Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
© 2025 Watch Tower Bible and Tract Society of Pennsylvania
MARCH 2-8
LESWI HI SWI DYONDZAKA EBIBELENI ESAYA 41-42
“U Nga Chavi”
Marito Yo Chavelela Ya Vuprofeta Lama Ku Khumbaka
10 Yehovha u kambisisa xiyimo xa misava hi ku languta eka malembe ya kwalomu ka 200 lawa a ma ha ta. Masocha ya matimba lama rhangeriweke hi Korexe ma ganyula kunene, ma hlula hinkwavo lava lwisanaka na wona. Vanhu—ku katsa ni vaaki va swihlala leswi nga ekule swinene—va gudlagudla matsolo loko va vona leswaku u ta a tile. Hi ku chava, va hlangana leswaku va hlengela loyi Yehovha a n’wi vitaneke a suka evuxeni leswaku a ta hetisisa vuavanyisi byakwe. Va ringeta ku tiyisana va ku: “Tiya nhlana.”
ijwbv xihloko xa vu 5 ¶4-7-mwbr
Esaya 41:10—“U Nga Chavi, Hikuva Ndzi Na Wena”
“Ndzi Na Wena.” Yehovha u nyika vagandzeri vakwe xivangelo xa leswaku a va fanelanga va chava hikuva a va voxe. Hikwalaho ka leswi a vonaka leswi va langutanaka na swona ni ku tlhela a twa swikhongelo swa vona, sweswo swi fana ni loko a ri kwalaho na vona.—Pisalema 34:15; 1 Petro 3:12.
“Ndzi Xikwembu xa wena.” Yehovha u khongotela vagandzeri vakwe hi ku va tsundzuxa leswaku wa ha ri Xikwembu xa vona naswona wa va amukela tanihi vagandzeri vakwe. Va nga tiyiseka leswaku a xi kona xivangelo ni xin’we lexi nga sivelaka Xikwembu leswaku xi va lwela.—Pisalema 118:6; Varhoma 8:32; Vaheveru 13:6.
“Ndzi ta ku tiyisa, ina, ndzi ta ku pfuna. Ndzi ta ku khoma swi tiya hi voko ra mina ra xinene ra ku lulama.” Yehovha u kandziyisa ni ku tlhela a hi tiyisekisa ndlela leyi a nga ta hi seketela hayona hi ku tirhisa swivulwa swinharhu leswi hlamuselaka mhaka yin’we ya nkoka. U hi kombisa ndlela leyi a tekaka goza hayona hi ku hatlisa loko vanhu vakwe va lava mpfuno. Loko un’wana a wa, Xikwembu xi ndlandlamuxa voko ra xona ra xinene leswaku xi n’wi pfuxa.—Esaya 41:13.
Ndlela yo sungula leyi Xikwembu xi yi tirhisaka leswaku xi tiyisa ni ku pfuna vagandzeri va xona i ku tirhisa Rito ra xona, ku nga Bibele. (Yoxuwa 1:8; Vaheveru 4:12) Hi xikombiso, Rito ra Xikwembu ri tamele vutlhari lebyi kongomeke eka lava langutaneke na miringo yo tanihi vusweti, mavabyi kumbe ku lahlekeriwa hi munhu loyi va n’wi rhandzaka. (Swivuriso 2:6, 7) Xikwembu xi nga tirhisa moya wo kwetsima kumbe matimba ya xona leswaku xi nyika vagandzeri va xona miehleketo leyi hlutekeke leswaku va kota ku tiyisela miringo.—Esaya 40:29; Luka 11:13.
“U Nga Chavi. Mina Ndzi Ta Ku Pfuna”
Marito ya Yehovha ma chavelela swinene. Ringeta ku ehleketa hi leswi Yehovha a hi tshembisaka swona. Ndzimana leyi a yi vuli swona leswaku u famba etlhelo ka Yehovha u khome voko rakwe. Loko a wu famba etlhelo ka yena, Yehovha a ta va a khome voko ra wena ra ximatsi hi voko rakwe ra xinene. Ku ri na sweswo, Yehovha u yisa “voko [rakwe] ra xinene ra ku lulama” kutani a khoma “voko ra wena ra xinene,” onge hiloko a ku humesa eka xiyimo xo tika. Loko Yehovha a khoma voko ra wena ra xinene, u ku tiyisa hi ku vula a ku: “U nga chavi. Mina ndzi ta ku pfuna.”
Xana u teka Yehovha tanihi Tatana la nga ni rirhandzu tlhelo Munghana wa wena? Xana wa tshemba leswaku u ta ku pfuna loko u langutane ni swiyimo swo tika? Yehovha wa khathala swinene ha wena naswona u lava ku ku pfuna. Loko u ri ni swiphiqo, Yehovha u lava leswaku u titwa u sirhelelekile. Ha yini? Hikuva wa ku rhandza swinene. Hakunene i “mpfuno lowu kumekaka hi ku hatlisa hi nkarhi wa maxangu.”—Ps. 46:1.
Endla Ndzavisiso
Swi Vula Yini Ku Tshembeka?
Yehovha u byele nakulobye wakwe Abrahama a ku: “Ndzi xitlhangu xa wena.” (Genesa 15:1; Esaya 41:8) Marito lawa a ya ri ya ntshima. Yehovha u sirhelele ni ku ponisa Abrahama ni ndyangu wakwe emavokweni ya Faro na Abimeleke. U pfune Abrahama leswaku a kutsula Lota eka tihosi ta mune leti a ti hlanganile ku lwa na yena. Yehovha u pfuxe matimba ya ku veleka ya Sara, loyi a a ri ni malembe ya 90 hi vukhale ni nuna wakwe Abrahama, loyi a a ri ni malembe ya 100 hi vukhale, leswaku ha vona ku ta huma Mbewu leyi tshembisiweke. Nkarhi ni nkarhi Yehovha a a vulavula na Abrahama hi swivono, milorho ni hi varhumiwa lava nga tintsumi. Kahle-kahle, Yehovha u kombise vutshembeki eka Abrahama, hayi loko a ha hanya ntsena niloko ku ri khale a funye buwa. Hi malembe-xidzana, Yehovha u hlayise switshembiso swakwe eka vatukulu va Abrahama, ku nga tiko ra Israyele, hambileswi a va endla swo tiva hi vona. Vuxaka bya Yehovha na Abrahama byi kombisa leswi vutshembeki bya xiviri byi vulaka swona—ku nga rirhandzu leri kombisiwaka hi swiendlo.—Genesa, tindzima 12 ku ya eka 25.
