Xiviko Xa Vahuweleri Va Mfumo
N’wana Wa Malembe Ya Ntlhanu Hi Vukhale U Pfuxa Ku Tsakela
EXIKARHI ka Timbhoni ta Yehova leti tlulaka 40 000 ta le Venezuela ku ni jaha ra malembe ya ntlhanu hi vukhale leri nga ni ntokoto lowu tsakisaka. A ri yingisele hi vukheta eka tinkulumo ta le rivaleni ehenhleni ka buku leyi nge Life—How Did It Get Here?—By Evolution or by Creation? ni le ka nkambisiso wa le ndzhakunyana wa ndyangu wa buku leyi, jaha leri ra malembe ya ntlhanu hi vukhale, leri a ri huma endyangwini lowu tinyiketeleke eka swilo swa moya, xisweswo ri swi twisisile leswaku hundzuluko wu vula leswaku munhu u ve kona a suka “emurhwini.” Yin’wana ya tindzimana ebukwini leyi yi hlamusela dyondzo ya hundzuluko ya leswaku vutomi byi hundzuluke byi suka eka murhu wa swilo leswi hanyaka.
Hi malembe ya 14, ndyangu wa vaakelani (nuna, nsati, vana vambirhi va kondlo-a-ndzi-dyi va majaha ni n’wana wa nhwanyana wa malembe ya nkombo hi vukhale) a wu nga swi tsakeli swikombelo swa ndyangu wa Timbhoni wo kambisisa Bibele ni swirhambo swa vona swo ya eHolweni ya Mfumo.
Siku rin’wana loko wansati wa Mbhoni a ri karhi a hlantswa swibye, u twe bulo leri tsakisaka exikarhi ka n’wana wa yena wa jaha ni xinhwanyetana xa muakelani, ekusuhi ni darata leyi avaka miti. Mufana lontsongo u te: “Ndzi byele mianakanyo ya wena! Vanhu va misava va vula leswaku munhu u huma emurhwini!” Xinhwanyetana xi hlamurile, hi laha xi toloveleke ku endla ha kona: “Wa hlanya ke?” Xifanyetana xi hlamurile: “E-e, a ndzi hlanyi. Vanhu va misava va vula leswaku munhu u huma emurhwini; kambe i Yehova loyi a endleke munhu.” Mufana u hlekule mianakanyo leyi, leyi a a nga yi lavi, hi ku anakanya leswaku a ku ri murhu lowu tolovelekeke wa swakudya. Kutani u ye emahlweni a byela xinhwanyetana a ku: “Tata wa mina u fanele ku nyika tata wa wena buku leyi nge Creation leswaku a ta swi vona leswaku Xikwembu hi xona xi nga vumba munhu.” Hambi swi ri tano, xinhwanyetana xi vule leswaku a va ri Makhatoliki, ivi sweswo swi herisa bulo.
Loko nuna wa makwerhu loyi wa xisati, loyi a nga nkulu, a vuyile entirhweni, u n’wi hlamusele bulo leri a ri tweke. Hambi leswi xiendlakalo xa vana xi va hlekiseke, makwerhu wa xinuna u anakanye leswaku kumbexana Yehova u lave leswaku a nyikela vumbhoni nakambe eka wanuna loyi wa muakelani. Kutani masiku ma nga ri mangani endzhakunyana, u tshinelele muakelani wa yena ivi a hlamusela bulo ra vana. U vule leswaku hikwalaho ka n’wana wa yena wa mufana, u lave ku n’wi nyika kopi ya buku leyi nge Creation. Mbhoni yi khuthaze leswaku muakelani a yi hlaya handle ka langutelo leri hoxeke, tanihi leswi yi nga ta kombisa masungulo ya vutomi.
Leswi hlamariseke makwerhu, endzhaku ka masikunyana mpatswa lowu, lowu hi nkarhi wo leha swinene a wu nga wu tsakeli ntiyiso, wu titise ekaya ra makwerhu wu phofula ku tisola hi langutelo leri a va ri na rona hi malembe layo tala swinene. Va vule leswaku va khumbiwe swinene hi ntikelo lowu hlamarisaka wa buku leyi nge Creation.
Leswi swi vange leswaku dyondzo ya Bibele yi sunguriwa ni ndyangu lowu. Va sungule ku va kona eminhlanganweni nkarhi na nkarhi naswona hi ku hatlisa va ve vahuweleri va mahungu lamanene. Wanuna, nsati wakwe ni vana vambirhi va majaha va kondlo-a-ndzi-dyi va khuvuriwile entsombanweni wa muganga, naswona nhwanyana na yena i muhuweleri wa Mfumo. Wansati u sungule ntirho wa vuphayona byo pfuna nkarhi na nkarhi hi ku hatlisa endzhaku ka ku khuvuriwa ka yena.
Yesu Kriste wa va tiva lava timbilu ta vona ti nga letinene kutani a nga swi kota naswona wa swi kota ku tirhisa hambi va ri vana ku fikelela timbilu to tano letinene.—Yohane 10:14.