NKANDZIYISO WA VANDLHA

Hi nga hlakulela moya wo nkhensa naswona hi tshama hi ri na wona hi ku anakanyisisa hi mikateko leyi hi nga na yona kutani hi nkhensa Yehovha hikwalaho ka yona. Ku va ni mbilu leyi tlangelaka swi ta hi pfuna leswaku hi lwisana ni moya wa ku nga nkhensi naswona hi kota ku langutana ni miringo. Ndzimana ya hina ya lembe ya 2015 yi ta hi tsundzuxa hi mhaka yoleyo lembe hinkwaro.

Xihloko lexi xi swi veka erivaleni leswaku ha yini hi fanele hi tsundzuka rifu ra Yesu. Xi hlamusela leswi xinkwa ni vhinyo swa le Xitsundzuxweni swi yimelaka swona xi tlhela xi kombisa ndlela leyi munhu a swi tivaka ha yona loko a fanele a dya swifanekiselo swoleswo. Xihloko lexi xi ta tlhela xi hi pfuna ku vona ndlela leyi hi nga tilunghiselelaka ha yona ku va kona eXilalelweni xa Hosi.

Vatekani va langutana ni mintshikilelo ni miringo leswi swi yaka swi andza. Kambe, hi ku pfuniwa hi Yehovha swa koteka ku va ni vukati lebyi tiyeke byi tlhela byi tsakisa. Xihloko xo sungula xi ta hlamusela tindlela ta ntlhanu to endla leswaku vukati byi va lebyi tiyeke. Xihloko xa vumbirhi xi ta hlamusela ndlela yo sirhelela vukati leswaku byi tshama byi tiyile.

I yini lexi kombisaka leswaku wanuna ni wansati va rhandzana hi ndlela ya xiviri? Xana swa koteka ku va ni rirhandzu leri tiyeke? Ri kombisiwa njhani rirhandzu rolero? Twana leswi buku ya Risimu Ra Solomoni yi hi dyondzisaka swona malunghana ni rirhandzu leri tiyeke.