Ku Chaveleriwa Ka Vahlayisi Va Vutshembeki
“Kambe wa nḍi tiyisa eku [tshembekeni] ka mina.”—PSALMA 41:12.
1. Hikwalaho ka yini vanhu va Yehova va lava ku chaveleriwa?
TIMBHONI ta Yehova leti hlayisaka vutshembeki ti lava ku chaveleriwa hikuva ta xanisiwa. Kavula, ti fanele ku langutela miringo yo tano, hikuva Yesu Kriste u byele valandzeri vakwe a ku: “Nandza a hi nkulu eka n’wini wa yena. Loko va ndzi xanisile, na n’wina va ta mi xanisa.” (Yohane 15:20) Ngopfu-ngopfu sweswi vanhu va Yehova va lava ku chaveleriwa. Ha yini? Hikuva mutshovi wo sungula wa vutshembeki, Sathana Diyavulosi, u lahleriwile laha misaveni, naswona nkarhi wa yena wu komile. Hikwalaho ke, u yima ro hetelela tanihi la Iwisanaka ni Xikwembu ni malandza ya xona.—Nhlavutelo 12:7-9, 17.
2. Vakriste va titwa njhani hi ku xaniseka ka vapfumeri-kulobye?
2 Tanihi malandza ya Yehova, nkarhi na nkarhi hi khongelela vamakwerhu va xinuna ni va xisati lava va faneleke ku tirha ehansi ka nsivelo kumbe lava xungetiwaka ni ku xanisiwa hi vaxanisi. (Mintirho 12:1; 2 Vatesalonika 1:4) Ku bumabumela ka hina ku ya eka Vakriste lava tiyiselaka mindzhukano leyi humaka eka vagwinehi ni van’wana hi ku tshembeka. (Matewu 5:11) Hi ni nkhathalo wa rirhandzu eka vapfumeri-kulorhi lava kanetiwaka hi maxaka kumbe lava tshamaka emindyangwini leyi nga ni vukhongeri lebyi avaneke. (Matewu 10:34-36) Naswona ntwelo-vusiwana werhu lowu humaka embilwini wu ni vahlayisi va vutshembeki lava xanisiwaka hi vulema ni vuvabyi bya nkarhi wo leha. Kambe hikwalaho ka yini ku ri ni ku xaniseka loku hinkwako? Naswona i ku chaveleriwa kwihi loku nga kona eka vavanuna ni vavasati va vutshembeki?
Tsundzuka Xivangelo Ni Khokholo
3. Sathana u tirhisa nxaniso hi matshalatshala yo endla yini?
3 Ku nga va hi vanhu kumbe hi switirho swa vudemona, Diyavulosi u lava ku ‘bvanyengeta’ Vakriste. (1 Petro 5:8) Ina, Sathana u tirhisa nxaniso ni swihinga swin’wana loko a ringeta ku herisa vuxaka bya hina na Yehova Xikwembu, a hi endla vatshovi lavakulu va vutshembeki. Kambe eka hinkwaswo leswi, xana hi hava nsirhelelo? A swi tano nikantsongo!
4. Loko va kongomana ni nxaniso ni tihanyi tin’wana, i yini lexi vahlayisi va vutshembeki va nga tiyisekaka ha xona?
4 Yehova u ta va khokholo ra hina loko hi xikhongelo hi lava mpfuno wa yena. Loko hi hlaseriwe hi nxaniso ni tihanyi tin’wana, hi nga huwelela yena hi laha mupisalema Davhida a endleke ha kona: “Nḍi twele v̌usiwana, Šikwembu, nḍi twele v̌usiwana! Hikuv̌a moya wa nga wu tšhavele ka wena; Nḍi tšhav̌ele nḍutini wa timpapa ta wena, e ku fika nkari lowu makhombo ma nga ta v̌a ma hunḍile.” (Psalma 57:1) Tanihi vahlayisi va vutshembeki, hi nga tiyiseka leswaku, enkarhini lowu faneleke, ntshunxeko wu ta ta wu huma eka Yehova, Khokholo ra hina. Naswona hi nga tiyiseka hi laha Davhida a tiyiseke ha kona loko hi xikhongelo eka Xikwembu a te: “Kambe wa nḍi tiyisa e ku [tshembekeni] ka mina, kutani wa nḍi v̌eka e mahlweni ka wena hi masiku.”—Psalma 41:12.
