Ku Pfuna Van’Wana Leswaku Va Dyondza Swilaveko Swa Xikwembu

“Hikuva swa ndzi boha ku ma twarisa; ndzi ta va ni khombo loko ndzi nga twarisi Mahungu Lamanene!”—1 VAKORINTO 9:16.

1, 2. (a) Hi wihi ntirho wa swiyenge swimbirhi lowu Yehovha a lavaka leswaku hi wu endla? (b) I yini leswi vanhu va timbilu letinene va faneleke va swi tiva, leswaku va ta va vafumiwa va Mfumo wa Xikwembu?

YEHOVHA u ni mahungu lamanene, lawa a ma khomeleke vanhu. U ni Mfumo, naswona u lava leswaku etindhawini hinkwato, vanhu va twa ha wona! Loko hi kala hi dyondza hi mahungu lawa lamanene, Xikwembu xi lava leswaku hi ma avela van’wana. Lowu i ntirho wa swiyenge swimbirhi. Xo sungula, hi fanele hi huwelela mahungu lamanene ya Mfumo wa Xikwembu. Eka vuprofeta bya yena malunghana ni “ku hela ka [minkarhi],” Yesu u te: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:3, 14.

² Xiyenge xa vumbirhi xa ntirho lowu xi katsa ku dyondzisa lava angulaka hi ndlela leyinene eku huweleriweni ka Mfumo. Endzhaku ka ku pfuxiwa ka yena eku feni, Yesu u byele ntlawa lowukulu wa vadyondzisiwa vakwe a ku: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.” (Matewu 28:19, 20) ‘Swilo leswi Kreste a va leriseke swona’ a swi nga humi eka yena; a a dyondzisa van’wana ku hlayisa swileriso kumbe swilaveko swa Xikwembu. (Yohane 14:23, 24; 15:10) Xisweswo ku dyondzisa van’wana ‘ku hlayisa swilo leswi Kreste a swi leriseke’ swi katsa ku va pfuna va tiva swilaveko swa Xikwembu. Vanhu va timbilu letinene va fanele va fikelela swilaveko swa Xikwembu leswaku va ta va vafumiwa va Mfumo wa xona.

3. Mfumo wa Xikwembu i yini, naswona i yini leswi wu nga ta swi endla, leswi endlaka leswaku rungula ra Mfumo ri va mahungu lamanene swonghasi?

³ Mfumo wa Xikwembu i yini? Naswona i yini leswi wu nga ta swi endla, leswi endlaka leswaku rungula ra Mfumo ri va mahungu lamanene swonghasi? Mfumo wa Xikwembu i hulumendhe ya le tilweni. I wa risima swinene embilwini ya Yehovha, hikuva hi wona lowu a nga ta wu tirhisa ku kwetsimisa vito ra yena, a ri basisa eka ndzhukano hinkwawo. Mfumo lowu i xitirho lexi Yehovha a nga ta xi tirhisa leswaku ku rhandza ka yena ku endliwa emisaveni, ku fana ni le tilweni. Hi yona mhaka leyi Yesu a hi dyondziseke ku khongelela Mfumo wa Xikwembu leswaku wu ta, ni ku hi khutaza leswaku hi wu rhangisa evuton’wini bya hina. (Matewu 6:9, 10, 33) Xana wa xi vona xivangelo lexi endlaka leswaku swi va swa nkoka swonghasi eka Yehovha, leswaku hi dyondzisa van’wana malunghana ni Mfumo wakwe?

I Ntlhontlho Kambe A Hi Ndzhwalo

4. Swi nga kombisiwa ku yini leswaku ntirho wa hina wo chumayela mahungu lamanene a hi ndzhwalo?

⁴ Xana i ndzhwalo ku chumayela mahungu lawa lamanene? Nikatsongo! Hi xikombiso: Tatana u ni vutihlamuleri byo wundla ndyangu wa yena hi swilo swa nyama. Ku tsandzeka ku endla tano swi fana ni ku landzula ripfumelo ra Vukreste. Muapostola Pawulo u tsarile: “Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.” (1 Timotiya 5:8) Kambe, xana vutihlamuleri byebyo i ndzhwalo eka wanuna wa Mukreste? Loko a rhandza va ndyangu wakwe, a hi ndzhwalo, u ta lava ku va wundla.

