Hina A Hi Vaendli Va Masalamusi Kumbe Swikwembu

HI KU VULA KA MERCY UWASI, NIGERIA

XITLHAVI lexi xa le khwirini xi ndzi sungule dyambu ri titlhaverile, hi ndzhenga wa le Afrika Vupela-dyambu hi March 1992. A ndzi fambe ni va le kaya hi ya le masin’wini ku ya cela ntsumbula. Loko hi ri kwale, xitlhavi xi sungule ku ndzi hisa ekhwirini. Hi nkarhi lowu hi nga tlhelela ekaya ha wona, xitlhavi a xo vila kunene. A ndzi hlanta; a ndzi nga koti ku hefemula kahle. Hambi leswi xitlhavi a xi endla ndzi nga koti ku yima hambi ku famba, mana wa mina u swi kotile ku ndzi khandziyisa ethekisini, leyi nga tsutsumela exibedlhele xa mani na mani lexi nga ekusuhi.

Le xibedlhele dokodela loyi a a tirha hi nkarhi wolowo a a ri wanuna loyi ndzi nga tshama ndzi n’wi chumayela hi ntshembo wa Bibele. Dokodela u khome khwiri ra mina; a ri pfimbile. U vutise leswaku xana a ndzi ri ni tingati, ivi mana wa mina a ku ina a ndzi ri enkarhini.

“N’wana wa wena u na ntlhanu wa tin’hweti a tikile,” ku vula dokodela. “Xivangelo xa leswaku a huma ngati hi leswaku u ringete ku susa khwiri.”

Manana u kanetile: “Nikatsongo Dokodela! Loyi a hi yena nhwanyana wa muxaka wolowo.”

“Sweswo u nga ki u swi vula. Vanhwanyana va masiku lawa va xisa vatswari va vona. Loyi u tikile.”

Ivi ndzi tivulavulela hi rito leri tlakukeke. Ndzi ku ndzi un’wana wa Timbhoni ta Yehovha naswona ndzi kurisiwe endyangwini wa Vukreste ni leswaku ripfalo ra mina leri leteriweke hi Bibele a ri ndzi pfumeleri ku hlanganyela eka mahanyelo yo biha.

Loko dokodela a hlamula u byele mana wa mina a ku: “Manana, a hi tshikeni swa vukhongeri hi langutana ni leswi nga swa xiviri. Ndza ku byela ndzi ri nhwanyana loyi u na ntlhanu wa tin’hweti a tikile.”

“Pfuka,” ku vula Manana. “Hi ya exibedlhele xin’wana.” Loko hi ri karhi hi huma emuakweni wolowo, ndzi tshame hansi ebyanyini ndzi rila hikuva a ndzi twa ku vava swinene. Manana u hatlise a ndzi yisa ekaya ivi a byela tata wa mina leswi dokodela a nga swi vula.

Va kunguhate ku ndzi yisa exibedlhele lexikulu lexi hluvukeke ku antswa lexi nyikelaka ni tidyondzo ta vuongori. Loko hi ri karhi hi ya kwale, ndzi khongele Yehovha leswaku a ndzi ponisa leswaku vanhu va nga sandzi vito rakwe lero kwetsima va ku ndzi dlawe hi nyimba leyi ndzi nga yi laviki. Ndzi ku loko ndzo fa, loko dokodela luya a vona Timbhoni ta Yehovha ti ta eku n’wi chumayeleni, u ta ku: ‘Xana a ku nga ri un’wana wa vanhu va ka n’wina la nga ta laha a ri ni khwiri enkarhini lowu hundzeke?’ Ndzi tlhele ndzi khongela leswaku ndzi kota ku tlhela ndzi ya eka dokodela luya ndzi ya n’wi nyikela vumbhoni nakambe.

“Wa Ha Ri Nhwana!”

