Vakhandziyi Va Tihanci Ta Xihundla Ta Nhlavutelo

U VONAKA u hlamarisiwa, hi ntshiva ni ncila lowu hungaka ni tinhopfu leti pfulekaka, hanci yi ri karhi yi rhelela hi le maribyeni. Mugadi wo khwaxa u vonaka a namarhetiwile exitulwini onge hi loko a ri xiphemu xa nyama ya hanci leyi fambaka, leyi rhurhumelaka.

Hambi ku endzeriwa xitici xa tihomu xa tiko leri tlakukeke ra Australia kumbe, hafu ya misava ku suka kwalaho, etimbaleni ta kaya ra tihanci ra Amerika, ku vona mukhandziyi wa tihanci loyi kunene a tivaka xitulu xakwe hakunene hi leswi swi hlamarisaka. Lexi hlamarisaka hi ndlela leyi fanaka i ku vangama ka ku macha ka tihanci ni vagadi lava leteriweke swinene-nene.

Vagadi vo tano va tihanci ni switulu swa vona va hi siya hi ri ku hlamaleni. Hambi swi ri tano, tihanci ni vakhandziyi lava voniweke hi mutsari wa buku ya Nhlavutelo (Apocalipsi) swa tsakisa ku swi hlalela! I swa xihundla kun’we ni ku va leswi tsemaka nhlana. Vagadi volavo va tihanci va vile lava tivekaka hi ku anama tanihi vakhandziyi va tihanci ta Apocalipsi.

Anakanya sweswo sweswi, u ri karhi u tsutsumeriwa hi vakhandziyi va mune va tihanci lava nga ni vutshila, un’wana wa vona a ri karhi a ndziwita fumu! Languta mivala ya tihanci ta vona. Yin’wana ni yin’wana yi na muhlovo wa yona. Hanci yin’wana i yo basa, yin’wana i yo tshwuka, yin’wana i ya ntima. kasi yin’wana i yo kwalala. Kunene i xivono xo hlamarisa xa xihundla.

Landzelela nkatsakanyo wa leswi mutsari wa Bibele, muapostola Yohane, a swi voneke. U ri: “Kutani nḍi languta, nḍi v̌ona hantši le’yo basa; loyi a yi khanḍiyeke a ri na v̌urha, kutani a nyikiwa hari, kutani a suka a ri muhluri e ku ya hlula. . . . Kutani ku huma hantši yiṅwana ya ribungu, loyi a yi khanḍiyeke a nyikiwe matimba ya ku herisa ku rhula emisav̌eni, ni ku endla leŝaku v̌anhu v̌a dlayana; a nyikiwa ni tlhari le’rikulu. . . . Kute loko nḍi langutile, nḍi v̌ona hantši le’ya ntima; loyi a yi khanḍiyeke a tamele šikalo šo pima e v̌okweni ra yena. Kutani nḍi twa . . . rito le’ri nge: ‘Mpimo wuṅwe [hakelo ya siku]’ wa koro, denari yiṅwe, ni mipimo minaru ya [hakelo ya siku] ya barley . . . Kutani nḍi v̌ona hantši ya ribungwanyana; loyi a yi khanḍiyeke a a v̌uriwa Rifu, a a lanḍeriwa hi šiv̌andla ša v̌afi; kutani a nyikiwa matimba e henhla ka tlhelo ra v̌umune ra misav̌a, ku ya dlaya v̌anhu hi tlhari, ni ndlala, ni rifu, ni hi ŝiv̌anḍana ŝa misav̌a.”—Nhlavutelo 6:2-8, Bibele ya Xitsonga.

Ku sukela loko xivono lexi xi tsariwe ro sungula ehansi, nhlamuselo ya xona yi nonon’hwerile vahlayi va ntsandza-vahlayi. Xana tihanci leti ta xihundla ni vagadi va tona a va yimela yini? Ku khandziya ka vona ku sungule rini xana? Ku khandziya ka vona ka byi khumba vutomi namuntlha ke? Ku nyikeriwe tinhlamuselo to hambana-hambana ta leswi nga yimeriwaka hi tihanci ni vakhandziyi va tona, ni nkarhi lowu entiyisweni ku khandziya ka vona ku humelelaka ha wona.

Ku hambana lokukulu ku kumeka eku hlamuseriweni ka hanci yo basa ni mukhandziyi wa yona. Hi xikombiso, New Catholic Encyclopedia yi hlamusela leswaku hanci yo basa yi yimela ‘ku hlula ka mahungu lamanene kumbe vuhosi.’

Eka buku leyi nge Daniel and the Revelation, Uriah Smith u nyika nhlamuselo leyi: “Hanci yo basa . . . i xifaniso lexi faneleke xa ku hlula ka mahungu lamanene eka lembe xidzana ro sungula . . . Ku basa ka hanci ku komba vutengi bya ripfumelo eka nguva yoleyo.”

The Expositor’s Bible yi ri: “Ehansi ka mukhandziyi wo sungula hi tivisiwile ndlela ematshan’wini ya vumunhu bya Kriste, eka xiyimo xo sungula xa ku ya emahlweni ka yona loku hlulaka, ni xitshembiso xa ku hlula ka yona ka nkarhi lowu taka. . . . Hi dyondza leswaku ndlela leyi yi le misaveni, leswaku mfumo lowu wu le xikarhi ka hina, ni leswaku lava wu kanetaka va ta hluriwa.” Hambi swi ri tano, Woodrow Kroll, wa Masungulo ya Vukriste bya Xiyuda, u vona leswaku mukhandziyi wa hanci yo basa i Nala wa Kriste.

Van’wana va ehlekete leswaku ku na tihanci ta ntlhanu ni vakhandziyi va ntlhanu, hayi mune ntsena. Manuku hi nga swi tivisa ku yini leswaku hi yihi leyi lulameke eka tinhlamuselo leti to tala? Hi nga tiyiseka njhani leswaku ku na ku twisisa loku lulameke? I vamani vakhandziyi lava va xihundla va tihanci ta Apocalipsi, naswona ku khandziya ka vona ku sungule rini xana?