5. Hambileswi ntirho wo chumayela ni ku endla vadyondzisiwa wu nga vutihlamuleri, ha yini hi fanele hi swi tsakela ku wu endla?

⁵ Hilaha ku fanaka, ntirho wa ku chumayela ni wo endla vadyondzisiwa i vutihlamuleri, xilaveko lexi vutomi bya hina byi titshegeke ha xona. Pawulo u swi veka hi ndlela leyi: “Hikuva swa ndzi boha ku ma twarisa; ndzi ta va ni khombo loko ndzi nga twarisi Mahungu Lamanene!” (1 Vakorinto 9:16; ringanisa Ezekiyele 33:7-9.) Hambiswiritano, leswi hi susumetelaka ku chumayela i rirhandzu, ku nga ri ku hetisisa nawu ntsena. Xa nkoka swinene, hi rhandza Xikwembu, kambe ni vaakelani va hina ha va rhandza, naswona ha swi tiva leswaku i swa nkoka swinene leswaku va twa mahungu lawa lamanene. (Matewu 22:37-39) Ma va nyika ntshembo hi vumundzuku. Ku nga ri khale Mfumo wa Xikwembu wu ta herisa vuhomboloki, wu susa ntshikilelo hinkwawo, ni ku kondletela ku rhula ni vun’we—ku tisa mikateko leyi nga heriki eka hinkwavo lava titsongahatelaka vulawuri bya wona lebyo lulama. Xana a hi swi tsakeli, ina, a hi nyanyuki, leswi hi avelanaka mahungu yo tano lamanene ni van’wana?—Pisalema 110:3.

6. Hikwalaho ka yihi ntirho wo chumayela ni ku endla vadyondzisiwa wu ri ntlhontlho lowukulu?

⁶ Hi nkarhi lowu fanaka, ntirho lowu wo chumayela ni wo endla vadyondzisiwa i ntlhontlho lowukulu. Vanhu a va fani. A va tsakeli swilo leswi fanaka kumbe ku va ni vuswikoti lebyi fanaka hinkwavo. Van’wana va dyondzekile, kasi van’wana a va dyondzekanga. Ku hlaya—eminkarhini leyi hundzeke a swi rhandziwa—sweswi hakanyingi swi langutiwa swi ri ntirho wo nonon’hwa. Ku loloha ku hlaya, leswi hlamuseriwaka tanihi “xiyimo kumbe ku va ni vuswikoti byo hlaya kambe u nga swi tsakeli ku endla tano,” i xiphiqo lexi kulaka, hambi ku ri ematikweni lama tinyungubyisaka hi dyondzo ya le henhla. Kutani, hi nga va pfuna njhani vanhu lava nga ni mindhavuko yo hambana swonghasi, naswona lava rhandzaka swilo swo hambana, leswaku va dyondza swilaveko swa Xikwembu?—Ringanisa 1 Vakorinto 9:20-23.

Ku Hloma Hi Ndlela Leyinene Leswaku Hi Pfuna Van’wana

7. “Nandza la tshembekaka, wo tlhariha” u hi hlomise hi ndlela yihi leswaku hi pfuna van’wana ku dyondza swilaveko swa Xikwembu?

⁷ Swa olova ku tirha ntirho lowu nonon’hwaka loko u ri ni switirho leswi faneleke. Xitirho lexi faneleke ku tirha ntirho wo karhi namuntlha xi nga ha lava ku antswisiwa kumbe ku siviwa hi xin’wana mundzuku, hikwalaho ka swilaveko leswi hundzukaka. Swi tano na hi rungula ra Mfumo wa Xikwembu. Hi malembe layo tala, “nandza la tshembekaka, wo tlhariha,” u hi nyike switirho leswi swi nga swona, minkandziyiso leyi hi ku kongoma yi endleriweke ku fambisa tidyondzo ta Bibele ta le kaya. (Matewu 24:45) Xisweswo a hi ri karhi hi hlomiseriwa ku pfuna vanhu vo huma “ematikweni hinkwawo, ni le tinxakeni hinkwato . . . ni va tindzimi hinkwato” leswaku va dyondza swilaveko swa Xikwembu. (Nhlavutelo 7:9) Nkarhi na nkarhi, tibuku leti engetelekeke a ti ri karhi ti endliwa leswaku ti fambisana ni swilaveko leswi hundzukaka swa misava. A hi xiyeni swikombiso swi nga ri swingani.

