Matimba Ya Vunavetisi

KHALE loko ku nghena swinavetisi eka thelevhixini a ku rhanga ku vuriwa marito lawa, “Sweswi hi ta twa marito ma nga ri mangani lama humaka eka museketeri wa hina.” Vaseketeri lava i tikhampani leti hakelaka mali leswaku swixavisiwa swa tona swi navetisiwa. Hambiloko “marito ma nga ri mangani lama humaka eka museketeri” ma hundzuke marito yo tala, vaseketeri va ha seketela ku haxiwa ka mahungu ni mintlango hi timali—eka thelevhixini, timagazini, maphepha-hungu ni le ka xi-ya-ni-moya. Hikwalaho, vaseketeri va ringeta ku lawula leswaku i yini leswi faneleke swi haxiwa eka swihaxa-mahungu ni leswi nga fanelangiki ku haxiwa.

Hi xikombiso: Hi 1993 khampani leyi xavisaka movha wa xiyimo xa le henhla wa le Jarimani, yi tsalele timagazini ta 30 yi lerisa leswaku swinavetisi leswi kombisaka movha wa vona swi fanele swi kombisiwa eka “matluka lama faneleke ntsena.” Papila leri ri vule leswaku timagazini leti nga ni swinavetisi swa vona a ti fanelanga ti humesa rungula rihi na rihi leri sandzaka movha wa vona, swixavisiwa leswi humaka eJarimani kumbe tiko ra Jarimani hi roxe. Ina, a swi hlamarisi leswi khampani leyi leyi tirhisaka 74,6 wa timiliyoni ta tirhandi eka vunavetisi bya le ka timagazini, yi lavaka ku tirhisiwa “matluka lama faneleke ntsena.”

Nakambe a swi hlamarisi leswi timagazini leti navetisaka tirhoko letintshwa ta mucato ti nga pfumeliki ku navetisa tirhoko ta mucato leti tshameke ti tirhisiwa kumbe maphepha-hungu lama nga ni nxaxamelo wa vaxavisi switandi ma nga ku byeliki leswaku yindlu u nga yi xavisisa ku yini loko u nga ri na xona. Hi laha ku fanaka a swi fanelanga swi hi hlamarisa loko swihaxa-mahungu leswi navetisaka tisigarete kumbe mibejo swi nga ku soli ku dzaha kumbe gembula.

Vanhu Lava Rhandzaka Ku Xava

Hikwalaho, nkucetelo wa vunavetisi a wo xavisa nhundzu ntsena. Wu endla vanhu va rhandza ku xava, ku nga mukhuva lowu funengetaka misava hinkwayo, wo hlongorisa swilo leswi vonakaka.

Xana ku na leswi hoxeke emhakeni leyi? Swi ya hi ku xivutiso lexi u xi vutisa mani. Vanavetisi va vula leswaku vanhu va rhandza ku xava ni ku va ni swilo; vunavetisi byi pfuna vona. Tlhandla-kambirhi, va vula leswaku vunavetisi byi endla leswaku ku va ni mintirho, byi seketela mintlango ni mintirho yin’wana ya ntivo-vuxongi, byi endla leswaku ku va na ni swihaxa-mahungu leswi kumekaka hi ku olova, byi endla leswaku ku va ni mphikizano, byi antswisa swixavisiwa, byi endla leswaku minxavo yi tshama yi ri ehansi naswona byi endla leswaku vanhu va va ni vutivi hi swilo leswi va lavaka ku swi xava.

Van’wana va vula leswaku vunavetisi byi endla leswaku vanhu va nga tshamiseki ni ku nga eneriseki hi swilo leswi va nga na swona, byi hlohlotela ni ku pfuxa ku navela swilo loku nga heriki. Muendli wa ndzavisiso, Alan Durning wa tsala: “Swinavetisi, swo fana ni swa nguva ya hina swa cinca-cinca, swi rhangisa ntsako emahlweni, swi ni swifaniso swo tala, swi lawuriwa hi tifexeni; swi dzunisa vanhu, swi khutaza ku xavetela swilo tanihi ndlela ya ku fikelela ku eneriseka ka munhu hi xiyexe naswona swi vula leswaku nhluvuko wa thekinoloji hi wona wu khomeke vumundzuku bya hina.”

Nkucetelo Wa Byona Eka Wena

Xana swinavetisi swa byi cinca vumunhu bya hina ni leswi hi swi navelaka? Kumbexana. Hambiswiritano, leswaku nkucetelo i wukulu kumbe a wu nyawuli swi titshege hi minkucetelo yin’wana.

