Ntsindza Wa Dyondzo Wa Watchtower Wu Rhumela Varhumiwa

XIKOLO XA BIBELE XA GILEAD XA WATCHTOWER xi khomeriwe etindhawini to hambana-hambana. Exikarhi ka 1943 na 1960, emiakweni ya le South Lansing, New York, U.S.A., mintlawa ya 35 leyi vumbiwaka hi swichudeni swo huma ematikweni ya 95, yi kume vuleteri byo hlawuleka kwalaho. Hi loko xikolo xi rhurhela le yindlu-nkulu ya misava hinkwayo eBrooklyn, New York, laha xi tshameke kona malembe yo lava ku va 28. Ku sukela hi 1988 ku ya eku sunguleni ka 1995, Xikolo xa Gilead a xi dyondzisela eWallkill, New York.

Hi malembe lawa xikolo lexi xi ndlandlamukile xi ya ni le ka tindhawu tin’wana. Ehansi ka nkongomiso wa xona, a ku nyikeriwa khoso ya mavhiki ya khume eka mintlawa yimbirhi le Mexico; mintlawa yin’wana ya ntlhanu a yi khomeriwa le Jarimani; yinharhu le India. Ku sukela hi 1987 xikolo xin’wana xo pfuneta lexi tiviwaka tanihi Xikolo xa Ndzetelo wa Vutirheli a xi dyondzisa mintlawa ematikweni ya 34, xi nyikela khoso yo hlawuleka ya mavhiki ya nhungu yo letela majaha lama fanelekaka. Kambe, vuleteri lebyi nyikeriweke ntlawa wa vu-99 wa le Gilead, eka Ntsindza wuntshwa wa Dyondzo wa Watchtower, le Patterson, eNew York, a ku ri khoso ya mavhiki ya 20, lama katsaka dyondzo leyi anameke ya Bibele hinkwayo, ku dyondza hi matimu ya manguva lawa ni ku hleriwa ka Timbhoni ta Yehovha, swin’we ni swiletelo swo tala malunghana ni ntirho wa vurhumiwa ematikweni mambe.

Hi September 2, ntlawa wa vu-99 wu thwasile. Nongonoko wa tiawara tinharhu wa ku thwasisa wu khomeriwe eholweni yintshwa ya le Ntsindza wa Dyondzo wa Watchtower. A yi tele swinene. Vayingiseri van’wana lava nga emiakweni ya Bethele ePatterson, Wallkill, ni le Brooklyn a va hlanganisiwe hi riqingho. Leri a ku ri siku ro tsakisa, ku nga ri eka ntlawa lowu thwasaka ntsena, kambe ni le ka maxaka ya vona ni vanghana va vona swin’we ni vatirhi vo tirhandzela lava veke ni xandla eku akeni ka xikolo lexi lexintshwa.

Eka marito yakwe yo sungula, Carey Barber wa Huvo leyi Fumaka u nyikele nhlamuselo ya leswi swi humelelaka. U te: “Lowu wu ta va ntsindza wa ntirho lowukulu wo dyondzisa rito ra Xikwembu, wo tlula wihi na wihi lowu tshameke wu endliwa emisaveni.” U hlamusele leswaku ha karhi ha tshinelela ku chaputa ka nkwetlembetano lowu nga kona exikarhi ka mbewu ya wansati ni mbewu ya nyoka. (Genesa 3:15) U vule leswaku lava ku nga vona ntsena va nga ta pona nkwetlembetano lowu lowukulu eka nhlomulo lowukulu lowu taka, hi lava va nga ni vutivi lebyi kongomeke bya Rito ra Xikwembu ni lava va ri yingisaka.

U vule leswaku “nongonoko wa hina wa dyondzo wa sweswi wu endleriwe leswaku wu kota ku tisa vanhu va Yehovha hinkwavo, vo huma hinkwako-nkwako, exiyin’weni lexinene xa ku wupfa lexi hlamuseriweke eka Swivuriso 1:1-4—lexiya xa ku tiva vutlhari ni ndzayo, va kota ku tiva ku twisisa, va amukela ndzayo leyi nyikaka vutlhari, ku lulama, ku avanyisa, vunene ni vuswikoti byo anakanya.” Mawaku nsirhelelo wonghasi wo va ni rifuwo leri!