8. (a) Hi xihi xiphemu lexi buku leyi nge “Let God Be True” yi veke na xona eku yiseni ka dyondzo ya Bibele emahlweni? (b) Hi xihi xitirho xo dyondza Bibele lexi humesiweke hi 1968, naswona a xi lunghiseleriwe hi ku hlawuleka hi ndlela yihi? (c) Buku leyi nge Ntiyiso yi pfune njhani entirhweni wo endla vadyondzisiwa?

⁸ Ku sukela hi 1946 ku ya ka 1968, buku leyi nge “Let God Be True” a yi tirhisiwa tanihi xitirho xa matimba xa dyondzo ya Bibele, naswona 19-250000 wa tikopi ti humesiwile hi tindzimi ta 54. Hi 1968 ku humesiwe buku leyi nge Ntiyiso Lowu Yisaka eVuton’wini Lebyi Nga Heriki (hi Xinghezi), leyi hi malembe layo tala yi tirhisiweke hi ndlela leyi humelelaka eku dyondzeni ka Bibele ni vanhu lava tsakelaka. Enkarhini lowu hundzeke, a swi tolovelekile eka van’wana leswaku va dyondza ni Timbhoni ta Yehovha malembe yo tala va nga si khuvuriwa. Kambe xitirho lexi a xi endleriwe ku pfuna xichudeni ku xi khutaza leswaku xi tirhisa leswi xi swi dyondzaka. Xana ku ve ni vuyelo byihi? Buku leyi nge Timbhoni Ta Yehovha I Vahuweleri Va Mfumo Wa Xikwembu yi ri: “Eka malembe manharhu ya ntirho ku sukela hi September 1, 1968, ku ya eka August 31, 1971, ku khuvuriwe ntsengo wa vanhu va 434 906—ku tlula nhlayo leyi khuvuriweke eka malembe manharhu ya ntirho lama hundzeke yi andzisiwe kambirhi!” Ku sukela eku humesiweni ka yona, buku leyi nge Ntiyiso yi hangalasiwe hi ndlela leyi hlamarisaka—ku tlula 107 000 000 hi tindzimi ta 117.

9. Hi xihi xiphemu xo hlawuleka lexi buku leyi nge Hanya Hi Masiku yi veke na xona, naswona hi byihi vuyelo lebyi yi veke na byona eka nhlayo ya vahuweleri va Mfumo?

⁹ Hi 1982, buku leyi nge U Nga Hanya Hi Masiku aParadeyisini eMisaveni yi ve buku-nkulu leyi a yi tirhiseriwa ku fambisa tidyondzo ta Bibele. Xitirho lexi xi ni swifaniso swo tlula 150, laha xin’wana ni xin’wana xi nga ni marito lama xi hlamuselaka kahle, lama hi ku komisa ma nyikelaka yinhla leyi dyondzisaka ya swifaniso swa kona. Nkandziyiso wa Vutirheli Bya Hina Bya Mfumo bya October 1982 (nkandziyiso wa U.S.A.) wu te: “Emalembeni ya kwalomu ka 20 lawa eka wona buku leyi nge ‘Let God Be True’ a yi ri buku-nkulu ya hina yo dyondzisa ha yona (ku sukela hi 1946 ku ya exikarhi ka va-1960), ku tlula 1000 000 wa vahuweleri lavantshwa va Mfumo va engetelekile enhlengeletanweni ya hina. Kutani, ku engeteleke nhlayo yin’wana ya vahuweleri va 1000 000 loko Ntiyiso Lowu Yisaka eVuton’wini Lebyi Nga Heriki yi ve buku-nkulu ya hina yo dyondzisa ha yona, endzhaku ka loko yi humesiwile hi 1968. Leswi hi tirhisaka buku ya hina leyintshwa yo dyondzisa leyi nge U Nga Hanya Hi Masiku aParadeyisini eMisaveni, xana hi nga kuma ku andza loku fanaka ka vahuweleri va Mfumo? Ina, loko leswi ku ri ku rhandza ka Yehovha!” Kunene, a ku ri ku rhandza ka Yehovha, hikuva ku sukela hi 1982 ku ya ka 1995, ku engeteleke vahuweleri va Mfumo vo tlula 2700 000!

