Yehova—Wa Chavisa Kambe U Na Rirhandzu

“MI TA nḍi fanisa na mani leŝaku nḍi fana na yena šana?” ku vutisa Yehova Xikwembu. Hambi ku ri ririmi leri tinyungubyisaka ri nga ka ri nga swi koti ku tlhantlha matimba ni ku kwetsima loku nga ringanisiwiki ka Xikwembu. Yena hi yexe u hi rhambela ku anakanya hi vuandlalo bya matilo a ku: “Tlakusani mahlo ya n’wina, mi languta! I mani Ta tumbulušeke ŝilo ŝeŝo, l’a fambiseke hi ku ri šašameta e v̌andla ra ŝona šana? Wa ŝi v̌itana hikwaŝo hi mav̌ito ya ŝona; hi ntamu lo’wukulu wa yena, ni matimba la’makulu ya yena, ku hav̌a šiṅwe le’ši pfumalekaka.”—Esaya 40:25, 26.

Magidi ya tinyeleti leti vonekaka eka mahlo ya nyama to va xiphemu ntsena xa 100 wa tibiliyoni leti vumbaka vandla ra hina ra tinyeleti hi roxe! Kambe Yehova u hlayile no thya tinyeleti hinkwato mavito exibakabakeni hinkwaxo! Nakambe xiya, ntamu lowukulu lowu nga eka vuako lebyi hinkwabyo. Dyambu ra hina ri na mahiselo ya mpimo wa timiliyoni ta 27 ta Fahrenheit (15 wa timiliyoni ta mahiselo ya Celsius). I ‘ntamu muni lowukulu’ swonghasi lowu Yehova a a fanele ku va na wona leswaku a vumba tibiliyoni ta makala lawa ya nyutliya!

Hikwalaho ku twisisa Yehova hi laha ku heleleke swi nonon’hwela vuswikoti bya hina lebyi pimiweke. Elihu u te: “Hi nga ka hi nga ṭhineli Lo’wa matimba-hikwawo, O tlakukile hi matimba . . . Hikwalaho, v̌anhu v̌a fanele ku tšhav̌a Šikwembu.” (Yobo 37:23, 24) Hambi swi ri tano, Yehova, u lava ku tlula xichavo xa hina ntsena. Bibele ya lerisa: “U ta ranḍa Yehova, Šikwembu ša wena, hi mbilu hikwayo ya wena, ni moya hikwawo wa wena, ni matimba hikwawo ya wena.” (Deuteronoma 6:15) Kambe hi nga rhandza munhu loyi hi nga n’wi twisisiki hi laha ku heleleke xana? Ina, hikuva hambi leswi vutshamo bya Yehova byi nga le henhla ematilweni, u tirhisana hi rirhandzu ni vanhu lava nga hetisekangiki naswona u va pfumelela leswaku va n’wi twisisanyana.—Ringanisa Psalma 113:5-9.

“Mahlo,” “Tindleve,” Na “Mombo” Wa Yena

Ndlela yin’wana leyi Yehova a hi pfunaka leswaku hi n’wi twisisa i ku va a pfumela ku hlamuseriwa hi marito ya vumunhu. Muapostola Petro u te: “Mahlo ya Hosi [Yehova] ma tsakela lavo lulama, ni tindleve ta yona ti pfulekele swikhongelo swa vona, kambe mombo wa Hosi wu fularhela lava endlaka swo biha.”—1 Petro 3:12; ringanisa Eksoda 15:6, Ezekiel 20:33; Luka 11:20.

Kavula, leswi i swigego leswi nga fanelangiki ku tekiwa swi ri swa xiviri, tanihi leswi Matsalwa ma vulaka leswaku Xikwembu i “dyambu,” ‘xitlhangu,’ kumbe “Ribye.” (Psalma 84:11; Deuteronoma 32:4, 31) Van’wana va nga ha ku: ‘Kasi Bibele a yi vuli leswaku hi endliwe hi “xifaniso” xa xona xana?’ (Genesa 1:26, 27) Ee, kambe ku vula leswaku Xikwembu xi na nomo wa xiviri, nhompfu na tindleve swi vanga swirhalanganya leswikulu. Hi xikombiso, ku twa ka Xikwembu xa le Henhla-henhla, hakunene ku nga hikiwa hi leswi magandlati ya mpfumawulo ma nga swi yisaka etindleveni ta xiviri? E-e, hikuva Bibele yi kombisa leswaku Xikwembu xi nga swi kota ku “twa” hambi ku ri marito lama vuriwaka hi mbilu ya munhu. (Genesa 24:42-45) Naswona matimba ya xona ya ku “vona” a ma tiseketeli hi magandlati ya ku vonakala.—Psalma 139:1, 7-12; Vaheveru 4:13.

Xisweswo munhu loyi a hetisekeke a nga voni ntsena swivumbeko swa nyama, kambe u vona timfanelo ta Xikwembu to tanihi rirhandzu ni vululami. Ngopfu-ngopfu Vakriste va kombisa timfanelo to tano loko va hlayisa xitsundzuxo xa muapostola Pawulo, loyi a nge te: “Hikuva mi ambarile munhu wa hanyelo lerintshwa loyi a pfuxetiwaka kambe na kambe, leswaku mi kota ku tiva swinene loyi a mi tumbuluxeke hi xifaniso xa yena.”—Vakolosa 3:10.