MARCH 9-15
LESWI HI SWI DYONDZAKA EBIBELENI ESAYA 43-44
Vuprofeta Lebyi Tsariweke Ka Ha Sale Malembe Ya Kwalomu Ka 200 Byi Nga Si Endleka
Vuprofeta Lebyi Hetisekeke
16 Hi 539 B.C.E., nkarhi wa ku fuma ka Babilona tanihi mfumo lowukulu wa misava wu fike emakumu loko Korexe mufumi la nga ni matimba wa Peresiya, a ri kun’we ni vuthu ra Meda, a mache a lwisana ni muti. Hambiswiritano, leswi Korexe a swi kumeke a swi ri swikulukumba ngopfu. Muti wa Babilona a wu rhendzeriwe hi makhumbi lamakulu naswona a wu vonaka wu nga hlaseleki. Nakambe, nambu lowukulu wa Yufrata a wu famba hi le mutini wolowo naswona wu pfunile leswaku va sirheleleka.
17 Herodotus n’wamatimu wa Mugriki u hlamusela ndlela leyi Korexe a tameleke xiphiqo ha yona: “U veke xiyenge xa vuthu rakwe eyinhleni leyi nambu wu nghenaka emutini hayona kutani vuthu rin’wana a ri veka endzhaku ka xivandla lexi wu humaka eka xona, ku ri ni swileriso swo macha va nghena emutini hi nyangwa wa xinambyana hi ku hatlisa loko mati ma vohle hilaha ku ringaneke . . . U hambukise Yufrata hi mugero wu nghena ebasinini [tiva leri nga riki ra ntumbuluko leri ceriweke hi mufumi la hundzeke wa Babilona], lowu hi nkarhi wolowo a wu tsakama, lowu eka wona nambu wu ngheneke ku fika empin’weni lowu vuandlalo bya ntumbuluko bya nambu byi vaka lebyi nghenekaka. Kwalaho Vaperesiya lava va siyeriweke xikongomelo lexi eBabilona etlhelo ka nambu, va nghene hi xinambyana, lexi manuku a xi phyile lerova xi fika exikarhi ka ndzhumbu wa munhu, naswona xisweswo va nghene edorobeni.”4
it “Korexe” ¶7
Korexe
Ku Hluriwa Ka Babilona. Korexe u ve ni xivindzi xo tlhontlha vuthu ra matimba ra Babilona naswona sweswo a swi hetisisa vuprofeta bya Bibele. Eka vuprofeta bya Esaya lebyi huhuteriweke mayelana ni ku vuyeteriwa ka muti wa Yerusalema ni tempele, hosi leyi ya le Peresiya a yi ta hlawuriwa hi Yehovha Xikwembu leswaku yi ta kutsula Vayuda lava a va ta va evuhlongeni eBabilona. (Esa 44:26–45:7) Vuprofeta lebyi byi tsariwe emalembeni ya 150 Korexe a nga si sungula ku fuma naswona Vayuda va sungule ku xanisiwa a nga si velekiwa, hambiswiritano Yehovha u vule leswaku Korexe a a ta va “murisi” Wakwe tanihi muyimeri wa Vayuda. (Esa 44:28; ringanisa na Rhm 4:17.) Hikwalaho ka leswi a hlawuriweke ka ha ri emahlweni, Korexe u vitaniwe “muhlawuriwa” wa Yehovha (leri hi Xiheveru ri vulaka ma·shiʹach, mesiya, naswona hi Xigriki khri·stosʹ, kreste). (Esa 45:1) Leswi Xikwembu xi n’wi ‘vitaneke hi vito’ (Esa 45:4) a nga si velekiwa, a swi nga vuli swona leswaku xi N’wi nyike rona loko a velekiwa, kambe a swi vula leswaku Yehovha a swi tiva leswaku wanuna yoloye a ta velekiwa nileswaku loyi a n’wi hlawuleke ku endla ntirho wa Yena a a nga ta fihliwa kambe a ta tiviwa hi vito.
it “Korexe” ¶17
Korexe
Ndlela leyi Korexe a tirhisana ni Vayuda hayona a yi hambanile ni leyi varhangeri va vukhongeri a va va khoma hayona. U vuyisele swibya swa nkoka swa le tempeleni leswi Nebukadnetsara Wa Vumbirhi a swi tekeke a swi yisa eBabilona, u nyike mpfumelelo leswaku ku rhumeriwa timhandzi ta mukedari ti suka eLebanoni ni ku tlhela a nyika mpfumelelo wa leswaku ku tirhisiwa mali ya le vuhosini ku hakelela swikoxo hinkwaswo swa ku aka. (Ezr 1:7-11; 3:7; 6:3-5) Hi ku ya hi Ribye ra xiphepherhele ra Korexe (XIFANISO, Vol. 2, tl. 332), hosi ya le Peresiya yi landzele ntwanano wa ku rhula wo va kombisa ntwelavusiwana ni ku tlhela yi amukela lava nga ehansi ka mfumo wa yona. Eka ribye rero a ku tshahiwe leswi hi yena: “Ndzi tlhelele [hilaha khale a wu vitaniwa hakona] eribuweni ra nambu wa Tigrisi, ku nga tindhawu ta vutumbelo leti a ti onhiwe khale, swifaniso leswi a swi tshama kwalaho, ndzi fike ndzi swi endla swi kombisa ndhawu ya vutumbelo ya hilaha ku nga heriki. Ndzi (tlhele) ndzi hlengeleta (khale) ka vaaki va muti wolowo leswaku ndzi va (tlherisela) emakaya ya vona.”—Ancient Near Eastern Texts, tl. 316.
Endla Ndzavisiso
Swivutiso Swa Vahlayi
Xikombiso xa vumbirhi i vuprofeta lebyi vulavulaka hi Korexe, loyi a a ta tshunxa Vayuda evuhlongeni leswaku va kota ku pfuxeta tempele ya Yehovha. (Esa. 44:26–45:4) Hosi Korexe wa le Peresiya u hetisise vuprofeta byebyo. (Ezra 1:1-4) Hambiswiritano, Korexe a a nga gandzeli Xikwembu xa ntiyiso. Yehovha u tirhise Korexe leswaku a hetisisa vuprofeta lebyi hambileswi a a nga n’wi gandzeli naswona a nga n’wi sindzisanga leswaku a n’wi gandzela.—Swiv. 21:1.
MARCH 16-22
LESWI HI SWI DYONDZAKA EBIBELENI ESAYA 45-47
“Hi Mina Xikwembu, A Ku Na Xin’wana Lexi Fanaka Na Mina”
“Vito Ra Wena A Ri Kwetsimisiwe”
14 Sathana u ringete hilaha a nga kotaka hakona ku sivela Yehovha leswaku a nga xi fikeleli xikongomelo xa Yena. Kambe u tsandzekile. Bibele yi hlamusela ndlela leyi Yehovha a tekeke goza hayona naswona yi swi veka erivaleni leswaku a nga kona loyi a fanaka na Yehovha Xikwembu. I ntiyiso leswaku ku xandzuka ka Sathana ni hinkwavo lava yimeke na yena, ku twise Yehovha ku vava swinene. (Ps. 78:40) Hambiswiritano, u lulamise xiyimo lexi hi vutlhari, hi ku lehisa mbilu ni ku kombisa vululami. U tlhele a kombisa matimba yakwe lamakulu hi tindlela to tala. Xa nkoka swinene, swilo swakwe hinkwaswo u swi endla hi rirhandzu. (1 Yoh. 4:8) Yehovha u tirhe vusiku ni nhlikanhi leswaku a kwetsimisa vito ra yena.
“Yehovha U . . . Ni Matimba Lamakulu”
14 Hilaha hi nga ta swi vona hakona, Xikwembu xi tirhisa matimba ku vumba, ku herisa, ku sirhelela ni ku vuyetela—hi ku komisa, xi ma tirhisela ku endla xin’wana ni xin’wana lexi fambisanaka ni swikongomelo swa xona leswi hetisekeke. (Esaya 46:10) Eswiyin’weni swin’wana, Yehovha u tirhisa matimba yakwe ku paluxa timfanelo ta nkoka ta vumunhu byakwe swin’we ni milawu yakwe. Nchumu wa nkoka ngopfu, u tirhisa matimba ya yena ku hetisisa ku endla ku rhandza kakwe—ku kwetsimisa vito rakwe ro kwetsima hi ku tirhisa Mfumo wa Mesiya, ku kombisa leswaku ndlela leyi a fumaka hayona i yinene. A xi kona lexi nga sivelaka xikongomelo xexo.
it “Mahlonga Ma Huma eBabilona” ¶1
Mahlonga Ma Huma eBabilona
HI 607 B.C.E. muti wa Yuda lowu a wu fuwile swinene wu hundzuriwe ‘rhumbi, ku nga ha vi na vaaki’ naswona Vayuda vo tala va yisiwe evuhlongeni eBabilona kasi lava saleke va balekele eEgipta. (Yr 9:11) Kambe Xikwembu xa tintswalo a xi nga ta tshika vanhu va xona evuhlongeni hilaha ku nga heriki. Hikwalaho, xi profete leswaku a va ta “tirhela hosi ya le Babilona malembe ya 70” kutani endzhaku ka sweswo a xi ta va kutsula evuhlongeni. (Yr 25:11, 12; 29:10-14) Hambi ku ri mfumo wa matimba wa Babilona lowu a swi tika ku wu hlasela, a wu nga ta swi kota ku sivela xikongomelo xa Xikwembu. Ku kutsuriwa ka Vayuda evuhlongeni swi kombisa ndlela yo hlamarisa leyi mikarhi hinkwayo vuprofeta bya Yehovha byi hetisekaka hayona.
Ha Tsaka Leswi Yehovha A hi Kombaka Ndlela Yakwe
18 Namuntlha, ku fana ni le nkarhini lowu hundzeke, ku famba endleleni ya Yehovha swi lava vutshembeki—ku tiyimisela ku tirhela yena ntsena. Swi lava ntshembo—ku pfumela hi mbilu hinkwayo leswaku switshembiso swa Yehovha swi tiyile naswona swi ta hetiseka. Ku famba endleleni ya Yehovha swi lava ku yingisa—ku landzela milawu yakwe u nga hambuki, ni ku hlayisa mimpimanyeto ya yena leyi tlakukeke. “Yehovha u lulamile; u rhandza swiendlo swo lulama.”—Pisalema 11:7.
19 Akazi a a tshemba swikwembu swa Siriya leswaku swi n’wi sirhelela. Vaisrayele le Egipta a va langutele leswaku “nkosikazi ya matilo,” xikwembu lexi a xi gandzeriwa hi vanhu vo tala eMiddle East ya khale, xi ta va katekisa hi swilo leswi vonakaka. Namuntlha swikwembu swo tala a hi swifaniso swa xiviri. Yesu u tsundzuxe leswaku hi nga tshuki hi gandzela “Rifuwo” ematshan’weni ya Yehovha. (Matewu 6:24) Muapostola Pawulo u vulavule hi “ku tshwa, ku nga ku gandzela swifaniso swa hava.” (Vakolosa 3:5) Nakambe u vulavule hi lava ‘xikwembu xa vona ku nga khwiri ra vona.’ (Vafilipiya 3:19) Ina, mali ni swilo leswi vonakaka hi swin’wana swa swikwembu leswikulu leswi gandzeriwaka namuntlha. Entiyisweni, vo tala—ku katsa vunyingi lebyi fambisanaka ni vukhongeri byo karhi—‘va tshemba rifuwo leri nga tiyangiki.’ (1 Timotiya 6:17) Vo tala va tikarhata swinene eku gandzeleni ka vona swikwembu leswi, naswona van’wana va vuyeriwa—va tshama emakaya ya manyunyu, va ni swilo swo durha naswona va dya swakudya swa le henhla. Hambiswiritano, a hi hinkwavo lava tiphinaka hi swilo sweswo va nga na swona. Naswona hambi ku ri lava va tiphinaka hi swona, va hetelela va kume leswaku a swi va enerisi. A hi swilo leswi tiyeke, i swa nkarhinyana naswona a swi swi enerisi swilaveko swa moya.—Matewu 5:3.
Endla Ndzavisiso
Xana Xikwembu A Xi Swi Tiva Leswaku Adamu Na Evha Va Ta Dyoha?
Matsalwa ma kombisa leswaku Xikwembu hi xona ‘ntsena lexi tlhariheke.’ (Varhoma 16:27) Tintsumi ta xona leti nga etilweni ti byi vone hi tindlela to tala vutlhari lebyi. Ti sungule ku “huwelela [ti] dzunisa” loko Yehovha a vumba swilo laha misaveni. (Yobo 38:4-7) A swi kanakanisi leswaku swivumbiwa sweswo swa moya swo tlhariha swi swi vone hinkwaswo leswi nga endleka entangeni wa Edeni. Xana Xikwembu lexi tlhariheke xi nga vumba vuako ni swilo swo hlamarisa kutani xi veka vanhu lava xi swi tivaka leswaku a va nge xi yingisi? Phela hambi ku ri tintsumi a ti hlalerile. Hakunene sweswo a swi twali nikatsongo.
Kambe van’wana va nga ha ku, ‘Swi tise ku yini leswaku Xikwembu lexi tlhariheke swinene xi nga swi tivi?’ I ntiyiso leswaku vutlhari lebyikulu bya Yehovha byi endla leswaku a tiva ni swilo “leswi nga ta humelela emakumu.” (Esaya 46:9, 10) Hambiswiritano, a swi nga bohi leswaku a tirhisa vuswikoti lebyi, tanihi leswi swi nga bohiki leswaku a tirhisa matimba yakwe hinkwawo. Wa tihlawulela leswaku a nga byi tirhisa rini. U byi tirhisa laha ku faneleke ni hi ku ya hi swiyimo swa kona.