10. Hi xihi xitirho lexintshwa lexi humesiweke hi 1995, naswona hikwalaho ka yini xi ta swi kota ku pfuna swichudeni swa Bibele leswaku swi endla nhluvuko lowunene wa moya hi xihatla?

¹⁰ Yesu u te: “Ntshovelo i wukulu, kambe vatirhi a va talanga.” (Matewu 9:37) Hakunene, ntshovelo i wukulu. Ka ha ri ni swo tala leswi faneleke ku endliwa. Ematikweni man’wana vanhu va boheka ku nghenisiwa enxaxamelweni wa lava rindzeleke tidyondzo ta Bibele. Kutani hikwalaho ko lava ku hangalasa vutivi bya Xikwembu hi xihatla, hi 1995 “nandza la tshembekaka, wo tlhariha” u nyikele xitirho lexintshwa, buku leyi nga ni matluka ya 192 leyi nge Vutivi Lebyi Yisaka eVuton’wini Lebyi Nga Heriki. Xitirho lexi xa nkoka a xi ti hlamuseli ngopfu tidyondzo ta mavunwa. Xi nyikela ntiyiso wa Bibele hi ndlela leyinene. Ku tshembiwa leswaku xi ta swi kota ku pfuna swichudeni swa Bibele leswaku swi endla nhluvuko lowunene wa moya hi xihatla. Buku leyi nge Vutivi ana se yi ve ni vuyelo lebyinene ensin’wini ya misava hinkwayo hi tikopi ta 45 500 000 leti kandziyisiweke hi tindzimi ta 125 naswona ya karhi ya hundzuluxeriwa hi tindzimi leti engetelekeke to ringana 21.

11. Hi xihi xitirho lexi lunghiseleriweke leswaku xi pfuna lava nga dyondzangiki, kumbe lava nga swi kotiki kahle ku hlaya, naswona xi hoxe njhani xandla hilaha ku xiyekaka eka nongonoko wa hina wa misava hinkwayo wo dyondzisa?

¹¹ Nkarhi na nkarhi, “nandza la tshembekaka” a a ri karhi a nyikela switirho leswi endleriweke ntlawa wo karhi wa vayingiseri. Hi xikombiso, ku vuriwa yini hi vanhu lava kumbexana va nga ha lavaka mpfuno lowo hlawuleka, hikwalaho ka ndhavuko kumbe vukhongeri lebyi va nga eka byona? Xana hi nga va pfunisa ku yini leswaku va dyondza swilaveko swa Xikwembu? Hi 1982 hi kume nchumu lowu a hi wu pfumala—broxara ya matluka ya 32 leyi nge Tsakela Vutomi eMisaveni Hi Masiku! Nkandziyiso lowu lowunene, lowu nga ni swifaniso wu ve xitirho lexi humelelaka eku dyondziseni ka lava nga dyondzangiki, kumbe lava nga swi kotiki kahle ku hlaya. Yi hlamusela tidyondzo ta xisekelo ta Matsalwa hi ndlela yo olova swinene ni leyi twisisekaka kahle. Ku sukela eku humesiweni ka yona broxara leyi nge Vutomi eMisaveni yi hoxe xandla swinene eka nongonoko wa hina wo dyondzisa wa misava hinkwayo. Ku tlula 105 100 000 wa tikopi ti kandziyisiwile hi tindzimi to ringana 239, leswi yi endlaka yi va nkandziyiso lowu hundzuluxeriweke hi tindzimi to tala swinene eka hinkwayo leyi Sosayiti ya Watch Tower yi tshameke yi yi humesa ku ta fika sweswi!

