Tsakisa Mbilu Ya Yehova Hi Ku Hlayisa Vutshembeki!
“Hambi hi hanya, hambi hi fa, hi va [Yehova].”—VARHOMA 14:8.
1, 2. (a) Hikwalaho ka yini Timbhoni ta Yehova ti tiyimisele ku hlayisa vutshembeki bya tona eka Xikwembu? (b) Kambe i swivutiso swihi leswi tlakukaka?
MARITO wolawo ya muapostola Pawulo ya phofula mintlhaveko ya vahlayisi va vutshembeki va ntiyiso va lembe xidzana leri ra vu-20 kahle swonghasi! Loko hi ri ni lunghelo ra ku hambeta hi hanya ivi hi vona mafambiselo layo biha ya sweswi ya hohloka emahlweni ka hina, i ntsako muni wonghasi lowu hi nga ta va na wona! Kambe loko hi fanele ku hlangavetana ni rifu entirhweni wa Xikwembu, a swi ve tano. Emhakeni yin’wana ni yin’wana, hi tiyimisele ku va timbhoni leti tshembekaka ta Yehova, Xikwembu xa hina. Hi ta hlayisa vutshembeki bya hina eka yena. Hikwalaho ka yini? Hikuva hambi hi hanya kumbe hi fa, hakunene hi va Yehova!
2 Hambi swi ri tano, vutshembeki i yini xana? Xana i swilaveko swihi leswi byi swi lavaka eka hina? Naswona ku hlayisa ka hina vutshembeki hakunene ku na mhaka eka Xikwembu ke?
Vutshembeki Ni Swilaveko Swa Byona
3. Hi ku ya hi Bibele, ku hlayisa vutshembeki swi vula yini xana?
3 ERitweni ra Xikwembu, vutshembeki byi vula mahanyelo lamanene ni ku hetiseka, lama nga hava xisandzu ni xisolo. Swi vula ku tinyikela loku nga tsekatsekiki eku lulameni. Entiyisweni, vutshembeki byi lava ku tinyikela loku nga tsemekiki ka munhu eka Yehova Xikwembu. Ina, ku hlayisa vutshembeki swi vula ku hambeta u endla ku rhandza ka hosi Yehova.
4. Mutshovi wo sungula wa vutshembeki a a ri mani, naswona u susumetele mpatswa wo sungula wa vanhu ku endla yini?
4 Mutshovi wo sungula wa vutshembeki a ku ri xivumbiwa xa moya lexi yiseke mpatswa wo sungula wa vanhu endleleni yo xandzukela Muvumbi wa vona. Adamu na Eva a va ri ni nkarhi wo kombisa vutshembeki bya vona eka Yehova hi ku xixima nsivelo wa Xikwembu malunghana ni murhi wa vutivi. Kambe ehansi ka ntshikilelo wa ku humelela ka Nala eka vutianakanyi, va pfule ndlela yo pfumala ku yingisa. Timbilu ta vona a ti tikombanga ti ri hava xisolo emilawini ya Yehova, naswona a va byi hlayisanga vutshembeki eka yena.—Psalma 119:1, 80.
5. Ku xandzuka ka Sathana ku tlakuse mphikamakaneta yihi, kutani leswi swi kombisiwe njhani hi mintokoto leyinene ya Yobo?
5 Ku xandzuka ka Sathana ku tlhontlhe mphika-makaneta ya ku lulama ka vuhosi bya Xikwembu ehenhla ka swivumbiwa swa Xona hinkwaswo, ya lunghelo ra Yehova ro lava ku tshembeka ka vona loku heleleke. Xisweswo mphika-makaneta ya vutshembeki bya munhu eka vuhosi bya Xikwembu yi ta va xiphemu xa nkoka xa mphika-makaneta ya vuhosi bya misava hinkwayo. Xikombiso xa leswi xi voniwa emhakeni ya Yobo nandza la tshembekaka wa Yehova, loyi a nga riki na xisandzu, la lulameke, ni wanuna loyi a chavaka Xikwembu. (Yobo 1:1) Yobo a nga hambukanga endleleni leyi faneleke ya Xikwembu. Rigangugangu a ri nga ri kona eka yena. A a nga hombolokanga eku avanyiseni kumbe ku va loyi a tsonanaka eka noni, n’wana la nga riki na tatana kumbe xisiwana. Ematshan’wini yo endla rifuwo ra leswi vonekaka leswaku ri va ntshembo wa yena, Yobo u tshembe la Tlakukeke hi laha ku heleleke. (Yobo 31:7-40) Hambi swi ri tano, Diyavulosi u tiyise leswaku Yobo a a tirhela Xikwembu hikwalaho ka swivangelo swa vutianakanyi. Hambi leswi Yehova a pfumeleleke Sathana ku lovisela Yobo rifuwo ra yena ni vana va yena, mukanganyisi loyi lonkulu u hlulekile ku tshova vutshembeki byebyo bya wanuna wo lulama. Hambi byi ri vuvabyi lebyi vavisaka ni ku sola lokukulu loku humaka eka vachaveleri va mavunwa a ku nga pfuni nchumu, hikuva Yobo u tikombe a ri muhlayisi wa vutshembeki.—Yobo 1:6-2:13; 27:5, 6; 31:6; 42:8, 9.