MARCH 23-29
LESWI HI SWI DYONDZAKA EBIBELENI ESAYA 48-49
Vuyeriwa Hi Dyondzo Leyi Humaka Eka Yehovha
it “Mudyondzisi, Ku dyondzisa” ¶2
Mudyondzisi, Ku dyondzisa
Yehovha Xikwembu loyi a nga Mutumbuluxi, i Muleteri Lonkulu kumbe Mudyondzisi eka malandza yakwe. (1Th 8:36; Ps 27:11; 86:11; 119:102; Esa 30:20; 54:13) Ntumbuluko hinkwawo wu swi veka erivaleni leswaku ku ni Xikwembu lexi nga ni vutlhari hinkwabyo naswona wu hi nyika vumbhoni bya leswaku hambiloko ko endliwa ndzavisiso wo tala, a hi nge pfuki hi tive swilo hinkwaswo leswi nga eka wona ku ta fikela namuntlha. (Yb 12:7-9) Ku engetela kwalaho, Yehovha u hlavutela vanhu vito rakwe, swikongomelo ni milawu yakwe. (Ringanisa na Eks 4:12, 15; 24:12; 34:5-7.) Nhlavutelo yoleyo yi kumeka eRitweni rakwe ku nga Bibele naswona ri dyondzisa vanhu tidyondzo ta ntiyiso mayelana ni xikongomelo xakwe. (Rhm 15:4; 2Tm 3:14-17) Moya wa Xikwembu na wona wu tlhela wu tirha tanihi mudyondzisi.—Yh 14:26.
ijwbq xihloko xa vu 44 ¶2-3
Xana Bibele Yi Ri Yini Malunghana Ni Ntshunxeko Wo Tihlawulela? Xana Xikwembu Xi Lawula Vutomi Bya Wena?
● Xikwembu xi vumbe munhu hi xifaniso xa xona. (Genesa 1:26) Ku hambana ni swiharhi leswi kongomisiwaka hi ntumbuluko, hina hi fana ni Muvumbi wa hina hileswi hi nga ni vuswikoti byo kombisa timfanelo to tanihi rirhandzu ni vululami. Hi ni ntshunxeko wo tihlawulela ku fana ni Muvumbi wa hina.
● Eka swilo swo tala ha swi kota ku kunguhata vumundzuku bya hina. Bibele yi hi khutaza ku “hlawula vutomi . . . hi ku yingisa rito [ra Xikwembu],” leswi vulaka ku hlawula ku yingisa milawu ya xona. (Deteronoma 30:19, 20) Ku hlawula koloko a ku nga ta hi pfuna nchumu loko a hi nga ri na wona ntshunxeko wo tihlawulela. Ematshan’weni yo va Xikwembu xi hi sindzisa ku endla leswi xi swi lavaka, xi hi kombela hi rirhandzu xi ku: “Kunene loko a wu yingise swileriso swa mina! Kutani ku rhula ka wena a ku ta fana ni nambu.”—Esaya 48:18.
‘Tiakeni eRipfumelweni Ra N’wina Ro Kwetsima Swinene’
8 Tsalwa leri ri hi tsundzuxa leswaku hi ta vuyeriwa loko hi yingisa Yehovha. U hi tshembisa leswaku hi ta vuyeriwa hi tindlela timbirhi loko hi n’wi yingisa. Yo sungula, ku rhula ka hina ku ta va kona hi masiku ku fana ni nambu lowu nga phyiki. Ya vumbirhi, ku lulama ka hina ku ta fana ni magandlati ya lwandle. Loko u yime eribuweni ra lwandle kutani u languta magandlati ma ri karhi ma ba, wa swi vona leswaku a ma nge pfuki ma herile. Yehovha u vula leswaku u nge karhali ku endla leswinene ku fana ni magandlati ya lwandle lama tshamaka ma ri karhi ma ba. Loko u tiyimisele ku tshama u tshembekile eka yena, u ta ku pfuna leswaku u nga tluli milawu ya yena. (Hlaya Pisalema 55:22.) Xana switshembiso swo tano a swi ku pfuni leswaku u aka ripfumelo ra wena eka Yehovha ni le ka milawu ya yena?
Endla Ndzavisiso
it “Nkarhi Wo Komba Tintswalo” ¶1-3
Nkarhi Wo Komba Tintswalo
Eka 2 Vakorinto 6:2, muapostola Pawulo u tshahe vuprofeta bya Esaya 49:8 lebyi nge: “Yehovha u ri: ‘Ndzi ku hlamurile hi nkarhi wa kona lowunene, ndzi ku pfunile hi siku ra ku ponisiwa; ndzi ku hlayisile leswaku ndzi ta ku endla ntwanano wa vanhu, leswaku tiko ri ta hlakarhela, leswaku va tlhela va kuma ndzhaka ya vona leyi onhiweke.’” Marito lama nga laha henhla ma twala onge ku vulavuriwa na Esaya kambe entiyisweni ma kombetela eka tiko ra Israyele. (Esa 49:3) Byolebyo a ku ri vuprofeta bya ku vuyetela lebyi hetisekeke ro sungula loko Vaisrayele va ntshunxiwa evuhlongeni eBabilona loko vabohiwa va Vaisrayele va twa rito ri ku, “Humani! Hikwalaho, va humile evuhlongeni ni ku tlhela va pfuxeta makaya ya vona.—Esa. 49:9.
Hambiswiritano, marito lama nga eka ndzimana 8 lama nge, “ndzi ku hlayisile leswaku ndzi ta ku endla ntwanano wa vanhu” ni lama nga eka ndzimana 6 lama nge, “nandza” wa Yehovha a a ta nyiketiwa tanihi “ku vonakala eka matiko, leswaku [Xikwembu xi] ta ponisa misava hinkwayo,” ma kombisa leswaku vuprofeta byebyo byi vulavula hi Mesiya naswona byi hetiseka eka Yesu Kreste hi ku helela tanihi “nandza” wa Xikwembu. (Ringanisa Esa 42:1-4, 6, 7 na Mt 12:18-21.) Leswi “hi nkarhi . . . lowunene” a ku ri kona ntsena laha Yehovha a ta ‘hlamula’ ni ku ‘pfuna’ nandza wakwe, sweswo swi nga va swi kombetela eka vutomi bya Yesu bya laha misaveni loko a endla “swikombelo ni swikhongelo hi swirilo swa matimba ni mihloti eka Loyi a a swi kota ku n’wi ponisa eku feni naswona u twiwile hikwalaho ka leswi a a chava Xikwembu.” (Hv 5:7-9; ringanisa Yh 12:27, 28; 17:1-5; Lk 22:41-44; 23:46) Hakunene rolero a ku ri “siku ra ku ponisiwa” ra N’wana wa Xikwembu hikuva loko a nyikiwe nkarhi wa ku kombisa vutshembeki byakwe loko a ha hanya laha misaveni, u endle tano naswona u kume “vutihlamuleri bya ku ponisa hinkwavo lava n’wi yingisaka hilaha ku nga heriki.”—Hv 5:9.
Ku engetela kwalaho, marito lawa Pawulo a ma tshaheke ya vuprofeta lebyi ma kombisa leswi Vakreste volavo a va fanele va tshama va swi endla, ku nga leswi Pawulo ava khutazeke swona leswaku va “nga amukeli musa lowukulu wa Xikwembu kutani [va] tlanga hi wona” ni le ka lava a va byeleke leswi (endzhaku ko tshaha Esa 49:8): “Vonani! Lowu i nkarhi wa leswaku Xikwembu xi hi komba tintswalo. Vonani! Sweswi i siku ra ku ponisiwa.” (2Ko 6:1, 2) Ku sukela hi Pentekosta ya 33 C.E. ku ya emahlweni, Vakreste volavo va ve “Israyele wa Xikwembu” wo fanekisela (Ga 6:16) kambe a va fanele va kombisa hi swiendlo leswaku hakunene va wu lava musa lowukulu wa Xikwembu lowu nga faneriwiki leswaku loko “nkarhi . . . [wo] komba tintswalo” wu fika, wu va “siku ra ku ponisiwa” ka vona.
APRIL 6-12
LESWI HI SWI DYONDZAKA EBIBELENI ESAYA 50-51
Yingisani Loyi A Dyondzisiweke Hi Xikwembu
Ku Letela Vatirheli Va Mfumo
5 Hi nkarhi lowu faneleke, Yehovha u dyondzise N’wana wakwe hi vutirheli lebyi a ta byi endla emisaveni. Kambisisa vuprofeta lebyi hlamuselaka vuxaka lebyi nga kona exikarhi ka Muleteri Lonkulu ni N’wana wakwe wa mativula. (Hlaya Esaya 50:4, 5.) Vuprofeta byi vula leswaku Yehovha a a pfuxa N’wana wakwe “mixo wun’wana ni wun’wana.” Xifaniso xexo xi kombisa ndlela leyi ha yona mudyondzisi a pfuxaka vana vakwe va xikolo nimixo leswaku a ta va dyondzisa. Buku yin’wana ya tinhlamuselo ta Bibele yi ri: “Yehovha . . . a a n’wi teka tanihi n’wana loyi a nga exikolweni kutani a n’wi dyondzisa leswi a fanele a swi chumayela ni ndlela leyi a faneleke a chumayela ha yona.” Eka “xikolo,” xexo xa le tilweni, Yehovha u dyondzise N’wana wakwe ‘leswi a nga ta swi hlamusela ni ku swi vulavula.’ (Yoh. 12:49) Nakambe Tatana u nyike N’wana wakwe swiletelo swa ndlela leyi a nga ta dyondzisa ha yona. Loko a ri laha misaveni, Yesu u tirhise ndzetelo wakwe hi ndlela leyinene ku nga ri hi ku hetisisa vutirheli byakwe ntsena kambe ni ku tlhela a letela valandzeri vakwe leswaku va hetisisa vutirheli bya vona.
“Ndza N’wi Rhandza Tatana”
13 Loko N’wana a nga si va munhu wa nyama, u tiyimisele ku dyondza eka Tata wa yena. Vuprofeta lebyi tsariweke eka Esaya 50:4-6 byi kombisa leswaku Yehovha u dyondzise N’wana wa yena dyondzo yo hlawuleka leyi khumbaka ntirho wa yena tanihi Mesiya. Hambileswi dyondzo yoleyo a yi katsa ni ku dyondza hi man’wana ya maxangu lawa a a ta langutana na wona tanihi Mutotiwa wa Yehovha, N’wana a nga yi bakanyelanga etlhelo. Hi ku famba ka nkarhi loko Yesu se a kurile laha misaveni, rirhandzu leri a a ri na rona hi yindlu ya Tata wakwe a ri nga si cinca naswona a a tiyimisele ku ya gandzela kona ni ku dyondzisa leswi Yehovha a a lava leswaku swi dyondzisiwa kwalaho. Kutani Bibele yi hi byela leswaku Yesu a a nga xwi etempeleni ni le sinagogeni. (Luka 4:16; 19:47) Loko hi lava leswaku rirhandzu ra hina eka Yehovha ri tshama ri tiyile, hi fanele hi hisekela ku va kona eminhlanganweni ya Vukreste, laha hi dyondzisiwaka ku gandzela Yehovha ni ku dzikisa vutivi bya hina ni ndlela leyi hi n’wi tlangelaka ha yona.
Endla Ndzavisiso
it “Mugodi” ¶2
Mugodi
Hi ku tirhisa swigego, Yehovha u tirhise Esaya ku tsundzuxa vanhu vakwe hi nkoka wa mugodi ni leswi a wu fanekisela swona. (Esa 51:1) Hilaha swi kombisiweke hakona eka ndzimana leyi landzelaka “ribye” ri kombetela eka Abrahama, tanihi tatana wa rixaka naswona “mugodi” i Sara loyi Isaka kokwa wa Israyele a humeke embelekweni wakwe. (Esa 51:2) Hambiswiritano, ndlela leyi Isaka a nga velekiwa hayona a yi nga tolovelekanga naswona a yi kombisa swiendlo swa singita kutani xigego xexo lexi tirhisiweke xi nga va xi yimela nchumu lowukulu lowu a wa ha ta. Deteronoma 32:18 yi kombetela eka Yehovha tanihi “Ribye leri nga va tata” wa Israyele, ‘Loyi a va tswaleke [rito leri fanaka leri nga eka Esa 51:2 ri kombetela eka Sara] hi switlhavi swa ku veleka.’
APRIL 13-19
LESWI HI SWI DYONDZAKA EBIBELENI ESAYA 52-53
Rirhandzu Leri Yesu A Ri Kombiseke!
Vantshwa—Lwanani Ni Ntshikilelo Wa Tintangha
2 Xana tintangha ta wena ti ni nkucetelo lowukulu eka wena? Loko swi ri tano, ha yini? Xana ku nga va ku ri hikwalaho ka leswi u lavaka ku amukeleka eka tona? Ku navela ko tano a hi minkarhi hinkwayo ku hoxeke. Entiyisweni, hambi ku ri vanhu lavakulu va swi lava ku amukeriwa hi tintangha ta vona. A nga kona munhu loyi a lavaka ku papalatiwa hi tintangha takwe, ku nga khathariseki leswaku i muntshwa kumbe i munhu lonkulu. Entiyisweni, vanhu van’wana a va nge he ku rhandzi loko u ala ku endla leswi hoxeke. Yesu na yena u tshame a langutana ni xiyimo xo tano. Hambiswiritano, Yesu a a endla leswinene minkarhi hinkwayo. Hambileswi van’wana va n’wi landzeleke va tlhela va va vadyondzisiwa va yena, van’wana va sandze N’wana wa Xikwembu naswona va “n’wi khome kukota loyi a nga pfuniki nchumu.”—Esa. 53:3.