5. I mfanelo yihi leyi Vakriste lava xanisiwaka va yi lavaka, naswona i ntshembo wihi lowu hi nga na wona?
5 Hambi swi ri tano, leswi miringo yi nga vaka kona nkarhinyana wo leha, hi fanele ku hlakulela ku tiyisela. Muapostola Pawulo u khutaze Vakriste va Vaheveru ku ‘hambeta va anakanya masiku lama hundzeke lawa . . . [va] tiyiseleke eku lweni lokukulu ni le ku vavisekeni.’ U ye emahlweni a tsala a ku: “Swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona.” (Vaheveru 10:32-36) Eka Vakriste lava totiweke, ku hetiseka ka xitshembiso xa Xikwembu ku ta tisa hakelo ya vutomi lebyi nga hava ku fa ematilweni. Kambe eka “ntshungu lowukulu,” ku ni langutelo ra vutomi lebyi nga heriki emisaveni ya paradeyisi. (Nhlavutelo 7:9; Luka 23:43) Kunene, ku ponela evuton’wini lebyi nga heriki swa koteka eka hinkwavo lava tiyiselaka ku fika emakumu tanihi vahlayisi va vutshembeki.—Marka 13:13.
6. Hikwalaho ka yini van’wana exikarhi ka Timbhoni ta Yehova va ri ni xilaveko lexi hlawulekeke xo tiyisela, naswona i mpfuno wihi lowu va nga na wona?
6 Hi makume ya malembe, Timbhoni ta Yehova ematikweni man’wana ngopfu-ngopfu ti ‘ve ni xilaveko xo tiyisela.’ Hikwalaho ka yini? Hikuva a va fanele ku rhwala ntirho wa vona wo hlawuleka ensin’wini yo nonon’hwa kumbe ehansi ka swihinga swo hambana-hambana, ku katsa ni minsivelo ya hulumendhe. Kumbexana wena hi wexe u boheka ku tiyisela rihanyo leri nga nyawuriki kumbe nkaneto wa ndyangu eka tipakani ta wena ta Vukriste. Miringo yo tano a yi ta yimisa lava va tiseketelaka hi matimba ya vanhu ntsena, kambe a yi ti yimisi Timbhoni ta Yehova hikuva ‘mpfuno wa tona wu huma eka Yehova, Muvumbi wa tilo ni misava.’—Psalma 121:1-3.
7. (a) Miringo leyi hambetaka yi hi nyika nkarhi wihi? (b) Hikwalaho ka yini hi nga pfumelaka leswi Pawulo a swi vuleke eka Vafilipiya 4:13 ke?
7 Swiyimo swin’wana swi nga ha lava ku tiyiseriwa ku fikela emakumu ya mafambiselo lawa ya swilo. Kambe miringo leyi hambetaka yi hi nyika nkarhi wo kombisa vutshembeki bya hina eka Xikwembu ni ku tsakisa mbilu ya xona. (Swivuriso 27:11) Hi nkarhi lowu fanaka, Yehova u nyika matimba lama lavekaka leswaku ku tiyiseriwa hi ku tshembeka. Muapostola Pawulo u tsarile a ku: “Ndzi nga endla hinkwaswo hi matimba ya Loyi a ndzi tiyisaka.” (Vafilipiya 4:13) U nga ma tshemba marito wolawo ma tiyisaka nhlana, hikuva nkarhi na nkarhi ya tikomba ya ri ntiyiso emhakeni ya “vamakwenu emisaveni hinkwayo.”—1 Petro 5:9, 10.