Le xibedlhele lexikulunyana, ku tlhele ku pfuka mhaka yo fana ni ya le xibedlhele lexo sungula; vadokodela a va anakanya leswaku ndzi ni khwiri. Xitlhavi a xi tlurisa mpimo. A ndzi rila. Dokodela u vulavule hi vukarhi, a ku: “Hi swona leswi n’wina vanhwanyana mi swi endlaka minkarhi hinkwayo. Ma tika, ivi mi sungula ku hokoloka.”

Va endle minkambisiso. Hi nkarhi wolowo va sungule ku ndzi haxa hi swivutiso. “U tekiwile?”

“Doo,” ku hlamula mina.

“U na malembe mangani?”

“Khume-nhungu.”

“Xana u na swigangu swingani?”

“Ndzi hava xigangu na xin’we.”

Hi loko ndhuna ya vadokodela a sungula ku huwelela, “U ringeta ku vula yini? Xana u lava ku ndzi byela leswaku u ri na malembe ya 18 hi vukhale a wu na xigangu?” Nakambe, tanihi le xibedlhele lexo sungula, ndzi va hlamusele xiyimo xa mina xa Vukreste. Ivi a ndzi vutisa leswaku xana ndzi un’wana wa Timbhoni ta Yehovha. Ndzi ku ina. Endzhaku ka sweswo, a nga ha ndzi vutisanga xivutiso xin’wana.

Minkambisiso yi kombise leswaku a ndzi nga ri na khwiri. Manana u twe un’wana wa vadokodela a byela lavan’wana a ku: “Wa ha ri nhwana!” Vadokodela va kombele ndzivalelo, va ku: “Mi nge hi veki nandzu hikwalaho ka leswi a hi swi anakanya. Hi hlangana ni swilo leswi fanaka ni sweswo hi vanhwanyana masiku hinkwawo.” Hambi swi ri tano, maxangu wolawo a ku ri masungulo ntsena ya nhlomulo wa mina.

‘U Ta Yi Amukela Ngati’

Nkambisiso wa ku yingisela ntshuka-ntshuko lowu nga endzeni ka munhu wu kombise leswaku ku na nchumu lowu mileke eka rin’wana ra mathumbu ya mina laya fambisaka mandza. A wu kule ku ringana ni papalamusi leritsongo. A ku laveka vuhandzuri.

Handle ko kanakana ndzi va byele leswaku a ndzi nge wu amukeli mpompelo wa ngati hambi leswi ndzi nga pfumelaka swihalaki leswi nga swikhomela-ndhawu. Va sindzise leswaku ngati yona ya laveka.

Un’wana wa swichudeni swa vadokodela u ndzi holoverile, a ku: “Leswi u swi vulaka swi fana ni leswi un’wana wa swirho swa n’wina a nga tshama a swi vula enkarhini wun’wana lowu hundzeke. Kambe loko xiyimo xa yena xi ya xi tika, u pfumele mpompelo wa ngati.”

Ndzi n’wi hlamurile: “Eka mina ke swilo swi hi ndlela yin’wana, hikuva ina wa mina i ina naswona e-e wa mina i e-e. A ndzi nge byi landzuli vutshembeki bya mina.”

Endzhakunyana, vadokodela vanharhu va te emubedweni wa mina va ta vutisisa hi xiyimo xa mina hi tlhelo ro ala ngati. Ndzi va hlamusele leswaku Bibele yi ri Vakreste va fanele ku “tshika . . . ngati va nga dyi.”—Mintirho 15:20.

Va kanetile: “Kambe a wu nge yi nghenisi enon’wini wa wena. U ta yi nghenisa hi nsiha.”

Ndzi va byele leswaku a swi vuli nchumu leswaku u yi dya hi nomu kumbe hi nsiha, kambe sweswo swa fana.

Hi Mugqivela, March 14, vhiki endzhaku ka ku sungula ka xitlhavi xa mina, ndhuna ya vahandzuri a ndzi kambela. A a averiwe ku ndzi endla vuhandzuri. Hi nkarhi wolowo se a ku pfimbe ku fika exifuveni.

