Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • g 4/08 matl. 8-9
  • Ku Ta Endleka Yini Endzhaku Ka Masiku Yo Hetelela?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ku Ta Endleka Yini Endzhaku Ka Masiku Yo Hetelela?
  • Xalamuka!—2008
  • Swihloko
  • Tinhlokomhaka Tin'wana Leti Yelana Na Yona
  • Leswi Xikwembu Xi Swi Tshembisaka
  • Misava Yo Pfumala Nyimpi Ku Nga Ri Khale
    Xalamuka!—1996
  • Hanya Hi Masiku eMisaveni Ya Paradeyisi
    Xana Xikongomelo Xa Vutomi I Yini? U Nga Xi Kumisa Ku Yini?
  • Vutomi eParadeyisini Leyi Kondleteriweke
    Xalamuka!—2008
  • Vumundzuku Lebyi Vangamaka Bya Misava eHansi Ka Mfumo Wa Xikwembu
    Xihondzo xo Rindza Xi Huwelela Mfumo Wa Yehovha—1988
Vona Swo Tala
Xalamuka!—2008
g 4/08 matl. 8-9

Ku Ta Endleka Yini Endzhaku Ka Masiku Yo Hetelela?

VANHU van’wana va chava ku anakanya hi ‘masiku yo hetelela.’ (2 Timotiya 3:1) Va anakanya ntsena leswaku ku ta va ni minkarhi yo nonon’hwa. Kutani ha yini vanhu vo tala swinene emalembeni yo tala lama hundzeke va ma langutele hi mahlo-ngati? Hikuva masiku yo hetelela ma tlhela ma kombisa leswaku ku ta ta minkarhi leyinene.

Hi xikombiso, nkulukumba Isaac Newton a a khorwiseka leswaku enkarhini wa makumu a ku ta va ni nkarhi lowuntshwa laha a ku ta va ni ku rhula naswona swilo swi famba kahle emisaveni hinkwayo ehansi ka Vulawuri bya Mfumo wa Xikwembu lowu nga ta fuma Gidi ra Malembe. U vule leswaku vuprofeta bya Mikiya 4:3, swin’we ni bya Esaya 2:4, byi ta hetiseka hi nkarhi wolowo: “Va ta fula mabanga ya vona ma va swikomu ni mafumu ya vona ma va swikhutulo. A va nge ri tlakusi banga, tiko rin’wana ku lwa ni tiko rin’wana, naswona a va nge he dyondzi nyimpi.”

Loko Yesu a vulavula hi nkarhi wa makumu, u khutaze valandzeri va yena leswaku va va ni langutelo lerinene. Endzhaku ko vulavula hi maxangu, nhlomulo ni ku chava loku a ku ta va kona hi nkarhi wa nhlomulo lowukulu, u te: “Loko swilo leswi swi sungula ku humelela, yimani mi ololoka ivi mi tlakusa tinhloko ta n’wina, hikuva ku kutsuriwa ka n’wina ka tshinela.” (Luka 21:28) Ku kutsuriwa eka yini?

Leswi Xikwembu Xi Swi Tshembisaka

Nyimpi ya matiko ni ya xin’wana-manana, vugevenga, madzolonga ni ndlala i swin’wana swa swilo swi nga ri swingani leswi xanisaka vanhu namuntlha naswona swi endla leswaku vanhu va timiliyoni va hanya hi ku chava. Xana u tshame u humeleriwa hi swin’wana swa swilo leswi? Kutani xiya leswi Xikwembu xi swi tshembisaka:

“Hi nkarhinyana, lowo homboloka a nge he vi kona . . . Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:10, 11.

“Vanhu va mina va ta tshama endhawini yo rhula ni le ka vutshamo lebyi tshembiwaka hi ku helela ni le tindhawini to wisela leti nga kavanyetiwiki.”—Esaya 32:18.

“[Yehovha] u herisa tinyimpi ku ya fika emakumu ya misava. Vurha u byi tshova hi le xikarhi naswona u tshovelela fumu; tigolonyi u ti hisa endzilweni.”—Pisalema 46:9.

“Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.”—Mikiya 4:4.

“Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:16.

“Loko ku ri loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”—Swivuriso 1:33.

Hambiloko hi tshama endhawini leyi swiyimo swa kona swi tsakisaka, hinkwerhu hi nga ha vabya hi tlhela hi fa. Swilo sweswo na swona swi ta va swi nga ha ri kona emisaveni leyintshwa ya Xikwembu. Hikokwalaho, hi nga langutela ni ku tlhela hi vona varhandziwa va hina lava feke. Xiya leswi landzelaka:

“Ku hava munhu la tshamaka kona la nga ta ku: ‘Ndza vabya.’”—Esaya 33:24.

“[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.

“Rifu i nala wo hetelela la nga ta herisiwa.”—1 Vakorinto 15:26.

“Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.”—Yohane 5:28, 29.

Muapostola Petro u katsakanye timhaka leti hinkwato hi ndlela leyinene loko a tsala a ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” (2 Petro 3:13) Leswaku ku va ni ku lulama emisaveni hinkwayo, ku fanele ku susiwa munhu wihi na wihi loyi a nga ta kavanyeta swiyimo swoleswo swo lulama. Nakambe ku fanele ku susiwa matiko lama nga kona namuntlha, lama vangaka madzolonga ni ku halatiwa ka ngati hileswi va lavaka ku hetisisa ku navela ka vona vini. Vulawuri hinkwabyo bya laha misaveni byi ta siviwa hi Mfumo wa Xikwembu lowu wu nga ta va wu lawuriwa hi Kreste. Ha tiyisekisiwa malunghana ni mfumo wolowo: “Ku tala ka ku fuma ka vuhosana ni ku rhula a swi nge vi na makumu, exiluvelweni xa Davhida ni le mfun’weni wa yena leswaku a wu simeka wu tiya ni ku wu seketela hi vululami ni hi ku tshembeka, ku sukela sweswi ku ya enkarhini lowu nga riki na makumu. Ku hiseka ka Yehovha wa mavuthu ku ta swi endla.”—Esaya 9:7.

Na wena u nga va ni vumundzuku lebyi, hikuva Bibele ya hi tiyisekisa yi ku: “[Ku rhandza ka Xikwembu hi] leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) U nga ha yimayimi. Nghenisa vutivi lebyi vulaka vutomi lebyi nga heriki. (Yohane 17:3) Rhanga hi ku vulavurisana ni vakandziyisi va magazini lowu kutani u kombela dyondzo ya mahala ya le kaya ya Bibele.

[Swifaniso leswi nga eka tluka 8, 9]

U nga langutela ku hanya hilaha ku nga heriki hi ku rhula naswona u ri ni rihanyo leri hetisekeke eParadeyisini leyi taka laha misaveni

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela