“Ku Dyondza Dyondzo Yo Tiyisela”

LOKO hi ri karhi hi tshinelela makumu ya lembe xidzana ra vu-20, xana vanhu va dyondze tidyondzo to karhi eka matimu ya rona ya vukarhi ku sukela hi 1914? Federico Mayor, mukongomisi-nkulu wa UNESCO (United Nations Educational, Scientific, and Cultural Organization), a nga ri na ntshembo ngopfu eka xihloko lexi a xi tsaleleke The Unesco Courier. “Misava leyi yi vonakaka leswaku yi ya kwihi . . . a yi susumeteli leswaku munhu a hiseka hi mbilu hinkwayo. Hikwalaho ka xisekelo xa vukhongeri, vutiko, ni xihlawuhlawu xa rixaka ni ntlawa, ni ku vengiwa ka Vayuda: moya wa ntshunxeko wu vuyetele makala ya vukarhi. . . . Ku wa ka fambiselo ra khale ku pfule ndlela ya magoza lamantshwa ya tinxaka hinkwato, lama yan’wana ya wona ya nga ni mpfilumpfilu hi ndlela leyi hundzeletiweke—naswona madzolonga ya humelela ntsena handle ka xivangelo.”

Ha yini madzolonga ya humelela? Ha yini vanhu va vengana ni ku dlayana ntsena hikwalaho ka leswi va nga va vukhongeri kumbe ntlawa wa rixaka leri hambaneke? Hambi ku ri laha khale a ku vitaniwa Yugoslavia, hambi hi le India, hambi hi le N’walungwini wa Ireland, hambi hi le United States, kumbe kwihi na kwihi emisaveni, xin’wana xa swivangelo leswikulu swa madzolonga xi vonaka xi ri xa ku leteriwa hi ndlela leyi hoxeke. Ematshan’wini yo dyondza ku tiyiselelana ni ku xiximana, vanhu va dyondze ku nga tshembi munhu ni rivengo eka vatswari va vona, eswikolweni swa vona, ni le ka vanhu lava tolovelekeke.

Federico Mayor u ya emahlweni: “A hi rivaleni hi ku tiyisela loku ku nga twisisekiki loku lavaka leswaku hi tiyisela leswi nga tiyiselekiki—vusweti, ndlala ni ku xaniseka ka timiliyoni ta vanhu. Loko hi endla sweswo hi ta tiphina hi nkufumelo wa risana ra ntwela-vusiwana ni vumakwavo.” Lawa i mavonelo lamanene. Kambe xana i tindlela tihi leti tirhaka leti nga kona leti nga hundzulaka moya lowu dzwihaleke lowu kavanyetaka leswi vuriwaka misava ya hina leyi voningeriweke?

Ku tlula 2 500 wa malembe lama hundzeke, Esaya u tsale marito lawa ya Yehovha: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.” (Esaya 54:13) Leswi ‘Xikwembu xi nga rirhandzu,’ swi le rivaleni leswaku lava hakunene va hanyaka hi ku landza mimpimanyeto ya xona va ta dyondza ku rhula, ku nga ri nyimpi; va ta dyondza ku rhandzana, ematshan’wini ya ku vengana; va ta dyondza ku tiyisela, ematshan’wini ya ku tsandzeka ku tiyisela.—1 Yohane 4:8.

Xana i vamani lava seketelaka dyondzo leyi endlaka vanhu va va ni ku rhula, va rhandzana naswona va tiyiselelana? I vamani lava hanyaka hi vun’we ku nga khathariseki rixaka ra vona? I vamani lava amukeleke dyondzo ya Bibele leyi hundzuleke langutelo ra vona hinkwaro, va tshika rivengo, va rhandzana? Hi ku khutaza leswaku u kambisisa tidyondzo ni maendlelo ya Timbhoni ta Yehovha u xiya leswaku ha yini hakunene va ri ni vun’we emisaveni hinkwayo.—Yohane 13:34, 35; 1 Vakorinto 13:4-8.