Swikombo Swa Mikandziyiso Leyi Nga Eka Xiyimiso Xa Mihlangano Xa Mahanyelo Ni Ntirho Wa Hina Wo Chumayela
JULY 1-7
LESWI HI SWI DYONDZAKA EBIBELENI | VAKOLOSA 1-4
“Hluvulani Vumunhu Bya Khale, Mi Ambala Lebyintshwa”
(Vakolosa 3:5-9) Hikokwalaho, dlayani swirho swa miri wa n’wina leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava. 6 Hikwalaho ka swilo sweswo vukarhi bya Xikwembu bya ta. 7 Na n’wina a mi famba eka swilo sweswo khale loko ma ha hanya eka swona. 8 Kambe hakunene sweswi cukumetani hinkwaswo ekule na n’wina, vukarhi, ku hlundzuka, vubihi, mavulavulelo ya nhlambha, ni mavulavulelo lama thyakeke ma suseni emilon’wini ya n’wina. 9 Mi nga hembelani. Hluvulani vumunhu bya khale ni mikhuva ya byona,”
Amukelani Moya Wa Xikwembu Ku Nga Ri Wa Misava
12 Mahanyelo ya mina ma kombisa leswaku ndzi lawuriwa hi moya wihi? (Hlaya Vakolosa 3:8-10, 13.) Moya wa misava wu kucetela mitirho ya nyama. (Gal. 5:19-21) Ndzingo lowukulu lowu kombisaka leswaku hi wihi moya lowu wu hi lawulaka wu fika loko swilo swi nga hi fambeli kahle, ku fana ni loko Mukreste-kulorhi a hi honisa, a hi khunguvanyisa kumbe a hi dyohela, ku nga ri loko swilo swi hi fambela kahle. Ku engetela kwalaho, leswaku hi lawuriwa hi moya lowo kwetsima kumbe hi moya wa misava swi nga ha vonaka loko hi ri emakaya ya hina. Kutani swi nga ha lava leswaku hi tikambela. Tivutise, ‘Eka tinh’weti ta tsevu leti hundzeke, xana andzi ti karhatela ku hanya ku fana na Kreste kumbe ndzi tlhelele eka mikhuva yo biha leyi a ndzi hanya hi yona?’
13 Moya wa Xikwembu wu nga hi pfuna leswaku hi “[hluvula] vumunhu bya khale ni mikhuva ya byona” kutani hi ambala “vumunhu lebyintshwa.” Sweswo swi ta hi pfuna leswaku hi ya hi va ni rirhandzu ni musa. Hi ta va lava rivalelaka van’wana hi ku ntshunxeka hambiloko swi tikomba ku ri ni xivangelo lexi twalaka xo va hi hlundzuka. Vuhomboloki lebyi hi byi vonaka a byi nge hi endli leswaku hi ‘hlundzuka hi va ni vukarhi ni huwa ni mavulavulelo ya nhlambha.’ Kambe hi ta tikarhatela ku va lava ‘tsetselelanaka swinene.’—Efe. 4:31, 32.
(Vakolosa 3:10-14) kutani mi tiambexa vumunhu lebyintshwa, lebyi hi vutivi lebyi kongomeke byi endliwaka byi va byintshwa hi ku ya hi xifaniso xa Loyi a byi tumbuluxeke, 11 laha ku nga riki na Mugriki kumbe Muyuda, la yimbeke kumbe la nga yimbangiki, munhu wumbe, Muskita, hlonga, munhu loyi a ntshunxekeke, kambe Kreste i swilo hinkwaswo eka hinkwavo. 12 Hikwalaho, leswi mi nga vahlawuriwa va Xikwembu, vo kwetsima ni lava rhandziwaka, tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha. 13 Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo. 14 Kambe, handle ka swilo leswi hinkwaswo, ambalani rirhandzu, hikuva i xiboho lexi hetisekeke xa vun’we.
Xana U Hundzukile?
18 Loko hi lava leswaku Rito ra Xikwembu ri hi hundzula, ku ri hlaya nkarhi na nkarhi ni ku dyondza eka rona ko va masungulo. Vanhu vo tala va hlaya Bibele nkarhi na nkarhi kutani va tolovelane ni leswi yi swi vulaka. Kumbexana u tshame u hlangana ni vanhu vo tano loko u ri ensin’wini. Van’wana va ti tiva hi nhloko tindzimana ta Bibele. Kambe leswi hakanyingi a swi cinci ndlela leyi va anakanyaka ha yona ni mahanyelo ya vona. Ha yini? Leswaku Rito ra Xikwembu ri kucetela ni ku hundzula munhu, u fanele a ri pfumelela ri khumba mbilu ya yena. Hikwalaho, hi fanele hi tinyika nkarhi wa ku anakanyisisa hi leswi hi swi dyondzaka. Hi fanele hi tivutisa leswaku: ‘Xana ndza khorwiseka leswaku leyi a ko va dyondzo ya vukhongeri ntsena? Xana ndza swi vona leswaku lowu i ntiyiso? Ku tlula kwalaho, xana ndzi vona tindlela leti ndzi nga swi tirhisaka ha yona evuton’wini bya mina leswi ndzi swi dyondzaka naswona ndzi nga swi teki tanihi nchumu lowu ndzi nga dyondzisaka van’wana ntsena? Xana ndza swi vona leswaku Yehovha u vulavula na mina hi ku kongoma?’ Ku anakanyisisa hi swivutiso leswi swi nga hi pfuna leswaku hi kurisa ndlela leyi hi n’wi tekaka ha yona Yehovha etimbilwini ta hina. Ndlela leyi hi n’wi rhandzaka ha yona yi ta kula. Loko mbilu yi khumbeka, hi ta susumeteleka ku hundzuka.—Swiv. 4:23; Luka 6:45.
19 Ku hlaya Rito ra Xikwembu nkarhi na nkarhi ni ku anakanyisisa hileswi hi swi hlayeke swi ta hi susumetela ku ya emahlweni hi endla leswi se hi swi endleke: ‘Ku hluvula vumunhu bya khale ni mikhuva ya byona kutani hi tiambexa vumunhu lebyintshwa, lebyi hi vutivi lebyi kongomeke byi endliwaka byi va byintshwa.’ (Kol. 3:9, 10) Ina, hi nga swi kota loko hi ri twisisa kahle Rito ra Xikwembu hi tlhela hi tirhisa leswi hi swi dyondzaka. Vumunhu lebyintshwa bya Vukreste byi ta hi sirhelela eka mintlhamu ya Sathana.
Endla Ndzavisiso
(Vakolosa 1:13, 14) U hi kutsule eka vulawuri bya munyama kutani a hi hundzisela emfun’weni wa N’wana wa yena loyi a n’wi rhandzaka, 14 loyi ha yena hi kumaka ku ntshunxiwa hi nkutsulo, ku rivaleriwa ka swidyoho swa hina.
it-2 169 ¶3-5
Mfumo wa Xikwembu
‘EMfunweni wa N’wana wa yena loyi a n’wi rhandzaka.’ Endzaku ka masiku ya khume Yesu a tlhandlukele etilweni, hi Pentekosta ya 33 C.E., Vadyondzisiwa vakwe va vone vumbhoni bya leswaku u “tlakuseriweke evokweni ra xinene ra Xikwembu” loko Yesu a va chululela moya lowo kwetsima. (Min 1:8, 9; 2:1-4, 29-33) “Ntwanano lowuntshwa” wu sungule ku tirha eka vona, naswona ku ve vona vo sungula ku va “tiko ro kwetsima”, Israyele wa moya.—Hv 12:22-24; 1Pe 2:9, 10; Ga 6:16.
Kreste sweswi u tshame evokweni ra xinene ra Tata wakwe naswona i Nhloko ya vandla. (Efe. 5:23; Hev. 1:3; Filp. 2:9-11) Matsalwa ma kombisa leswaku ku sukela hi Pentekosta ya 33 C.E., ku ya emahlweni, Mfumo wa moya wu simekiwile hi ku tirhisa vadyondzisiwa vakwe. Loko muapostola Pawulo tsalela Vakreste vosungula vale Kolosa, u tsale onge Yesu Kreste se a ku ri khale a ri ni Mfumo: “U hi kutsule eka vulawuri bya munyama kutani a hi hundzisela emfun’weni wa N’wana wa yena loyi a n’wi rhandzaka.”—Kol. 1:13; Mint. 17:6, 7.
Ku sukela hi Pentekosta ya 33 C.E. Mfumo wa Kreste wa moya a wu mfuma Israyele wa moya ni Vakreste lava totiweke hi moya wa Xikwembu leswaku va va vana va Xikwembu va moya. (Yoh. 3:3, 5, 6) Loko Vakreste volavo lava totiweke hi moya va kuma xiavela xa vona xa le tilweni, a va nge he vi swivumbiwa swa laha misaveni leswi nga ta fumiwa hi mfumo wa Kreste wa moya, kambe swi ta va tihosi na Kreste etilweni.—Nhlav. 5:9, 10.
(Vakolosa 2:8) Tivoneleni: swi nga ha endleka ku va ni un’wana loyi a nga ta mi phasa hi filosofi ni vuxisi bya hava hi ku ya hi ndhavuko wa vanhu, hi ku ya hi swilo swa masungulo swa misava, ku nga ri hi ku ya hi Kreste;
Tinhla-nkulu Ta Mapapila Lama Yaka Eka Vagalatiya, Vaefesa, Vafilipiya Ni Le Ka Vakolosa
2:8—I yini “swilo swa masungulo swa misava” leswi Pawulo a lemuxeke ha swona? I swilo swa misava ya Sathana—swilo swa xisekelo kumbe misinya ya milawu leyi swi vumbaka, ku swi kongomisa kumbe ku swi kucetela. (1 Yoh. 2:16) Swilo swin’wana leswi katsekaka eka swona i filosofi, ku hlongorisa rifuwo ni vukhongeri bya mavunwa bya misava leyi.
Ku Hlayiwa Ka Bibele
(Vakolosa 1:1-20) Mina Pawulo, muapostola wa Kreste Yesu hi ku rhandza ka Xikwembu, na Timotiya makwerhu, 2 eka vakwetsimi ni vamakwerhu vo tshembeka evun’weni na Kreste lava nga eKolosa: Onge mi nga va ni musa lowu nga faneriwiki ni ku rhula loku humaka eka Xikwembu Tata wa hina. 3 Hi nkhensa Xikwembu Tata wa Hosi ya hina Yesu Kreste minkarhi hinkwayo loko hi mi khongelela, 4 tanihi leswi hi tweke hi ta ripfumelo ra n’wina mayelana na Kreste Yesu ni rirhandzu leri mi rhandzaka vakwetsimi hinkwavo ha rona 5 hikwalaho ka ntshembo lowu mi vekeriweke wona ematilweni. Ntshembo lowu mi tweke ha wona emahlweni hi ku vuriwa ka ntiyiso wa mahungu wolawo lamanene 6 lama titiseke eka n’wina, tanihi leswi ma vekaka mihandzu naswona ma andzaka emisaveni hinkwayo hilaha ma endlaka hakona ni le xikarhi ka n’wina, ku sukela esikwini leri mi tweke ni ku wu tiva hi ku kongoma musa lowu nga faneriwiki wa Xikwembu hi ntiyiso. 7 Sweswo hi leswi mi swi dyondzeke eka Epafrasi hlonga-kulorhi leri rhandzekaka, leri nga mutirheli wo tshembeka wa Kreste ematshan’weni ya hina, 8 leri nakambe ri hi paluxeleke rirhandzu ra n’wina hi ndlela ya moya. 9 Hi yona mhaka leyi hina, ku sukela esikwini leri hi tweke ha rona, hi nga tshikangiki ku mi khongelela ni ku kombela leswaku mi tala vutivi lebyi kongomeke bya ku rhandza ka xona hi vutlhari hinkwabyo ni ku twisisa ka moya, 10 leswaku mi famba hi mukhuva lowu fanelaka eka Yehovha leswaku mi n’wi tsakisa hi ku helela mi ri karhi mi veka mihandzu entirhweni wun’wana ni wun’wana lowunene ni ku kula eku tiveni ka Xikwembu hi ku kongoma, 11 mi endliwa lava nga ni matimba hi matimba hinkwawo hi ku ya hi matimba yakwe lama vangamaka leswaku mi tiyisela hi ku helela ni ku va ni mbilu yo leha hi ntsako, 12 mi nkhensa Tatana loyi a mi endleke mi faneleka ku hlanganyela eka ndzhaka ya vakwetsimi eku vonakaleni. 13 U hi kutsule eka vulawuri bya munyama kutani a hi hundzisela emfun’weni wa N’wana wa yena loyi a n’wi rhandzaka, 14 loyi ha yena hi kumaka ku ntshunxiwa hi nkutsulo, ku rivaleriwa ka swidyoho swa hina. 15 I xifaniso xa Xikwembu lexi nga vonakiki, mativula ya ntumbuluko hinkwawo; 16 hikuva ha yena swilo hinkwaswo swi tumbuluxiwile ematilweni ni le henhla ka misava, swilo leswi vonakaka ni swilo leswi nga vonakiki, ku nga khathariseki leswaku i swiluvelo kumbe vuhosi kumbe tihulumendhe kumbe vulawuri. Swilo leswin’wana hinkwaswo swi tumbuluxiwe ha yena naswona swi tumbuluxeriwe yena. 17 Nakambe, u le mahlweni ka swilo swin’wana hinkwaswo naswona swilo swin’wana hinkwaswo swi endliwe swi va kona hikwalaho ka yena, 18 naswona i nhloko ya miri, vandlha. Yena i masungulo, mativula eka lava feke, leswaku a va lowo sungula eka swilo hinkwaswo; 19 hikuva Xikwembu xi vone swi ri swinene leswaku ku tala hinkwako ku tshama eka yena, 20 ni leswaku ha yena xi tlhela xi vuyelelanisa swilo swin’wana hinkwaswo hi ku endla ku rhula hi ngati leyi a yi halateke emhandzini ya nxaniso, ku nga khathariseki leswaku i swilo leswi nga ehenhla ka misava kumbe swilo leswi nga ematilweni.
JULY 8-14
LESWI HI SWI DYONDZAKA EBIBELENI | 1 VATESALONIKA 1-5
“Hambetani Mi Chavelelana, Mi Akana”
(1 Vatesalonika 5:11-13) Hikokwalaho hambetani mi chavelelana, mi akana, hilaha entiyisweni mi endlaka hakona. Kutani ha mi kombela, vamakwerhu, leswaku mi xixima lava tirhaka hi matimba exikarhi ka n’wina, lava va mi ungamelaka eHosini, lava va mi tsundzuxaka; ni ku va nyika xichavo lexi tlulaka ngopfu lexi tolovelekeke hi rirhandzu hikwalaho ka ntirho wa vona. Vanani ni ku rhula un’wana eka un’wana.
‘Xiximani Lava Tirhaka Hi Matimba eXikarhi Ka N’wina’
12 Ku ‘ungamela’ vandlha a swi katsi ku dyondzisa ntsena. Rito leri fanaka ri tirhisiwe ni le ka 1 Timotiya 3:4. Pawulo u vule leswaku mulanguteri u fanele “a va wanuna la ungamelaka ndyangu wakwe hi mukhuva lowunene, vana vakwe va tiveka ehansi ka yena hi ku tiyimisela.” Swi le rivaleni leswaku eka ndzimana leyi, rito leri nge ‘ungamela’ a ri katsi ku dyondzisa vana vakwe ntsena, kambe ri katsa ni ku rhangela endyangwini ni ku va “vana vakwe va tiveka ehansi ka yena.” Kutani, vakulu va rhangela vandlha ni ku pfuna swirho swa rona hinkwaswo leswaku swi tiveka ehansi ka Yehovha.—1 Tim. 3:5.