Ndzayo Leyi Yaka Eka Ntlawa Lowu Thwasaka

Marito lawa yo sungula ma tlhandlamiwe hi nxaxamelo wa tinkulumo to koma ta ntlhanu leti kongomisiweke eka ntlawa lowu thwasaka. Harold Jackson, khale ka muleteri wa le Gilead loyi sweswi a nga xirho xa vatirhi va le yindlu-nkulu eBrooklyn, u khutaze ntlawa a ku, “Hlayisani Swinene Ku Eneriseka Ka N’wina Hi Lunghiselelo Ra Xikwembu.” Lloyd Barry, la veke murhumiwa nkarhi wo leha, loyi sweswi a nga xirho xa Huvo leyi Fumaka, u vulavule hi xihloko lexi nge “Ku Tirhela Yehovha Hi Ku Titsongahata.” U hlamusele leswaku mfanelo leyi i ya nkoka swinene eka mathwasana loko ma ta kota ku tolovelana ni swiyimo swa wona leswintshwa swin’we ni le ku hanyisaneni ka wona ni varhumiwa-kulobye, mavandlha lawa va nga ta tirha na wona swin’we ni vanhu va ndhawu ya kona.

Karl Adams, loyi sweswi a tirhaka tanihi un’wana wa vadyondzisi eGilead, u vulavurisane ni ntlawa hi xivutiso lexi nge “Xana Ripfumelo Ri Ta Ku Susumetela Ku Endla Yini?” U va khutaze leswaku va nga fani ni Vaisrayele lavaya va gunguleke hi swiyimo swa le mananga ivi va navela ku tlhelela aEgipta, kambe ematshan’weni ya sweswo, a va fane na Abrahama, loyi a titshegeke hi Mfumo wa Xikwembu ematshan’weni yo tlhelela eUri wa Vakalediya tanihi ntlhantlho wa swiphiqo. (Eksoda 16:2, 3; Vaheveru 11:10, 15, 16) Ulysses Glass, mutsarisi wa xikolo, u tirhise ntokoto wa Asafa hi laha wu tsariweke ha kona eka Pisalema 73 ku tsundzuxa ntlawa wa mathwasana, “Hlayelani Mikateko Ya N’wina.” Albert Schroeder, xirho xa Komiti leyi Dyondzisaka xa Huvo leyi Fumaka, u vulavule hi nhloko-mhaka leyi nge “Yehovha Wa Hi Wundla.” Tanihi vumbhoni bya malunghiselelo yo tano, u boxe Xikolo xa Gilead hi xoxe ni ntirho wa xona eku hetisiseni ka ntirho lowukulu wo chumayela ni wa ku endla vadyondzisiwa.

Endzhakunyana vayingiseri va yingise hi vukheta loko Milton Henschel, muungameri wa Sosayiti ya Watch Tower, a vulavule hi nhloko-mhaka leyi nge “Swirho Leswi Tirhisanaka.” U hlaye Varhoma ndzima 12 ivi a yi hlamusela hi vuenti. Hi xikombiso, u te: “Hi fanele hi tsundzuka leswaku hi ni vuxaka bya le kusuhi ni malandza-kulorhi ya le vandlheni.” U engeterile: “I swinene leswaku minkarhi hinkwayo hi tekana tanihi vanhu lava nga va Yehovha, ematshan’weni yo va ni vuxopaxopi, hi vonana swihoxo, a hi pfunaneni hi minkarhi hinkwayo. Ha tipfuna hi hexe loko hi hlayisa vun’we evandlheni ra Vukreste.” U kombise ndlela leyi ku pfunana koloko ku nga kombisiwaka ha yona eku lunghiseleleni ka swakudya emakaya ya varhumiwa, hi tsundzuka leswaku van’wana swi nga ha endleka va nga dyi swilo swokarhi. Nakambe u khutaze ku pfunana ematshan’weni ya ku xopaxopana loko hi ri ensin’wini ni Vakreste-kulobye lava va sweleke. Loko hi pfunana hakunene, hi akana ni ku khutazana, “Yehovha u ta hi rhandza hikwalaho ka sweswo,” ku vule Makwerhu Henschel. Mawaku xitsundzuxo xonghasi eka varhumiwa lava va nga ta ya tirha ematikweni lawa ma hambanaka swinene ni lawa va humaka eka wona!