6. I yini lexi lavekaka eka lava va nga ‘va Yehova’?
6 Xisweswo vanhu va ni lunghelo leri nga ringanisiwiki ro seketela ku kwetsimisiwa ka vito ra Xikwembu ro hlawuleka. Njhani? Hi ku hlayisa vutshembeki, va kombisa leswaku va seketela vuhosi bya Yehova bya misava hinkwayo hi ku tshembeka. Manuku ke, xana i yini lexi lavekaka eka lava va nga ‘va Yehova’? Hi fanele ku tirhela Xikwembu hi ku tinyikela loku heleleke, hi nga rivali nikantsongo leswaku Yehova i “Šikwembu ša hina, ša rilav̌eta.”—Eksoda 20:5.
Hi Nga Tsakisa Mbilu Ya Yehova
7, 8. (a) Leswi hi nga hetisekangiki, hi nga hlayisa vutshembeki bya hina eka Xikwembu hi ndlela yihi? (b) Loko hi ri vahlayisi va vutshembeki, Swivuriso 27:11 yi ta tirha eka hina hi ndlela yihi?
7 Leswi hinkwerhu ka hina hi nga hetisekangiki, ha tsandzeka ku fambisana ni milawu ya Xikwembu yo lulama hi ku hetiseka. Kutani ke, ku hlayisa ka hina vutshembeki a ku vuli ku hetiseka ka xiendlo kumbe ku vulavula. Kambe ke, swi vula ku va hi mbilu hinkwayo, kumbe ku tinyikela loku heleleke ka mbilu. Xisweswo, hambi leswi Davhida a endleke swidyoho leswikulu, u fambe ‘hi ku tshembeka ka mbilu ni ku lulama.’ (1 Tihosi 9:4) Hi ku amukela ku tshinyiwa, u lulamise ndlela ya yena, ivi kutani a kombisa leswaku mbilu ya yena a yi tele hi rirhandzu ra ntiyiso eka Yehova. (Psalma 26:1-12) Na hina, hi nga kombisa rirhandzu ro tano, hi endla ‘hi ku ya hi ku tshembeka ka mbilu.’—Psalma 78:72.
8 Ndlela yo hlayisa vutshembeki ya koteka hikuva hi ni ripfumelo leri enteke eka Yehova Xikwembu ni ku tshembela eka yena hi laha ku heleleke ni le matimbeni yakwe yo hi ponisa. (Psalma 25:21; 41:12) A swi olovi ku hlayisa vutshembeki bya hina, hikuva Sathana Diyavulosi—nala lonkulu wa Yehova, ni wa hina—u pfala miehleketo ya vanhu lava nga pfumeriki naswona i “mukanganyisi wa misava hinkwayo.” (Nhlavutelo 12:9; 2 Vakorinto 4:4) Kambe, ku fana na Yobo, hi nga va vahlayisi va vutshembeki. Hambi leswi hi nga hetisekangiki, xisweswo, hi nga tsakisa mbilu ya Xikwembu xa hina xa rirhandzu. Hi laha Swivuriso 27:11 yi swi vekaka ha kona yi ri: “Ṅwana nga, tlhariha, u ṭakisa mbilu ya mina, nḍi ta kuma rito e ku hlamula la’v̌a nḍi rukanaka.” Lexi tsakisaka, tanihi malandza lama tshembekaka ya Yehova, hi nga n’wi nyika nhlamulo leyi tirhaka eka Nala wakwe loyi a n’wi rhukanaka. Ku hlayisa ka hina vutshembeki ku na mhaka. Tanihi lava va hlayisaka vutshembeki, hi nga tsakisa mbilu ya Yehova. Naswona mawaku ntsako lowu leswi swi hi tiselaka wona!