‘Xiximani Lava Tirhaka Hi Matimba eXikarhi Ka N’wina’
19 U nga endla yini loko wo kuma nyiko leyi endleriweke wena hi ku kongoma? Xana a wu ta kombisa leswaku wa yi tlangela hi ku va u yi tirhisa? Yehovha u ku nyike “tinyiko leti nga vanhu” hi ku tirhisa Yesu Kreste. Ndlela yin’wana leyi u nga kombisaka ha yona leswaku u tlangela tinyiko leti i ku rhiya ndleve loko vakulu va nyikela tinkulumo u tlhela u ringeta hi matimba ku tirhisa tinhla leti va ti vulaka. U nga tlhela u kombisa ku tlangela ka wena hi ku nyikela tinhlamulo leti akaka eminhlanganweni. Loko u tshame u pfuniwa hi ndzayo leyi u yi kumeke eka nkulu wo karhi, ha yini u nga n’wi byeli? Ku tlula kwalaho, ha yini u nga swi tlangeli swirho swa mindyangu ya vakulu? Tsundzuka leswaku ku va nkulu a kota ku tirha hi matimba evandlheni, ndyangu wakwe wu titsona nkarhi lowu a wu ta wu heta na yena.
(1 Vatesalonika 5:14) Hi hala tlhelo, ha mi khongotela, vamakwerhu, tsundzuxani lava nga hlelekangiki, vulavulani hi ku chavelela eka mimoya-xiviri leyi karhatekeke, seketelani lava tsaneke, vanani ni mbilu yo leha eka hinkwavo.
“A Hi Veni Ni Rirhandzu . . . Hi Swiendlo Ni ntiyiso”
13 Pfuna lava tsaneke. Loko hakunene hi rhandza van’wana swi ta vonaka loko hi yingisa xileriso xa le Bibeleni lexi nge, “seketelani lava tsaneke, vanani ni mbilu yo leha eka hinkwavo.” (1 Tes. 5:14) Hambileswi van’wana va tsaneke sweswi, hi ku famba ka nkarhi va nga tiyisa vuxaka bya vona na Yehovha kasi van’wana va lava hi va lehisela mbilu loko hi ri karhi hi va pfuna. Leswi swi nga ha katsa ku va khutaza hi Matsalwa, ku famba na vona ensin’wini ni ku rhiya ndleve loko va vulavula. Ematshan’weni yo anakanya leswaku makwerhu wo karhi u “tiyile eripfumelweni” kumbe u “tsanile,” hi fanele hi tsundzuka leswaku hinkwerhu hi ni ku tsana ko karhi. Hambi ku ri muapostola Pawulo a a pfumela leswaku u ni ku tsana ko karhi. (2 Kor. 12:9, 10) Hikwalaho, hinkwerhu hi lava ku pfuniwa hi vamakwerhu.
Tekelelani Ku Titsongahata Ni Ntwela-vusiwana Wa Yesu
16 Marito ya hina ya ntwela-vusiwana. Ku khumbeka ka hina ku ta hi susumetela ku “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Hi nga va khutaza njhani? Hi nga va byela ndlela leyi hi khathalaka ha yona ha vona. Hi nga va bumabumela hi tlhela hi va pfuna va vona timfanelo ta vona letinene ni vuswikoti bya vona. Hi nga va tsundzuxa leswaku Yehovha u va pfunile leswaku va kuma ntiyiso, kutani i va risima eka yena. (Yohane 6:44) Hi nga va tiyisekisa leswaku Yehovha wa khathala swinene hi malandza yakwe lama “tshovekeke mbilu” kumbe lama “pfotlokeke emoyeni.” (Pisalema 34:18) Marito ya hina ya ntwela-vusiwana ma nga va phyuphyisa swinene lava lavaka ku chaveleriwa.—Swivuriso 16:24.
Endla Ndzavisiso
(1 Vatesalonika 4:3-6) Hikuva Xikwembu xi rhandza leswaku mi kwetsimisiwa, mi papalata vumbhisa; 4 leswaku un’wana ni un’wana wa n’wina a tiva ndlela yo lawula xibya xakwe hi ku kwetsima ni ku xiximeka, 5 ku nga ri hi ku navela ka ku lava vuxaka bya rimbewu loku fanaka ni loku matiko lama nga tiviki Xikwembu ma nga na kona; 6 leswaku ku nga vi na loyi swi fikaka laha a onhaka ni ku nghenelela etimfanelweni ta makwavo emhakeni leyi, hikuva Yehovha hi yena la xupulaka eka swilo leswi hinkwaswo, hilaha hi mi byeleke hakona ka ha ri emahlweni hi tlhela hi mi nyika vumbhoni bya rixaladza.
it-1 863-864
Vumbhisa
Vumbhisa I xidyoho lexikulu lexi nga endlaka leswaku munhu a susiwa evandlheni ra Vukreste. (1 Kor. 5:9-13; Hev. 12:15, 16) Muapostola u hlamusela leswaku Mukreste loyi a endlaka vumbhisa u dyohela miri wakwe, naswona u tirhisa swirho swakwe swa rimbewu hi ndlela leyi nga riki yinene. Vuxaka bya yena na Yehovha byi khumbekile swinene, u thyakisa vandlha ra Xikwembu, naswona u ti veka ekhombyeni ra mavabyi lama tlulelaka hikwalaho ka timhaka ta masangu. (1 Vakorinto 6:18, 19) U onha timfanelo ta vamakwerhu (1 Vatesalonika 4:3-7) (1) Hi ku tisa xisandzu evandleni hikwalaho ka leswi a ri thyakiseke ni leswi a ri vangeleke tingana hi vuphukuphuku byakwe. (Hev. 12:15, 16), (2) Hi ku nyamisa loyi a endleke na yena vumbhisa emahlweni ka Xikwembu naswona loko munhu wa kona a nga nghenelanga vukati, a nge he swikoti ku nghenela vukati a basile. (3) u onha ndhuma leyinene ya ndyangu wa ka vona, naswona (4) u dyohela vatswari vakwe, nuna kumbe nsati, kumbe murhandziwa wa loyi a endleke vumbhisa na yena. Hikwalaho, munhu la endlaka vumbhisa, u va a nga tluli milawu ya vanhu, leyi mikarhi yin’wana yi nga vuliki nchumu hi vumbhisa, kambe u va a tlula milawu ya Xikwembu, lexi xi nga ta n’wi avanyisa hikwalaho ka xidyoho xa yena.—1Te 4:8.
(1 Vatesalonika 4:15-17) Hikuva hi mi byela hi rito ra Yehovha, leswaku hina lava hanyaka lava poneke ku fikela eka vukona bya Hosi a hi nge va rhangeli nikatsongo lava etleleke eku feni; 16 hikuva Hosi hi yoxe yi ta xika hi le tilweni hi rito ro lerisa, hi rito ra ntsumi leyikulu ni hi mhalamhala ya Xikwembu, kutani lava feke evun’weni na Kreste va ta sungula va pfuka. 17 Endzhaku hina lava hanyaka lava poneke, hi ta tekiwa swin’we na vona hi ri emapapeni hi ya hlangana ni Hosi emoyeni; xisweswo hi ta va ni Hosi minkarhi hinkwayo.
“Ku Kutsuriwa Ka N’wina Ka Tshinela”!