U ndzi vutisile, “Xana va ku byerile leswaku u ta boheka ku amukela ngati?”

“Dokodela, sweswo va ndzi byerile, kambe a ndzi nge yi amukeli ngati,” ku hlamula mina.

“Inge ndzi ku byela swin’wana,” ku vula yena. “U ta yi amukela. Loko u nga yi amukeli u ta fa. Hi Musumbhunuku, loko ndzi ta, loko ku nga ri na ngati leyi yimeleke wena, a ndzi nge byi endli vuhandzuri. Loko ku nga ri na ngati, a ku endliwi vuhandzuri.”

Ivi a vona buku leyi a yi ri etlhelo ka mubedo wa mina ivi a vutisa, “Xana i Bibele ya wena leyi?” Ndzi ku e-e; i kopi ya mina ya buku leyi nge Nghwazi Leyi Tshameke Yi Hanya.a U vule leswaku ndzi fanele ku tirhisa buku leyi ndzi khongela leswaku ndzi nga fi. Ndzi n’wi hlamusele leswaku hina a hi hlayi swikhongelo swa hina etibukwini. Loko hi ri na xiphiqo, hi khongela Yehovha swi huma embilwini.

Eka masiku mambirhi lama landzeleke, vadokodela ni vaongori a va hamba va ta va ta ndzi sindzisa ku pfumela mpompelo wa ngati. Va ndzi byele leswaku ndza ha ri ntsongo a ndzi si lulamela ku fa. Va ku: “Amukela ngati u ta hanya!”

“Yehova O Nḍi Yimele”

Hi minkarhi yoleyo ya maxangu, ndzi hlaye Pisalema 118, leyi xiphemu xa yona xi nge: “E makhombyeni ya mina nḍi khongerile Yehova; Yehova o nḍi yingisile, a nḍi v̌eka ku anameni. Yehova o nḍi yimele, a nḍi nga tšhav̌i ntšhumu. Munhu a nga nḍi endla yini?”—Pisalema 118:5, 6.

Endzhaku ko anakanyisisa hi tindzimana leti, ripfumelo ra mina eka Yehovha ri tiyisiwile. Mixo wolowo vatswari va mina va te exibedlhele. Ndzi va kombe pisalema yoleyo, na vona va titwe va tiyisiwile eripfumelweni.

Hi nkarhi wolowo, Mhani na Papa a va nga ndzi seketeli ntsena eka xiboho xa mina xa ku nga amukeli ngati kambe a va tlhela va ndzi khongelela. Swirho swa le vandlheni ra mina a swi ndzi khongelela swi ndzi khutaza hi Matsalwa.

“Hina A Hi Vaendli Va Masalamusi”

Hi Musumbhunuku, March 16, mixo lowu vuhandzuri a byi fanele byi endliwa ha wona, un’wana wa vadokodela u te ekamareni ra mina ivi a ndzi vona ndzi khome khadi ra Medical Directive, leri hlamuselaka xiyimo xa mina hi mpompelo wa ngati. A ku, “I yini lexi? Xana wa tiyiseka hi leswi a wu ri karhi u swi vula?”

“Ina, a ndzi nge yi amukeli ngati.”

A ku: “Hi swona, sweswo swi vula leswaku hi fanele ku tshika vuhandzuri bya wena. A ku nge endliwi vuhandzuri.”

Kutani dokodela a bela mana wa mina riqingho a ri ekamareni ra mina. Manana u te: “U kule hi ndlela leyi ringaneleke lerova a nga tiendlela xiboho hi yexe. Ndzi nga ka ndzi nga n’wi endleli xiboho. U ri ripfalo ra yena leri leteriweke hi Bibele a ri nge n’wi pfumeleli ku amukela ngati.”

