Misava Leyi Taleke Maxangu
VANHU ni kan’we eku sunguleni a va si tshama va va ni mpfilumpfilu, ntshikilelo, ni maxangu yo tano evurungurwini. Timhangu ti toloveleke ngopfu ku fana ni moya lowu hi wu hefemulaka. Loko wu hlamusela nkarhi wo sukela hi 1914, magazini wun’wana wu te: “Lowu wu vile nkarhi wa mpfilu-mpfilu ni vuhomboloki lebyi nga tolovelekangiki, endzhandzeni wa mindzilakana ni le ndzeni ka yona.”
Lexi vavisaka hi ndlela yo hlawuleka i mboyamelo wa tihanyi leti nga lawulekiki enyimpini ya namuntlha. Etikweni rin’wana lerintsongo ra Vantima, ku dodombisana ka malembe ya nkombo ku koxile vutomi lebyi tlulaka 20 000. A ku ri ni ku damurhutiwa ka vavasati, ku pfinya, ni swiendlo swo tano. Vanhu lava kuleke ni swihlangi va hlaseriwa hi tibomo leti yimberiwaka, swibuluki, ni tihanyi tinene leti tolovelekeke.
Loko hi languta maxangu emavonelweni ya vanhu, gome ra xiyimo xa kona ri vonaka swinene. Hi xikombiso, ringeta ku tiveka exivandleni xa wansati loyi hi ku kombiwa vholovholo, emahlweni ka vana vakwe a sindzisiweke ku yimbelela ni ku phokotela mavoko yakwe loko ntlawa wa vavanuna hi ku nonoka wu ri karhi wu dlaya nuna wakwe hi ku n’wi khembetela. Xana a wu ta endla yini ke? Ee, hakunene “matiko ma hela ntamu,” naswona munhu u dya mbitsi.—Luka 21:25.
Vakriste hakanyingi va papalata makhombo hi ku hlayisa vukala-tlhelo lebyikulu ni ku sukela tindhawu leti vuhomboloki byi talelaka eka tona. (Yohane 17:16) Hambi swi ri tano, a va swi koti ku papalata makhombo hinkwawo, naswona minkarhi yin’wana va xaniseka, ku fana ni vanhu lava nga va misava.
Hi ku tirhisa vuhomboloki ni vuxisi, Sathana Diyavulosi a nga vanga mafu lama nga fanelangiki. Leswi xiphemu xa mahungu lama twarisiwaka emisaveni hinkwayo hi Timbhoni ta Yehova ma katsaka ku paluxa mintirho ya Diyavulosi, xana a hi fanelanga ku rindzela Sathana leswaku a tirhisa “matimba ya rifu” eku ringeteni ka ku herisa varhwali lava va mahungu ke? Matsalwa ma komba tano.—Vaheveru 2:14, 15; Nhlavutelo 2:10; 12:12, 17.
Vakriste Va Langutana Ni Maxangu Man’wana
Ku tlhandlekela emaxangwini lama hlaselaka mani na mani, valandzeri lava tshembekaka va Yesu Kriste va fanele ku tiyisela nxaniso lowu va telaka hikwalaho ka ku yima ka vona va tiyile va yimela Mufumi Lonkulu, Yehova Xikwembu, ni Mfumo wakwe. Endzhaku ko hlamusela swiendlakalo leswi dyisaka mbitsi leswi a swi ta fungha makumu ya mafambiselo ya mfumo wa vanhu ehansi ka Sathana, Yesu u te: “Enkarhini wolowo va ta mi nyiketa eku xanisiweni, va mi dlaya; mi ta vengiwa hi vanhu va matiko hinkwawo hikwalaho ka vito ra mina.” Marka u tshaha Yesu tanihi loyi a engetelaka a ku, “mi ta biwa.”—Matewu 24:3, 7-9; Marka 13:9.
Ina, hikwalaho ka ku tiyimisela ka vona ko chumayela ‘mahungu lawa manene ya mfumo’ emisaveni hinkwayo ehansi ka matshamelo hinkwawo, vanhu va Yehova va fanele ku tiyisela ndzingo lowu engetelekeke wa ku xanisiwa—ku biwa, ku yirisiwa, ku khotsiwa, ni swivumbeko swin’wana swa ku xanisiwa. (Matewu 24:14) Phela, vaxanisi ku fike laha va dlayaka ni van’wana Vakriste lava “nandzu” wa vona ntsena a ku ri ku dyondzisa leswaku Mfumo wa Xikwembu hi wona ntsena ntshembo wa vanhu!
Yesu u vurile a ku: “Loyi a tiyiselaka ku fika makumu hi yena loyi a nga ta ponisiwa.” (Marka 13:13) Hambi swi ri tano, xana hina hi nga swi kota ku tiyisela hi nga karhali ke? Xi kona xihlovo xin’wana xa ku chavelela hambi ku ri eka maxangu lama tlurisaka? Xana hi na swona swikombiso swa lava va tiyiseleke?