14 Ku ta humelela yini endzhaku ka loko Gogo wa Magogo a sungule ku hlasela vanhu va Xikwembu? Bibele yi vula leswaku N’wana wa munhu “u ta rhuma tintsumi takwe, ku ya hlengeleta vahlawuriwa va yena va huma etimhehweni ta mune, ku suka emakun’wini ya misava ku ya emakun’wini ya matilo.” (Marka 13:27; Matewu 24:31) Ntirho lowu wo hlengeleta a wu kombeteli eka nkarhi lowu Vakreste lava totiweke va hlawuriwaka ha wona ro sungula. Naswona a wu kombeteli eka ku funghiwa ko hetelela ka vatotiwa lava ha riki laha misaveni. (Matewu 13:37, 38) Va ta funghiwa ro hetelela emahlweninyana ka ku va ku sungula nhlomulo lowukulu. (Nhlavutelo 7:1-4) Hikwalaho, i yini ntirho lowu wa ku hlengeleta? I nkarhi lowu vatotiwa lava ha riki laha misaveni va nga ta kuma hakelo ya vona kutani va ya etilweni. (1 Vatesalonika 4:15-17; Nhlavutelo 14:1) Xiendlakalo lexi xi ta humelela endzhaku ka loko Gogo wa Magogo a sungule ku hlasela vanhu va Yehovha. (Ezekiyele 38:11) Kutani, hilaha Yesu a vuleke hakona, “lava va lulameke va ta voninga ngopfu kukota dyambu emfun’weni wa Tata wa vona.”—Matewu 13:43.
15 Xana leswi swi vula leswaku vatotiwa va ta “wutleriwa etilweni”? Vanhu vo tala eVujaganini va pfumela leswaku Vakreste va ta tekeriwa etilweni hi mimiri ya vona ya nyama. Va tlhela va pfumela leswaku va ta vona Yesu hi mahlo ya nyama a vuya a ta fuma misava. Hambiswiritano, Bibele yi swi kombisa kahle leswaku Yesu u ta vuya hi ndlela leyi nga vonakiki loko yi ku: “Xikombiso xa N’wana wa munhu xi ta humelela etilweni” naswona Yesu u ta ta “a ri emapapeni ya tilo.” (Matewu 24:30) Bibele yi tlhela yi vula leswaku “nyama ni ngati a swi nge yi dyi ndzhaka ya mfumo wa Xikwembu.” Hikwalaho lava nga ta tekeriwa etilweni va fanele va rhanga va “hundzuriwa, hi nkarhinyana, hi ku tsopeta ka tihlo, hi nkarhi wa nanga yo hetelela.” (Hlaya 1 Vakorinto 15:50-53.) A hi xi tirhisi xiga lexi nge “ku wutleriwa etilweni” leswaku hi hlamusela xiendlakalo lexi, hikuva xiga lexi xi fambisana ni dyondzo ya mavunwa ya Vujagana. Hambiswiritano, vatotiwa vo tshembeka lava ha riki laha misaveni va ta hlengeletiwa hi nkarhinyana.
Ku Hlayiwa Ka Bibele
(1 Vatesalonika 3:1-13) Hikwalaho, loko hi tsandzeka ku ya emahlweni hi tiyisela, hi vone swi ri swinene ku sala hi ri swerhu eAtena; 2 kutani hi rhumele Timotiya, makwerhu tlhelo mutirheli wa Xikwembu hi mahungu lamanene malunghana na Kreste, leswaku a mi tiyisa ni ku mi chavelela hikwalaho ka ripfumelo ra n’wina, 3 leswaku ku nga vi na munhu la ninginisiwaka hi mahlomulo lawa. Hikuva n’wina ma swi tiva leswaku hi vekeriwe swilo leswi. 4 Nakambe, entiyisweni loko ha ha ri na n’wina, a hi mi byela ka ha ri emahlweni leswaku hi ta weriwa hi nhlomulo, hilaha swi endlekeke hakona ni hilaha mi tivaka hakona. 5 Hakunene, hi yona mhaka leyi loko ndzi tsandzeka ku ya emahlweni ndzi tiyisela, ndzi n’wi rhumile leswaku ndzi ta tiva hi ta vutshembeki bya n’wina, swi nga ha endleka hi ndlela yo karhi Muringi a va a mi ringile, naswona ku tikarhata ka hina ku nga ha va ku hundzuke ka hava. 6 Kambe Timotiya wa ha ku ta eka hina a huma eka n’wina naswona u hi nyike mahungu lamanene hi vutshembeki ni rirhandzu ra n’wina, ni leswaku mi tshama mi ri karhi mi hi tsundzuka kahle minkarhi hinkwayo, hakunene mi navela ku hi vona hi ndlela leyi fanaka ni leyi na hina hi navelaka ku mi vona ha yona. 7 Hi yona mhaka leyi vamakwerhu, hi chaveleriweke ha n’wina eka hinkwaswo leswi a hi swi pfumala ni le nhlomulweni wa hina hikwalaho ka vutshembeki lebyi mi byi kombaka, 8 hikuva sweswi ha hanya loko mi yima mi tiyile eHosini. 9 Hikuva hi nga xi nkhensa ha yini Xikwembu malunghana na n’wina hi hakela ntsako hinkwawo lowu hi tsakaka ha wona hikwalaho ka n’wina emahlweni ka Xikwembu xa hina, 10 kasi vusiku ni nhlikanhi hi endla swikombelo leswi swi tlulaka ngopfu leswi tolovelekeke leswaku hi vona swikandza swa n’wina ni ku lulamisa swilo leswi pfumalekaka malunghana ni ripfumelo ra n’wina? 11 Onge sweswi Xikwembu tlhelo Tata wa hina hi byakwe ni Hosi ya hina Yesu va nga kongomisa ndlela ya hina yo ta eka n’wina hilaha ku humelelaka. 12 Ku tlula kwalaho, onge Hosi yi nga mi andzisa, ina, yi mi kurisa, erirhandzwini un’wana eka un’wana ni le ka hinkwavo, hilaha na hina hi endlaka hakona eka n’wina; 13 ku endlela leswaku yi ta tiyisa timbilu ta n’wina, ti pfumala xisandzu eku kwetsimeni emahlweni ka Xikwembu tlhelo Tata wa hina eka vukona bya Hosi ya hina Yesu ni vakwetsimi va yena hinkwavo.
JULY 15-21
LESWI HI SWI DYONDZAKA EBIBELENI | 2 VATESALONIKA 1-3
“Ku Hlavuteriwa Ka Lowo Kala Nawu”
(2 Vatesalonika 2:6-8) Kutani sweswi se ma xi tiva xilo lexi nga xirhalanganya, leswaku a ta hlavuteriwa enkarhini wakwe lowu faneleke. 7 I ntiyiso, xihundla xa ku kala nawu loku ana se xa tirha; kambe ku fikela ntsena loko loyi a nga xirhalanganya enkarhini wolowu a suka endleleni. 8 Kunene lowo kala nawu u ta hlavuteriwa, loyi Hosi Yesu a nga ta n’wi dlaya hi moya wa nomu wakwe a n’wi herisa loko vukona byakwe byi humelela erivaleni.
