Hi Muxaka Wa Vanhu Lava Nga Ni Ripfumelo

Ku Byela Van’wana Ntshembo Wa Vukreste eSenegal

KU SUKELA eminkarhini ya khale, tinhlampfi a ti tirhisiwa tanihi swakudya-nkulu. Vanhu va phase tinhlampfi emalwandle, emativeni ni le milambyeni ya misava ku ringana magidi ya malembe. Van’wana va vaapostola va Yesu Kreste a va ri vaphasi va tinhlampfi eLwandle ra Galeliya. Kambe, Yesu u va dyondzise ku phasa tinhlampfi ta muxaka wun’wana. Muxaka lowu wa ku phasa tinhlampfi a wu ri wa moya, lowu a wu ta vuyerisa vaphasi va tinhlampfi swin’we ni tinhlampfi hi toxe.

Malunghana ni mhaka leyi, Yesu u byele Petro, loyi a a ri muphasi wa tinhlampfi a ku: “Ku sukela sweswi u ta phasa vanhu va ri karhi va hanya.” (Luka 5:10) Muxaka lowu wa ku phasa tinhlampfi wa endliwa namuntlha ematikweni yo tlula 230, ku katsa na Senegal. (Matewu 24:14) Etikweni leri, “vaphasi va vanhu” va manguva lawa va byela van’wana hi ntshembo wa vona wa Vukreste, hi xivindzi.—Matewu 4:19.

Senegal ri kumeka eyinhleni ya vupela-dyambu bya Afrika. Ri nave ku suka etindhawini leti nga kwandzasi ra sava, ri vandzamane na Sahara en’walungwini kasi edzongeni ri vandzamane ni makhwati ya le ndhawini ya moya wo hisa ya xifundzha xa Casamance. Senegal i tiko leri eka rona ku hungaka moya wo hisa wa kwandzasi ni rimoyana leri timulaka ni leri phyuphyisaka ra lwandle ra Atlantic. Ku ni vanhu va timiliyoni to tlula kaye etikweni leri. Vaaki va le Senegal va tiveka hi malwandla ya vona. Vunyingi bya vona a hi Vakreste. Ku tele varisi va tinyimpfu kasi van’wana va fuwe tihomu, tikamela ni timbuti. Ni varimi va kona, lava rimaka timanga, vutiyi ni mpunga. Ina, ku tlhela ku va ni vaphasi va tinhlampfi, lava tinkoka ta vona ti vuyaka ti phase tinhlampfi to tala eLwandle ra Atlantic ni le milambyeni yo hlayanyana leyikulu ya tiko leri. Bindzu ra ku phasa tinhlampfi ri hoxa xandla swinene eka ikhonomi ya Senegal. Entiyisweni, swakudya leswi rhandziwaka swinene hi leswi vuriwaka ceebu jën, ku nga mpunga, nhlampfi ni matsavu, leswi phomisaka marha.

“Vaphasi Va Vanhu”

Ku ni vachumayeri va Mfumo wa Xikwembu lava hisekaka va 863 eSenegal. Ku phasa tinhlampfi hi tlhelo ra moya etikweni leri ku sungule eku sunguleni ka va-1950. Hofisi ya rhavi ra Sosayiti ya Watch Tower yi pfuriwe hi 1965 entsindza, ku nga Dakar. Varhumiwa, ku nga “vaphasi va tinhlampfi,” va sungule ku fika va huma ematikweni ya le kule. Hiloko ntirho wa ku “phasa tinhlampfi” wu va wu sungurile, kutani ku byela van’wana hi ntshembo wa Vukreste eSenegal ku ye emahlweni hakatsongo-katsongo. Eku heteleleni, ku akiwe rhavi lerintshwa eAlmadies, ehandle ka le Dakar, kutani ri nyiketeriwe eka Yehovha hi June 1999. Mawaku nkarhi wonghasi wa ntsako!