Yehovha A Tlakusa Mesiya Nandza Wakwe
25 Xana Mesiya u pfumerile ku xaniseka ni ku fa? Esaya u ri: “A a tikeriwa, naswona a a titshika a xaniseka; kambe a nga wu pfulanga nomu. A a tisiwa laha ku dlayeriwaka kona ku fana ni nyimpfu; ku fana ni nyimpfu leyi pfaleke nomu emahlweni ka vatsemeti va yona, na yena a nga wu pfulanga nomu.” (Esaya 53:7) Evusikwini byo hetelela bya vutomi byakwe, Yesu ingi a kombele “mavandla ya tintsumi lama tlulaka 12” leswaku ma ta n’wi pfuna. Kambe u te: “Mayelana ni leswi, xana Matsalwa ma ta hetiseka njhani lama vulaka leswaku swi fanele swi endleka hi ndlela leyi?” (Matewu 26:53, 54) Ku ri na sweswo, “Xinyimpfana xa Xikwembu” a xi tilwelanga. (Yohane 1:29) Loko vaprista lavakulu ni vakulukumba va n’wi phyarheka hi swihehlo swa mavunwa emahlweni ka Pilato, Yesu “a nga hlamulanga.” (Matewu 27:11-14) A nga lavanga ku vula nchumu lexi nga kavanyetaka ku hetiseka ka ku rhandza ka Xikwembu ha yena. Yesu a a tiyimisele ku fa tanihi Xinyimpfana xa gandzelo, tanihi leswi a a swi tiva kahle leswaku rifu rakwe a ri ta kutsula vanhu lava yingisaka, exidyohweni, evuvabyini ni le ku feni.
Endla Ndzavisiso
it “Swibya” ¶2
Swibya
Mikarhi yo tala rito keliʹ ri vula swibya swo hambanahambana leswi a swi tirhisiwa endhawini ya vugandzeri. Swibya sweswo swi katsa swilo swo ka ha swona, mafoxolo, minkambana, tiforoko, swo khoma ndzilo, swo tima timboni, swo khoma ntambhu ya rivoni, swo hlambela ni swinwelo. (Eks 25:29, 30, 39; 27:3, 19; 37:16, 23; 38:3; 1Th 7:40-50; 2Tk 4:11-22) Leswi a swi tirhiseriwa swilo swo kwetsima, swibya leswi na swona a swi “kwetsima.” (1Th 8:4) Hikwalaho, leswi Vayuda lava humeke eBabilona hi 537 B.C.E. va veke ni nkateko wo rhwala swibya swo kwetsima leswi Hosi Nebukadnetsara a swi tekeke eYerusalema, a va fanele va papalata ku gandzela swikwembu swa hava ni ku tshama va tengile emahanyelweni. Marito lawa ya vuprofeta a ma kongomisiwe eka vona: “Sukani, sukani, humani [eBabilona], mi nga khumbi nchumu lexi nga basangiki! Humani exikarhi ka yena, mi nga tithyakisi, n’wina lava rhwalaka swibya swa Yehovha.” (Esa 52:11) Sweswo a swi katsa ku va va tshama va basile hi tindlela hinkwato ta vugandzeri ni le mahanyelweni ya vona. Nakambe a swi vuriwa ku va ni mbilu leyi baseke. Loko muapostola Pawulo a tsalela Vakorinto, u tirhise marito lama nga eka Esaya 52:11 ku kombisa leswaku Vakreste va fanele va fambela ekule ni swilo leswi thyakisaka nyama ni moya.—2Ko 6:14-18; 7:1.
APRIL 20-26
LESWI HI SWI DYONDZAKA EBIBELENI ESAYA 54-55
U Tiyimisele Ku Titsona Yini Leswaku U Dyondzisiwa Hi Yehovha?
Ndlela Leyi Dyondzo Ya Xikwembu Yi Nga Ya Risima Ha Yona
3 Yehovha u tiyimiserile ku dyondzisa vanhu lava nga hetisekangiki hikwalaho ka vunene bya yena. Esaya 54:13 loko yi vulavula hi ndlela ya vuprofeta hi Vakreste lava totiweke yi ri: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala.” Marito wolawo ma tirha ni le ka “tinyimpfu tin’wana” ta Kreste. (Yoh. 10:16) Leswi swi vonaka eka vuprofeta lebyi hetisekaka namuntlha. Exivonweni Esaya u vone vanhu lava humaka eka matiko hinkwawo va khitikanela evugandzerini bya ntiyiso. U vule leswaku a va byelana va ku: “A hi tlhandlukeleni entshaveni ya Yehovha, endlwini ya Xikwembu xa Yakobe; kutani u ta hi letela tindlela ta yena, hi ta famba emintileni ya yena.” (Esa. 2:1-3) Mawaku lunghelo ra ku dyondzisiwa hi Xikwembu!
“Xava Ntiyiso, U Nga Wu Xavisi”
6 Hlaya Esaya 55:1-3. Marito ya Yehovha lama tsariweke hi Esaya ma hlamusela leswi engetelekeke mayelana ni leswi swi vulaka swona ku xava ntiyiso. Eka ndzimana leyi ya le Bibeleni, Yehovha u fanisa rito rakwe ni mati, ntswamba ni vhinyo. Marito ya Xikwembu ya ntiyiso ma phyuphyisa ku fana ni mati yo titimela lama baseke. Nakambe, leswi ntswamba wu hi tiyisaka wu tlhela wu pfuna vana leswaku va kula, marito lama humaka eka Yehovha ma hi tiyisa naswona ma hi pfuna leswaku hi tiyisa vuxaka bya hina na yena. Ku tlula kwalaho, marito ya Yehovha ma fana ni vhinyo. Hi ndlela yihi? EBibeleni vhinyo yi fambisana ni ntsako. (Ps. 104:15) Hikwalaho, loko Yehovha a byela vanhu vakwe leswaku va “xava vhinyo,” wa hi tiyisekisa leswaku loko hi hanya hi ku pfumelelana ni marito yakwe hi ta tsaka. (Ps. 19:8) Leyi i ndlela leyinene yo hlamusela vuyelo lebyi pfunaka byo dyondza ni ku tirhisa marito ya ntiyiso ya Xikwembu! Matshalatshala lawa hi ma endlaka hi nga ma fanisa ni mali leyi hi yi hakelaka. Hikwalaho, a hi kambisiseni swilo swa ntlhanu leswi hi nga bohekaka ku swi endla leswaku hi xava ntiyiso.