Loko a twe sweswo u lahlele maphepha ya mina ehenhla ka tafula ivi a ba magoza a huma ekamareni. Ntlhanu wa tiawara ti hundzile hi nga twi nchumu. A ndzi twa ku vava naswona a ndzi nga koti ku dya. Naswona a ku nga ha ri na xibedlhele xin’wana endhawini yoleyo.

Kutani, lexi ndzi hlamariseke ku tisiwe rihlaka leswaku ri ta ndzi rhwala ri ndzi yisa ekamareni ro handzulela ka rona. A ndzi mane khadi ra mina ra “No Blood.” Loko hi ri karhi hi ya evuhandzulelweni ndzi vone switirho swo handzula ni swinkwamana swa ngati. Ndzi sungule ku rila swinene ndzi ri karhi ndzi ku ndzi nge yi amukeli ngati. Un’wana wa vaongori u ndzi byele leswaku ndzi cukumeta khadi ehansi. U vule leswaku a ndzi fanelanga ku nghena na rona le vuhandzulelweni. Ndzi n’wi byele leswaku ndzi nge ngheni ndzi nga ri na rona ni leswaku a ndzi lava ku ri komba ndhuna ya vahandzuri. Ivi muongori a vutla khadi leriya a nghena na rona evuhandzulelweni ivi a ri komba muhandzuri. Xikan’we-kan’we ndhuna ya vahandzuri ni vadokodela van’wana va ntlhanu va hume va ambale swiambalo swa vona swa vuhandzuri va ta le a ndzi ri kona.

Ndhuna ya vahandzuri a bava a khalakhasa. U kombele leswaku manana a vitaniwa, ivi a kombetela khwiri ra mina, ivi a ku ka yena: “Manana, twisisa leswi. A hi xi tivi lexi hi nga ta xi kuma endzeni ka yena. Loko hi boheka ku n’wi handzula swinene, ku ta huma ngati yo tala. Xana u lava leswaku a huma ngati a kondza a fa?”

Loko Manana a n’wi hlamula u te: “Dokodela, ndza swi tiva leswaku Yehovha u ta va ni xinhwanyetana lexi. Naswona u ta va na n’wina hi ku fanana. Endlani hinkwaswo leswi mi swi kotaka ivi mi tshikela Yehovha leswin’wana.”

Kutani dokodela a ku: “Hina a hi vaendli va masalamusi kumbe tin’anga ta mitsembyana. Hi tshemba leswi hi swi dyondzeke ntsena. A ndzi nge byi endli vuhandzuri lebyi handle ko tirhisa ngati.”

Manana u tlhele a n’wi kombela ku endla leswi a kotaka swona ntsena. Eku heteleleni, u pfumele ku endla vuhandzuri handle ka ngati. U ndzi vutise leswaku xana a ndzi chava. Ndzi n’wi hlamule ndzi ku: “Rifu a ndzi ri chavi. Ndza swi tiva leswaku Yehovha u na mina.”

“U Ya Emahlweni U Tirhela Xikwembu Xa Wena”

Vuhandzuri byi hetiwe ku nga si hela awara. Va ndzi pfurile ivi hi ku olova va humesa nchumu lowu mileke, swi hlamarisa vatirhi va le xibedlhele.

Endzhaku ka sweswo un’wana wa vadokodela u byele Mana wa mina leswaku vadokodela lava ha dyondzaka va vulavula hi mhaka ya mina ni vusiku le va tshamaka kona. Sweswi loko mina kumbe Mana wa mina hi ya le xibedlhele xexo, va hi tshungula hi ndlela yo hlawuleka.

Masiku mambirhi endzhaku ka vuhandzuri bya mina, muhandzuri u te ewodini ya mina, a vutisa leswaku ndzi titwa njhani, ivi a ku: “U fanele u ya emahlweni u tirhela Xikwembu xa wena. Hakunene xi ku pfunile.”

[Nhlamuselo ya le hansi]