Xana Hakunene Tiolimpiki Ti Nga Swi Kota Ku Endla Vanhu Va Va Ni Vun’we?—Xana Bibele Yi Ri Yini Hi Mhaka Leyi?

Eka Tiolimpiki ta ximumu xa 2024, vanhu va kwalomu ka ntlhanu wa tibiliyoni va ta hlalela mphikizano wa ku tsutsuma lowu nga ni vanhu vo ringana 206 lava humaka etindhawini to hambanahambana. Thomas Bach loyi a nga presidente ya Komiti Ya Misava Hinkwayo Ya Tiolimpiki, u ri: “Hi xiphemu xa xiendlakalo xa misava hinkwayo lexi hlanganisaka vanhu leswaku va va ni ku rhula. A hi tlangeleni Olimpiki leyi, leyi endlaka leswaku hi hanya hi ku rhula naswona ku nga yona ntsena leyi nga endlaka vanhu emisaveni hinkwayo va va ni vun’we.”

Xana Tiolimpiki ti nga swi kota ku endla swilo leswi hinkwaswo? Xana wu kona ntshembo wa leswaku hi ta kala hi ve ni ku rhula ni vun’we?

Leswi nga endlaka ku va ni ku rhula ni vun’we

Ku ni swo tala leswi katsekaka eka mphikizano wa lembe leri ku tlula mitlango ntsena. Mitlango leyi yi endla hi kota ku vona ku avana loku nga kona eka vanhu ni le ka swa tipolitiki. Swi endla leswaku vanhu va nga khomiwi hi ndlela leyi fanaka, ku va ni ku avana eka timfanelo ta vanhu ni le ka swa tipolitiki, ku va ni xihlawuhlawu ni ku khoma van’wana ku biha hi ku ya hi vukhongeri lebyi va nga eka byona.

Mitlango leyi nga kona emisaveni hinkwayo yo tanihi ya Tiolimpiki, yi hungasa vanhu. Hambiswiritano, mitlango yoleyo yi hlohlotela moya wa ku avana ematshan’weni yo endla leswaku ku va ni ku rhula ni vun’we.

Bibele yi profete hi leswi endlaka swi tika namuntlha leswaku vanhu va va ni vun’we. (2 Timotiya 3:1-5) Leswaku u dyondza swo tala hi vuprofeta lebyi bya le Bibeleni, hlaya nhlokomhaka leyi nge, “Xana Bibele Yi Profetile Hi Ndlela Leyi Vanhu Va Ehleketaka Ni Ku Hanya Hayona Namuntlha?”

Ntshembo wa xiviri hi ku rhula ni vun’we emisaveni hinkwayo

Bibele yi hi nyika ntshembo wa xiviri wa leswaku ku ta va ni ku rhula ni vun’we emisaveni hinkwayo. Yi hi tshembisa leswaku vanhu emisaveni hinkwayo va ta va ni vun’we ehansi ka hulumendhe ya le tilweni leyi vuriwaka “Mfumo wa Xikwembu.”—Luka 4:43; Matewu 6:10.

Hosi ya Mfumo wolowo ku nga Yesu Kreste, yi ta tisa ku rhula emisaveni hinkwayo. Bibele yi ri:

• “Lowo lulama u ta hluka hi nkarhi wa ku fuma ka yona, ku ta va ni ku rhula.”—Pisalema 72:7.

• “Yi ta pfuna swisiwana leswi kombelaka mpfuno . . . Yi ta swi ponisa eku tshikileriweni ni le madzolongeni.”—Pisalema 72:12, 14.

Ninamuntlha, tidyondzo ta Yesu ti endla leswaku timiliyoni ta vanhu lava humaka ematikweni ya 239, va va ni vun’we. Leswi Timbhoni ta Yehovha ti nga Vakreste, ti dyondze ku va ni vun’we emisaveni hinkwayo. Leswaku u tiva ku ti swi endlise ku yini, hlaya magazini wa Xihondzo xo Rindza lowu nga ni nhlokomhaka leyi nge, “Hi Nga Swi Kota Ku Hlula Rivengo.”