BHUKU GO SANGULA GA SAMUWELI

1 Makunu ku wa hi ni wanuna wa le Ramatayime-Zofime,*+ le tikweni ga zvitsunga ga Efrayime,+ a nga vitaniwa ku hi Elkana,+ a n’wana wa Jerohamu, a n’wana wa Elihu, a n’wana wa Tohu, a n’wana wa Zufa, a muEfrayime. 2 I wa hi ni vasati vambiri; a mun’we ku wa hi Hana, loyi mun’wani ku wa hi Penina. Penina i wa hi ni vana, kanilezvi Hana i wa nga hi na vana. 3 Lembe ni lembe, a wanuna loye i wa suka dhoropeni gakwe a kandziha a ya khozela* ni ku maha muphahlo ka Jehovha wa mabutho le Xilo.+ Hi kwalaho a vana va Eli va vambiri, Hofeni na Finiyasi,+ va nga tira kona kota vapristi va Jehovha.+

4 Ka siku go kari, laha Elkana a nga maha muphahlo, i no mu nyika a zvipandze zva muphahlo a sati wakwe Penina, ni vontlhe a vafana vakwe ni vanhanyana vakwe,+ 5 kanilezvi i no nyika Hana a cipandze co hlawuleka hakuva i wa mu randza nguvhu; kanilezvi Jehovha i wa nga mu nyikangi vana.* 6 Ahandle ka lezvo, a katakuloni wakwe kambe i wa tshama hi ku mu swiretela kasi ku mu zwisa kubayisa hi lezvi Jehovha a nga kala a nga mu nyikangi vana. 7 Penina i wa maha lezvo lembe ni lembe; neti Hana a kandziha aya ndlwini ya Jehovha,+ a katakuloni wakwe i wo mu swiretela nguvhu laha ka kuza a rila a tsika ni kuga. 8 Kanilezvi a nuna wakwe, Elkana, i te ngalo kakwe: “Hana, hikuyini u rilako, u tsika ni kuga? Kona u bayisekela yini?* A ndzi wa lisima ka wena a ku hundza a 10 wa vana ke?”

9 Loku va mbhetile kuga ni kunwa le Xilo, Hana i no suka. Mupristi Eli i wa tshamile laha ka citulo, kusuhani ni nyangwa ya tempeli*+ ya Jehovha. 10 Hana i wa bayisekile nguvhu,* a se sangula ku khongela ka Jehovha,+ a rila a nga nyimi. 11 I no hlambanya, aku: “O, Jehovha wa mabutho, loku u cuwuka a hlomulo wa nandza ga wena, u ndzi alakanya, u nga rivali a nandza ga wena u gi nyika a n’wana wa mufana,+ ndzi ta mu nyikela ka Jehovha wontlhe a masiku ya kuhanya kakwe, niku a likari* li nga ta henya a hloko yakwe.”+

12 Laha a nga kari a maha a mukhongelo wakwe wo leha ka Jehovha, Eli i wa cuwukisela a nomu wakwe. 13 Hana i wa wulawula hi lomu mbilwini yakwe, ku ninganika a nomu wakwe basi kanilezvi a gezu gakwe gi wa nga zwali. Hikwalaho, Eli i no alakanya lezvaku Hana i popilwe. 14 Eli aku kakwe: “U ta popiwa kala rini? Tsika kunwa vhinyo.” 15 Hana a hlamula, aku: “Ahihi, hosi yanga, ndzi wasati a nga kukaratekeni ka hombe; a ndzi nwangi vhinyo ne byala ga lin’wani lixaka, kanilezvi ndzo chulula a muhefemulo* wa mina mahlweni ka Jehovha.+ 16 U nga alakanyi lezvaku a nandza ga wena ga cisati munhu wo kala ku vhuna nchumu, hakuva kala lezvi ndzi lomu ka ku chulula a kubayiseka ka mina ka hombe ni kukarateka ka mina.” 17 Eli aku: “Famba hi kurula, Nungungulu wa Izrayeli i wa ku nyike lezvi u nga mu kombela.”+ 18 Hana aku: “A nandza ga wena gi wa kume thomo mahlweni ka wena.” A wasati i no suka a famba a yaga; a nghohe yakwe yi wa nga ha tsuvangi.

19 Andzhako ka lezvo, va no vindzuka ni mixo va ya khizama mahlweni ka Jehovha va gumesa va tlhela kaya kabye le Rama.+ Elkana i no hlengela masango ni sati wakwe Hana, Jehovha a mu alakanya.+ 20 Na ku nga se hundza lembe,* Hana i no xura nyimba a pswala n’wana wa mufana a mu chula+ ku hi Samuweli,* hakuva i te ngalo: “Ndzi mu kombele ka Jehovha.”

21 Hi cikhati ca kona, Elkana i no kandziha ni ngango wakwe wontlhe kasi va ya maha a muphahlo wa lembe ni lembe ka Jehovha+ ni ku nyikela a munyikelo wakwe wa cifungo. 22 Kanilezvi Hana a nga kandzihangi,+ hakuva i wa byelile a nuna wakwe, aku: “Zvalezvi a n’wanana a to tsika ku an’wa, ndzi ta mu heleketa kasi a ya woneka mahlweni ka Jehovha, a tshama seyo wontlhe a masiku ya kuhanya kakwe.”+ 23 A nuna wakwe Elkana aku kakwe: “Maha lezvi u zvi wonako na zvi sasekile. Tshama laha kaya kala u mu tsikisa ku an’wa. Jehovha i wa tatise lezvi u nga wula.” Hikwalaho, a wasati i no tshama laha kaya a an’wisa a n’wana wakwe kala a mu tsikisa ku an’wa.

24 Zvalezvi a nga mu tsikisa ku an’wa, i no famba naye Xilo, na a hi ni cihon’wana ca malembe manharu, ni efa* ya mapa, ni fuko ya hombe ya vhinyo.+ I no chikela ni mufanyana wakwe ndlwini ya Jehovha, le Xilo.+ 25 Andzhako ka lezvo, va no daya homu, va nyikela mufanyana ka Eli. 26 Hana aku: “Ndzi tsetselele, hosi yanga! A ku khwatsi hi lezvi u* hanyako, hosi yanga, hi mina wasati loyi a nga yimile na wena ka wutshamu legi a khongela ka Jehovha.+ 27 Ndzi wa khongela ndzi kombela mufana loyi; Jehovha i ndzi nyikile lezvi ndzi nga mu kombela.+ 28 Makunu minawu ndza mu nyikela* ka Jehovha. Hakuva wontlhe masiku ya kuhanya kakwe i tava wa Jehovha.”

I* no khizama laho mahlweni ka Jehovha.

2 Makunu Hana i no khongela, aku:

11 Andzhako ka lezvo, Elkana i no tlhela mutini wakwe le Rama, kanilezvi a mufanyana i no sala a maha nandza ga* Jehovha+ mahlweni ka mupristi Eli.

12 A vana va Eli va wa bihile+ niku va wa nga hi na mhaka na Jehovha. 13 Ka zvilo lezvi a vapristi va nga fanele ku nyikiwa hi vanhu, a vana va Eli va wa maha lezvi:+ Loku a munhu a maha muphahlo, a nyama na ya ha vila, ku wata a nandza ga mupristi na gi welele garfo ga matino manharu, 14 gi ta gi peta lomu ka mbita, kutani lomu ka mbita ya zvikhomo zvimbiri, kutani lomu ka bhota, kutani lomu ka mbita ya cikhomo cin’we. Ni cihi ci nga tsawuliwa hi garfu ci wa tekiwa hi mupristi. Hi zvalezvo va nga kari va maha ka vontlhe a vaIzrayeli va ngaya le Xilo. 15 Hambu loku a munhu a nga se hisa a mafura ya muphahlo wakwe,+ a nandza ga mupristi gi wata kakwe, gi taku: “Mu nyike nyama a mupristi kasi a woca. A nga ta vhumela ku u mu nyika a nyama yo bhikiwa, ntsena ya yimbisi.” 16 Loku a munhu loye aku: “Va tsike va ranga hi ku hisa a mafura,+ u ta gumesa u teka ni yihi nyama u* yi lavako”, a nandza ga mupristi gi waku: “Ahihi, hatlisa u ndzi nyika zvezvi. Loku u nga ndzi nyiki ndzi taya hi ku wutla!” 17 Hikwalaho, a ciwonho ca malandza lawo ci nova ca hombe mahlweni ka Jehovha,+ hakuva a vavanuna lavo va wa nga hi na cichavo hi munyikelo wa Jehovha.

18 Samuweli i wa tira+ mahlweni ka Jehovha na a bohile efodhe ya wukene,*+ hambu lezvi a nga hi mufanyana. 19 A mamani wakwe kambe i wa mu rungela cinghanjwana co kala mawoko a mu fambela naco lembe ni lembe a cikhati leci a nga kandziha ni nuna wakwe va ya nyikela muphahlo wa lembe ni lembe.+ 20 Eli i no katekisa Elkana ni sati wakwe, aku: “Jehovha i wa ku nyike n’wana hi wasati loyi, wutshan’wini ga loyi a nga nyikelwa* ka Jehovha.”+ Andzhako ka lezvo, va no tlhela kaya. 21 Jehovha i no alakanya Hana, kasi a zvi kota ku xura nyimba;+ i no pswala vafana vanharu ni vanhanyana vambiri. Mufana Samuweli i no simama ku kula mahlweni ka Jehovha.+

22 Eli i wa khosahele nguvhu, kanilezvi i wa zvi zwile zvontlhe lezvi a vana vakwe va nga kari va maha+ ka vontlhe a vaIzrayeli, ni lezvaku va wa etlela ni vavasati lava va nga tira laha nyangweni ya tenda ga mutlhangano.+ 23 Eli i wa tala ku va byela lezvi: “Hikuyini mu simamako ku maha zvilo lezvi? A zvilo lezvi ndzi zvi zwako ni vanhu vontlhe hi n’wina zvi bihile. 24 Vana vanga, a mahungu lawa ndzi ma zwako na ma hangalaka cikari ka vanhu va Jehovha a hi manene. 25 Loku a munhu a wonhela a mun’wani munhu, a mun’wani a nga mu khongelela ka Jehovha;* kanilezvi loku a munhu a wonhela Jehovha,+ himani a to mu khongelela ke?” Kanilezvi a va ingisangi a papayi wabye, hakuva Jehovha i wa bohile ku va daya.+ 26 Ka cikhati caleco, mufana Samuweli i no simama ku kula, a tsakelwa hi Jehovha ni vanhu.+

27 Ku nota a munhu wa Nungungulu ka Eli, a taku: “Jehovha i ngalo: ‘Kasi a ndzi wonekangi ka yindlu ya papayi wa wena a cikhati leci va nga hi tikhumbi le Gibhite, ndlwini ya Faro ke?+ 28 Ndzi no hlawula yena cikari ka tixaka tontlhe ta ka Izrayeli+ kasi ava mupristi wa mina a tlhela a kandziha laha alatini ga mina+ a maha miphahlo, ni ku hisa libani,* a boha efodhe mahlweni ka mina; a yindlu ya kokwani wa wena ndzi yi nyikile a minyikelo yontlhe ya kuhiswa yi mahiwako hi vaIzrayeli.*+ 29 Makunu hikuyini mu kanyisako* a muphahlo wa mina ni munyikelo wa mina lezvi ndzi leleteleko lezvaku zvi nyikelwa wutshan’wini ga mina ke?+ Hikuyini u simamako u dzundza nguvhu a vana va wena a ku hundza mina, mu kulukelana hi nyama yo nona ya minyikelo yontlhe ya vanhu va mina va ka Izrayeli ke?+