12, 13. (a) Ku sukela hi 1990, hi yihi ndlela leyintshwa leyi “nandza la tshembekaka” a yi lunghiseleke leswaku ku pfuniwa vayingiseri lava nga etindhawini to hambana-hambana? (b) Hi nga ti tirhisa njhani tivhidiyo ta Sosayiti evutirhelini bya hina bya nsimu? (c) I xitirho xihi lexa ha ku lunghiseleriwaka leswaku xi hi pfuna entirhweni wa hina wo endla vadyondzisiwa?

¹² Ku engetela eka tibuku leti kandziyisiweke, ku sukela hi 1990 “nandza la tshembekaka” u hi lunghiselele ndlela yo dyondzisa leyi yi hi nyikaka ndlela leyintshwa yo fikelela vayingiseri vo tala swinene—ku nga tikhasete ta vhidiyo. Hi October ya lembe rero, ku humesiwe vhidiyo yo leha 55 wa timinete leyi nge Jehovah’s Witnesses—The Organization Behind the Name—ku nga vhidiyo yo sungula leyi humesiweke hi Sosayiti ya Watch Tower. Rungula leri lerinene, leri dyondzisaka, leri kumekaka hi tindzimi ta kwalomu ka 35, ri kombisa nhlengeletano ya misava hinkwayo ya vanhu va Yehovha lava tinyiketeleke, va ri karhi va hetisisa xileriso xa Yesu xo twarisa mahungu lamanene emisaveni hinkwayo. Hilaha ku hlawulekeke vhidiyo leyi yi endleriwe ku pfuneta entirhweni wa hina wo endla vadyondzisiwa. Vahuweleri va Mfumo a va kalanga va dya nkarhi eku tirhiseni ka xitirho lexi lexintshwa evutirhelini bya nsimu. Van’wana va famba na yona eminkwameni ya vona ya tibuku, va tshama va lunghekele ku yi komba, kumbe ku yi lomba lava tsakelaka. Endzhakunyana ko humesiwa ka yona, mulanguteri la famba-fambaka u tsarile: “Tivhidiyo ti ve ndlela ya lembe-xidzana ra vu-21 yo fikelela mianakanyo ni timbilu ta timiliyoni ta vanhu, kutani hi tshemba leswaku vhidiyo leyi yo va masungulo eka tivhidiyo to tala leti Sosayiti yi nga ta ti tirhisa leswaku yi yisa ntirho wa Mfumo emahlweni emisaveni hinkwayo.” Ina, tivhidiyo leti engetelekeke ti humesiwile, ku katsa ni leyi ya swiyenge swinharhu leswi tlhandlamanaka, leyi nge The Bible—A Book of Fact and Prophecy na leyi nge Jehovah’s Witnesses Stand Firm Against Nazi Assault. Loko tivhidiyo ta Sosayiti ti kumeka hi ririmi ra wena, xana u tshama u ti tirhisa evutirhelini bya wena bya nsimu?a

¹³ Sweswinyana ku humesiwe xitirho lexintshwa, broxara leyi nge I Yini Leswi Xikwembu Xi Swi Languteleke Eka Hina?, leswaku yi pfuneta entirhweni wo endla vadyondzisiwa. Yi humesiwe hikwalaho ka xivangelo xihi? Xana yi nga tirhisiwa hi ndlela yihi?

Ku Kambisisa Xitirho Lexintshwa

14, 15. Xana broxara leyi nge Leswi Xi Swi Languteleke yi lunghiseleriwe vamani, naswona yi tamele yini?