Ntlhontlho Wa Ku Amukela Ntiyiso

Nkarhi na nkarhi ku hlanganiwa ni vanhu va mindhavuko yo hambana-hambana, naswona van’wana va vona va ri amukele hi mandla mambirhi rungula ra ntshembo leri kumekaka eRitweni ra Xikwembu. Hambileswi vo tala va nga riki na vutivi bya Bibele, va tsaka ku tiva leswaku switshembiso leswi Yehovha Xikwembu a swi tshembiseke vaprofeta vakwe vo tshembeka va khale, swi ta hetiseka ku nga ri khale.

Hakanyingi swi lava xivindzi ku seketela minsinya ya milawu ya Vukreste, ngopfu-ngopfu loko ku katseka mindhavuko ni mikhuva ya ndyangu. Hi xikombiso, swi tolovelekile ku teka tshengwe eSenegal. Anakanya hi mhaka ya wanuna loyi a a ri ni vasati vambirhi loko a sungula ku dyondza Bibele. Xana a a ta va na xona xivindzi xa ku amukela ntiyiso wa Vukreste ni ku pfumelelana ni xilaveko xa Matsalwa xa leswaku wanuna a va ni nsati un’we ntsena? (1 Timotiya 3:2) Naswona, xana a a ta tshika nsati wa vumbirhi, a namarhela nsati wakwe wo sungula? U endle tano, kutani sweswi i nkulu la hisekaka eka rin’wana ra mavandlha lamakulu ya le Dakar. Nsati wakwe wo sungula na yena u amukele ntiyiso swin’we ni vana vakwe hinkwavo va 12, laha va 10 va nga va nsati wo sungula kasi vambirhi i va nsati wa vumbirhi.

Xihinga xin’wana loko swi ta eku amukeleni ka ntshembo wa Vukreste i ku va munhu a nga dyondzanga. Xana leswi swi vula leswaku munhu la nga dyondzangiki a nge wu amukeli ntiyiso ni ku hanya hi wona? Doo! Anakanya hi xikombiso xa Marie, manana la tirhaka hi matimba, la nga ni vana va nhungu. Hi ku hatlisa u vone nkoka wa ku bula hi ndzimana ya Bibele ni vana vakwe siku rin’wana ni rin’wana va nga si ya exikolweni, na yena a nga si ya entirhweni. Kambe, xana a a ta swi endlisa ku yini leswi, hikuva a a nga swi koti ku hlaya? Mixo wun’wana ni wun’wana, a a teka xibukwana xa Ku Kambisisa Matsalwa Siku Na Siku kutani a yima exitarateni emahlweni ka yindlu yakwe. Loko vanhu va ri karhi va hundza, a a va vutisa loko va kota ku hlaya. Loko a kuma munhu la kotaka ku hlaya, a a n’wi nyika xibukwana lexi kutani hi ku titsongahata a ku: “A ndzi swi koti ku hlaya, xana u nga ndzi hlayela xiyenge lexi namuntlha?” A a rhiya ndleve loko ku hlayiwa. Loko a hlayeriwile, a a nkhensa munhu la n’wi hlayeleke ivi hi ku hatlisa a nghena endlwini leswaku a ta burisana ni vana vakwe hi rungula ra kona, va nga si ya exikolweni!

Ku Angula Vanhu Va Tinxaka Hinkwato

Esenegal, u kuma vanhu va tshame eswitarateni va xavisa tinhlampfi, matsavu, kumbe mihandzu emakete, kumbe va tshame ehansi ka murhi lowukulu wa ximuwu, va tinwela ataya, tiya yo bava ya rihlaza. Hikwalaho ka leswi a va tiyimisele ku vulavula hi mahungu lamanene ni munhu un’wana ni un’wana loyi va hlanganaka na yena, vamakwerhu vambirhi va vulavule ni wanuna la lamaleke, loyi a a kombela mali etlhelo ka xitarata. Endzhaku ko n’wi pfuxela, va te: “Vanhu vo tala va ku nyika mali kambe a va yimi va bula na wena. Hi tele ku ta bula na wena hi nchumu wun’wana wa nkoka swinene, lowu khumbaka vumundzuku bya wena.” Wanuna loyi wa mukomberi u hlamarile. Vamakwerhu va ye emahlweni va ku: “Hi lava ku ku vutisa xivutiso. U ehleketa leswaku ha yini ku ri ni maxangu yo tala swonghasi emisaveni?” Wanuna loyi wa mukomberi u te: “I ku rhandza ka Xikwembu.”