it-1 972-973
Tinyiketela Loku Nga Ni Vukwembu
Hi lexi xihundla xin’wana lexi hambaneke hi ku helela ni “xihundla xo kwetsima” xa Yehovha. I “xihundla xa ku kala nawu.” Lexi a ku ri xihundla eka Vakreste va ntiyiso, hikuva hi nkarhi lowu muapostola Pawulo a hanyeke ha wona a swi nga se paluxiwa hi ku hetiseka leswaku i mani “munhu wo kala nawu”. Hambiloko se a humelerile “munhu” yoloye, a ta ya emahlweni a nga tiveki eka vanhu vo tala hikuva vuhomboloki bya yena a ta byi tumbeta hi ku endla onge u tinyiketele eka Xikwembu. Kahlekahle a ta va a kanetana ni leswi ku tinyiketela eka Xikwembu swi vulaka swona hakunene. Pawulo u vule leswaku “xihundla xa ku kala nawu loku” ana se a xi tirha hi nkarhi wakwe, hikuva a ku ri ni nkucetelo wo biha evandleni ra Vukreste, lowu a wu ta hetelela wu tswale ntlawa lowu wa vaxandzuki. Emakumu, Yesu Kreste a ta wu herisa loko a hlavuteriwa hi nkarhi wa vukona byakwe. Muxandzuki loyi, loyi a lawuriwaka hi Sathana u titlakusela ehenhla ka “un’wana ni un’wana la vuriwaka “xikwembu” kumbe xilo lexi xiximiwaka” (Gr., seʹba·sma). Hikwalaho mukaneti loyi wa Xikwembu, loyi a tirhisiwaka hi Sathana a a ta va na vukanganyisi swinene naswona a ta endla leswaku vanhu lava landzelaka mikhuva yakwe va lovisiwa. “Munhu wo kala nawu” a a ta humelela eka marhengu yakwe hikwalaho ka leswi vuhomboloki byakwe a byi tumbetaka hi ku tinyiketela loku nga ni vukwembu ka vukanganyisi.—2Te 2:3-12; ringanisa na Mt 7:15, 21-23.
(2 Vatesalonika 2:9-12) Kambe vukona bya lowo kala nawu byi fambisana ni matirhelo ya Sathana ni mintirho hinkwayo ya matimba hi mahlori ya mavunwa ni swihlamariso 10 ni hi vuxisi hinkwabyo lebyi nga lulamangiki eka lava va lovaka, leswi nga ndzihiso hikuva a va ku amukelanga ku rhandza ntiyiso leswaku va ta ponisiwa. 11 Hi yona mhaka leyi Xikwembu xi tshikaka matirhelo ya xidyoho ma hundzela eka vona, leswaku va ta kholwa mavunwa, 12 leswaku hinkwavo va avanyisiwa hikuva a va wu kholwanga ntiyiso kambe va tsakele leswi nga lulamangiki.
it-2 245 ¶7
Mavun’wa
Yehovha Xikwembu u pfumelela “matirhelo ya Sathana” leswaku ma nghena eka vanhu lava va pfumelaka ku xisiwa “leswaku va ta kholwa mavunwa” ematshan’wini yo tshemba mahungu lamanene ha Kreste Yesu. (2Te 2:9-12) Mhaka leyi yi kombisiwe kahle hi leswi nga humelela Hosi ya Vaisrayele Akabu enkarhini lowu nga hundza. Muprofeta wa mavun’wa u tiyisekise Akabu leswaku u ta hlula enyimpini loko a lwa na Rhamoti-giliyadi kasi hi halatlhlelo muprofeta wa Yehovha Mikaya u profete khombo. Hilaha swi kombiseweke ha kona eka xivona xa Akabu, Yehovha pfumelela xivumbiwa xa moya xi va “moya wa vuxisi” enon’wini wa vaprofeta Akabu. Leswi swi vula leswaku ematshan’wini yo vula ntiyiso, xivule leswi a va lava leswaku xi swi vula ni leswi Akabu a lava ku swi twa. Hambileswi a lemukisa, Akabu u hluwule ku xisiwa naswona sweswo swi koxe vutomi byakwe.—1Th 22:1-38; 2Tk 18.
Endla Ndzavisiso
(2 Vatesalonika 1:7, 8) kambe, n’wina lava weriwaka hi nhlomulo, xi ta mi hakela hi ku wisa swin’we na hina eku hlavuteriweni ka Hosi Yesu a huma etilweni swin’we ni tintsumi takwe ta matimba 8 a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu.
it-1 834 ¶5
Ndzilo
Petro u tsale leswaku “matilo ni misava leyi nga kona sweswi swi hlayiseriwe ndzilo.” Marito ya tsalwa leri ya swi veka erivaleni leswaku ndzilo lowu ku vulavuriwaka hi wona a hi ndzilo wa xiviri kambe i wo fanekisela lowu fanekiselaka ku loviseriwa makumu. Tanihi leswi Ndhambi ya Nowa yi nga lovisangiki matilo kumbe misava, kambe yi loviseke vanhu lava nga pfumeliki eka Xikwembu, hilaha ku fanaka eku hlavuteriweni ka Hosi Yesu a huma etilweni swin’we ni tintsumi takwe ta matimba a ri endzilweni lowu pfurhaka malangavi lowu wu nga ta tisa ku heriseriwa makumu eka vanhu lava nga riki va Xikwembu swin’we ni mafambiselo lawa yo biha ya swilo lawa va katsekaka eka wona.—2Pe 3:5-7, 10-13; 2Te 1:6-10; ringanisa na Esa 66:15, 16, 22, 24.
(2 Vatesalonika 2:2) mi nga ninginisiwi hi ku hatlisa emianakanyweni ya n’wina hambi ku ri ku nyanyuriwa hi marito lama huhuteriweke kumbe hi rungula ra nomu kumbe hi papila leri vonakaka onge ri huma eka hina, ri kombisa leswaku siku ra Yehovha ri fikile.
it-1 1206 ¶4
Ku huhuteriwa
“Marito Lama Huhuteriweke”—Ya Ntiyiso Ni Ya Mavunwa. Rito ra Xigriki pneuʹma (moya) ri tirhisiwe hi ndlela yo hlawuleka eka matsalwa ya vaapostola. Eka 2 Vatesalonika 2:2, Hi xikombiso, muapostola Pawulo u khutaza vamakwavo va le Tesalonika leswaku va nga ninginisiwi kumbe ku nyanyuriwa hi “marito lama huhuteriweke [hi ku kongoma, swi vula, “moya”] kumbe hi rungula ra nomu kumbe hi papila leri vonakaka onge ri huma eka hina, ri kombisa leswaku siku ra Yehovha ri fikile.” Swile rivaleni leswaku Pawulo u tirhise rito pneuʹma (moya) emhakeni ya ku vulavurisana, ku fana ni ku vulavurisana hi “nomu” kumbe hi “papila.” Hi yona mhaka Lange’s Commentary on the Holy Scriptures (tl. 126) yi ku: “Emhakeni leyi muapostola a vulavula hi marito ya vanhu lava tiendlaka vaprofeta va Xikwembu.” (Swi hundzuluxeriwe swi tlhela swi kamberiwa hi P. Schaff, 1976) Vincent’s Word Studies in the New Testament yi ri: “Hi moya. Hi marito ya vaprofeta va Vakreste lava endlaka onge va huhuteriwe hi Xikwembu.” (1957, Vol. IV, tl. 63) Xisweswo hambileswi vahundzuluxeri va n’wana va hundzuluxeleke rito pneuʹma ri va “moya” eka tsalwa leri ni man’wana, vahundzuluxeri van’wana va tsale “rungula ra moya” (AT), “ku vhumba” (JB), “ku huhuteriwa” (D’Ostervald; Segond [French]), “marito lama huhuteriweke” (NW).