Vahlayisi Va Vutshembeki Va Hi Khutaza
8. Hlamusela ndlela leyi vahlayisi va vutshembeki lava nga emindyangwini leyi avaneke va nga ha katekisiwaka ha yona.
8 I xihlovo xa xikhutazo lexikulu ku vona vutshembeki byi hlayisiwa hi ‘vamakwerhu hinkwavo emisaveni.’ Van’wana va vona va hakeriwe swinene hikwalaho ka ku hlayisa vutshembeki bya vona eka Yehova emindyangwini leyi avaneke. Hi xikombiso, loko dyondzo ya Bibele yi sunguriwile ni wansati wa Khatoliki eIreland, nuna wakwe u kombise nkaneto lowukulu ivi a xungeta ku dlaya vukati. Hambi swi ri tano, u hambetile ni dyondzo yakwe, kutani siku rin’wana u nyike nuna wakwe kopi ya buku leyi nge U Nga Hanya Hi Masiku aParadeyisini eMisaveni. U nyanyuriwe hi ku olova ka yona, ku kongoma, ni swifaniso leswinene. Hi ku hatlisa nuna loyi a a dyondza Bibele hi mpfuno wa buku leyi. U tshike ku dzaha, naswona hi ku hatlisa endzhakunyana mpatswa lowu wu tlhentlhile eKerekeni ya Khatoliki ivi wu fayelela swifaniso swa wona leswi vuriwaka leswo kwetsima. Nkarhi wu nga si ya kule, nsati wa kona u khuvuriwile naswona a a hlanganyela entirhweni wa vuphayona lebyi pfunaka, loko nuna wakwe a endla nhluvuko lowunene evutirhelini. Mintokoto yo tano yi nga va xikhutazo xa xiviri eka lava va nga emindyangwini leyi avaneke lava tiyiselaka tanihi vahlayisi va vutshembeki.—1 Vakorinto 7:12-16.
9. Vahlayisi va vutshembeki lava nga swilema va nga pfuna van’wana hi ndlela yihi?
9 Vahlayisi van’wana va vutshembeki va tikombe va tshembekile ku nga khathariseki vulema. EBritain, Mukriste un’wana loyi a nga xilema loyi a bohekaka ku tirhisa xitulu xa swilema hambi swi ri tano u kuma ku hetiseka evutirhelini bya yena. U tsarile a ku: “Hambi leswi a ndzi nga thoriwi ku sukela hi 1949, Yehova u tsakele ku ndzi tirhisa nkarhi lowu hinkwawo. Hikwalaho malembe ma hundze hi ku anghwetla. Ndzi dyondze leswaku hambi a ri munhu loyi a lamaleke swinene a nga va mpfuno lowukulu eka van’wana. Mina ni nsati wa mina hi vile phuphu eka vanhu vo hambana-hambana ebandlheni. Hikwalaho ka swiyimo swa hina minkarhi hinkwayo hi kona, ha kumeka.” Ina, u nga tshuki u endla leswaku Mukriste la lamaleke a hela matimba, hikuva a nga va xihlovo xa xikhutazo eka van’wana.
10. Hikwalaho ko ka va nga hluriwi hi nxaniso, vahlayisi va vutshembiki va pfuna vapfumeri-kulobye hi ndlela yihi?
10 Vahlayisi va vutshembeki a va hluriwi hi nxaniso. Loko a khotseriwe ku hlayisa vukalatlhelo bya Vukriste, makwerhu un’wana u te: “Ku biwa . . . ku ve xiphemu xa nkarhi na nkarhi xa vutomi bya mina, ku engeteleka hi nhlayo na hi ku vava. A ndzi tsana siku na siku, hikwalaho ka leswi hakanyingi va ndzi tsoneke swakudya. Nkarhi na nkarhi ndzi khongele Yehova, kutani ndzi nga vula leswaku a nga ndzi lahlanga. Loko va ndzi ba ngopfu, hi laha a ndzi sungula ku swi twa swintsongo.” Hambi leswi a yi gweveriwe malembe lama tlulaka mambirhi ekhotsweni, mbhoni leyi ya Yehova yi hlayise vukala-tlhelo bya yona. (Esaya 2:2-4; Yohane 15:19) Vahlayisi van’wana vo tala va vutshembeki va teke xiyimo lexi fanaka. Hakunene, vahlayisi vo tano va vutshembeki va nyikela xikombiso lexi khutazaka lexi nga susumetelaka vapfumeri-kulobye ku tshembeka.
Ku Chavelela Loku Nga Hlulekiki
11. I ntshembo wihi wa Matsalwa wo chavelela lowu Vakriste va nga na wona?
11 Leyi yi nga laha henhla hi yin’wana ya mintokoto yi nga ri yingani ntsena leyi nga hlayekiki leyi kombaka leswaku Yehova u ni vanhu vakwe lava tshembekaka. I “Tatana wa tintswalo, Xikwembu lexi ku chavelela hinkwako ku humaka eka xona. Xa hi chavelela emaxangwini hinkwawo ya hina.” (2 Vakorinto 1:3, 4) Ina, “Šikwembu i v̌utšhav̌elo bya hina ni matimba ya hina, i ku pfuna loku kumiwaka kusuhi e mapfalweni.” (Psalma 46:1-3) Swi chavelela swonghasi ku tiva leswaku u ta seketela hina ni vapfumerikulorhi emaxangwini hinkwawo!
12. Ndlela ya Pawulo yo hlayisa vutshembeki yi khumbe Vakriste-kulobye hi ndlela yihi?
12 Hi nga kuma xivindzi emhakeni yo vona vagandzerikulorhi va Yehova va tiyisela tanihi Vakriste lava tshembekaka ku nga khathariseki swihinga swo hambana-hambana. Sweswo hi swona leswi humeleleke loko van’wana va vone ku tshembeka ka muapostola Pawulo. U tsarile a ku: “Leswi swi ndzi humeleleke swi pfunile ku yisa Evangeli emahlweni hakunene. Swi fike laha valanguteri hinkwavo va yindlu ya vuhosi ni lavan’wana hinkwavo va swi voneke leswaku ndzi le khotsweni hikwalaho ka Kriste. Ku bohiwa ka mina ekhotsweni ku endlile leswaku vamakwerhu lavo tala va veka ku tshemba ka vona eka Hosi, va engeta va kanya timbilu ku vula Rito va nga chavi nchumu.”—Vafilipiya 1:12-14.
13. Ku hlayisa ka hina vini ka vutshembeki ku nga va ni vuyelo byihi?
13 Ina, loko hi swi tiva leswaku timbhoni tin’wana ta Yehova ti hlayisa vutshembeki eka yena ehansi ka nxaniso, ha tiyisiwa leswaku hi tshama hi tshembekile. Hi tlhelo rin’wana, loko hina hi hexe hi hlayisa vutshembeki ehansi ka ndzingo, hi khutaza van’wana ku vula rito ra Xikwembu va nga chavi nchumu. Naswona hakunene hi nga kuma ku aneriseka hi ku tiva leswaku ku tshembeka ka hina i xihlovo xa xikhutazo ni nkateko eka vona.
14. I switirho swihi swimbirhi leswi Yehova a hi chavelelaka ha swona?
14 Yehova wa hi tiyisa hi moya wakwe lowo kwetsima. Entiyisweni, hi laha Petro a tsaleke ha kona u te, ‘loko hi soriwa hikwalaho ka vito ra Kriste, ha tsaka, hikuva moya lowu kwetsimaka, lowu nga wa Xikwembu, wu le ka hina.’ (1 Petro 4:12-16) Nakambe Xikwembu xi chavelela hina ni vapfumeri-kulorhi lava xanisekaka hi ku amukela ka xona swikhongelo swa hina. “Mi nga vileli ha nchumu,” ku tsale Pawulo, “Kambe etimhakeni hinkwato, tivisani eka Xikwembu, hi ku khongela, leswi mi swi pfumalaka, mi ri karhi mi nkhensa; kutani ku rhula ka Xikwembu loku tlulaka ku twisisa hinkwako, ku ta hlayisa timbilu ta n’wina ni mianakanyo ya n’wina eka Kriste Yesu.” (Vafilipiya 4:6, 7) Xana u ni ntshembo lowu fanaka eka “la yingisaka mikhongelo” ke?—Psalma 65:2.
Ku Kuma Ku Chavelela Loku Humaka eRitweni Ra Xikwembu
15. U nga kombisa ntiyiso wa Varhoma 15:4 hi ndlela yihi?
15 Rito ra Xikwembu leri hlawulekeke nakambe i xihlovo xa ku chavelela lokukulu. Hi laha muapostola Pawulo a xiyeke ha kona u te: “Hinkwaswo leswi tsariweke hi va khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Hi xikombiso, loko hi hlaya hi ta ku kutsuriwa ka Vaisrayele hi singita va huma aEgipta kumbe ku hlayisiwa ka Vayuda esikwini ra Hosi Ester, xana sweswo a swi ku tiyisi ku tshemba ka hina eka Yehova tanihi Mukutsuri la nga ringanisiwiki? Ku vuriwa yini hi rhekhodo ya ku hlayisa ka Yobo ka Vutshembeki ehansi ka tihanyi letikulu? Hakunene, leswi swi komba ndlela leyi malandza ya Yehova ya manguva lawa ma nga tiyiselaka ku xaniseka hi matimba lama Xikwembu xi ma nyikaka ha yona. “Ku chaveleriwa loku hi ku kumaka eMatsalweni” hakunene ku nga tata vahlayisi va vutshembeki hi ntshembo ni xivindzi.
16. I mintshembo yihi leyi chavelelaka leyi kumekaka eka 1 Petro 5:6, 7 na 1 Vakorinto 10:13?
16 Kambe ku vuriwa yini loko swiphiqo swa hina swi hi endla leswaku hi khomiwa hi gome? Kunene, switshembiso leswi chavelelaka swa Matsalwa swi nga hi endla hi titwa hi sirheletekile eku khathaleleni ka Yehova naswona swi nga pfuna ku susa gome ra hina. Muapostola Petro u tsarile a ku: “Titsongahateni ehansi ka voko ra matimba ra Xikwembu, leswaku hi nkarhi wa kona xi ta mi tlakusa. Rhulani ku karhateka hinkwako ka n’wina eka xona, hikuva xi tikarhatela n’wina.” (1 Petro 5:6, 7) Ina, Yehova u “tikarhatela n’wina.” Mawaku mianakanyo leyi chavelelaka swonghasi! Ku hava lexi xi nga humelelaka lexi a nga xi voniki kumbe a hlulekaka ku xi lawula. Ku tlula kwalaho, Pawulo u nyike xitshembiso lexi: “Xikwembu xa tshembeka, xi nga ka xi nga pfumeri leswaku mi humeleriwa hi ndzingo lowu wu mi hlulaka; kambe loko ndzingo wu ta, xi ta mi nyika ndlela ya ku huma eka wona, leswaku mi ta kota ku wu rhwala.” (1 Vakorinto 10:13) Tanihi munhu loyi a tiyimiseleke ku va muhlayisi wa vutshembeki, u nga pfuneka eka sweswo!
17. I malunghiselelo wahi man’wana lama nga kona yo hi chavelela?
17 Ku dyondza Rito ra Xikwembu hi xikhongelo na tibuku ta Vukriste leti ti humesiweke hi “nandza lowo tshembeka, lowa vutlhari” ku nga tisa ku chaveleriwa eminkarhini ya ntshikilelo. (Matewu 24:45-47; Psalma 119:105) Xitsundzuxo lexinene xa Matsalwa lexi humaka eka vakulu va musa ebandlheni na xona xi nga endla tano. Exikarhi ka swilo swin’wana, va rhambiwa ku “tiyisa lava helaka ntamu, [ku pfuna] lava tsaneke, [va] lehisela hinkwavo timbilu.”—1 Vatesalonika 5:14.
18. Loko hi ri ni swintsongo etlhelweni ra nyama, i ku chavelela kwihi loku hi nga na kona?
18 I ku chaveleriwa muni loku nga kona loko hi ri ni swilo swintsongo swa nyama? Kahlekahle swa chavelela ku tiva leswaku ku ta va ni tindlu letinene, swakudya swo tala, ni minkateko yin’wana yo tala ya nyama eMafambiselweni Lamatshwa ya Xikwembu. (Psalma 72:16; 2 Petro 3:13; ringanisa Esaya 65:17-25.) Kambe hambi ku ri sweswi vutomi bya Vukriste byi hunguta ku hangalasiwa ka mali eku dzaheni loku onhaka, ku tinyiketela ku tlula mpimo eka swakunwa leswi nga ni xihoko, ku beja hi mali, na swin’wana. Xisweswo mali leyi hlayisiweke yi nga tirhiseriwa ku pfuna ndyangu wa munhu. Ku landzela Rito ra Xikwembu nakona ku nga hi pfuna ku anerisiwa hi leswintsongo etlhelweni ra nyama. Pawulo a a ri tano, hikuva u te: “Hakunene vukhongeri lebyi nga ni ku tsaka ka mbilu i rifuwo lerikulu. Hikuva a hi tanga na nchumu emisaveni, naswona hi nga ka hi nga fambi na nchumu, loko hi suka kwala misaveni. Hikokwalaho, loko hi ri ni swakudya ni tinguvu, hi ta kolwa hi swona.” (1 Timotiya 6:6-8; Vafilipiya 4:11, 12) Ku anakanyisisa hi malunghelo ya hina entirhweni wa Yehova ku vanga minkateko yo tala leyi endlaka leswaku hi va lava fuweke hakunene.—Swivuriso 10:22.
19. Vuvabyi lebyi nga horiki byi nga tiyiseriwa hi ndlela yihi?
19 Kambe ke, ku vuriwa yini loko hi fanele ku tiyisela vuvabyi lebyi nga horiki? Leswi swi nga antswisiwa hi mpfuno ni ku chavelela ka Yehova loku nyikeriweke hi Rito ra yena. Hi xikombiso, mupisalema Davhida u te: “Ku katekile loyi a anakanyaka šisiwana . . . Yehova o ta ṅwi hlayisa, a v̌a a ṅwi lwela.” (Psalma 41:1-3) Lowu a hi wona nkarhi wo hanyisa hi masingita. Kambe Yehova u nyika Vakriste lava vabyaka vutlhari ni ku tiyisela loku lavekaka ko hlangavetana ni mavabyi ya vona loko va ri karhi va rhangisa timhaka ta Mfumo evuton’wini.—Matewu 6:33; 2 Vakorinto 12:7-10.
20. Hi nga kongomana ni nhlomulo loko munhu loyi hi n’wi rhandzaka a fa hi ndlela yihi?
20 Hi nga kongomana njhani ni nhlomulo lowu ku hlangavetaniwaka na wona loko munhu loyi a rhandziwaka a fa? Ku chaveleriwa ku nga kumiwa eka ntshembo wa Bibele wa ku pfuka ka vafi. (Yohane 5:28, 29; Mintirho 24:15) Xisweswo, hambi leswi hi khomisiwaka gome hi ku fa ka munhu la rhandziwaka, “a hi vaviseki ku kota van’wana lava nga riki na ku langutela.” (1 Vatesalonika 4:13) Mawaku ku chaveleriwa loku ntshembo wa ku pfuka ka vafi wu ku nyikaka vahlayisi va vutshembeki!
Tshama U Ri Karhi U Tshemba Xikwembu Xa Ku Chavelela
21. Nxaniso lowu tiyiseriweke hakanyingi wu hetelela hi yini?
21 Tiyiseka leswaku Yehova, “Xikwembu lexi ku chavelela hinkwako ku humaka eka xona,” a nga ka a nga va lahli vanhu va yena lava tinyiketeke ni lava tshembekaka. (2 Vakorinto 1:3; Psalma 94:14) Nakambe swa pfuna ku tsundzuka leswaku nxaniso lowu tiyiseriweke hi Vakriste wu nga dzunisa, kumbe wu kwetsimisa Xikwembu. Ku xanisiwa ko tano ku yisa mianakanyo eka vanhu va xona ni ntirho wa vona wo chumayela hi ta Mfumo, naswona leswi hakanyingi swi vanga ku andza lokukulu eka nhlayo ya vadzunisi va Yehova.—Ringanisa Mintirho 8:4-8; 11:19-21.
22. Malunghana ni vutshembeki, ku tiyimisela ka hina ku fanele ku va kwihi?
22 Hikwalaho ke, hi mpfuno wa Xikwembu, a hi tiyimiseleni ku lwisana ni marhengu ya Sathana yo tshova vutshembeki bya hina. Hi ku kombisa ripfumelo, onge hi nga hambeta hi tshemba Yehova. Hi nga tshuki hi honisa tindlela to tala leti a katekisaka, a tlakusa, ni ku hi chavelela ha tona tanihi malandza yakwe. Onge hi nga kombisa ku tinyiketela ka hina eka yena ni le milawini yakwe yo lulama, hi tlakusa vuhosi byakwe. Nakambe, tsundzuka leswaku leyi i mhaka ya munhu hi xiyexe. Hambeta u endla ku rhandza ka Xikwembu loko u ri karhi u tirha kun’we ni nhlengeletano ya Yehova eminkarhini leyi yo hlamarisa. Tsakela lunghelo ra wena ro tsakisa mbilu ya Yehova hi ku tshama u tshembekile eka yena, naswona u nga rivali leswaku handle ko hluleka u nyikela ku chavelela eka vahlayisi va vutshembeki hinkwavo.
Nhlamulo Ya Wena Hi Yihi Xana?
◻ Hikwalaho ka yini malandza ya Yehova ngopfu-ngopfu ya lava ku chaveleriwa?
◻ Hikwalaho ka yini Sathana a tirhisa nxaniso ku lwisana ni Vakriste?
◻ Vahlayisi va vutshembeki va nga hi khutaza hi ndlela yihi?
◻ Hi nga kuma ku chaveleriwa eRitweni ra Xikwembu hi ndlela yihi?
◻ Hi tiyisekisiwa hi yini eka 1 Petro 5:6, 7 na 1 Vakorinto 10:13 ke?
[Xifaniso eka tluka 16]
Sathana u lava ku vhanyangeta malandza ya Yehova, kambe a hi pfumali nsirhelelo
[Xifaniso eka tluka 18]
Yehova u hlamula swikhongelo swa vahlayisi va vutshembeki. Xana u khongela nkarhi na nkarhi?