Nxaxamelo Wo Leha Wa Vahlayisi Va Vutshembeki
9. A va ri vamani van’wana va “vunyingi lebyikulu” bya timbhoni ta Yehova leti hlayiseke vutshembeki, naswona i miringo yihi ya vutshembeki leyi va nga yi tiyisela xana?
9 Kahle-kahle, Timbhoni ta Yehova namuntlha i xiphemu xa nxaxamelo wo leha wa vahlayisi va vutshembeki. Wu tlhelela endzhaku swinene eka Avele loyi a tshembekaka naswona wu katsa vavanuna ni vavasati vo fanana na Avele, Henoko, Nowa, Abrahama, Sara, Isaka, Yakobo, Yosefa, Muxe, Rahava, Gidiyoni, Baraka, Samsoni, Yefta, Davhida na Samuyele. Šadrak, Mišak na Abed-nego, vahlayisi va vutshembeki lava aleke ku gandzela xifaniso lexi a xi vekiwe hi Nebukadnetsar hosi ya Babilona va lahleriwe ekheleni lerikulu ra ndzilo, handle ko kanakana a va gegiwa tanihi ‘vatimi va mindzilo leyo leva.’ Timbhoni tin’wana ta Yehova to sungula ta Vukriste ti ‘hlekuriwile, ti biwa, ti khotsiwa, ti khandliwa hi maribye, ti ringiwa, ti tsemeleriwa, ti dlayiwa hi tlhari; ti tsendzelekisiwa hinkwako ti ambale madzovo ya tinyimpfu ni ya timbuti, ti ri enhlomulweni ni ku xanisiwa.’ Hakunene hi pfumelelana na Pawulo, loyi a nga te: “Misava a yi nga va fanelanga.” Swi tsakisa swonghasi ku rhendzeriwa hi “vunyingi” lebyikulu bya timbhoni leti hlayisaka vutshembeki!—Vaheveru 11:1-12:1; nakambe vona Daniel, ndzima 3.
10. Muapostola Pawulo u tsakise mbilu ya Yehova hi ndlela yihi?
10 Hi xivindzi ni matimba lama a ma nyikiweke hi Xikwembu, muapostola Pawulo u tiyisele ku khotsiwa, ku biwa, ku tshovekeriwa hi ngalava, timhangu to tala, vusiku byo pfumala vurhongo, ndlala, torha, ku titimela, ku pfumala swiambalo, “ni ku va kusuhi ni ku dlawa minkarhi yo tala.” (2 Vakorinto 11:23-27) U hlangavetane ni maxangu yo tano hikwalaho ka vutirheli, kutani eka hinkwaswo leswi u tsakise mbilu ya Yehova tanihi nhenha leyi hlayisaka vutshembeki. Na hina hi nga swi kota.
11. Malunghana ni vutshembeki, i xikombiso xihi lexi Yesu a xi vekeke?
11 Xa nkoka exikarhi ka vahlayisi va vutshembeki i “Musunguri ni Muhetisisi wa ku pfumela ka hina,” ku nga Yesu Kriste. Loko a ringiwa hi Diyavulosi emananga, Yesu u namarhele vutshembeki bya yena, eku heteleleni a ku: “Suka Sathana, hikuva ku tsariwile va te: ‘U ta gandzela [Yehova], Xikwembu xa wena, u tirhela xona ntsena.’” Hi ku pfumala matimba ehansi ka xiboho lexi nyikeriweke hi Xikwembu, Diyavulosi u tshike Yesu. Wolowo a wu nga ri wona nhlaselo wa Sathana wo hetelela ehenhla ka Yesu, kambe Diyavulosi a a ri hava matimba yo tshova vutshembeki bya N’wana wa Xikwembu. ‘Hikwalaho ka ku tsaka loku vekiweke emahlweni ka yena u tiyisele mhandzi ya nxaniso,’ a nga kalanga a va mutshovi wa vutshembeki. Onge hi nga landza xikombiso xa yena lexinene kutani hi tsakisa mbilu ya Yehova tanihi vahlayisi va vutshembeki.—Vaheveru 12:2, 3; Matewu 4:1-11.
12, 13. I miringo yihi ya vutshembeki leyi Vakriste vo sungula va kongomaneke na yona hi laha ku humelelaka?