Hiloko vamakwerhu va hlamulana na yena hi Matsalwa kutani va hlamusela Nhlavutelo 21:4. Rungula leri ra ntshembo, ni ku tiva leswaku ku ni munhu la khathalaka ha yena lerova a kala a yima a bula na yena hi Bibele, swi fikelele mbilu ya wanuna loyi wa mukomberi. Hiloko a havaxela mihloti. Ematshan’weni yo kombela mali, u kombele vamakwerhu lava leswaku va teka mali hinkwayo leyi a a ri na yona ethinini rakwe ro kombela mali! U va sindzise lerova vanhu hinkwavo lava hundzaka hi ndlela va yima va hlalela xiendlakalo xexo. A swi nga olovi ku va vamakwerhu va n’wi khorwisa leswaku a va nge yi teki mali yakwe. Eku heteleleni u pfumerile ku tshama ni mali yakwe, kambe u va sindzise leswaku va tlhela va n’wi endzela.

Yunivhesiti leyikulu ya le Dakar na yona yi hoxa xandla eku phasiweni ka tinhlampfi ta moya. Eka yona, Jean-Louis, xichudeni lexi dyondzelaka swa vutshunguri, u sungule ku dyondza Bibele. Hi ku hatlisa u amukele ntiyiso, hiloko a nyiketela vutomi byakwe eka Yehovha kutani a khuvuriwa. Ku navela ka yena a ku ri ku tirhela Xikwembu tanihi phayona ra nkarhi hinkwawo, kambe hi nkarhi lowu fanaka a a tsakela dyondzo yakwe ya swa vutshunguri. Hikwalaho ka xiboho lexi a xi endleke ni tiko ra rikwavo, a a boheka ku heta tidyondzo takwe. Kambe, u ve phayona ra nkarhinyana hi nkarhi lowu fanaka. Hi ku hatlisa endzhaku ka ku kuma diploma yakwe ya ku fanelekela ku va dokodela, u rhambiwile leswaku a ta va dokodela wa ndyangu lowukulu wa Bethele eAfrika. Jaha rin’wana leri kumiweke eYunivhesiti ya le Dakar na rona ri tirha endyangwini wa Bethele etikweni ra rikwavo.

Kunene ku phasiwa ka tinhlampfi hi tlhelo ra moya ka vuyerisa eSenegal. Tibuku ta Bibele ta Timbhoni ta Yehovha ta tsakeriwa swinene naswona sweswi se ti kumeka hi ririmi ra kwalaho ra Xiwolof. Vanhu vo tala va timbilu letinene va susumetiwe ku amukela mahungu lamanene hi mandla mambirhi loko va ma twa hi ririmi ra rikwavo. A swi kanakanisi leswaku hi nkateko wa Yehovha, tinhlampfi tin’wana to tala to fanekisela ta ha ta phasiwa, loko “vaphasi va vanhu” va le Senegal va ya emahlweni va va ni ripfumelo ni xivindzi xa ku byela van’wana hi ntshembo wa Vukreste.

[Mepe/Xifaniso lexi nga eka tluka 31]

(Leswaku u vona rungula leri hleriweke hi ku helela, vona nkandziyiso wa kona)

SENEGAL

[Xifaniso]

Ku byela van’wana hi ntshembo wa Vukreste eSenegal

[Xihlovo Xa Kona]

Mountain High Maps® Copyright © 1997 Digital Wisdom, Inc.