“A Ndzi Swi Tsakeli”
1 Hi ntolovelo vanhu va angula tano etindhawini tin’wana loko hi va chumayela. I yini lexi nga hi pfunaka leswaku hi nga heli matimba loko vanhu va nga tsakeli ensin’wini ya hina? Xana hi nga endla njhani leswaku va tsakela mahungu lamanene?
2 Tshama U Tsakile: Hi nga tshama hi tsakile loko hi tsundzuka leswi endlaka leswaku vanhu vo tala va nga ri tsakeli rungula ra hina. Vanhu lava dyondzisiweke leswaku swilo swi lo tiendlekela kumbe lava kuriseriweke laha vanhu va nga pfumeliki leswaku Xikwembu xi kona, swi nga endleka va nga vi na mhaka ni Bibele. Van’wana swi nga ha endleka va pfilunganyiwe hi vukanganyisi lebyi va byi vonaka evukhongerini. Van’wana va nga ha nyenya leswi hi va byelaka swona hikwalaho ka leswi va karhatekeke ni leswi va heleriweke hi ntshembo. (Efe. 2:12) Van’wana a va ‘lemuki’ hikwalaho ka leswi swiphiqo swa vutomi swi va tshameke enhan’wini.—Mat. 24:37-39.
3 Hambileswi van’wana va nga ri tsakeliki rungula ra hina, hi nga va ni ntsako loko hi ri ensin’wini, hi ku va hi tiva leswaku matshalatshala ya hina ma dzunisa Yehovha. (1 Pet. 4:11) Nakambe, ku vulavula hi ntiyiso ni le ka lava va nga si vonaka nkoka wa wona, swi tiyisa ripfumelo ra hina. A hi tikarhateleni ku va ni vonelo leri fanaka ni ra Yehovha hi vanhu va nsimu ya hina. Yehovha u va twele vusiwana vanhu va le Ninivha lava a va nga ku ‘tivi nikatsongo ku hambana exikarhi ka voko ra vona ra xinene ni ra ximatsi.’ (Yon. 4:11) Vanhu lava tshamaka ensin’wini ya hina va swi lava ku twa mahungu lamanene! Hikwalaho, a hi fanelanga hi hela mbilu, kambe hi fanele hi lava tindlela to va endla leswaku va tsakela rungula ra Bibele.
4 Vulavula Hi Swilo Leswi Karhataka Vanhu Va Muganga Wolowo: Kumbexana exinghenisweni xa wena u nga vulavula hi mhaka leyi karhataka vanhu emugangeni wolowo kutani u kombela ku twa leswaku n’wini wa muti u swi vona njhani. Rhiya ndleve loko a ri karhi a vulavula kutani u angula hi ku n’wi hlayela rungula leri chavelelaka leri humaka eBibeleni. Endzhaku ka khombo ro karhi emugangeni wun’wana, loko Mbhoni yin’wana yi ri karhi yi chumayela hi yindlu ni yindlu yi byele vini va miti ndlela leyi yi tweke ku vava ha yona. Yi te: “A swi tekanga nkarhi leswaku vanhu va titwa va ntshunxekile kutani va sungula ku vulavula. Ndzi ve ni mabulo lamanene siku rero hikwalaho ka leswi ndzi vulavuleke hi swilo leswi khumbaka vutomi bya vona.”
5 Xiphiqo xin’wana ni xin’wana lexi khumbaka vanhu xi ta tlhantlhiwa hi Mfumo wa Xikwembu. Ringeta ku twisisa xiphiqo lexi ku nga xona xi tsonaka n’wini wa muti vurhongo. Swi nga ha endleka a ku pfumelela leswaku u n’wi byela rungula ra Bibele leri nyikaka ntshembo. Loko swi nga ri tano, kumbexana u ta ku yingisa “hi nkarhi wun’wana.”—Mint. 17:32.