12 Yesu u byele vadyondzisiwa va yena a ku: “Mi ta vengiwa hi vanhu hinkwavo hikwalaho ka vito ra mina.” (Matewu 10:22) Sweswo minkarhi hinkwayo swi ve ntiyiso swonghasi eka Vakriste va ntiyiso! Ebukwini ya yena leyi nge Christianity and the Roman Government, E. G. Hardy u tsarile a ku: “Swi vonaka swi nga twanani, epapileni ra Pliny ni leri tlheleke ri tsariwa ra Trajan, leswaku Vakriste va nga xupuleriwa nomen [vito] ntsena, kumbe ku tivulela ka Vukriste ntsena, handle ka nhlamuselo kumbe vumbhoni bya vugevenga lebyi xiyekaka.”
13 I miringo muni yonghasi ya vutshembeki leyi Vakriste volavo vo sungula va swi koteke ku kongomana na yona hi laha ku humelelaka hi matimba lama va ma nyikiweke hi Xikwembu! Hi xikombiso, mayelana na vona ku vuriwe leswi: “Minkarhi yin’wana a va xanisiwa kutani va lahleriwa erivaleni ra swivandzana leswi nga ni ndlala leswaku va tsakisa vanhu.” Hambi swi ri tano, ku nga khathariseki ku xanisiwa ko tano, ku xiyiwile leswaku “nxaniso wu tirhe ku tiyisa ripfumelo ra vona ntsena ni ku tisa vunyingi bya lava hundzukeke endleleni ya vona.” (From the Old World to the New, hi Eugene A. Colligan na Maxwell F. Littwin, 1932, matluka 90-1) Swi tano na hi timbhoni ta Yehova leti hlayisaka vutshembeki eka lembe xidzana leri ra vu-20. Switirho swa Diyavulosi swi tikombe swi ri hava lexi swi nga xi endlaka eka vona.
14, 15. “Timbhoni timbirhi” i vamani, naswona ti hlangavetane na yini hi 1918 na 1919?
14 Xiyisisa leswi malandza ya Yehova lama totiweke, “timbhoni timbirhi” to fanekisela, ya hlangavetaneke na swona hi 1918 na 1919, loko valala va wona ‘va kunguhate nhlaselo hi ku avanyisa ko biha.’ (Nhlavutelo 11:3, 7-10; Psalma 94:20) J. F. Rutherford (loyi a a ri muungameri wa Sosayiti ya Watch Tower enkarhini wolowo) ni vanghana vakwe va nkombo va khotsiwe hi ndlela yo biha. Enkarhini wolowo, “timbhoni timbirhi” a ti file etlhelweni ra ku profeta ka tona naswona valala va tona a va tsakile. Ebukwini ya yena leyi nge Preachers Present Arms Ray H. Abrams u xiyile: “Ku kambisisiwa ka mhaka hinkwayo [leyi katsaka Rutherford ni vanghana vakwe] ku yisa emakun’wini ya leswaku tikereke ni vafundhisi eku sunguleni a va seketela matshalatshala yo herisa [swichudeni swa Bibele]. . . . Loko mahungu ya swigwevo swa makume mambirhi ya malembe ya fike eka vahleri va nyuziphepha ya vukhongeri, yin’wana ni yin’wana ya tibuku leti, letikulu ni letintsongo, yi tsakele xiendlakalo lexi hi ku kongoma. Ndzi tsandzeke ku kuma marito yo karhi ya ntwelo-vusiwana eka timagazini tihi na tihi ta vukhongeri bya orthodox.”
15 Hambi swi ri tano, hi nkarhi lowu faneleke, Swichudeni swa Bibele swa nhungu leswi khotsiweke swi ntshunxiwile kutani swi suriwa ku hemberiwa hi laha ku heleleke, leswi swi hlundzukise Sathana ni switirho swa yena. Ti kwetsimise hi moya wa Xikwembu, “timbhoni timbirhi,” vuthu rero rintsongo ra vatotiwa, ri tlhele ri tlakusa milenge ya rona tanihi vahuweleri va Mfumo. (Nhlavutelo 11:11) Naswona valala va Yehova a va ri karhi va Iwa nyimpi leyi hlulekaka ni vahlayisi vo tano va vutshembeki ku sukela eku sunguleni.