¹⁴ Nkandziyiso lowuntshwa lowu nge I Yini Leswi Xikwembu Xi Swi Languteleke Eka Hina? wu endleriwe vanhu lava ana va pfumelaka eka Xikwembu naswona lava yi xiximaka Bibele. Valanguteri lava famba-fambaka ku katsa ni varhumiwa lava leteriweke eGilead, lava nga ni ntokoto wa malembe yo tala ematikweni lama hluvukaka, va pfunetile eku lunghiseleleni ka broxara leyi. Yi ni rungula leri twisisekaka, leri nga ni tidyondzo ta Bibele ta xisekelo. Matsalelo ya yona hi lamanene, yo olova naswona ma ba nhloko ya mhaka. Hi nkarhi lowu fanaka, rungula ra yona a ri olovi ngopfu. A ri nyikeli “ntswamba” ntsena kambe ri nyikela ni “swakudya leswi tiyeke” leswi humaka eRitweni ra Xikwembu hi ndlela leyi vanhu vo tala va nga ta kota ku ri twisisa.—Vaheveru 5:12-14.

¹⁵ Emalembeni ya sweswinyana, vahuweleri va Mfumo ematikweni yo tala va kombele nkandziyiso wo tanihi lowu. Hi xikombiso, rhavi ra Sosayiti ya Watch Tower ra le Papua New Guinea ri tsarile: “Vanhu va pfilunganyekile hi tidyondzo ta vukhongeri leti himpfilitanaka. Va lava rungula ra ntiyiso leri baka nhloko ya mhaka, leri seketeriwaka hi tindzimana ta Bibele to hlayanyana, leri va nga ta ri hlaya eTibibeleni ta vona vini. Va lava rungula leri twisisekaka ni leri kongomeke ra leswi Xikwembu xi swi languteleke eka Mukreste wa ntiyiso, ni leswaku hi yihi mikhuva ni swiendlo leswi nga amukelekiki eka xona.” Broxara leyi nge Leswi Xi Swi Languteleke hi wona nchumu lowu hi wu lavaka leswaku hi pfuna vanhu vo tano leswaku va dyondza swilaveko swa Xikwembu.

16. (a) I vamani lava ngopfu-ngopfu va nga vuyeriwaka hi tinhlamuselo leti olovaka ta broxara leyintshwa? (b) Xana lava nga ensin’wini ya ka n’wina va nga pfunisiwa ku yini hi broxara leyi nge Leswi Xi Swi Languteleke?

¹⁶ Xana u nga xi tirhisa njhani xitirho lexi lexintshwa? Xo sungula, xi nga tirhisiwa ku dyondza ni vanhu lava swi va nonon’hwelaka ku hlaya kumbe lava nga swi rhandziki swinene ku hlaya.b Vanhu vo tano va nga ha pfuneka hi tinhlamuselo leti olovaka ta broxara leyi. Endzhaku ko kambisisa kopi ya nkandziyiso lowu leyi marhavi ya Watch Tower ma rhumeriweke yona ka ha ri emahlweni, ma tsale leswi landzelaka: “Broxara leyi yi ta pfuna swinene eswiphen’wini swo tala swa tiko, laha vanhu va kona va nga swi rhandziki swinene ku hlaya.” (Brazil) “Ku ni nhlayo leyikulu ya valuveri lava nga swi kotiki ku hlaya ririmi ra ka vona naswona va ha tikeriwaka hi ku hlaya Xifurwa. Broxara leyi yi nga ha tirhisiwa tanihi xipfuneti xo dyondzisa vanhu vo tano.” (Furwa) Xana u nga anakanya hi vanhu lava nga ha pfuniwaka hi broxara leyi nge Leswi Xi Swi Languteleke ensin’wini ya ka n’wina?

