Xana Vunakulobye Bya Vukreste I Bya Nkoka Ku Fikela Kwihi?

¹ “Munhu i munhu hi van’wana.” Marito wolawo ya mutlhokovetseri wa lembe-xidzana ra vu-17 ma kandziyisa leswi Bibele yi swi vulaka mayelana ni xilaveko-nkulu xa vanhu—ku nga vunakulobye. (Swiv. 18:1) Vunakulobye bya hina bya Vukreste byi enerisa xilaveko lexi. Byi xi enerisa hi tindlela tihi leti vuyerisaka?

² Evutirhelini: Vuyelo byin’wana lebyikulu i ndlela leyi vamakwerhu va hi tiyisaka ni ku hi seketela ha yona entirhweni wa ku chumayela. Yesu u rhumele vadyondzisiwa vakwe “hi vambirhi-mbirhi” leswaku va ya chumayela. (Mar. 6:7; Luka 10:1) Hi ku pfumelelana ni endlelo leri, loko hi ri karhi hi tirha ni van’wana entirhweni wa nsimu, hi tokota ntiyiso wa marito ya Eklesiasta 4:9, 10. Loko hi ri karhi hi hetisisa vutirheli bya hina swin’we, ripfumelo, ku yingisa, ni rirhandzu ra lava hi tirhaka na vona swa hi khutaza ni ku pfuxeta ku hiseka ka hina.

³ Mpfuno Wa Munhu Hi Yexe: Vun’we bya hina tanihi vamakwerhu nakambe i xihlovo xa xikhutazo ni nkongomiso leswaku hi kota ku langutana ni mintshikilelo swin’we ni ku lwisana ni miringo. Vanghana va hina lava nga Vakreste va nga ha hi tsundzuxa matsalwa lama nga ta hi pfuna ku langutana ni leswi swi hi karhataka. Va nga ha tlhela va hi khongelela, tanihi leswi na hina hi va khongelelaka. (2 Kor. 1:11) Kunene xikombiso xa vona lexinene xa hi khutaza emintirhweni leyinene ni ku hi tiyisa.

⁴ Eminhlanganweni: Mikateko ya vunakulobye bya Vukreste hi yi kuma loko hi va kona minkarhi hinkwayo eminhlanganweni ya vandlha. (Hev. 10:24, 25) Nongonoko wa kona wu fuwile hi ndzetelo wa moya, naswona vukona bya hina eminhlanganweni byi hi tshineta ekusuhi ni vapfumeri-kulorhi. Minhlangano leyi yi hi nyika lunghelo ro yingisela vamakwerhu loko va phofula ripfumelo ra vona, va ri eplatifomo kumbe va ri exikarhi ka vayingiseri. (Rhom. 1:12) Xiboho xa hina xa vunakulobye xa kula loko hi bula minhlangano yi nga si sungula ni loko se yi herile. Minkarhi yo tano yi hi nyika lunghelo ro rungulelana mintokoto ya hina leyi akaka ripfumelo. Vumunhu bya hina bya antswisiwa loko hi bula ni vanhu lava rhandzaka Yehovha, Rito rakwe, mintirho yakwe ni vanhu va yena.—Filp. 2:1, 2.

⁵ Ha va lava vanghana va hina lava nga Vakreste. Handle ka vona, swi ta tika ku famba endleleni leyo khuma leyi yisaka evuton’wini. Kambe, hikwalaho ka rirhandzu ni xikhutazo xa vona, hi nga hambeta hi famba endleleni leyi yisaka emisaveni leyintshwa yo lulama ya Yehovha.—Mat. 7:14.