Ku Hlayiwa Ka Bibele
(2 Vatesalonika 1:1-12) Mina Pawulo na Silvhano na Timotiya, eka vandlha ra Vatesalonika leri nga ni vun’we ni Xikwembu Tata wa hina ni Hosi Yesu Kreste: 2 Onge mi nga va ni musa lowu nga faneriwiki ni ku rhula leswi humaka eka Xikwembu Tatana ni le ka Hosi Yesu Kreste. 3 Ha boheka ku nkhensa Xikwembu minkarhi hinkwayo hikwalaho ka n’wina, vamakwerhu, hilaha swi fanelaka hakona, hikuva ripfumelo ra n’wina ri kula ngopfu ni rirhandzu ra n’wina hinkwenu ra kula exikarhi ka n’wina. 4 Hikwalaho hina ha tinyungubyisa ha n’wina exikarhi ka mavandlha ya Xikwembu hikwalaho ka ku tiyisela ka n’wina ni ripfumelo ra n’wina leri mi xanisekaka hikwalaho ka rona ni mahlomulo lawa mi ma tiyiselaka. 5 Lexi i xitiyisekiso xa vuavanyisi byo lulama bya Xikwembu, lexi endlaka leswaku mi hlayiwa mi ri lava faneriwaka hi mfumo wa Xikwembu, lowu hakunene mi xanisekaka ha wona. 6 Leswi swi kombisa leswaku swi lulamile eka Xikwembu leswaku xi tlherisela nhlomulo eka lava mi tiselaka nhlomulo, 7 kambe, n’wina lava weriwaka hi nhlomulo, xi ta mi hakela hi ku wisa swin’we na hina eku hlavuteriweni ka Hosi Yesu a huma etilweni swin’we ni tintsumi takwe ta matimba 8 a ri endzilweni lowu pfurhaka malangavi, a tisa ndzihiselo eka lava va nga xi tiviki Xikwembu ni lava va nga ma yingisiki mahungu lamanene malunghana ni Hosi ya hina Yesu. 9 Vona va ta kuma nxupulo wa vuavanyisi bya ku loviseriwa makumu emahlweni ka Hosi ni le ku vangameni ka ntamu wa yona, 10 enkarhini lowu a nga ta ta ha wona a ta vangamisiwa mayelana ni vakwetsimi vakwe ni ku langutiwa hi ku hlamala esikwini rero mayelana ni hinkwavo lava kombiseke ripfumelo, hikuva vumbhoni lebyi hi byi nyikeleke byi hlangane ni ripfumelo exikarhi ka n’wina. 11 Kunene, emhakeni yoleyo hi mi khongelela minkarhi hinkwayo leswaku Xikwembu xa hina xi mi hlaya mi ri lava faneriwaka hi ku vitaniwa hi xona naswona xi swi endla hi ku helela hinkwaswo leswi xi swi tsakelaka leswi nga swa vunene ni ntirho wa ripfumelo hi matimba; 12 leswaku vito ra Hosi ya hina Yesu ri vangamisiwa eka n’wina, na n’wina evun’weni na yena, hi ku landza musa lowu nga faneriwiki wa Xikwembu xa hina ni wa Hosi Yesu Kreste.”
JULY 22-28
LESWI HI SWI DYONDZAKA EBIBELENI | 1 TIMOTIYA 1-3
“Tikarhatele Ku Fanelekela Ntirho Lowunene”
(1 Timotiya 3:1) Rito rero ra tshembeka. Loko munhu un’wana ni un’wana a lwela ku fikelela ntirho wa ku va mulanguteri, u navela ntirho lowunene.
Xana Wa Wu Vona Nkoka Wo Endla Nhluvuko Hi Tlhelo Ra Moya?
3 Hlaya 1 Timotiya 3:1. Riendli ra Xigriki leri hundzuluxeriweke ri va ku “lwela ku fikelela” ri vula ku lwela ku khoma nchumu wo karhi, kumbexana nchumu wun’wana lowu swi nga oloviki ku wu fikelela. Loko a tirhisa rito rero, muapostola Pawulo u kandziyise leswaku ku endla nhluvuko swi lava ku tikarhata. Ehleketa hi makwerhu loyi a anakanyaka hi vumundzuku bya yena evandlheni. Swi nga ha endleka a nga ri nandza wa vutirheli kambe wa swi xiya leswaku u fanele a hlakulela timfanelo ta moya. Xo sungula, u tikarhatela ku fanelekela ku va nandza wa vutirheli. Hi ku famba ka nkarhi, u navela ku va nkulu. Loko a nyikiwa swiavelo, wa tikarhata leswaku a fanelekela ku endla mintirho leyi engetelekeke evandlheni.
(1 Timotiya 3:13) Hikuva vavanuna lava tirhelaka hi mukhuva lowunene va tikumela xiyimo lexinene ni ntshunxeko lowukulu wo vulavula eripfumelweni mayelana na Kreste Yesu.
km 9/78 4 ¶7
‘Lava Va Tikumeka Xiyimo Lexinene’
7 Swile rivaleni leswaku hikwalaho ka yini Pawulo a vule leswaku vanhu volavo “va tikumela xiyimo lexinene.” Lexi a xi fani ni xitshembiso lexi endliwaka hi vanhu va kereke. kambe vavanuna lava va tirhelaka Yehovha va n’wi ‘tirhela hi mukhuva lowunene’ naswona Yehovha na Yesu va va tshembhisa mikateko, naswona vamakwerhu evandlheni va va seketela ni ku va komba xichavo. Hikwalaho va va ni “ntshunxeko lowukulu wo vulavula eripfumelweni mayelana na Kreste Yesu.” Leswi va hetisisaka xiavelo xa vona hi ku tshembeka, vatlangeriwa swinene hikwalaho ka ntirho lowunene lowu va wu endlaka; a va chavi ku hlekuriwa naswona va ni ripfumelo leritiyeke.
Endla Ndzavisiso
(1 Timotiya 1:4) hambi ku ri ku nyikela nyingiso etimhakeni ta mavunwa ni ta matimu ya swivongo, leti makumu ya tona ku nga vuhava, kambe ti vangaka swivutiso leswi lavaka ndzavisiso ku nga ri ku ava nchumu wo karhi lowu humaka eka Xikwembu mayelana ni ripfumelo.
it-1 914-915
Matimu Ya Xivongo
Ku vulavula hi matimu ya swivongo a swi nga ri swa nkoka, ngopfu ngopfu hi nkarhi lowu Pawulo a tsalela Timotiya. A swi nga ha bohi ku va na matimu ya xivongo leswi nga ta kombisa leswaku u wa rixaka rihi, hikwalaho ka leswi Xikwembu a xi nga ha voni ku hambana exikarhi ka Muyuda ni vanhu va matiko evandlheni ra Vukreste. (Ga 3:28) Matimu ya xivongo xa Yesu ana se a ya tsariwile ku sukela eka nxaxamelo wa Davhida. Naswona endzaku ka loko Pawulo a nyike Timotiya xitsundzuxo lexi, a swi nga ta teka nkarhi wo leha leswaku Yerusalema wu lovisiwa swin’we ni tirhekhodo ta Vayuda. Yehovha a nga ti sirhelelanga tirhekhodo teto. Kahlekahle, Pawulo a karhateka hi leswaku Timotiya swin’we ni mavandlha va nga rivatiwi hi ku ngundzuvanya matimu ya swivongo swa vona ni minjhekanjhekisano leyi khumbaka munhu hi yexe kambe yi nga pfuniki nchumu etimhakeni ta ripfumelo ra Mukreste. Matimu ya xivongo lama nga eBibeleni ya enerile ku hi komba leswaku hakunene Yesu i Mesiya, wolawo hi wona matimu ya nkoka ngopfu eka Vakreste. Matimu laman’wana ya swivongo lama nga eBibeleni i vumbhoni bya leswaku Bibele ya tshembeka, ma swi veka erivaleni leswaku rungula ra yona ra matimu i ra xiviri ku nga ri ntsheketo.
(1 Timotiya 1:17) Sweswi ku xiximiwa ni ku vangama, a swi ye eka Hosi leyi nga riki na makumu, leyi nga onhakiki, leyi nga vonakiki, leyi nga Xikwembu xi ri xoxe, hi masiku ni masiku. Amen.
