwandla. Swi tolovelekile leswaku nhloko ya ndyangu yi kombela leswaku muendzi loyi a a nga rindzeriwanga a swekeriwa huku. Yi dyiwa ni vuswa, swakudya leswi va swi dyaka nkarhi hinkwawo, leswi endliweke hi mavele. Loko muendzi a famba, nhloko ya dyangu yi ta heleketa muendzi wa yona mpfhukanyana. Leyi i ndlela ya ndhavuko yo kombisa xichavo eka muendzi. Vana va dyondzisiwe ku pfuxela vaendzi hi ndlela leyi sasekeke hi ku korhamisa nhloko va veka voko ehenhla ka rin’wana. Eka tluka leri u vona vavasati vambirhi va Vavhenda va pfuxelana hi ndlela leyi ya ndhavuko.

Ririmi Ro Tika

Valungu a swi va oloveli ku tiva Xivhenda hi vuenti. Xiphiqo lexikulu hi leswaku marito yo tala ya peletiwa ku fana kambe ma vitaniwa hi tindlela to hambana. Loko ndzi ri karhi ndzi nyikela nkulumo ya Bibele evandlheni ra Timbhoni ta Yehovha siku rin’wana, a ndzi ringeta ku khutaza vayingiseri ku vulavula ni munhu un’wana ni un’wana. Un’wana eka vayingiseri u tsandzeke ku tikhoma hi ku hleka hikuva ndzi te eka “rintiho rin’wana ni rin’wana” ematshanweni yo “munhu un’wana ni un’wana.”

Loko ndzi sungula ku ringeta ku vulavula Xivhenda entirhweni wa le rivaleni wo chumayela, wansati wa Muvhenda u angule a ku: “A ndzi vulavuli Xinghezi.” Ndzi ehlekete leswaku ndzi vulavule Xivhenda lexinene, kambe a ehleketa leswaku a ku ri Xinghezi! Eka xiendlakalo xin’wana loko ndzi ri karhi ndzi tshinelela yindlu, ndzi kombele xifanyetana leswaku xi vitana nhloko ya ndyangu. Vito ra Xivhenda ra nhloko ya ndyangu i thoʹho. Hi xihoxo, ndzi te thohoʹ, leswi vulaka ku kombela ku vulavula ni mfenhe ya muti lowu! Swihoxo swo fana ni leswi a swi ndzi heta matimba, kambe hi ku tiyisela havumbirhi bya hina mina na nsati wa mina sweswi ha swi kota ku xi vulavula kahle Xivhenda.

Mihandzu Ya Moya

Tiko ra Vavhenda ri ti komba ri ri leri tswalaka mihandzu hi tlhelo ra moya. Hi va-1950, vandlha ra Timbhoni ta Yehovha ri simekiwile exikarhi ka varhurhi lava humaka eka matiko-akelani va ta tirha emugodini wa koporo edorobeni ra Messina. Ku hisekela ntirho ka vona ku tise Vavhenda vo tala entiyisweni wa Bibele. Endzhaku ka khume ra malembe ntlawa wa Timbhoni wa Vavhenda a wu khoma minhlangano ekaya ra munhu edorobeni ra Sibasa.

Leswaku ku hatlisisiwa ku andza, rhavi ra Afrika Dzonga ra Sosayiti ya Watch Tower ri rhumele vavuri va evhangeli eka nsimu leyi leyi tswalaka mihandzu. Hi xihatla ntlawa wa ka Sibasa wu kule wu va vandlha lerikulu. Minhlangano ya Vukreste hi nkarhi wolowo a yi khomeriwa etlilasini. Hambiswiritano, ku akiwe Holo ya Mfumo eThohoyandou, doroba leri nga le kusuhani, hi ku pfuniwa hi Timbhoni ta Yehovha ta le ndhawini ya Pietersburg ku nga mpfhuka wa tikhilomitara ta 160 ku ya edzongeni.

Vaaki lava vulavulaka Xivhenda en’walungu wa Afrika Dzonga va tlula 500 000. A ku nga ri na Timbhoni ta Vavhenda loko ntirho wo chumayela hi Mfumo wu sungula hi va-1950. Sweswi ti tlula 150. Kambe ka ha ri ni tindhawu to tala leti nga khumbiwangiki naswona ku ni ntirho wo tala lowu faneleke wu endliwa. Hi 1989 hi sungule ku endzela ximutana xa Vhenda lexi vuriwaka Hamutsha. A ko va ni Mbhoni yin’we leyi tshamaka kwalaho hi nkarhi wolowo. Sweswi ku ni vahuweleri va Mfumo vo tlula 40 lava tshamaka eximutanini xolexo. Hi karhi hi hetisa Holo ya hina ya Mfumo, ha nkhensa nakambe hi mpfuno wa Timbhoni ta le mavandlheni ya le Pietersburg kun’we ni mali ya munyikelo ya vamakwerhu va le matikweni yo tala lama fuweke.

Hi tshama ekharavhanini epurasini. Hi ku hanya vutomi byo olova, hi ni nkarhi wo tala wo fikelela vanhu va kwalaho hi mahungu lamanene. (Marka 13:10) Hikwalaho ka sweswo, hi katekisiwe hilaha ku fuweke hi lunghelo ro pfuna vo tala leswaku va nyiketela vutomi bya vona eka Yehovha Xikwembu. Xin’wana xa swikombiso i wanuna loyi va nge i Michael, loyi a voneke buku leyi nge U Nga Hanya Hi Masiku aParadeyisini eMisaveni endlwini ya munghana wa yena.a U sungule ku yi hlaya, kutani hi ku hatlisa a vona ntiyiso. Kutani u tsalele Sosayiti ya Watch Tower a kombela tibuku ta Bibele leti engetelekeke. Eka papila ra yena Michael u hlamusele leswaku a ha ku khuvuriwa tanihi xirho xa kereke ya Apostolic ya kwalaho. U ye emahlweni a ku: “Ndzi tshubule leswaku ndzi le ndleleni leyi hoxeke yo ya eMfun’weni wa Xikwembu. Ndzi endle xiboho xa leswaku ndzi va un’wana wa swirho swa n’wina, kambe a ndzi swi tivi leswaku ndzi nga endla njhani.” Kutani hi loko a tsala adirese ya yena naswona a kombela leswaku un’wana wa Timbhoni ta Yehovha a rhumeriwa eka yena a ta n’wi pfuna. Ndzi swi kotile ku kuma Michael kutani ndzi sungula dyondzo ya le kaya ya Bibele na yena. Namutlha, i Mbhoni leyi khuvuriweke naswona u tirhela Yehovha hi ku tshembeka.

Hi December 1997, hi ve kona eka Ntsombano wa Muganga wa Timbhoni ta Yehovha wa “Ku Pfumela eRitweni Ra Xikwembu” lowu a wu khomeriwe erivaleni ra mintlangu ra Thohoyandou. A ku ri na vanhu va 634, naswona lavantshwa va 12 va khuvuriwile. Ndzi ve ni lunghelo ro nyikela tinkulumo timbirhi hi Xivhenda. Entiyisweni lexi ku ve xiendlakalo lexi nga rivalekiki eka malembe lawa ya khume ya tsako hi ma heteke etikweni leri leri tswalaka mihandzu!—Xi lo nyikeriwa.

[Nhlamuselo ya le hansi]

a Yi kandziyisiwe hi Watchtower Bible and Tract Society of New York, Inc.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela