Xana Khapu Ya Misava Hinkwayo (World Cup) Yi Nga Swi Kota Ku Endla Leswaku Vanhu Va Va Ni Vun’we Hakunene?—Xana Bibele Yi Ri Yini Hi Mhaka Leyi?

Ku ringanyetiwa leswaku vanhu va kwalomu ka ntlhanu wa tibiliyoni va ta hlalela Khapu Ya Misava Hinkwayo ya FIFA leyi veke kona ku sukela hi November 20 ku ya eka December 18, 2022. Vanhu vo tala va tshemba leswaku mitlangu yo fana ni leyi yi nga endla swo tala ku tlula ku endla leswaku vanhu va titwa va ri ni vun’we loko va ri karhi va yi hlalela.

• Mitlangu yi na matimba yo cinca misava. Yi na matimba yo hlohlotela vanhu. Yi na matimba yo endla leswaku vanhu va titwa va ri ni vun’we hi ndlela yo hlawuleka.”—Nelson Mandela, khale ka presidente wa Afrika Dzonga.

• Bolo ya milenge . . . yi hlanganisa vanhu hikuva yi va endla va va ni ntshembo, va tsaka, va va ni ku navela loku fanaka ni ku tlhela va rhandzana hileswi va rhandzaka nchumu lowu fanaka.”—Gianni Infantino, presidente wa FIFA.a

Xana Khapu Ya Misava Hinkwayo kumbe mitlangu yin’wana, yi nga swi kota ku fikelela swilo sweswo? Xana ku ni ntshembo wa leswaku ku ta kala ku va ni ku rhula ni vun’we?

Xana hakunene Khapu Ya Misava Hinkwayo yi endla leswaku vanhu va va ni vun’we?

Khapu Ya Misava Hinkwayo ya lembe leri yi endle leswaku vanhu va nga ehleketi hi bolo ya milenge ntsena. Mitlangu leyi yi endle leswaku ku va ni njhekanjhekisano eka vanhu ni le ka van’watipolitiki mayelana ni timfanelo ta vanhu, xihlawuhlawu ni ku nga ringani ka swiyimo swa vanhu hi tlhelo ra ikhonomi.

Hambiswiritano, vo tala va kume leswaku mitlangu ya matiko yo tanihi Khapu Ya Misava Hinkwayo yi tisa vunyanyuri lebyikulu eka vanhu. Hambileswi vanhu va tsakelaka leswaku mitlangu yi va pfuna va kondletela vun’we kambe a yi nge swi koti ku tisa vun’we bya hilaha ku nga heriki. Ku ri na sweswo, yi tala ku endla leswaku ku va ni ku avana ni swiendlo leswi Bibele yi vuleke leswaku a swi ta kombisa nkarhi lowu vitiwaka ‘masiku yo hetelela.’—2 Timotiya 3:1-5.

Ntshembo wa xiviri hi vun’we lebyi nga ta va kona emisaveni hinkwayo

Bibele yi hi nyika ntshembo wa xiviri mayelana ni vun’we lebyi nga ta va kona emisaveni hinkwayo. Yi tshembisa leswaku vanhu hinkwavo emisaveni hinkwayo va ta va ni vun’we ehansi ka hulumendhe ya le tilweni leyi vuriwaka “Mfumo wa Xikwembu.”—Luka 4:43; Matewu 6:10.

Hosi ya Mfumo wolowo Yesu Kreste, yi ta tiyiseka leswaku ku va ni ku rhula emisaveni hinkwayo. Bibele yi ri:

• Lowo lulama u ta hluka . . . ku ta va ni ku rhula.”—Pisalema 72:7.

• Yi ta pfuna swisiwana leswi kombelaka mpfuno . . . Yi ta swi ponisa eku tshikileriweni ni le madzolongeni.”—Pisalema 72:12, 14.

Hambi ku ri namuntlha, tidyondzo ta Yesu ti endle leswaku vanhu va timiliyoni va va ni vun’we ematikweni yo ringana 239. Va dyondze ku tshika ku venga vanhu van’wana. Leswaku u dyondza swo tala, hlaya nxaxamelo wa mikandziyiso eka nhlokomhaka leyi nge: “Hi Nga Swi Kota Ku Hlula Rivengo.”