“Maswivo! Lexi I Xikwembu Xa Hina”
15 Xithopo xin’wana lexi tirhaka ntsena eka Yehovha hi lexi nge “Hosi leyi nga riki na makumu.” (1 Timotiya 1:17; Nhlavutelo 15:3) Xana leswi swi vula yini? Mianakanyo ya hina leyi nga nyawuliki a yi nge swi koti ku swi twisisa hi ku helela, kambe Yehovha a nga na masungulo naswona a nga na makumu. Pisalema 90:2 yi ri: “U Xikwembu ku suka enkarhini lowu nga riki na makumu ku ya enkarhini lowu nga riki na makumu.” Hikwalaho Yehovha a nga na masungulo; a a ri kona hilaha ku nga riki na masungulo. Swi fanerile ku va a vuriwa “Nkulukumba wa Masiku,”—u ve kona hilaha ku nga riki na makumu ku nga si va na munhu kumbe nchumu evuakweni hinkwabyo! (Daniyele 7:9, 13, 22) I mani loyi a nga kanakanaka mfanelo yakwe ya ku va Hosi leyi Lawulaka?
Ku Hlayiwa Ka Bibele
(1 Timotiya 2:1-15) Hikokwalaho, xo sungula ndzi khongotela leswaku swikombelo, swikhongelo, ku khongelela, ku nkhensa, swi endleriwa vanhu va mixaka hinkwayo, 2 swi endleriwa tihosi ni hinkwavo lava nga eswiyin’weni leswi tlakukeke; leswaku hi ta ya emahlweni hi hanya vutomi byo rhula ni byo hola hi ku tinyiketela loku heleleke loku nga ni vukwembu ni ku tiyimisela. 3 Leswi i swinene naswona swa amukeleka emahlweni ka Muponisi wa hina, ku nga Xikwembu, 4 lexi rhandzaka leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso. 5 Hikuva ku ni Xikwembu xin’we, ni muhlanganisi un’we exikarhi ka Xikwembu ni vanhu, wanuna la vuriwaka Kreste Yesu, 6 la tinyikeleke leswaku a va nkutsulo lowu yelanaka eka hinkwavo—leswi ku fanele ku nyikeriwa vumbhoni ha swona hi nkarhi wa swona. 7 Hikwalaho ka vumbhoni lebyi, ndzi vekiwe ku va muchumayeri ni muapostola—ndzi vulavula ntiyiso, a ndzi hembi—ni ku va mudyondzisi wa matiko emhakeni ya ripfumelo ni ntiyiso. 8 Hikokwalaho ndzi navela leswaku endhawini yin’wana ni yin’wana vavanuna va hambeta va khongela, va tlakusa mavoko lama tshembekeke, ku nga ri hi vukarhi ni minjhekanjhekisano. 9 Hilaha ku fanaka ndzi navela leswaku vavasati va tisasekisa hi swiambalo leswi langutekaka, hi xichavo ni mianakanyo yo hluteka, ku nga ri hi tindlela to horha misisi ni nsuku kumbe tiperela kumbe swiambalo leswi durhaka ngopfu, 10 kambe hi ndlela leyi fanelaka vavasati lava vulaka leswaku va chava Xikwembu, hi mintirho leyinene. 11 Wansati a a dyondze a miyerile hi ku titsongahata loku heleleke. 12 A ndzi n’wi pfumeleli wansati leswaku a dyondzisa, kumbe ku lawula wanuna, kambe a a miyele. 13 Hikuva ku rhange Adamu a vumbiwa ivi ku landzela Evha. 14 Nakambe, a hi Adamu la xisiweke, kambe wansati hi yena la xisiweke hi ku helela kutani a tlula nawu. 15 Hambiswiritano, u ta tshama a hlayisekile hi ku tswala vana, ntsena loko vavasati va tshama eripfumelweni ni le rirhandzwini ni le ku kwetsimeni naswona va hlutekile emianakanyweni.
JULY 29–AUGUST 4
LESWI HI SWI DYONDZAKA EBIBELENI | 1 TIMOTIYA 4-6
“Ku Tinyiketela Loku Ku Nga Ni Vukwembu Ni Rifuwo”
(1 Timotiya 6:6-8) Hakunene, swin’we ni ku eneriseka i ndlela leyi pindzurisaka swinene. 7 Hikuva a hi tanga na nchumu emisaveni, naswona a hi nge fambi na nchumu. 8 Kutani, loko hi ri ni swakudya ni swifunengeto, hi ta eneriseka hi swilo leswi.
Ku Dyondza Xihundla Xa Ku Eneriseka
Nchumu lowukulu lowu endleke leswaku Pawulo a kuma ntsako a ku ri moya wa ku eneriseka lowu a ri na wona. Kambe xana ku eneriseka swi vula yini? Hi ku kongoma swi vula ku kolwa hi swilo swa xisekelo. Emhakeni yoleyo Pawulo u byele mutirhi-kulobye Timotiya a ku: “Hakunene, ku tinyiketela loku ku nga ni vukwembu swin’we ni ku eneriseka i ndlela leyi pindzurisaka swinene. Hikuva a hi tanga na nchumu emisaveni, naswona a hi nge fambi na nchumu. Kutani, loko hi ri ni swakudya ni swifunengeto, hi ta eneriseka hi swilo leswi.”—1 Timotiya 6:6-8.
Xiya leswaku Pawulo u hlanganise ku eneriseka ni ku tinyiketela loku nga ni vukwembu. U swi lemukile leswaku ntsako wa xiviri a wu tisiwi hi ku va ni swilo leswi vonakaka kumbe rifuwo, kambe wu tisiwa hi ku tinyiketela loku nga ni vukwembu, ku nga ku rhangisa ntirho wa Xikwembu emahlweni. A a fanele a kuma “swakudya ni swifunengeto” leswaku a ya emahlweni ni ntirho wa Xikwembu. Kutani eka Pawulo, xihundla xa ku eneriseka a ku ri ku titshega hi Yehovha, ku nga khathariseki leswaku xiyimo xi njhani.
(1 Timotiya 6:9) Hambiswiritano, lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni.
Ku Tiyimisela Ku Fuwa—Ndlela Leyi Swi Ku Khumbaka Ha Yona
I ntiyiso leswaku a va talanga vanhu lava faka hikwalaho ka ku hlongorisa rifuwo. Kambe, va nga ha lahlekeriwa hi nkarhi wo tala wo tsakela vutomi loko va ha hlongorisa rifuwo. Va nga ha tikuma va nga dyi byi rhelela loko va hlaseriwa hi ntshikilelo wa le ntirhweni kumbe wa timali, nkelunkelu, ku tshamela ku pandziwa hi nhloko kumbe swilondza ekhwirini leswi vangiwaka hi ku vilela—swiphiqo swa rihanyo leswi nga endlaka munhu a nga hanyi malembe yo tala. Hambiloko munhu o swi lemuka leswaku u fanele a cinca mianakanyo ya yena mayelana ni swilo leswi a swi tekaka swi ri swa nkoka evuton’wini byakwe, a nga ha tikuma se a hlwele ngopfu. Munghana wakwe wa vukati swi nga ha endleka a nga ha n’wi tshembi, vana vakwe swi nga ha endleka se va vavisekile emintlhavekweni naswona rihanyo rakwe ri nga ha va se ri vavisekile. Kumbexana swin’wana swi nga ha lunghiseka, kambe swi ta lava matshalatshala lamakulu. Kunene, vanhu vo tano va “titlhave hinkwako-nkwako hi switlhavi swo tala.”—1 Timotiya 6:10.
(1 Timotiya 6:10) Hikuva ku rhandza mali i rimitsu ra mixaka hinkwayo ya swilo swo biha, naswona hi ku lwela ku fikelela rirhandzu leri, van’wana va lahlekisiwile eripfumelweni naswona va titlhave hinkwako-nkwako hi switlhavi swo tala.
