Xiyimiso Xa Nhlangano Wa Ntirho

Vhiki Leri Sungulaka Hi September 9

Risimu 209

13 min: Switiviso swa vandlha. Switiviso leswi hlawuriweke eka Vutirheli Bya Hina Bya Mfumo. Hi ku tirhisa swiringanyeto leswi nga eka tluka 8, endla minkombiso yimbirhi yo fambisa Xihondzo xo Rindza xa September 15 na Xalamuka! ya October 8. Enkombisweni ha wun’we, kombisa ndlela leyi hambaneke yo angula lava lavaka ku siva bulo hi marito lama nge “A ndzi ti tsakeli Timbhoni ta Yehovha.”—Vona buku leyi nge Ku Hlamulana, matluka 17-18.

17 min: “Ku Pfuna Van’wana Leswaku Va Dzunisa Yehovha.”a Loko nkarhi wu pfumela, boxa yinhla yin’we kumbe timbirhi leti pfunaka leti kumekaka ebukwini leyi nge Ku Hlamulana, matluka 425-7.

15 min: Ha Yini Ripfumelo Ri Nga Ri Kona? Ku burisana ni vayingiseri. Hakanyingi hi hlangana ni vanhu lava nga ni ripfumelo leritsongo. (2 Tes. 3:2) Leswaku hi va byela ntiyiso malunghana na Yehovha, hi fanele hi rhanga hi ku kambisisa leswi endleke leswaku va va ni miehleketo leyi va nga na yona malunghana ni Xikwembu. Xiya swilo swa mune leswi hlamuseriweke ebukwini leyi nge Ku Hlamulana, matluka 233-4, leswi nga sivelaka vanhu ku va ni ripfumelo. Kombela vayingiseri va ringanyeta leswaku hi xihi xingheniso lexi nga tirhisiwaka eka yinhla ha yin’we. Hlamusela ntokoto wa xingheniso lexi tirheke, kumbe u tirhisa ntokoto lowu nga eka Xalamuka! (ya Xinghezi) ya August 22, 1993, matluka14-15.

Risimu 122 ni xikhongelo xo pfala.

Vhiki Leri Sungulaka Hi September 16

Risimu 163

10 min: Switiviso swa vandlha. Xiviko xa timali. Khutaza hinkwavo leswaku va pfuxeta tinhla leti va ti kumeke enongonokweni wa nhlengeletano ya xifundzha leyi hundzeke leswaku va lunghekela Nhlangano wa Ntirho wa vhiki leri taka.

18 min: Hi Tirhe Njhani N’wexemu? Nkulumo leyi nga ta nyikeriwa hi mulanguteri wa ntirho. Nyikela tinhla-nkulu ta xiviko xa vandlha xa lembe ra ntirho ra 2002. Bumabumela hinkwavo hikwalaho ka swilo leswinene leswi va swi endleke. Yisa nyingiso eka ndlela leyi vandlha ri teke ha yona eminhlanganweni, ndlela leyi ri tirheke ha yona eka maendzo yo vuyela ni le ka ntirho wa ku fambisa tidyondzo ta Bibele, ni le ka vuphayona bya nkarhinyana, u nyikela swiringanyeto leswi nga pfunaka ku antswisa. Veka tipakani leti nga fikeleriwaka eka lembe ra ntirho lerintshwa. Khutaza hinkwavo leswaku va hlanganyela entirhweni wa nsimu ni ku vika n’hweti na n’hweti eka lembe leri lerintshwa ra ntirho.

17 min: Mintlhontlho Leyi Vatswari Lava Nga Voxe Va Langutaneke Na Yona. Nkulu u burisana ni mutswari la nga yexe un’we kumbe vambirhi (kumbe lava vanghana va vona va vukati va nga riki Timbhoni) ku vona ndlela leyi va hlangavetanaka ha yona ni mintlhontlho ya ku letela, ku laya, ni ku kongomisa vana va vona etimhakeni ta moya. Xana va swi kotisa ku yini ku khathalela timhaka ta mindyangu ya vona ni ku va kona eminhlanganweni ni ku ya ensin’wini minkarhi hinkwayo? Hlamusela swiringanyeto swin’wana leswi nga ebukwini leyi nge Ntsako eNdyangwini, matluka 104-10. Hilaha swi kombisiweke hakona eka matluka 113-15, boxa tindlela leti van’wana va nga pfunaka ha tona.

