Vekela Vana Va Wena Masungulo Lamanene eVuton’wini

HI MUTSARI WA XALAMUKA! LE CANADA

◼ Magazini wun’wana wu vula leswaku “thelevhixini yi nga va xitirho xa kahle swinene xo dyondza ha xona.” (The New York Times) Kambe “ku tshama emahlweni ka TV ku ringana tiawara to tala swi ya swi nyanya ku onha mimiri ni mianakanyo ya vana,” swi endla leswaku va nga ha kumi nkarhi lowu va nga tiendlelaka swilo ha wona, ku dyondza ni ku ka va nga ha koti ku vulavurisana ni van’wana.

Phepha-hungu rin’wana ri vula leswaku endzhaku ko kambisisa mahanyelo ya vana va 2 500, vakambisisi va le Xibedlhele xa Vana le Seattle, eWashington, le U.S.A., “va kume leswaku vana vo tala lava hlalelaka TV lava nga ni malembe manharhu, va le khombyeni lerikulu ro va ni swiphiqo swo rhiya ndleve loko va ri ni malembe ya nkombo.” Vana volavo a va nyanya ku kariha ni ku va ni ximbilwambilwana naswona va ya va nga ha swi koti ku rhiya ndleve nkarhi wo leha. Hi ku ya hi Dok. Jane M. Healy wa mianakanyo, “vatswari vo tala lava nga ni vana lava nga ni vuvabyi byo tsandzeka ku rhiya ndleve va kuma swi va tikela ku antswisa endzhaku ka loko va hungute minkarhi yo hlalela thelevhixini.”

Xana vatswari va nga endla yini leswaku va hunguta nkarhi lowu vana va vona va wu hetaka va ri eku hlaleleni ka thelevhixini? Xiviko xi nyikele swiringanyeto leswi landzelaka: Veka swipimelo swa leswaku thelevhixini mi ta yi hlalela rini naswona mi heta nkarhi wo tanihi kwihi eka siku ha rin’we. Papalata ku endla thelevhixini leswaku yi ku tlangela ni n’wana. Ku ri na sweswo, endla leswaku vana va wena va katseka swinene eku endleni ka mintirho yo tala ekaya. Hlawula minongonoko leyi n’wana wa wena a nga yi hlalelaka, ivi u tima thelevhixini loko minongonoko yoleyo yi herile. Loko swi koteka, hlalela minongonoko leyi u yi hlawuleke ni vana mi tlhela mi bula hileswi mi swi vonaka. Xo hetelela, hunguta nkarhi lowu u wu hetaka u ri karhi u hlalela thelevhixini.

Ku dyondzisa vana leswaku va va ni vutshila swi teka nkarhi wo leha, swi lava u tiyimisela u tlhela u tinyika nkarhi. Vuyelo lebyinene lebyi vaka kona bya pfuna swinene. Mhaka leyi yi seketeriwile hi xivuriso xa khale lexi nge: “Letela mufana hi ndlela leyi nga yakwe; hambiloko a kurile a nge hambuki eka yona.” (Swivuriso 22:6) Xiphemu xa nkoka eka ndzetelo wolowo xi katsa ku dyondzisa vana hi ndlela leyi faneleke.

Timbhoni ta Yehovha ti swi kota kahle ku dyondzisa vana va tona mahanyelo lamanene hileswi ti tirhisaka buku leyi nge Dyondza Eka Mudyondzisi Lonkulu. Hakunene ku vulavurisana lokunene ni ku va vatswari va rhiya ndleve loko vana va vona va ha ri vatsongo swi ta endla leswaku va tiyiseka leswaku vana va ta pfuneka niloko se va kurile. Kunene a wu kona nchumu lowu tsakisaka swinene ku tlula ku va vatswari va vona vana va vona va kula va ri vanhu lava xiximekaka ni ku va ni vutihlamuleri!