17. Xana broxara leyintshwa yi nga tirhisiwa hi ndlela yihi leyi humelelaka ematikweni yo tala, naswona ha yini?

¹⁷ Xa vumbirhi, ematikweni yo tala broxara leyi yi nga tirhiseriwa ku sungula tidyondzo ta Bibele ni vanhu lava chavaka Xikwembu, ku nga khathariseki leswaku va dyondzeke ku fikela kwihi. Kavula, ku fanele ku endliwa matshalatshala yo sungula dyondzo hi buku leyi nge Vutivi Lebyi Yisaka eVuton’wini Lebyi Nga Heriki. Kambe minkarhi yin’wana swi nga ha olova ku sungula dyondzo hi broxara. Kutani hi nkarhi lowu faneleke, dyondzo yi nga ha hundziseriwa eka buku leyi nge Vutivi, buku-mpfuno ya hina leyikulu ni leyi bumabumeriwaka yo fambisa dyondzo. Malunghana ni matirhiselo lawa ya broxara leyi nge Leswi Xi Swi Languteleke, marhavi ya Watch Tower ma tsarile: “Ku sungula tidyondzo ta Bibele swa tika, naswona swi tikomba onge swa antswa eka vahuweleri loko va sungula dyondzo hi broxara.” (Jarimani) “Broxara ya muxaka lowu yi ta humelela swinene eku sunguleni ka tidyondzo ta Bibele, kutani endzhaku ku tirhisiwa buku leyi nge Vutivi.” (Italy) “Hambileswi Majapani ma nga ni dyondzo ya le henhla, yo tala ya wona ma ni vutivi byitsongo hi Bibele ni tidyondzo ta yona ta xisekelo. Broxara leyi yi nga ha va ndlela leyinene yo hundzela ebukwini leyi nge Vutivi.”—Japani.

18. I yini leswi hi faneleke hi swi tsundzuka malunghana ni ku fikelela swilaveko swa Xikwembu?

¹⁸ Marhavi ya Sosayiti emisaveni hinkwayo ma yi komberile broxara leyi, naswona ku nyikiwe mpfumelelo wo yi hundzuluxela hi tindzimi ta 221. Onge nkandziyiso lowu wu nga hi pfuna leswaku hi pfuna van’wana leswaku va tiva leswi Yehovha Xikwembu a swi languteleke eka vona. Swa hina, i ku tsundzuka leswaku ku fikelela swilaveko swa Xikwembu, ku katsa ni xileriso xa ku chumayela ni xo endla vadyondzisiwa, swi hi nyika nkarhi lowunene wo komba Yehovha ndlela leyi hi n’wi rhandzaka ha yona. Ina, leswi Xikwembu xi swi languteleke eka hina a hi ndzhwalo. I ndlela yo antswa ya ku hanya!—Pisalema 19:7-11.

[Tinhlamuselo ta le hansi]

Xana U Nga Hlamusela?

◻ Hi le ntirhweni wihi wa swiyenge swimbirhi lowu Yehovha a lavaka leswaku malandza yakwe ma hlanganyela eka wona?

◻ Hikwalaho ka yini vutihlamuleri bya hina byo chumayela ni ku endla vadyondzisiwa byi nga ri ndzhwalo eka hina?

◻ I switirho swihi leswi “nandza la tshembekaka, wo tlhariha” a swi lunghiseleleke leswaku hi swi tirhisa entirhweni wo chumayela ni ku endla vadyondzisiwa?

◻ Xana broxara leyi nge Leswi Xi Swi Languteleke yi endleriwe vamani, naswona hi nga yi tirhisa njhani evutirhelini bya hina?

[Xifaniso lexi nga eka tluka 24]

Ntirho wa hina wo chumayela ni ku endla vadyondzisiwa a hi ndzhwalo

[Xifaniso lexi nga eka tluka 26]

“Let God Be True” (1946, leyi pfuxetiweke hi 1952): 19 250 000 hi tindzimi ta 54

“Ntiyiso Lowu Yisaka eVuton’wini Lebyi Nga Heriki” (1968): 107 000 000 hi tindzimi ta 117 (yi kombisiwe hi Xifurwa)

“U Nga Hanya Hi Masiku aParadeyisini eMisaveni” (1982): 80 900 000 hi tindzimi ta 130 (yi kombisiwe hi Xirussia)

“Vutivi Lebyi Yisaka eVuton’wini Lebyi Nga Heriki” (1995): 45 500 000 hi tindzimi ta 125 (yi kombisiwe hi Xijarimani)