Risimu 149 ni xikhongelo xo pfala.

Vhiki Leri Sungulaka Hi September 23

Risimu 107

10 min: Switiviso swa vandlha. Marungula Ya Swa Mfumo. Hi ku tirhisa swiringanyeto leswi nga eka tluka 8, kombela nkulu leswaku a endla nkombiso wa ku fambisa Xihondzo xo Rindza xa October 1 endzhaku u kombela nandza wa vutirheli a kombisa ndlela ya ku fambisa Xalamuka! ya October 8. Endzhaku ka nkombiso ha wun’we, tlhela u hlamusela xivulwa xo sungula kumbe swimbirhi leswi tirhisiweke ku pfuxa ku tsakela ka n’wini wa muti.

10 min: Swilaveko swa vandlha.

25 min: “Chavani Xikwembu Mi Xi Vangamisa.” (Nhlav. 14:7) Nkulumo leyi katsaka ni ku vulavurisana ni vayingiseri ya ku pfuxeta nongonoko wa nhlengeletano ya xifundzha leyi khomiweke eka lembe ra ntirho leri hundzeke. Kombela vayingiseri leswaku va hlamusela tinhla-nkulu leti va ti dyondzeke ni ndlela leyi va ti tirhiseke ha yona ha un’we kumbe tanihi ndyangu. (Va nga averiwa tinhla to vulavula ha tona ka ha ri emahlweni.) Vulavulani hi tinkulumo leti landzelaka: (1) “Pfuna Lava Ha Riki Vantshwa Ku Hlakulela Ku Chava Xikwembu.” Xana hi nga va pfuna njhani vanhu lava tsakelaka lava veke kona eXitsundzuxweni leswaku va endla nhluvuko ni leswaku va va malandza ya Yehovha lama hisekaka? (2) “Ku Chava Yehovha Swi Vula Ku Venga Leswo Biha.” (w87-TS 4/15 16-18) Xana buku ya Swivuriso 6:16-19 yi nga hi pfuna njhani leswaku hi papalata swilo leswi Yehovha a swi vengaka—ku tikukumuxa, ku hemba, ku hlongorisa swilo leswi vonakaka, vuhungasi lebyi thyakeke ni ku tirhisa Internet hi ndlela yo biha? (3) “Vana Ni Vuxaka Lebyikulu Ni Varhandziwa Va Wena.” Hi rhandza Yehovha, Yesu, swirho swa ndyangu, ni van’wana evandlheni; xana ku va ni vuxaka na vona swi hi sirhelela njhani eka misava leyi? (4) “Chava Yehovha, Ku Nga Ri Vanhu.” Xana ku chava ku hlundzukisa Yehovha swi ku pfune njhani leswaku u va ni xivindzi loko u ri eku chumayeleni, leswaku u namarhela misinya ya milawu ya Xikwembu entirhweni wa ku tihanyisa kumbe exikolweni, kumbe ku hlula ntshikilelo lowu vangiwaka hi muthori wa wena wa leswaku u xwa eminhlanganweni, etinhlengeletanweni ni le mintsombanweni? (5) “Endla Swilo Hinkwaswo Hi Xikongomelo Xo Dzunisa Xikwembu.” (Ps. 119:37; Hev. 4:13) Ha yini ku chava Xikwembu swi fanele swi hi sivela ku nwa ku tlula mpimo, ku languta swilo leswi navetisaka rimbewu kumbe ku endla swidyoho swin’wana exihundleni? (6) “Hambeta U Famba Hi Ku Chava Yehovha.” Xana Yehovha u ku katekise njhani hi ku va u pfumelele moya wa yena wu tirha hi ku helela evuton’wini bya wena?—Ps. 31:19; 33:18; 34:9, 17; 145:19.

Risimu 171 ni xikhongelo xo pfala.

Vhiki Leri Sungulaka Hi September 30

Risimu 116

15 min: Switiviso swa vandlha. Swi fanele ku nyikeriwa hi mulanguteri wa ntirho. Tsundzuxa vahuweleri leswaku va siya swiviko swa ntirho wa nsimu wa September. Hlamusela xihloko lexi nge “Tsima Ra Ku Aka Tiholo Ta Mfumo Ri Ya eMahlweni.” Hlamusela malunghiselelo yo hetelela ya nsimu leyi nga aviwangiki. Tanihi leswi October ku nga n’hweti yo hetelela ya tsima ra nsimu leyi nga aviwangiki, khutaza hinkwavo leswaku va hlanganyela hi xitalo.

