Xiviko Xa Vahuweleri Va Mfumo
Yehova U Katekise Xiyimo Xa Vona Lexi Tiyeke eNawini Wakwe
ETIKWENI ra le Middle East, tatana a a lunghisa thayere leri phyeke etlhelo ka gondzo loko movha wu tlumba n’wana wakwe wa mune wa malembe kutani wu famba. N’wana la vavisiweke a vukarhiwe hi mana wakwe, tatana u tsutsumele exibedlhele xa le kusuhi kambe a rhumeriwa exibedlhele xin’wana xa vukule bya tikhilomitara ta 25. N’anga yi ehlekete leswaku ngati ya n’wana yi wele endzeni ni leswaku a a lava vuhandzuri ni mpompelo wa ngati. Tin’anga tin’wana ta nhungu ti swi pfumerile. Hi ku tiva nawu wa Xikwembu lowu alelaka mpompelo wa ngati, vatswari va arile. “Mi na timinete ta ntlhanu ntsena leswaku mi endla xiboho loko swi nga ri tano a hi nge n’wi khumbi n’wana wa n’wina hambi loko endzhaku mo amukela mpompelo wa ngati,” ku xungeta n’anga. Hi nkarhi wolowo, khwiri ra n’wana ri ye emahlweni ri kukumuka naswona a ri fika eka xiyimo lexi chavisaka.
Makwavo wa tatana, loyi a nga riki entiyisweni, u sindzise tatana ku pfumelela mpompelo wa ngati. U vule ni leswaku: “Ndza ku kombela, teka n’wana loyi a nga ri wa wena kambe a ri wa mina. Tanihi leswi ripfalo ra wena ri ku karhataka, ndzi ta rhwala vutihlamuleri, ku katsa ni ku hakela xibedlhele, n’wana a nyikiwa ngati leyi lavekaka. Loyi hi yena n’wana wa wena ntsena.” Ntshikilelo a wu tika ku wu rhwala, kambe vatswari a va tiyile exibohweni xa vona.
Va teke n’wana kutani va famba, va lava xibedlhele xin’wana, kambe va lahleka. Hi xiwelo va vone xikombiso xa xibedlhele xin’wana, kutani va ya eka xona, hambi leswi a ku nga ri xona lexi a va lava xona. Endzhaku ko vona n’wana n’anga yi te: “Ku kukumuka ka khwiri ra n’wana ku nga ha va ku ri xikombiso xa ku wela ka ngati endzeni kumbe ku nga ha va ku nga ri xona. Etlerisa n’wana, kutani mundzuku hi ta endla nkambisiso lowu lavekaka ku kumisisa.” Nkambisiso wu kombe leswaku ngati a yi nga humi, kambe ku kukumuka a ku vangiwa hi mhangu. A ku nga ri na xilaveko xa vuhandzuri. Entiyisweni, n’anga yi vule leswaku vuhandzuri a byi ta va byi vange khombo swinene. “Hi nkhensa Yehova” ku vula vatswari, “hi ku hlayiseka ka n’wana wa hina ni ku hi kongomisa exibedlhele lexi faneleke ni le ka n’anga leyi faneleke.”
Khume ra malembe endzhaku, a ku ri byihi vuyelo bya xiyimo lexi? Tatana wa hlamusela: “Makwerhu la ndzi sindziseke exibedlhele u tive xiyimo xa hina naswona a vona nkongomiso wa Yehova emhakeni leyi. Leswi swi pfuxete ku tsakela ka yena ntiyiso, lowu a wu amukeleke naswona sweswi u khuvuriwile naswona u tirha tanihi nkulu ebandlheni. Nsati ni n’wana wakwe va tirhela Yehova hi ku gingiriteka na yena. Vamakwerhu van’wana va mina vambirhi na vona va le ntiyisweni kun’we ni mindyangu ya vona, naswona un’wana wa vona u tirha tanihi nandza wa vutirheli. Tatana na manana va ha ku khuvuriwa sweswi ku nga khathariseki ku dyuhala ka vona. Kutani, hambi leswi a ku ri ntokoto wo chavisa eka mina na nsati wa mina, hikwalaho ka wona 30 wa swirho swa ndyangu wa ka hina swi amukele ntiyiso; van’wana ana se va khuvuriwile naswona va tirha tanihi vakulu ni malandza ya vutirheli. Van’wana va lunghiselela nkhuvulo. N’wana wa mina, loyi sweswi a nga na malembe ya 14, i muhuweleri la nga na rihanyo, la gingiritekaka naswona u yimele ku khuvuriwa. Hi nkhensa Yehova swonghasi mina na nsati wa mina loko a hi pfunile ku endla xiboho lexi faneleke lexi fambisanaka ni nawu wakwe lowu andlariweke eka Mintirho 15:29”!
[Xifaniso lexi nga eka tluka 27]
“Mi tshika tinyama leti tlhaveriweke swikwembu swa hava, mi nga dyi ngati”