Swilo Swa Tsevu Leswi Nga Ku Pfunaka Leswaku Vutomi Byi Ku Fambela Kahle
Hilaha hi swi voneke hakona exihlokweni xo sungula xa nxaxamelo wa swihloko leswi, vanhu lava anakanyaka leswaku loko va fuwile swilo swi ta va fambela kahle, entiyisweni va hlongorisa mheho. Swilo a swi va fambelanga kahle evuton’wini naswona va tivangele swiphiqo swo tala. Hi xikombiso, loko vanhu va ri karhi va hlongorisa rifuwo, hakanyingi a va ha khathali hi vuxaka bya vona ni mindyangu ya vona ni vanghana va vona. Van’wana a va etleli, hikwalaho ko tirha ngopfu kumbe hikwalaho ko vilela ku tlula mpimo. Eklesiasta 5:12 yi ri: “Bya nandziha vurhongo bya loyi a tirhelaka un’wana, ku nga khathariseki leswaku u dya leswitsongo kumbe swo tala; kambe swo tala swa loyi a fuweke a swi n’wi pfumeleli leswaku a etlela.”
Mali i n’wini la nga ni tihanyi ni loyi a kanganyisaka. Yesu Kreste u vulavule hi “matimba ya vuxisi bya rifuwo.” (Marka 4:19) Hi marito man’wana, rifuwo ri tshembisa munhu ntsako kambe a ri wu tisi. Ri endla munhu leswaku a tshama a ri eku laveni ka rifuwo leri engetelekeke. Eklesiasta 5:10 yi ri: “La rhandzaka [mali] a nge enerisiwi hi [mali].”
Hi ku komisa, ku rhandza mali swi vanga swiphiqo naswona swi hetelela swi hete munhu matimba kumbe swi n’wi endla a katseka eka vugevenga. (Swivuriso 28:20) Leswi endlaka munhu a tsaka naswona vutomi byi n’wi fambela kahle i ku hanana, ku rivalela, mahanyelo lamanene, rirhandzu ni ku va ni vuxaka lebyinene ni Xikwembu.
Endla Ndzavisiso
(1 Timotiya 4:2) hi vukanganyisi bya vanhu lava hembaka, onge mapfalo ya vona ma funghiwe hi nsimbi yo hisa.
U Fanele U Endla Yini Leswaku U Va Ni Ripfalo Lerinene?
17 Muapostola Petro u te: “Hlayisani ripfalo lerinene.” (1 Petro 3:16) Ripfalo leri baseke emahlweni ka Yehovha Xikwembu i nyiko ya risima. A ri fani ni mapfalo ya vanhu vo tala namuntlha. Pawulo u vule leswaku ku ni lava ‘mapfalo ya vona ma funghiweke hi nsimbi yo hisa.’ (1 Timotiya 4:2) Nsimbi yo fungha yi hisa nyama ku sala xivati naswona loko ku horile nyama yi fa vusindza. Vo tala va ni mapfalo lama feke, lama nga ha va pfuniki lerova a ma ha va lemuxi nchumu hambiloko va endla nchumu wo karhi lowu hoxeke. Va yi honisa hi vomu ndlela leyi va titwaka ha yona.
(1 Timotiya 4:13) Loko ndza ha ri endleleni, yana emahlweni u tinyiketela eku hlayeni ka le rivaleni, eku khongoteleni, eku dyondziseni.
it-2 714 ¶1-2
Ku Hlaya Erivaleni
Evandlheni Ra Vukreste. Hi nkarhi wa Vakreste vosungula, van’wana va hlohloteriwe hi tibukusongwa ta Bibele, leswaku va teke ku hlaya erivaleni ku ri nchumu wa nkoka. Muapostola Pawulo u lerise vandlha ra Vukreste leswaku va hlaya mapapila yakwe emavandlheni, ni leswaku va lombana wona swin’wi ni mavandlha ma n’wana leswaku va ya hlaya. (Kl 4:16; 1Te 5:27) Pawulo u tlhela a tsundzuxa Timotiya loyi a langutela mavandlha ku sukela a hari muntshwa, leswaku a “tinyiketela eku hlayeni ka le rivaleni, eku khongoteleni, eku dyondziseni.”—1 Tim. 4:13.
Ku hlaya erivaleni ku fanele ku endliwa hi ndlela yo khuluka. (Hb 2:2) Hikuva ku hlaya erivaleni ku dyondzisa van’wana, muhlayi u fanele a hlaya hi ndlela leyinene naswona a xi twisisa kahle xivangelo xo va mutsari a tsale mhaka yoleyo, ni ku tlhela a va ni vuxiyaxiya loko a hlaya leswaku a nga hlayi leswi nga tsariwangiki swin’wi ni ku hlaya rungula leri hoxeke. Hikuya hi Nhlavutelo 1:3, lava va hlayaka vuprofeta hi rito ra leri twalaka swin’we ni lava va twaka kumbe ku xiya marito wolawo, va ta tsaka.
Ku Hlayiwa Ka Bibele
(1 Timotiya 4:1-16) Hambiswiritano, marito lama huhuteriweke ma vula hilaha ku tiyeke leswaku eminkarhini yo hetelela van’wana va ta wa eripfumelweni, va nyikela nyingiso eka marito yo hambukisa lama huhuteriweke ni le tidyondzweni ta madimona, 2 hi vukanganyisi bya vanhu lava hembaka, onge mapfalo ya vona ma funghiwe hi nsimbi yo hisa; 3 va arisa ku tekana, va lerisa leswaku ku papalatiwa swakudya leswi Xikwembu xi swi endleke leswaku swi dyiwa hi ku nkhensa hi lava va nga ni ripfumelo naswona va tivaka ntiyiso hi ku kongoma. 4 Xivangelo xa kona hileswi ntumbuluko hinkwawo wa Xikwembu wu nga wunene, naswona ku hava lexi faneleke xi bakanyiwa loko xi amukeriwa hi ku nkhensa, 5 hikuva xi kwetsimisiwa hi ku tirhisa rito ra Xikwembu ni hi ku xi khongelela. 6 Loko u nyika vamakwerhu switsundzuxo leswi u ta va mutirheli lonene wa Kreste Yesu, la wundliweke hi marito ya ripfumelo ni ya dyondzo leyinene leyi u yi landzelerisiseke. 7 Kambe fularhela timhaka ta mavunwa leti lwisanaka ni leswo kwetsima leti vuriwaka hi vavasati lava kuleke. Hi hala tlhelo, tiletele hi xikongomelo xa ku tinyiketela loku nga ni vukwembu. 8 Hikuva ku letela miri swa pfuna katsongo; kambe ku tinyiketela loku nga ni vukwembu ku pfuna eka hinkwaswo, hileswi ku nga ni xitshembiso xa vutomi bya sweswi ni lebyi nga ta ta. 9 Marito wolawo ma tshembeka naswona ma fanele ma amukeriwa hi ku helela. 10 Hikwalaho hi tirha hi matimba naswona ha tikarhata, hikuva hi veke ntshembo wa hina eka Xikwembu lexi hanyaka, lexi nga Muponisi wa vanhu va mixaka hinkwayo, ngopfu-ngopfu wa lava tshembekaka. 11 Hambeta u nyika swileriso leswi naswona u dyondzisa ha swona. 12 Ku nga tshuki ku va ni munhu la byi langutelaka ehansi vuntshwa bya wena. Ku hambana ni sweswo, vana xikombiso xa lava tshembekaka eku vulavuleni, eku tikhomeni, erirhandzwini, eripfumelweni, evutengini. 13 Loko ndza ha ri endleleni, yana emahlweni u tinyiketela eku hlayeni ka le rivaleni, eku khongoteleni, eku dyondziseni. 14 U nga yi honisi nyiko leyi nga eka wena leyi u nyikiweke yona hi ku tirhisa ku bvumba ni loko huvo ya vakulukumba yi ku tlhandleka mavoko. 15 Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo. 16 Nyikela nyingiso lowu hambetaka eka wena ni le ku dyondziseni ka wena. Tshama eka swilo leswi, hikuva hi ku endla tano, u ta tiponisa wena swin’we ni lava va ku yingisaka.