Misava Yo Pfumala Nyimpi Ku Nga Ri Khale

TLHELA u byi languta nakambe vuprofeta bya Bibele eka Esaya lebyi nge: “Va ta fula mabanga ya vona ya va swikomu, ivi hi matlhari ya vona va endla tihwevo: tiko a ri nga ha lwi ni tiko rin’wana, hambi ku ri nyimpi a va nga ha yi dyondzi.” Xiya eka mongo wa kona leswaku lava va fulaka mabanga ya vona ya va swikomu i “vanhu vo tala” lava va fambaka etindleleni ta Xikwembu. (Esaya 2:2-4, King James Version) Leswi swi vula leswaku vanhu lava hi lava va gandzelaka Yehovha Xikwembu ivi va yingisa milawu yakwe. Xana i vamani?

Va fanele va ri vanhu va matiko lama hlanganeke lava va nga tshikangiki matlhari ya nyimpi kambe lava emianakanyweni ni le timbilwini ta vona va simuleke malangutelo ni mimboyamelo leyi vangaka madzolonga ni tinyimpi. (Varhoma 12:2) Ematshan’wini yo dlaya vaakelani va vona, va va rhandza. (Matewu 22:36-39) Xana u tshame u twa hi ta vanhu vo tano?

Kumbexana u tshame u twa leswaku Timbhoni ta Yehovha i vamakwavo emisaveni hinkwayo, naswona ti hlambe mavoko emhakeni yo rhwala matlhari ti ya dlaya vamakwavo. Anakanya ha swona: Loko un’wana ni un’wana emisaveni a a ri ni langutelo ro tano, xana pulanete leyi ya hina a a yi nga ta va ana yi ri ndhawu ya ku rhula ni ya nsirhelelo?

Kavula, a hi hinkwavo lava nga ni langutelo ro tano. Swi fana ni leswi Hosi Solomoni a tsaleke ha swona 3000 wa malembe lama hundzeke a ku: “Nḍi engeta kambe nḍi ṭunḍuka mašangu hikwawo la’ma humelelaka e hansi ka dyambu, nḍi v̌ona mihloti ya la’v̌a šanisiwaka, kambe ku nga ri na loyi a v̌a miyetaka. E tlhelo ra v̌ašanisi v̌a v̌ona, nḍi v̌ona ku nonoṅhwa, kambe ku nga ri na mumiyeti wa v̌ona.”—Eklesiasta 4:1.

Ku Rhamba Varhandzi Va Ku Rhula

Xana misava leyi nga riki na nyimpi yi ta kala yi va kona? Ina. Xana yi ta tisiwa hi matshalatshala ya vanhu? Doo. Xana yi ta tisiwa hi ku hundzuriwa ka vanhu vo tala va ya evukhongerini bya ntiyiso? Doo. Buku ya Bibele ya Tipisalema ya hlamula: “Tanani, mi hlalela mitiro ya Yehova, . . . O herise tinyimpi ku yisa e makuṅweni ya misav̌a, o ṭhov̌ile mav̌ura, o fayetele matlhari.” (Xiitaliki i xerhu.)—Pisalema 46:8, 9.

Xana Yehovha Xikwembu u ta swi endlisa ku yini sweswo? Buku ya Swivuriso ya hlamula: “Hikuv̌a la’v̌a lulameke v̌a ta aka misav̌eni, la’v̌o tenga v̌a ta siyiwa kona; kambe la’v̌o biha [lava nga yi xiximiki milawu ya Xikwembu], v̌a ta susiwa la misav̌eni, ni timbabva ti ta ṭhuv̌uriwa ka yona.”—Swivuriso 2:21, 22.

Xivangelo-nkulu xa leswaku ha yini Xikwembu xi nga tekangi goza ku nga si fika nkarhi lowu, hi lexi: Xi nyika vanhu nkarhi wo dyondza hi tindlela ta xona leswaku va famba emintileni ya xona. Muapostola Petro u tsale leswi: “Hosi a yi hlweli ku endla leswi yi nga tshembisa swona, hilaha van’wana va twisisaka ‘ku hlwela’ hakona, kambe yi lehisa mbilu hikwalaho ka n’wina; a yi lavi leswaku ni un’we wa n’wina a lova, kambe yi lava leswaku hinkwavo va ta eku hundzukeni.” (2 Petro 3:9) Xisweswo, vanhu va Xikwembu handle ka vutianakanyi va pfuna van’wana ku dyondza hi ta Yehovha. Hilaha Esaya a vuleke ha kona, va huwelela va ku: “Tanani, hi ta tlhandlukela nṭhav̌eni ya Yehova, . . . [u] ta hi dyonḍisa tindlela ta [ye]na.”—Esaya 2:3.

“E Mikarini Ya Makumo”

Tsalwa leri nga eka Esaya na rona ri vhumbe leswaku vanhu va ta dyondzisiwa tindlela ta ku rhula “e mikarini ya makumo.” (Esaya 2:2) Hi hanya enkarhini wolowo sweswi. Hi ndlela yo khovolela, tinyimpi ta lembe-xidzana leri ti kombise leswaku hi hanya kona.