15 min: I Yini Lexi Endlaka Leswaku Timagazini Ta Hina Ti Va Leti Hlawulekeke? Nkulumo leyi katsaka ni ku vulavurisana ni vayingiseri. Hi October hi ta va hi fambisa Xihondzo xo Rindza ni Xalamuka! Hlamusela swivangelo swa ku va timagazini ti va leti hlawulekeke: (1) Ti tlakusa vito ra Yehovha. (2) Ti khutaza ku va ni ripfumelo eka Yesu. (3) Ti twarisa Mfumo wa Xikwembu. (4) Ti kombisa leswaku Bibele hi yona ntsena buku leyi nga tshembiwaka etimhakeni hinkwato. (5) Ti hlamusela ku hetiseka ka vuprofeta bya Bibele. (6) Ti hlamusela leswi swiendlakalo swa misava swi vulaka swona hakunene. (7) Ti kombisa ndlela leyi hi nga langutanaka ha yona ni swiphiqo swa namuntlha. (8) Ti khumba vanhu va swiyimo hinkwaswo swa vutomi. (9) A ti seketeli tipolitiki. Endla minkombiso yimbirhi yo koma, laha eka nkombiso ha wun’we ku kombisiwaka ndlela leyi yin’wana ya tinhla leti nga laha henhla yi nga tirhisiwaka ha yona ku sungula bulo.

15 min: “Kombisa Moya Wa Ku Tlangela Swilo Swa Ntirho Wa Xikwembu.”b Yi fanele yi nyikeriwa hi nkulu. Hlamusela ni leswi xiyiweke endhawini ya ka n’wina ni leswi vandlha ri nga swi endlaka leswaku ri tirhisa minkandziyiso ya hina hi vutlharhi. Khutaza hinkwavo leswaku va endla swikombelo swa minkandziyiso leyi va yi lavaka hakunene. Tsundzuka lunghelo ro nyikela hi mali leswaku hi seketela ntirho wa misava hinkwayo.—Vona nhloko-mhaka leyi nge “Avelana Ni Van’wana Hi Ku Ya Hi Swilaveko Swa Vona,” eka Vutirheli Bya Hina Bya Mfumo bya May 2001, tluka 3.

Risimu 21 ni xikhongelo xo pfala.

Vhiki Leri Sungulaka Hi October 7

Risimu 129

10 min: Switiviso swa vandlha.

15 min: Ku Yima U Tiyile eNtiyisweni Loko U Ri eXikolweni. Vulavurisana ni muhuweleri un’we kumbe vambirhi lava ha riki vantshwa lava nghenaka xikolo lava xiyaka xilaveko xa ku va ni vuxiyaxiya eku endleni ka xinghana ni vadyondzi-kulobye lava nga riki vapfumeri. Xana va kunguhate ku langutana njhani ni swiphiqo ni miringo leyi fambisanaka ni minkhuvo ya vutiko, mincino ya le xikolweni ni tinhlengeletano ta politiki, mintlangu leyi vaka kona loko xikolo xi humile kun’we ni mikhuva leyi nga basangiki? Katsa ni tinhlamuselo ta tindlela leti va ti kunguhateke to nyikela vumbhoni exikolweni. Hlamusela langutelo ra matsalwa hi ku losa mujeko ni ku yimbelela risimu ra rixaka hilaha swi hlamuseriweke hakona eka buku leyi nge Ku Hlamulana, tluka 335.

20 min: “Papalata Ku Hlongorisa ‘Swilo Leswi Nga Pfuniki Nchumu.’”c Endzhaku ko hlamusela ndzimana 4, katsa ni tinhlamuselo ta xiengetelo xa Vutirheli Bya Hina Bya Mfumo bya November 1999, tindzimana 30-2. Loko u hlamusela ndzimana 5, katsa ni tinhlamuselo leti nga eka bokisi leri kumekaka eka Xihondzo xo Rindza xa October 1, 1994, tluka 8. Loko mi fika eka ndzimana 6, hlaya na ndzimana 18 eka xiengetelo xa November 1999.

Risimu 105 ni xikhongelo xo pfala.

[Tinhlamuselo ta le hansi]