Swivono Swa Ku Kwetsima

Eminkarhini ya khale, malandza yan’wana ya Yehova ma vile na lunghelo ro amukela swivono leswi huhuteriweke swa ku kwetsima ka Yehova ka le tilweni. Ezekiyele a ri un’wana wa vanhu lava. (Ezekiel 1:1) Leswi a swi voneke exivonweni a swi tika ku swi hlamusela! Ezekiyele u tirhisile swigego ni swifananiso, hakanyingi a vula leswaku lexi a xi voneke ‘a xi fana’ ni nchumu wo karhi lowu tolovelekeke. Hi xikombiso, muprofeta loyi u te:

“A ku v̌onaka šilo leši nga fana ni ribye ra safri le’ri nga ni ngohe ya šiluv̌elo; e henhla ka šifaniso leši ša šiluv̌elo a ku v̌onaka šilo leši ngi ši ri ni ngohe ya munhu. Kutani nḍi v̌ona šilo le’ši fanaka ni kopor loko yi v̌ila; e ku sukela ka le’ši nga fana ni šisuti ša yena ku ya henhla, ni ku sukela kona ku ya hansi, nḍi v̌ona šilo leši fanaka ni nḍilo, ni ku v̌onakala lo’kukulu e matlhelo hikwawo. Hi laha ku saseka ka nkwangulatilo emapapeni hi siku ra mpfula, a ku sasekile ŝeŝo e matlhelweni hikwawo hi ku v̌onakala loku: A yi ri nhlav̌utelo ya ku kwetsima ka Yehova.”—Ezekiel 1:26-28.

I ku kwetsima muni konghasi loku Ezekiyele a ku hlamuselaka! Muapostola Yohane u vone xivono lexi fanaka xa Yehova, naswona u tsarile a ku: “Kutani ndzi vona xiluvelo xi ri etilweni. A ku tshamile un’wana exiluveIweni xa kona. Loyi a tshameke eka xona a a languteka ku fana ni maribye ya nkoka ya “yaspere” ni ya “sardiyo,” kutani xiluvelo a xi rhendzeriwile hi nkwangulatilo lowu wu langutekaka ku fana na emeralda.” (Nhlavutelo 4:1-3) Hambi leswi Yehova a fanisiwa ni swilo swo tano swa ntikelo, a nga kombisiwi a ri Xikwembu xa tihanyi. Kambe xiyimo xa xona hi lexo hola ni ku rhula kukotisa nkwangulatilo.—Ringanisa Genesa 9:12-14.

Mhaka ya leswaku Xikwembu xi pfumelele hambi ya ri malangutelo yo tano lama pimiweke ya vukulu bya xona bya le tilweni swi komba leswaku makungu ya xona eka vanhu i yo rhula. Kunene, lava va rhandzaka Xikwembu manuku, va nga xi tshinelela hi ku tiyiseka tanihi ‘muyingisi wa mikhongelo’ wa tintswalo.—Psalma 65:2.

Yobo u vulavule hi Xikwembu a ku: “V̌ona ŝeŝo i v̌uhandle bya tindlela ta šona, hi twa tingomela le’tiṭanana ta šona ntsena!” (Yobo 26:14) Hakunene, ku na swo tala leswi nga dyondziwaka mayelana na Yehova Xikwembu, loyi a katekiseke malandza yakwe hi ntshembo wa ku hanya hi laha ku nga heriki. (Yohane 17:3) Kambe hambi wu ri ‘nkarhi lowu nga heriki’ eka hina wu nga ka wu nga vi lowu ringaneke ku ‘kumisisa mintirho leyi endliweke hi Xikwembu eku sunguleni ka yona eku yisa eku heteleleni.’—Eklesiasta 3:11.

Hambi swi ri tano, leswi lava va timbilu letinene va swi tivaka kumbe ku swi dyondza, swi nga va susumetela ku rhandza ni ku yingisa Yehova. (1 Yohane 5:3) Xana u wun’wana wa vanhu vo tano-ke? Ku yingisa Xikwembu a swi olovi minkarhi hinkwayo. Kambe loko hakunene u tivile Yehova Xikwembu ni tindlela ta yena ta rirhandzu, ku hava matshalatshala lama vonekaka ma ri lamakulu ku tlurisa. Hikwalaho, xana u tiyimisele ku tiva Xikwembu lexi xo chavisa kambe xi ri xa rirhandzu ke?

[Xifaniso ka tluka 6]

Vavanuna vo fana na Ezekiyele na Yohane va vonile swivono leswi hi nyikaka xitshwati ntsena xa ku kwetsima loku chavisaka ka Yehova

[Xifaniso eka tluka 7]

Ku vumba ka Xikwembu ni ku thya tinyeleti mavito swi hi nyika ku vonakalanyana ka matimba ya xona lama nga pimiwiki!