Loko vadyondzisiwa va Yesu va n’wi vutise leswi nga ta fungha makumu ya mafambiselo lawa ya swilo, u vhumbe leswaku “ku tsekatseka ka misava; mintungu ni tindlala swi ta va kona ematlhelweni layo tala.” (Luka 21:11; Matewu 24:3) U tlhele a vula leswi: “Loko mi twa huwa ya tinyimpi ni ya mikitsikitsi, mi nga tshuki mi chava, hikuva sweswo swi fanele ku rhanga swi humelela, kambe makumu wona ma ta hlwela ku fika. Yesu a engeta a ku ka vona: ‘Tiko rin’wana ri ta pfukela rin’wanyana, mfumo wun’wana wu ta lwa ni wun’wanyana.’”—Luka 21:9, 10.

Hambileswi ku veke ni tinyimpi eka magidi ya malembe, eka lembe-xidzana leri ri ri roxe ku ve ni tinyimpi timbirhi ta misava, naswona hi ku ya hi tinhlayo tin’wana, ku ve na madzana ya tinyimpi letitsongo. Yi chavisa ngopfu mhaka ya leswaku etinyimpini ta lembe-xidzana leri ku fe makume ya timiliyoni ta vanhu. Hi ku ya hi magazini wa World Watch, emalembeni ya 2000 emahlweni ka lembe-xidzana leri ra vu-20, hi avhareji, a swi teka kwalomu ka 50 wa malembe leswaku ku fa vanhu lava endlaka miliyoni enyimpini. Eka lembe-xidzana leri, hi avhareji, swi teka lembe rin’we ntsena leswaku enyimpini ku fa miliyoni ya vanhu.

Misava Leyi Nga Riki Na Nyimpi

Tinyimpi leto chavisa ta lembe-xidzana ra hina, xikan’we ni ku hundzuka kun’wana loko tala loku vhumbiweke evuprofeteni bya le Bibeleni, swi kombisa leswaku hi le nyangweni ya misava leyintshwa leyi Xikwembu xi nga ta yi endla. Vufendze bya misava ya khale byi ta kukuriwa ivi byi siviwa hi “misava leyintshwa,” laha ku nga ta tala ku rhula ni ku lulama. (2 Petro 3:13) Rito ra Xikwembu ri ri: “La’v̌o biha v̌a ta susiwa, kambe la’v̌a ṭhembaka Yehova v̌a ta fuma misav̌a. V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.”—Pisalema 37:9, 11.

Namuntlha, emisaveni hinkwayo timiliyoni ta ntsandza-vahlayi ti navela misava leyi nga riki na nyimpi. Ku kombisa leswaku Xikwembu xi tiyisile hi ku hetisisa xitshembiso xa xona xa ku vumba misava yo tano, muprofeta wa Xikwembu khale ka khaleni u tsale a ku: “Hikuv̌a hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endlakala ŝinene, yi nga ka yi nga hlweri.”—Habakuku 2:3.

Hikwalaho, hi vutlharhi, tshemba Xikwembu kutani u vona ku hetiseka ka xitshembiso xa xona: “Xikwembu hi xoxe xi ta va na vona [vanhu va xona], xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”—Nhlavutelo 21:3, 4.

Leswi Bibele Yi Swi Tshembisaka Emisaveni Yoleyo Leyintshwa:

A Ku Nga Vi Na Vugevenga, Madzolonga, Kumbe Vuhomboloki

“[Xikwembu xi] herise tinyimpi ku yisa e makuṅweni ya misav̌a.”—Pisalema 46:9.

“La’v̌o biha v̌a ta susiwa, . . . Ku sele nkarinyana, kutani lo’wo biha a nga ka a nga ha v̌i kona.”—Pisalema 37:9, 10.

Vanhu Hinkwavo Va Ta Va Eku Rhuleni

“Hi v̌elekeriwe ṅwana, hi nyikiwe ṅwana wa wanḍisanyana, v̌uhosi byi v̌ekiwile khatleni ra yena. O ta tšhyiwa . . . Hosi ya ku rula; . . . ku fuma ka yena [ni] ku rula [ku ta va] lo’ku nga heriki.”—Esaya 9:6, 7.

Misava Hinkwayo Yi Va Paradeyisi

Yesu u te: “U ta va na mina eParadeyisini.”—Luka 23:43.

“La’v̌o lulama v̌a ta fuma misav̌a, v̌a ta ṭhama ka yona hi masiku.”—Pisalema 37:29.

Vumakwerhu Bya Rirhandzu eMisaveni Hinkwayo

“Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” —Mintirho 10:34, 35.

Ku Pfuxiwa Ka Varhandziwa Lava Feke

“Nkarhi wa ta lowu hinkwavo lava nge masirheni va nga ta twa rito ra [Yesu], kutani va ta huma.”—Yohane 5:28, 29.

A Ku Nga Ha Vi Na Vuvabyi, Vudyuhari, Kumbe Rifu

“Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” —Nhlavutelo 21:4.