Xihundla—I Mani Babilona Lonkulu La Nga Muoswi Ke?

WANSATI, muoswi lowo biha, loyi a kuceteleke vutomi bya magidi ya timiliyoni ya vanhu, u dlayiwile, u lovisiwile. Kambe loku a hi ku lovisiwa loku tolovelekeke. I yini lexi ku endlaka ku va loku hambaneke? Mulovisi i xiharhi, xivandzana lexi n’wi hluvulaka a sala a nga ambalanga nchumu, xi dya nyama ya yena kutani xi n’wi siya a rindzela ku herisiwa hi ndzilo. Wansati loyi a nga ni nkucetelo i mani xana? Ha yini xivandzana xi n’wi hlasela ke? U endle yini lerova a faneriwa hi makumu lawa ya vukari?a—Nhlavutelo 17:16, 17.

Lexi xi nga va xisekelo xa mhaka ya xihundla leyi tsakisaka swinene—hikwalaho ka leswi yi nga riki pulani ya novhele. I ntiyiso wa matimu lowu yaka eku hetisekeni. Naswona swa ku khumba hikuva muoswi loyi wo biha a nga ha va a kucetela vutomi bya wena sweswi. Ku tlula kwalaho, hambi u tshama na yena kumbe u hambana na yena swi ta vula ku hambana exikarhi ka rifu ni vutomi. Kutani i mani ke?

Vanghana Va Wansati Wa Xihundla

Wansati loyi wa mukanganyisi, muxisi loyi la nga nyumiki, u hlamuseriwe hi Yohane ebukwini ya Bibele ya vuprofeta ya Nhlavutelo, laha hi hlayaka ku: “Hi loko ntsumi yi ndzi teka, yi ndzi yisa emananga ndzi ri eMoyeni. Kutani ndzi vona wansati a tshamile ehenhla ka xivandzana xa ribungu lexi a xi tele hinkwako hi mavito yo sandza Xikwembu; xivandzana xa kona a xi ri ni tinhloko ta 7 ni timhondzo ta khume. Wansati a a ambele tinguvu to vangama ta xivunguvungu ni leto tshwuka, a tikhavisile hi nsuku, ni maribye ya nkoka, ni vuhlalu bya nxavo lowukulu; evokweni ra yena a a tamele xinwelo xa nsuku lexi taleke hi manyala ni thyaka ra vuoswi bya yena. Emombyeni wa yena a ku tsariwile vito leri nhlamuselo ya rona yi nga ya xihundla, leri nge: ‘Babilona lonkulu, mana wa [vaoswi] ni wa manyala ya misava.’”—Nhlavutelo 17:3-5.

Manuku “Babilona lonkulu” loyi u fanele a ri wansati wo chavisa, hikuva rungula eka ndzimana 1 ri vula leswaku hi “la tshameke ehenhla ka mati layo tala.” Sweswo swi vula yini xana? Ntsumi ya Xikwembu yi hlamusele Yohane yi ku: “Mati lawa u ma voneke, laha ku nga tshama nsati loyi wa muoswi, i vanhu va swivongo leswo tala ni ntshungu lowukulu, i vanhu va matiko layo tala ni tindzimi leto tala.” (Nhlavutelo 17:15) Handle ko kanakana loyi i muoswi la nga ni nkucetelo emisaveni hinkwayo. Kambe a hi muoswi la tolovelekeke. I ‘mana wa vaoswi,’ manana wa xiendlo lexi. Loko ku tiwa eka vuoswi, u nyikela swiletelo. Kambe u tlhela a va ni vanghana lava hlawulekeke.

Ntsumi yi paluxa leswaku vanghana lava vo rhandzeka va muoswi lonkulu i vamani. Xana yi va hlamusela njhani? Yi vula leswaku Babilona Lonkulu hi yena loyi “tihosi ta misava ti oswaneke na yena, loyi a nga pyopyisa vaaki va laha misaveni hi vhinyo ya vuoswi bya yena.” (Nhlavutelo 17:2) Loyi ku fanele ku ri muoswi la nga ni vuxisi la nga ni vuxaka lebyinene leswaku a swi kota ku koka vafumi va politiki va misava, tona “tihosi ta misava”! Kutani i mani xana?

Ntsumi yi vula leswaku u ni vito, vito ra xihundla, “Babilona lonkulu.” Manuku hi leswi swikombiso swimbirhi swa ku n’wi tiva—xin’wana i vanghana lava a va rhandzaka naswona xin’wana i vito ra yena, Babilona Lonkulu. Xana swikombiso leswi swi yisa eka makumu wahi ke?

[Nhlamuselo ya le hansi]