U TITSONE YINI LESWAKU U XAVA NTIYISO?
7 Nkarhi. Leyi i hakelo leyi un’wana ni un’wana loyi a xavaka ntiyiso a faneleke a yi hakela. Swi lava nkarhi ku yingisela rungula ra Mfumo, ku hlaya Bibele ni minkandziyiso leyi sekeriweke eBibeleni, ku va ni dyondzo ya munhu hi yexe ya Bibele, ku lunghiselela mihlangano ya vandlha ni ku ya eka yona. Hi fanele hi tshika ku endla swilo swin’wana leswi nga riki swa nkoka leswaku hi “tixavela” nkarhi kumbe hi tinyika wona. (Hlaya Vaefesa 5:15, 16.) Hi nga tirhisa nkarhi wo tanihi kwihi leswaku hi kuma vutivi lebyi kongomeke bya tidyondzo ta xisekelo ta Bibele? Swi nga ya hi swiyimo swa hina. Swi tele swinene swilo leswi hi nga swi dyondzaka hi vutlhari, tindlela ni mitirho ya Yehovha. (Rhom. 11:33) Nkandziyiso wo sungula wa Xihondzo xo Rindza wu fanise ntiyiso ni “xiluva lexitsongo xo saseka” kutani wu te: “U nga enerisiwi hi xiluva xin’we xa ntiyiso. Loko xin’we a xi enerile a ku nga ha ta endliwa swin’wana. Tshama u ri karhi u hlengeleta, lava leswi engetelekeke.” Hi nga ha tivutisa, ‘Swiluva swa mina swa ntiyiso swi tele ku fikela kwihi?’ Hi nga dyondza leswi engetelekeke hi Yehovha hambiloko hi hanya hilaha ku nga heriki. Nchumu wa nkoka swinene namuntlha hi leswaku hi tirhisa nkarhi wa hina hi vutlhari leswaku hi ta xava ntiyiso wo tala hilaha swiyimo swa hina swi hi pfumelelaka hakona. Xiya xikombiso xa munhu loyi a lava ku tiva ntiyiso.
“Nyikela Nyingiso Eka Ndlela Leyi U Yingisaka Ha Yona”
I swinyingi swilo leswi nga hi kavanyetaka leswaku hi rhiya ndleve. Mianakanyo ya hina yi nga va yi pfilunganyiwe hi mivilelo. Pongo ni ku famba-famba ka vayingiseri kumbe pongo leri nga ehandle ka ndhawu ya minhlangano, ri nga hi kavanyeta. Switlhavi swa miri swi nga endla leswaku swi hi tikela ku nyikela nyingiso. Lava va nga ni vana lavatsongo hakanyingi va kavanyeteka. I yini lexi nga hi pfunaka leswaku nyingiso wa hina wu tshama wu ri enongonokweni?
Mahlo hi wona ma lawulaka nyingiso wa hina. Tirhisa mahlo ya wena leswaku ma ku pfuna ku nyikela nyingiso hi ku tshama u langute xivulavuri. Loko xi boxa ndzimana yo karhi ya Bibele—hambi ku ri leyi tolovelekeke—yi pfule kutani u fambisana na xona loko xi yi hlaya. Lwana ni mboyamelo wo hundzuluxela nhloko kun’wana ni kun’wana laha ku twalaka pongo kona kumbe ku languta vanhu lava famba-fambaka. Loko mahlo ya wena ma tshama ma langute swilo leswi kavanyetaka, u ta lahlekeriwa swinene hi leswi swi vuriwaka eplatifomo.
Loko ‘miehleketo yihi ni yihi leyi ku karhataka’ yi endla swi ku tikela ku nyikela nyingiso enongonokweni, khongela eka Yehovha leswaku u kuma ku rhula ka mianakanyo ni ku rhula ka mbilu, leswaku u ta kota ku nyikela nyingiso. (Ps. 94:19; Filp. 4:6, 7) Loko swi laveka, u nga ha khongela hi ku phindha-phindha. (Mat. 7:7, 8) Minhlangano ya vandlha i lunghiselelo ra Yehovha. U nga tiyiseka leswaku u lava u vuyeriwa eka yona.—1 Yoh. 5:14, 15.
Endla Ndzavisiso
“U Nga Languti Ematlhelweni, Hikuva Mina Ndzi Xikwembu Xa Wena”
14 Xo sungula, leswi hi nga valandzeri va Kreste, ha swi tiva leswaku hi ta vengiwa. (Mat. 10:22) Yesu u profete leswaku vadyondzisiwa vakwe a va ta xanisiwa hi ndlela ya tihanyi enkarhini wa makumu. (Mat. 24:9; Yoh. 15:20) Xa vumbirhi, vuprofeta bya Esaya byi hi lemukise leswaku valala va hina a va nga ta hi venga ntsena kambe a va ta hi hlasela hi matlhari yo hambanahambana. Matlhari wolawo ma nga ha katsa ku soholota mavunwa leswaku ma vonaka ma ri ntiyiso, va nga ha hi phyarheka mavunwa ya rihlaza kumbe ku hi xanisa hi ndlela ya tihanyi. (Mat. 5:11) Yehovha a nge va siveli valala va hina loko va tirhisa matlhari wolawo ku lwa na hina. (Efe. 6:12; Nhlav. 12:17) Kambe a hi fanelanga hi chava. Hikwalaho ka yini?
15 Xiya nchumu wa vunharhu lowu hi faneleke hi wu tsundzuka. Yehovha u vule leswaku “tlhari rihi ni rihi” leri nga ta lwa na hina “a ri nge humeleli.” Tanihi leswi khumbi ri hi sirhelelaka eka mpfula ya matimba, Yehovha na yena u hi sirhelela eka “vukarhi bya lava tihanyi.” (Hlaya Esaya 25:4, 5.) Valala va hina a va nge swi koti ku hi vavisela makumu.—Esa. 65:17.