Ku Tiva Ntlawa Ku Antswa

Swichudeni swa 48 swa ntlawa wa vu-99 hi avhareji swi ni malembe ya 32 hi vukhale naswona se swi ni malembe yo tlula 11 swi ri evutirhelini bya nkarhi hinkwawo.

Mimbulavurisano leyi a yi ri xiphemu xa nongonoko wo thwasisa yi nyike vayingiseri nkarhi wo tiva swin’wana swa swona. Nikki Liebl, wo huma eUnited States, na Simon Bolton wo huma eNghilandhi, va vulavule hi xiendlakalo lexi ringeke ripfumelo ra vona ra leswaku Yehovha u ta va wundla hi tlhelo ra nyama. Va vone nkhathalelo wa Yehovha loko va ri karhi va rhangisa vutirheli bya vona bya nkarhi hinkwawo.

Isabelle Kazan, loyi a vulavulaka Xifurwa, u vule leswaku u dyondze Xiarabu leswaku a ta kota ku nyikela vumbhoni eka vanhu lava vulavulaka Xiarabu etikweni ra ka vona. Loko a sungula hi 1987, ntlawanyana lowu a wu ri eParis a wu ri ni vamakwerhu va mune ntsena lava vulavulaka Xiarabu, ivi ku va yena ni makwerhu un’wana wa xisati loyi na yena a dyondzaka ririmi leri. (A swi nga olovi. A va heta tiawara ta nhungu va ri karhi va lunghiselela dyondzo ya vona ya Xihondzo xa Rindza vhiki na vhiki leswaku va ta kota ku hlamula.) Xana matshalatshala ya vona ma humelerile? Phela namuntlha ku ni Timbhoni leti vulavulaka Xiarabu leti hleriweke ti va swifundzha swa ntlhanu eFurwa hinkwaro. Xichudeni xin’wana, ku nga Miko Puro, u hlamusele ndlela leyi Xifurwa lexi a xi dyondzeke exikolweni xi n’wi pfuneke ha yona ku chumayela vahlapfa va Vantima lava nge tikweni ra ka vona ra Finland, naswona xi ta n’wi pfuna swinene exiavelweni xakwe xa vurhumiwa eBenin. Bonny Bowes u hlamusele matshalatshala yakwe yo vulavula Xifurwa hi ndlela leyi khulukaka leswaku a ta kota ku ya tirha eQuebec, Canada. Bjarki Rasmussen wo huma eDenmark, u hlamusele ntokoto lowu yena ni nsati wakwe ana se va veke na wona hi malembe ya vona yo tala yo tirha eSwihlaleni swa Faeroe. Entiyisweni varhumiwa lava i vatirheli va nkarhi hinkwawo lava nga ni ntokoto.

Mathwasana lawa ma averiwe ematikweni ya 19—eAfrika, Amerika Dzonga ni le Xikarhi, Yuropa Vuxa ni le Vuxeni. Mathwasana ya mintlawa leyi hundzeke ana se ma tirhe ematikweni yo tlula 200. Yo tala ya mathwasana lawa ya ha tirha eswiavelweni swa wona. Varhumiwa lava lavantshwa sweswi va va joyina eku ndlandlamuxeni ka ku nyikela vumbhoni hi Mfumo ku ya fika emakun’wini ya misava.—Mintirho 1:8.

[Swifaniso leswi nga eka tluka 25]

Swivono swa kamara ro dyondzela eka rona eNtsindza wa Dyondzo wa Watchtower

[Xifaniso lexi nga eka tluka 26]

Ntlawa Wa Vu-99 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwe ku sukela emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Swifaniso leswi nga eka tluka 27]

Va ha ri kona eswiavelweni swa vona: (eximatsini) Charles Leathco ni nsati wakwe, Fern le Brazil, mathwasana ya ntlawa wo sungula ni wa vutsevu wa le Gilead; (ehansi) Martha Hess eJapani, thwasana ra ntlawa wa vunkombo wa le Gilead