30 “‘Hikwalaho, a mhaka ya Jehovha, a Nungungulu wa Izrayeli, yi ngalo: “Kunene ndzi wulile lezvaku a yindlu ya wena ni yindlu ya kokwani wa wena contlhe cikhati yi wa ta famba mahlweni ka mina.”+ Kanilezvi makunu Jehovha i ngalo: “Zvi nga ta ha tira, hakuva ndzi ta dzundza lava va ndzi dzundzako,+ kanilezvi lava va ndzi kanyisako va ta chepetiwa.” 31 A masiku mata laha ndzi to tsema a ntamu* wa wena ni wa yindlu ya papayi wa wena kasi ku ngavi ni munhu lomu ndlwini ya wena a to hanya kala a kumba.+ 32 Wena u ta wona a nala lomu ndlwini ya mina ka zvontlhe zvazvinene zvi to mahiwa lomu Izrayeli,+ niku ku nga ta ha tshuka kuva ni munhu wo kumba lomu ndlwini ya wena. 33 Loyi ndzi to kala ku mu susa laha alatini ga mina, na a hi wa yindlu ya wena, i ta maha ku a matihlo ya wena ma nga ha woni a tlhela a ku vangela* a hlomulo wa hombe, kanilezvi a kutala ka vanhu va yindlu ya wena va ta dawa hi cipadha ca vanhu.+ 34 Lezvi zvi to humelela a vana va wena va vambiri, Hofeni na Finiyasi, zvi tava cikombiso ka wena: Hi wumbiri gabye va tafa siku gin’we.+ 35 Andzhako ka lezvo, ndzi ta ti vhuxela a mupristi wo tsumbeka,+ loyi a to maha lezvi zvi laviwako hi mbilu ya mina.* Ndzi ta mu akela yindlu ya kala kupindzuka, a famba mahlweni ka a totilweko wa mina kala kupindzuka. 36 Loyi a to sala wa yindlu ya wena i tata a ta khizamela a mupristi wa mina a kombela ntiro kasi a hakhelwa hi mali ni pawa, aku: “Ndzi kombela a ntiro wa wupristi kasi ndzi kumanyana pawa yoga.”’”+

3 Cikhatini leco, mufana Samuweli i wa tirela+ Jehovha mahlweni ka Eli, kanilezvi a mhaka ya Jehovha yi wa kala masikwini lawo; ni miwoniso+ yi wa nga tali ku woneka.

2 Ka siku go kari, Eli i wa etlele lomu a nga tolovela ku etlela kona. A matihlo yakwe ma wa firimela; i wa nga zvi koti ku wona.+ 3 A kandiya ya Nungungulu+ yi wa nga se timiwa niku Samuweli i wa etlele lomu tempeleni*+ ya Jehovha, lomu ku nga hi ni Arke* ga Nungungulu. 4 Makunu, Jehovha i no vitana Samuweli. Yena a hlamula, aku: “Hi mina loyi.” 5 I no tsutsuma aya ka Eli, a yaku: “Ndzi tile kota lezvi u nga ndzi vitana.” Eli aku: “A ndzi ku vitanangi, tlhela u ya etlela.” Hikwalaho, i no tlhela a ya etlela. 6 Jehovha i no mu vitana kambe, aku: “Samuweli!” Zvalezvo, Samuweli i no vhuka aya ka Eli, a yaku: “Ndzi tile kota lezvi u nga ndzi vitana.” Kanilezvi Eli aku: “A ndzi ku vitanangi, n’wananga. Tlhela u ya etlela.” 7 (Samuweli i wa nga se mu tiva Jehovha, niku i wa nga se vhululelwa a mhaka ya Jehovha.)+ 8 Hikwalaho, Jehovha i no mu vitana kambe hi khati ga wunharu, aku: “Samuweli!” Zvalezvo Samuweli i no vhuka aya ka Eli, a yaku: “Ndzi tile kota lezvi u nga ndzi vitana.”

Makunu Eli i no zvi pola lezvaku hi Jehovha a vitanako mufanyana. 9 Hikwalaho, Eli i no byela Samuweli, aku: “Tlhela u ya etlela. Loku a ku vitana kambe, uku: ‘Jehovha, wulawula, a nandza ga wena ga ingisela.’” Samuweli i no tlhela a ya etlela wutshan’wini gakwe.

10 Jehovha i nota a ta yima laho, a mu vitana kambe a ku fana ni makhati lawa man’wani, aku: “Samuweli, Samuweli!” Zvalezvo Samuweli, aku: “Wulawula, a nandza ga wena ga ingisela.” 11 Jehovha i no byela Samuweli, aku: “Ndzi ta maha nchumu lomu Izrayeli wu to tinga tindleve ta vontlhe va to wuzwa.+ 12 Ka siku lego, ndzi ta maha ka Eli zvontlhe lezvi ndzi nga wula hi yindlu yakwe, kusukela kusanguleni kala magumo.+ 13 Mu byele lezvaku ndzi ta lamula a yindlu yakwe kala kupindzuka hi kota ya cigoho leci a ci tivako,+ hi lezvi a vana vakwe va rukako Nungungulu,+ kanilezvi yena a nga va kawuki.+ 14 Hi zvalezvi zvi nga ndzi maha ndzi hlambanyela a yindlu ya Eli, ndziku: A ciwonho ca yindlu ya Eli ci nga ta tshuka ci tsetselelwa hi miphahlo kutani hi minyikelo.”+

15 Samuweli i no etlela kala ni mixo; i no vhuka a vhulula tivati ta yindlu ya Jehovha. Samuweli i wa chava ku mu hlawutela a muwoniso lowo Eli. 16 Kanilezvi Eli i no vitana Samuweli, aku: “Samuweli, n’wananga!” Samuweli aku: “Hi mina loyi.” 17 I no mu wutisa, aku: “Zvini a nga ku byela? U nga ndzi fihleli nchumu. Nungungulu i wa ku tsayise a tlhela a engeta loku u ndzi fihlela nchumu ka zvontlhe lezvi a nga ku byela.” 18 Hikwalaho, Samuweli i no mu hlawutela zvontlhe, niku a nga mu fihlelangi nchumu. Eli aku: “Hi Jehovha. I wa mahe lezvi zvi nga zvinene mahlweni kakwe.”

19 Samuweli i no simama ku kula. Jehovha i wa hi zvin’we naye+ niku ka magezu yakwe wontlhe gi hava ni gin’we gi nga kala ku tatiseka.* 20 A vaIzrayeli vontlhe, kusukela le Dhani kala le Bherexebha, va no zvi tiva lezvaku Samuweli i wa hlawulilwe kuva muphrofeti wa Jehovha. 21 Jehovha i no simama ku woneka le Xilo, hakuva Jehovha i wa ti wonekelisile ka Samuweli le Xilo hi mhaka ya Jehovha.+

4 A mhaka ya Samuweli yi no hangalaka kontlhe lomu Izrayeli.

Makunu a vaIzrayeli va no huma kasi va ya tlhangana ni vaFilistiya valwa. A vaIzrayeli va no gova kusuhani ni Ebhenezera, niku a vaFilistiya va wa govile le Afeka. 2 A vaFilistiya va no fola kasi kulwa ni vaIzrayeli, kanilezvi a yimpi a yi fambangi khwatsi; a vaIzrayeli va no hluliwa hi vaFilistiya, va daya a cipimo ca 4000 wa vavanuna va nga hi yimpini. 3 A cikhati leci a vanhu va nga tlhela wugovelweni, a madhota ya ka Izrayeli ma te: “Hikuyini Jehovha a nga hi tsika hi hluliwa* nyamutlha hi vaFilistiya?+ A hi yeni hi ya teka a arke* ga civhumelwano ca Jehovha le Xilo+ hi ta tshama nago kasi gi hi ponisa canjeni ga valala va hina.” 4 Hikwalaho, a vanhu va no rumela a vavanuna le Xilo va ya teka a arke ga civhumelwano ca Jehovha wa mabutho, loyi a tshamileko citshan’wini ca wuhosi hehla* ka makerubhima.+ A vana va Eli va vambiri, Hofeni na Finiyasi,+ vonawu va no famba ni arke ga civhumelwano ca Nungungulu wa lisine.

5 Zvalezvi a arke ga civhumelwano ca Jehovha gi nga chikela wugovelweni, vontlhe a vaIzrayeli va no banguleka va maha guwa ga hombe, laha ka kuza ku tsekatseka ni misava. 6 A cikhati leci a vaFilistiya va ngazwa guwa, va te: “I guwa ga yini lego gi zwalako lomu wugovelweni ga vaHebheru ke?” Hi kugumesa, va no tiva lezvaku i Arke ga Jehovha gi nga chikela lomu wugovelweni. 7 A vaFilistiya va no chava, vaku: “Nungungulu i tile lomu wugovelweni!”+ Hikwalaho va te: “Hi file mayo! Hakuva cima a ku se maheka zvilo zvo khwatsi hi lezvi. 8 Hi file mayo! Himani a to hi ponisa canjeni ga Nungungulu loyi wa hombe ke? Phela hi yena Nungungulu loyi a nga hihirita a vaGibhite lomu ciwuleni hi makhombo ya tixakaxaka.+ 9 N’wina vaFilistiya, tiyani hlanha, mu maha cinuna kasi mu nga tireli a vaHebheru a ku khwatsi hi vona va nga mu tirela.+ Mahani cinuna, mulwa!” 10 A vaFilistiya va nolwa, a vaIzrayeli va hluliwa,+ a mun’we ni mun’wani a tsutsumela tendeni gakwe. Ku no dawa vanhu vo tala; seno ka vaIzrayeli ku nofa 30 000 wa masochwa ma nga famba hi minenge. 11 Ahandle ka lezvo, ku no tekiwa a Arke ga Nungungulu, ku tlhela kufa a vana vambiri va Eli, Hofeni na Finiyasi.+

12 Ku no tsutsuma a wanuna wo kari wa ka Bhenjamini hi le yimpini a chikela le Xilo hi siku galego na a hi ni tinguwo to handzuka ni misava lomu hlokweni yakwe.+ 13 Laha a wanuna loye a nga chikela, Eli i wa tshamile laha citulweni tlhelweni ga ruwa na a cuwukela, hakuva a mbilu yakwe yi wa rurumela hi kota ya Arke ga Nungungulu wa lisine.+ A wanuna loye i no nghena lomu dhoropeni a hlawutela a mahungu lawo, a dhoropa gontlhe gi sangula kuba tinyandha. 14 A cikhati leci Eli a ngazwa a tinyandha, i no wutisa, aku: “A gujeguje leyo ya yini? A wanuna loye i no hatlisa aya ka Eli a ya mu byela a mahungu lawo. 15 (Eli i wa hi ni 98 wa malembe, niku a matihlo yakwe ma wa nyimile; i wa nga woni.)+ 16 A wanuna loye i te ngalo ka Eli: “Ndzita hi le yimpini! Ndzi tsutsumile hi le yimpini nyamutlha.” Eli a wutisa, aku: “Zvini zvi nga maheka, n’wananga?” 17 Makunu a wanuna loye a ngata ni mahungu i no hlawutela, aku: “Izrayeli i tsutsumile mahlweni ka vaFilistiya; ku delwe vanhu vo tala nguvhu;+ a vana va wena va vambiri, Hofeni na Finiyasi, vonawu va file+ niku a Arke ga Nungungulu wa lisine gi tekilwe.”+

18 Zvalezvi a wanuna loye a nga kumbuka a Arke ga Nungungulu wa lisine, Eli i nowa hi lendzhako laha a nga tshamile kona kusuhani ni nyangwa, a tshoveka nhamu afa, hakuva i wa khosahele niku i wa bindza. I wa lamulile Izrayeli a 40 wa malembe. 19 A katamwane wakwe, a sati wa Finiyasi, i wa hi ni nyimba niku i wa sikile. Laha a ngazwa lezvaku ku tekilwe a Arke ga Nungungulu wa lisine ni lezvaku a n’wingi wakwe ni nuna wakwe va file, i no korama, zvalezvo a sangula ku lun’wa, a gumesa a pswala. 20 Laha a nga kari afa, a vavasati lava va nga hi laho va te ngalo: “U nga chavi, hakuva u pswalile mufana.” Kanilezvi a nga hlamulangi, ne a nga chelangi kota hi zvona. 21 Kanilezvi i no chula a mufana wakwe a ku hi Ikabhodhe,*+ aku: “A wudzundzo gi sukile lomu Izrayeli giya wukhumbini.”+ I wulile lezvo hi kota ya lezvi a Arke ga Nungungulu wa lisine gi nga tekilwe ni lezvi zvi nga humelele a n’wingi wakwe ni nuna wakwe.+ 22 I te: “A wudzundzo gi sukile lomu Izrayeli giya wukhumbini, hakuva a Arke ga Nungungulu wa lisine gi tekilwe.”+