APRIL 27–MAY 3
LESWI HI SWI DYONDZAKA EBIBELENI ESAYA 56-57
Ha Tsaka Hileswi Hi Nga Na Yehovha Tanihi Xikwembu Xa Hina
Yehovha U Pfuxa Moya Wa Lava Titsongahataka
14 Hambiswiritano, nkarhi wa ku lehisa ka Xikwembu mbilu a wu ta hela. Loko Yehovha a vulavula hi nkarhi wolowo, u te: “Mina ndzi ta twarisa ku lulama ka wena ni mintirho ya wena, leswaku a yi nge ku pfuni. Loko u huwelela u kombela mpfuno, swilo swa wena leswi hlengeletiweke a swi nge ku kutsuli, kambe mheho yi ta swi teka hinkwaswo. Moya wu ta swi susa.” (Esaya 57:12, 13a) Yehovha a a ta aneka vululami byo kanganyisa bya Vayuda erivaleni. Mintirho ya vona ya vukanganyisi a yi ta fana ni ku fukamela mandza yo bola. ‘Swilo leswi va swi hlengeleteke,’ nhulu ya swifaniso swa vona swa swikwembu swa hava a swi nga ta va kutsula. Loko khombo ri fika, swikwembu leswi a va swi tshemba a swi ta hungiwa hi moya lowu ni ku nyawula wu nga nyawuliki, swi ya ku nhavalala, le ko taniya.
15 Marito ya Yehovha ma hetiseke hi 607 B.C.E. Ma hetiseke loko Hosi Nebukadnetsara wa le Babilona a lovisa Yerusalema, a hisa tempele ya kona a tlhela a khoma vanhu vo tala a famba na vona. “Xisweswo Yuda a ya evukhumbini a suka endhawini ya yena.”—2 Tihosi 25:1-21.
16 Hi ku fanana, swifaniso swo tala leswi fumbiweke eVujaganini a swi nge swi koti ku byi ponisa esikwini ra vukari bya Yehovha. (Esaya 2:19-22; 2 Vatesalonika 1:6-10) Vujagana byi ta yimberiwa swin’we ni swirho hinkwaswo swa “Babilona Lonkulu”—ku nga mpfangampfangano wa vukhongeri bya mavunwa bya misava. Xivandzana xo fanekisela xa muvala wa ribungu kun’we ni timhondzo ta xona ta khume, ‘swi ta hlakata Babilona Lonkulu a sala ntsena, swi dya tinyama ta yena hinkwato, kutani swi n’wi hisa hi ndzilo a nga ha vi kona.’ (Nhlavutelo 17:3, 16, 17) Ha tsaka swinene leswi hi yingiseke xileriso lexi nge: “Humani eka yena, vanhu va mina, loko mi nga lavi ku hlanganyela na yena eswidyohweni swa yena, ni loko mi nga lavi ku amukela xiphemu xa makhombo ya yena”! (Nhlavutelo 18:4, 5) A hi nambeni hi chuveka rihlampfu etindleleni ta yena.
“Mfumo Wa Mina A Hi Xiphemu Xa Misava Leyi”
16 Hakunene ku cinca loku va ku endleke i ka nkoka! Bibele yi fanisa tinxaka hinkwato ta vanhu ni lwandle leri yaka hala ni hala leri nga riki na ku rhula. (Esa. 17:12; 57:20, 21; Nhlav. 13:1) Loko timhaka ta tipolitiki ti pfilunganya vanhu, ti va hambanisa ni ku va susumetela eka swiendlo swa madzolonga, hina hi hlayisa ku rhula ka hina ni vun’we. Nakambe loko Yehovha a vona ku avana loku nga kona emisaveni, swi fanele swi n’wi tsakisa loko a vona vanhu vakwe va ri na vun’we.—Hlaya Sofaniya 3:17.
it “Misava” ¶21
Misava
Misava i yin’wana ya swilo leswi kombisaka leswaku ku ni Muvumbi loyi a yi vumbeke hi ndlela leyi nga ta endla leswaku vanhu va kota ku hanya eka yona. Vanhu lava endlaka swilo swo biha va fanisisiwa ni lwandle leri karihaka.—Esa 57:20; Yk 1:6; Yd 13; ringanisa Nhl 12:16; 20:11; 21:1.
it “Ku Rhula” ¶3
Ku Rhula
Ku Lavisisa Ku Rhula. Yehovha i Xikwembu xa ku rhula (1Ko 14:33; 2Ko 13:11; 1Te 5:23; Hv 13:20) ni Xihlovo xa ku rhula (Tin 6:26; 1Tk 22:9; Ps 4:8; 29:11; 147:14; Esa 45:7; Rhm 15:33; 16:20) naswona ku rhula ku wela eka mihandzu ya moya wakwe lowo kwetsima. (Ga 5:22) Hikwalaho, ku rhula ka xiviri ku nga kumiwa ntsena hi lava nga ni ku rhula ni Xikwembu. Swidyoho leswikulu swi nga endla leswaku munhu a nga vi na vuxaka lebyinene na Xikwembu ni ku tlhela a nga vi na ku rhula. Mupisalema u te: “Marhambu ya mina a ma na ku rhula hikwalaho ka xidyoho xa mina.” (Ps 38:3) Lava va lavaka ku va ni ku rhula va fanele va ‘balekela swilo swo biha ivi va endla leswinene.’ (Ps 34:14) Handle ka vululami, a ku nge pfuki ku ve ni ku rhula. (Ps 72:3; 85:10; Esa 32:17) Hi yona mhaka lavo homboloka a va nge pfuki va ve ni ku rhula. (Esa 48:22; 57:21; ringanisa Esa 59:2-8.) Hi hala tlhelo, ku rhula ku kumiwa hi lava va tirhelaka Yehovha, va rhandza nawu wakwe (Ps 119:165) ni ku yingisa swileriso swakwe.—Esa 48:18.
Endla Ndzavisiso
Tinhla-nkulu Ta Buku Ya Esaya—II
56:6—I vamani “vanhu vambe” naswona “va hlayisa ntwanano wa [Yehovha]” hi tindlela tihi? “Vanhu vambe” i “tinyimpfu tin’wana” ta Yesu. (Yohane 10:16) Va hlayisa ntwanano lowuntshwa hileswi va yingisaka milawu leyi fambisanaka ni ntwanano wolowo, va ma seketela hi ku helela malunghiselelo lama endliweke ha wona, va dya swakudya swa moya leswi dyiwaka hi Vakreste lava totiweke ni ku va seketela entirhweni wo chumayela hi Mfumo ni wo endla vadyondzisiwa.
Ku Xixima Minhlangano Ya Hina Leyi Kwetsimaka
YEHOVHA u hlengelete vanhu va yena, Vakreste lava totiweke ni vanghana va vona, leswaku va n’wi gandzela “entshaveni ya [yena] yo kwetsima.” U endla leswaku va tsaka “endlwini ya [yena] ya xikhongelo,” etempeleni ya yena ya moya, leyi nga “yindlu ya xikhongelo ya vanhu hinkwavo.” (Esaya 56:7; Marka 11:17) Swiendlakalo leswi swi kombisa leswaku vugandzeri bya Yehovha bya kwetsima, byi tengile naswona hi lebyi tlakukeke. Loko hi xixima minhlangano ya hina leyi hi dyondzaka ni ku gandzela eka yona, hi kombisa leswaku hi ni langutelo ra Yehovha hi swilo leswi kwetsimaka.