Ndlela Leyi U Nga Tiyiselaka Maxangu Ha Yona

“HI KU tiyisela ka n’wina, mi ta tikumela vutomi.” Yesu Kriste u vule marito wolawo loko a nyikela vuprofeta byakwe lebyi yelanaka ni ‘masiku ya makumu’ (Luka 21:19; Daniel 12:4) Eka marito yakwe, tinhla leti timbirhi ta xiyeka: (1) Ku tiyisela swa laveka leswaku ku ponisiwa vutomi bya hina, naswona (2) swa koteka ku tiyisela.

Kambe u nga tiyisela njhani? Ku hlamula xivutiso lexi, xo sungula hi fanele ku tiva leswaku hikwalaho ka yini Yehova a pfumelele maxangu ni ku xanisiwa swi wela malandza yakwe.

Maxangu Ni Ku Xanisiwa—Ha Yini Xana?

Xivangelo lexikulu hi leswaku Sathana u tlhontlhile vunene ni ku lulama ka vuhosi bya Yehova. (Genesa 3:1-19) Yehova u lunghiselele ku hlangavetana ni ntlhontlho lowu leswaku a Iwela vito rakwe ni ku Iwela van’wana.

Nakambe Xikwembu xi pfumelele vanhu va xona va xaniseka hikwalaho ka swikongomelo leswi swi nga swi kotaka ku hi pfuna ku vona loko hi languta ku nonon’hwa ko tano hi ndlela leyinene. Hi xikombiso, loko hi tiyisela loko hi ri ehansi ka ndzingo handle ko tsana ehenhleni ka maxangu ya hina, hi tiyisa leswaku ripfumelo ra hina i ra ntiyiso, wu nga muxaka wa ripfumelo leri tsakisaka Xikwembu. (1 Petro 1:6, 7; Vaheveru 11:6) Kambe ku nonon’hwa ku nga tlhela ku komba swihoxo swa vumunhu swo tanihi ku tikukumuxa, ximbilwa-mbilwani, na ku rhandza ku oloveriwa. Hi ku pfuniwa hi moya wa Xikwembu, hi nga hlula mikhuva yo tano ivi hi xitalo hi ‘ambala munhu lontshwa.’—Vakolosa 3:9-14.

Mupisalema u hi andlalerile yinhla leyi kahle a ku: “Ŝi lulamile ka mina leŝi nḍi nga ṭongahatiwa leŝaku nḍi ta dyonḍa tifanelo ta wena.” (Psalma 119:71) Mayana ndlela leyinene yo languta khombo! Ku hava ku vilela kumbe ku n’unun’uta. Ku hava ku karhateka ka vuciva ka ku lahlekeriwa kwihi na kwihi ka munhu loku khombo ri nga ha vaka ri ku tisile. Kambe, laha ku ni ku twisisa ka vutlhari ka leswaku leswi Yehova a swi pfumeleleke swi wela mupisalema a swi ta n’wi pfuna ku tlangela milawu ya Yehova hi laha ku teleke. Xana hi pfumelela ku xaniseka ku va ni nsusumeto wo tano eka hina ke?

Muapostola Pawulo u pfunekile hi nhlomulo lowu a veke na wona etikweni ra Asia. Entiyisweni, maxangu lawa ma n’wi vangele ku tiseketela hi Yehova hi xitalo. Nakambe ma tiyisile ku tshemba ka muapostola ka ku pfuka eku feni, hikuva u tiyiserile ku nonon’hwa kakwe hi ku tshemba loku heleleke “eka Xikwembu lexi pfuxaka vafi.” (2 Vakorinto 1:8-10) Ee, Pawulo u pfunekile hikwalaho ka ku tiyisela ka yena ehansi ka ku xaniseka.

Sweswo i ntiyiso na hi Vakriste lavaya va nga ni malangutelo lamanene ya ku nonon’hwa namuntlha. EZimbabwe, tiko leri tshameke ri hlaseriwa hi nyimpi ya vuhehli, bandlha ra vanhu va Yehova ri rhurhiseriwile emutini lowu sirheletekeke. Hikwalaho ka swiyimo swa nkarhi wa nyimpi, un’wana ni un’wana wa vakulu vanharhu lava hlawuriweke ebandlheni ra kona u feriwile hi n’wana. Ku tlula kwalaho, vanhu va ndhawu yoleyo a va tisa ntshikilelo lowukulu eka vatswari lava va Vakriste leswaku va landzula ripfumelo ra vona hi ku miyeta mimoya leyi ku vuriweke leswaku yi hlundzukisiwile. Xana vakulu va kona va titwe njhani hi leswi? Loko a vulavulela hi vanharhu ka vona, un’wana wa vona u te: “Loko tiko ri ri eku lweni, na hina hi le ku lweni na mimoya leyo biha. Hi ta n’wi hlula nala loyi [matimba ya mimoya leyo biha] hi leswi hi nga ni ntshembo, ntshembo lowu hanyaka. Kutani ke, hambi loko hi nga fa enyimpini, ntsendze loko hi fa hi tshembekile eka Yehova, hi ta pfuxiwa. Hi ta va hi hlurile nala.” Vavanuna lava vanharhu vo tshembeka ni kan’we a va lahlekeriwanga hi matimba ya Yehova yo kutsula. Hi ku vona ku yima ka vona loku tiyeke, na hina hi fanele ku khorwiseka leswaku hi nga tiyisela!