16. Mbhoni yin’wana leyintshwa leyi hlayiseke vutshembeki yi tiphofule hi ndlela yihi?
16 Hi xikombiso: Xiya marito lama tiyisaka nhlana ya jaha leri tsaleleke ndyangu wa rona loko ri rindzele ku dlayiwa emavokweni ya vaxanisi va Vunazi. U tsarile a ku: “Ku se ku hundze xikarhi ka vusiku. Ndza ha ri ni nkarhi wo cinca miehleketo ya mina. Aha! Xana ndzi nga tlhela ndzi tsaka eka misava leyi endzhaku ka loko ndzi landzule Hosi ya hina ke? A swi tano nikantsongo! Kambe sweswi ma tiyiseka leswaku ndzi siya misava leyi hi ntsako ni ku rhula.” Xana wolowo wu twala wu ri mpfumawulo wo tsana wa vutoya, wa mutshovi wa vutshembeki ke? Kavula a swi tano!
17. Ku khomiwa ka Timbhoni ta Yehova eSoviet Union ku ve ni vuyelo byihi emintirhweni ya tona yo chumayela hi Mfumo?
17 Matshalatshala yo tshova vutshembeki bya malandza ya Yehova ya hambetile. Hi xikombiso, ebukwini yakwe leyi nge Religion in the Soviet Union Walter Kolarz mutsari wa tinyuziphepha u vulavule hi ku khomiwa ka vunyingi bya Timbhoni ta Yehova eku sunguleni ka lembe ra 1951 kutani a ku: “Timbhoni hi toxe ti ringanyeta leswaku vanhu vo ringana 7 000 hinkwavo va rhurhisiwile va yisiwa eUrals, Siberia, ni le Far North (Vorkuta) ni le Kazakhstan.” U engeterile: Loku a ku nga ri ku hela ka ‘Timbhoni’ eRussia, kambe a ko va masungulo ya ndzima leyintshwa ya ku hundzula ka vona mintirho. Va ringete ni ku hangalasa ripfumelo ra vona loko va yimisiwe eswiticini va ri endleleni ya vona yo ya evuhlongeni. Loko yi va rhurhisa, Hulumendhe ya Soviet ku hava nchumu wo antswa lowu yi wu endleke ku herisa ripfumelo ra vona. Loko ti hambanisiwe ni doroba ra tona ‘Timbhoni’ a ti tisiwe etikweni lerikulu, hambi leswi leri a ri ri tiko leri chavisaka ra tikampa ta ntirho wa nxaniso ni wa vuhlonga.” Kwalaho malandza ya Yehova ya kume vo tala lava amukeleke rungula leri nyanyulaka ra Mfumo hi ntsako.—Ringanisa Mintirho 11:19-21.
Ku Fana Ni Vuthu Leri Hlulaka
18, 19. Swi kotekisa ku yini ku hlula tanihi vahlayisa va vutshembeki?
18 Ku xanisiwa ka vanhu va Xikwembu ku ya emahlweni ku ta fika esikwini leri. Kutani xana swi kotekisa ku yini eka Timbhoni ta Yehova ku hlula tanihi vahlayisi va vutshembeki? Hi nga endla tano hikuva hi yingisa Rito ra Xikwembu, naswona ‘miehleketo ya hina yi dyondze ku hambanisa leswinene ni leswo biha.’ Tanihi timbhoni leti tshembekaka ta Yehova, a hi va ‘mafambiselo lawa ya swilo, kambe hi hundzuriwile hi ku lunghisa mianakanyo ya hina.’ Hi endla leswi tsakisaka Yehova hi ntsako, naswona u hi nyika ku hlula valala va hina, mademona ni vanhu.—Vaheveru 5:12-14; Varhoma 12:1, 2.
19 Hina lava hi nga ‘va Yehova’ hi nga fanisiwa ni vuthu leri hlulaka. Kavula, nyimpi ya hina i ya moya, naswona hi ‘ya emahlweni hi kuma matimba eka Hosi ni le ka ntamu wa matimba ya yona.’ Hi ni matlhari hinkwawo ya moya lama humaka eka Xikwembu, kutani moya wa xona lowo kwetsima wa hi seketela. Hi yona mhaka leyi hi swi kotaka ‘ku yima hi Iwa ni mano layo biha ya Diyavulosi.’ (Vaefesa 6:10-20; 2 Vakorinto 10:3, 4; Zakaria 4:6) Ina, hi yona mhaka leyi hi nga ta hambeta hi hlula tanihi vahlayisa va vutshembeki.