Loko hi kongomisiwa hi misinya ya milawu ni mimpimanyeto ya Bibele, hi ta swi xiya leswaku a swi hoxanga ku va ni swilo leswi vonakaka. Kahle-kahle, Xikwembu xi katekise Abrahama, Yobo, Solomoni ni van’wana hi rifuwo ro tala.

Kambe, loko hi tirhisa misinya ya milawu ya Matsalwa, hi ta papalata ku vilela ka lava va lavaka ku eneriseka ni ntsako hi ku tshamela ku hlongorisa swilo leswi vonakaka. Rungula ra Bibele a ri vuli swona leswaku “Xavetela kukondza u karhala.” Ematshan’weni ya sweswo yi ri:

Tshemba Xikwembu. “Lerisa lava fuweke emafambiselweni ya sweswi ya swilo leswaku va nga titekeli ehenhla, naswona va nga veki ntshembo wa vona erifuweni leri nga tiyangiki, kambe va wu veka eka Xikwembu, lexi hi nyikaka swilo hinkwaswo hilaha ku fuweke leswaku hi tiphina.”—1 Timotiya 6:17.

Eneriseka. “A hi tanga na nchumu emisaveni, naswona a hi nge fambi na nchumu. Kutani, loko hi ri ni swakudya ni swifunengeto, hi ta eneriseka hi swilo leswi.”—1 Timotiya 6:7, 8.

Ringanisela. “Ndzi navela leswaku vavasati va tisasekisa hi swiambalo leswi langutekaka, hi xichavo ni mianakanyo yo hluteka, ku nga ri hi tindlela to horha misisi ni nsuku kumbe tiperela kumbe swiambalo swa ntsengo lowukulu, kambe hi ndlela leyi fanelaka vavasati lava vulaka leswaku va chava Xikwembu, hi mintirho leyinene.”—1 Timotiya 2:9, 10.

Tsundzuka leswaku vutlharhi bya ku chava Xikwembu byi tlula rifuwo. “Ku katekile munhu loyi a kumaka ku twisisa, ni loyi a kumaka v̌utlhari! Hikuv̌a binḍu ra byona ri tlula silver, ni ku anḍa ka byona ku tlula nsuku; byi tlula tiperla hi risima, hikwaŝo le’ŝi nav̌etaka a ŝi byi ringani. Ku leha ka masiku ku le v̌okweni ra šinene ra byona; ku fuma ni ku twala ŝi le v̌okweni ra šimaṭi. Tindlela ta byona i tindlela le’ti ṭakisaka, mitila ya byona yi ni ku rula. I muri wa v̌utomi e ka la’v̌a byi fuweke, la’v̌a byi hlayisaka v̌a katekile.”—Swivuriso 3:13-18.

Dyondza ku nyika. “Ku nyika swi tisa ntsako lowukulu ku tlula ku amukela.”—Mintirho 20:35.

Un’wana a nga ha vula leswaku nxaxamelo lowu wa swihloko i muxaka wun’wana wa vunavetisi, lowu “seketelaka” dyondzo ya leswaku swilo swa moya a swi fanelanga swi bakanyeriwa etlhelo hikwalaho ka swilo leswi vonakaka. A swi kanakanisi leswaku na wena u pfumelelana na yona mianakanyo leyi.

[Box on page 27]

Ku Twarisa Mfumo Wa Xikwembu

Hi yihi ndlela yin’wana leyinene yo fikelela vanhu hi rungula leri khorwisaka? Buku leyi nge Advertising: Principles and Practice yi ri: “Ehansi ka swiyimo leswinene muendli wa nhundzu un’wana ni un’wana, a nga swi kota ku vulavurisana hi ku kongoma ni muxavi un’wana ni un’wana malunghana ni xixavisiwa xo karhi kumbe mpfuno lowu u wu kumaka loko u xava.” Vakreste va ntiyiso hi ku tirhandzela a va twarisa Mfumo wa Xikwembu hi ku tirhisa ndlela leyi ku ringana malembe ya kwalomu ka 2000. (Matewu 24:14; Mintirho 20:20) Ha yini van’wamabindzu vo tala va nga tirhisi endlelo leri ro fikelela vanhu? Buku leyi ya hlamusela: “Ri durha ngopfu. Loko vanhu lava xavisaka va endzela vanhu emakaya swi nga koxa mali ya kwalomu ka R745 eka riendzo ha rin’we.” Kambe, Vakreste va “twarisa” Mfumo wa Xikwembu hi ku tirhandzela. I xiphemu xa vugandzeri bya vona.

[Xifaniso lexi nga eka tluka 26]

Rungula ra Bibele a ri vuli swona leswaku “Xavetela kukondza u karhala”