Leswi Mfumo Wa Xikwembu Wu Nga Ta Swi Endla Hi Nyimpi

Emisaveni hinkwayo, tinyimpi ti ya emahlweni ti onha swinene ti tlhela ti vangela vanhu ku xaniseka. Xiya swiviko leswi landzelaka:

• “Lembe leri nga hundza, ku fe vanhu vo tala hikwalaho ka nyimpi, ngopfungopfu eEthiopia ni le Ukraine ku tlula malembe man’wana ku sukela hi 1994.”—Peace Research Institute Oslo, June 7, 2023.

• “Nyimpi ya le Ukraine yi endle leswaku xiyimo xi nyanya hi 2022. Hi ku angarhela, madzolonga ya tipolitiki ma andze hi tiphesente ta 27 emisaveni hinkwayo lembe leri nga hundza naswona ma khumbe vanhu va kwalomu ka 1,7 wa tibiliyoni.”—The Armed Conflict Location & Event Data Project (ACLED), February 8, 2023.

Bibele yi hi nyika ntshembo. Yi vula leswaku “Xikwembu xa le tilweni xi ta simeka mfumo lowu nga ta ka wu nga wisiwi.” (Daniyele 2:44) Ehansi ka Mfumo wolowo kumbe hulumendhe, Xikwembu xi ta “herisa tinyimpi emisaveni hinkwayo.”—Pisalema 46:9.