Loko Ku Xanisiwa Ku Ri Ka Tihanyi

U nga ha ku, ‘Kambe ku vuriwa yini hi loko ku xanisiwa ku ri ka tihanyi, ku ri ni mikhuva ya tihanyi yo xanisa leyi tirhisiwaka? Xana hi nga tama hi swi kota ku tiyisela futhi hi nga tshiki ripfumelo ra hina?’ Ee, Vakriste vo sungula va swi kotile ku tiyisela ku xanisiwa va nga lahli ripfumelo ra vona.

Hi ku fanana, ripfumelo leri heleleke eka Yehova ri kombisiwile hi Mukriste wa namuntlha la tshamaka etiko-xikaya leri nga le kule eZimbabwe. A ri swakwe siku rin’wana hikwalaho ka leswi nsati wakwe a endzele n’wana wa vona wa xisati la tekiweke. Xikan’we-kan’we, u holoveriwile hi masocha lama n’wi hembeleke hikwalaho ka xiyimo xakwe xa Vukriste. Endzhaku ka loko va n’wi bile swinene, vavanuna lava va bohelele switina leswi hisaka swinene exikarhi ka milenge yakwe va tlhela va n’wi byela ku famba ehenhla ka switina swo tano. Kava loko a siyiwa swakwe leswaku a fa. Hikwalaho ka leswi ku cinca ka xihatla ka swiyimo endhawini ya kona ku endleke leswaku swi nga koteki ku famba-famba, nsati wa nuna loyi a nga ri tivanga khombo ra nuna wa yena. Vaakelani va byeriwile leswaku loko vo n’wi pfuna va ta dlawa. Kutani u tshame a ri swakwe exiyin’weni lexi tin’hweti tinharhu hinkwato, siku na siku a ri la langutelaka ku fa.

Wanuna loyi wa Mukriste la xanisekaka u swi kotile ku tihanyisa hi mati ni mapa ya mavele leswi a swi ri kona ekaya kakwe. Kambe hikwalaho ka leswi a himeteriwile, a a nga swi koti ku famba. Hikokwalaho ke, loko tihunyi to tshivela ndzilo leti nga kusuhi ti herile, a boheka ku pandzela fanichara ya yena ivi a tirhisa yona ku tshivela ndzilo wo sweka hi wona. Mati ya kona ma sungule ku kurha ivi ma tala hi swivungwana. Swilondza swakwe swa ndzilo swi yile emahlweni swi phyatsuka.

Lexi a xi ri xiyimo xa makwerhu loyi loko eku heteleleni nsati wakwe a swi kota ku vuya ekaya endzhaku ka tin’hweti tinharhu. Anakanya leswi wansati a titwiseke xiswona loko a n’wi vona! Xikan’we-kan’we, u endlile malunghiselelo yo n’wi yisa exibedlhele. Emhakeni leyi, u boheke ku n’wi teka hi ngirivani a n’wi yisa exitichini xa le kusuhi xa bazi ivi ku suka kwalaho a n’wi yisa edorobeni laha a ku ri na xibedlhele. Endzhaku ka mavhiki manharhu u ntshuxiwile exibedlhele ivi a ya emutini wa n’wana wakwe wa xisati, laha a kumeke mpfuno wa moya ni xikhutazo lexi humaka eka swirho swa bandlha swa Timbhoni ta Yehova endhawini ya kona.

Xana i yini lexi pfuneke museketeri loyi wo tshembeka wa Mfumo wa Xikwembu ku tiyisela nxaniso wa tihanyi ke? Ku ringana tin’hweti tinharhu a ri yexe hi laha ku heleleke. U rindzerile ku fa ntsena. Kambe, loko a vutisiwe leswi a titwiseke swona enkarhini wa ndzingo lowu nhlamulo yakwe yi te, “A ndzi titwa Yehova a ri na mina nkarhi hinkwawo.” A ku ri hava mivilelo yo lwisana ni vaxanisi vakwe kumbe ku hlamarisiwa hi leswi swi n’wi endlekeleke—kambe ntshembo lowu tiyeke wa leswaku Yehova a nga tshuki a cukumeta malandza lama tshembekaka ya yena.—Psalma 37:28.

Ina, Vakriste va nga swi kota ku tiyisela. Va swi tiva leswaku loko Yehova a pfumelela nhlomulo, u ni xikongomelo lexinene, naswona ku tiyisela swa koteka. Rito ra Xikwembu ni mintokoto ya van’wana swi hi tiyisekisa hi mhaka leyi. (Matewu 24:13) Hambi swi ri tano, loko hi ri karhi hi tiyisela miringo, hakanyingi hi lava ku chaveleriwa, a swi tano xana? Kambe ku chavelela ko tano hi nga ku kuma kwihi?