20. I mpfuno ni ku tiyiseka kwihi loku hi nga na kona loko hi ri karhi hi tirhela ku hlayisa vutshembeki bya hina?
20 Hakunene hi vuthu leri nga tolovelekangiki ra nyimpi. Kunene, exikarhi ka hina hambi va ri “v̌av̌asati la’v̌o tala v̌a v̌ikela mahungu lamanene.” (Psalma 68:11) Hambi leswi hi kongomanaka ni valala lava chavisaka, ‘lava nga na hina va tele, va tlula lava nga na vona.’ (2 Tihosi 6:16) Tintsumi ti na hina loko hi ri karhi hi twarisa mahungu lamanene eka vaaki va misava. (Nhlavutelo 14:6) Naswona tanihi vahlayisi va vutshembeki, ha tiyiseka leswaku ‘ku hava tlhari leri endliweke ku Iwa na hina leri nga ta hlula.’—Esaya 54:17.
21. Ku nga khathariseki ku xanisiwa loku hi hlangavetanaka na kona, i yini lexi hambetaka xana?
21 Handle ko kanakana, nyimpi yi tshinele. Mavuthu ya Sathana ya tiyimisele ku yimisa ntirho wa hina wo veka vumbhoni. Hikwalaho ke, swi le ka hina ‘ku hambeta hi Iwa nyimpi leyinene.’ (1 Timotiya 1:18) Hi ri na Yesu Kriste la kwetsimisiweke tanihi ndhuna ni Murhangeri wa hina, onge un’wana ni un’wana wa hina a nga tirha “ku fana ni nhenha leyinene ya Kriste Yesu.” (2 Timotiya 2:3, 4) Hambi leswi hi hlaseriwaka matlhelo hinkwawo, swa hi fanela—naswona hi ta endla tano, hi musa lowu nga fanelangiki wa Xikwembu—ku tshama hi tiyile tanihi vahlayisi va vutshembeki. Swikandza swa hina swa n’wayitela loko hi vona ku andza loku landzelanaka. Tinhlayo letikulu ta ‘swilo leswi rhandzekaka swa matiko’ ta karhi ta nghena naswona ti tata yindlu ya Yehova hi ku kwetsima. (Hagai 2:7) Ku nga khathariseki ku xanisiwa, ku khotsiwa, ku biwa, ku yirisiwa ka ntirho wa hina ematikweni yo hambana-hambana ni matshalatshala yo miyeta milomu ya hina, ntirho lowunene wa ku endla vadyondzisiwa wu ya emahlweni naswona wa kula.—Matewu 24:14; 28:19, 20.
22. Tanihi lava hi nga va Yehova, hi fanele ku endla yini xana?
22 Loko mpfumawulo wa ku dzunisa lowu yaka eka Yehova wu ya emahlweni wu kula, lowu i nkarhi wo endla makumu eka un’wana ni un’wana emisaveni. I lunghelo muni ronghasi leri hi nga na rona ra ku hangalasa mahungu lamanene ni ku dyondzisa lava amukelaka vugandzeri bya ntiyiso! Hikwalaho ke, loko “ntshungu lowukulu” wu karhi wu andza, onge hi nga ya emahlweni tanihi malandza lama hlulaka ya Xikwembu lexi Tlakukeke. (Nhlavutelo 7:9) ‘Ha hanya kumbe ha fa, hi va Yehova.’ Kutani a hi phikeleleni pakani ya vutomi, hi tlangela lunghelo ra hina lerinene ra ku tsakisa mbilu ya Yehova hi ku hlayisa vutshembeki!
Xana U Nga Hlamula?
◻ Vutshembeki i yini?
◻ Xana i swilaveko swihi leswi ku hlayisa vutshembeki ku swi vekaka ehenhla ka vanhu va Yehova?
◻ Swi nga kombisiwa njhani leswaku ku hlayisa ka hina vutshembeki ku endla ku hambana eka Xikwembu?
◻ Van’wana enkarhini lowu hundzeke va tikombe va ri vahlayisi va vutshembeki hi tindlela tihi?
◻ Swi kotekisa ku yini eka Timbhoni ta Yehova ku va vahlayisi va vutshembeki namuntlha?
[Xifaniso eka tluka 13]
Malandza ya Yehova namuntlha i xiphemu xa nxaxamelo wo leha wa timbhoni ta yena leti hlayisaka vutshembeki. Xana u le xikarhi ka vona?
Henoko
Sara
Yefta
Pawulo