5 A cikhati leci a vaFilistiya va nga teka a Arke*+ ga Nungungulu wa lisine, va no gi susa le Ebhenezera va famba nago le Axdhodhe. 2 A vaFilistiya va no teka a Arke ga Nungungulu wa lisine va gi nghenisa lomu ndlwini* ya Dhagoni, va gi veka tlhelweni ga Dhagoni.+ 3 Ka siku gi nga landzela, a vaAxdhodhe va no vhuka ni mixo va kuma ku Dhagoni i wile lahasi hi nghohe mahlweni ka Arke ga Jehovha.+ Hikwalaho, va no teka Dhagoni va mu tlhelisa wutshan’wini gakwe.+ 4 Ka siku gi nga landzela kambe, va no vhuka ni mixo va kuma ku Dhagoni i wile lahasi hi nghohe mahlweni ka Arke ga Jehovha. A hloko ya Dhagoni ni zvicanja zvakwe zvi wa tsemilwe zviwa lahasi laha cipimbitsini. Ku wa no sala ntsena a cipandze ca miri co khwatsi i njhanjhi.* 5 Hi zvalezvo zvi mahako ku kala ni nyamutlha a vapristi va Dhagoni ni vontlhe lava va nghenako lomu ndlwini ya Dhagoni va nga kandziheli laha cipimbitsini ca Dhagoni, le Axdhodhe.

6 A canja ga Jehovha gi no va xanisa nguvhu a vaAxdhodhe. I no hlasela a tiko ga Axdhodhe ni zvitikwana zva kona hi mababyi ya kwilakwila.*+ 7 Laha a vanhu va le Axdhodhe va nga wona lezvi zvi nga maheka, va te ngalo: “Hi nga ha tshami ni Arke ga Nungungulu wa Izrayeli hakuva a canja gakwe ga hi xanisa nguvhu gi tlhela gi xanisa ni nungungulu wa hina Dhagoni.” 8 Hikwalaho, va no ruma vanhu va ya vitanisa a tihosi tontlhe ta vaFilistiya, vaku ka tona: “Hi ta kuyini hi Arke ga Nungungulu wa Izrayeli?” A tihosi ta vaFilistiya tiku: “A Arke ga Nungungulu wa Izrayeli gi wa yisiwe le Gati.”+ Hikwalaho, va no teka a Arke ga Nungungulu wa Izrayeli va gi yisa seyo.

9 Laha a Arke gi nga chikele seyo, a canja ga Jehovha gi no vhukela dhoropa, kuva ni gujeguje ya hombe. I no hlasela a vanhu va dhoropa, kusukela ka loyi wa mutsongwani kala ka wahombe, hi mababyi ya kwilakwila.*+ 10 Hikwalaho, va no rumela a Arke ga Nungungulu wa lisine le Ekroni.+ Kanilezvi zvalezvi a Arke ga Nungungulu wa lisine gi nga chikela le Ekroni, a vaEkroni va no sangula kuba tinyandha, vaku: “Va tisile a Arke ga Nungungulu wa Izrayeli kasi va fela ku daya hina ni vanhu va hina!”+ 11 Va no ruma vanhu va ya vitanisa a tihosi tontlhe ta vaFilistiya, vaku: “Susani a Arke ga Nungungulu wa Izrayeli lomu gi tlhela kaya ka gona kasi hina ni vanhu va hina hi ngafi.” Hakuva a dhoropa gontlhe gi wa chava kufa, ni canja ga Nungungulu wa lisine gi wa bindza nguvhu hehla ka gona.+ 12 A vanhu lava va nga kala kufa va wa xanisiwa hi mababyi ya kwilakwila.* A cirilo ca dhoropa ci no chikela ni le matilweni.

6 A Arke*+ ga Jehovha gi tshamile a 7 wa tihweti lomu tikweni ga vaFilistiya. 2 A vaFilistiya va no vitanisa a vapristi ni vavhumbi,+ va ta va wutisa, vaku: “Hi ta kuyini hi Arke ga Jehovha? Hi lava ku tiva ku hi ta gi tlhelisisa kuyini kaya ka gona.” 3 Vona vaku: “A cikhati leci mu to tlhelisa a arke ga civhumelwano ca Jehovha, a Nungungulu wa Izrayeli, mu nga gi tlhelisi na gi nga hi na munyikelo. Gi tlheliseni kakwe na gi hi ni munyikelo wa nandzu.+ Loku mu maha lezvo hi kona mu to hanyiswa mu tlhela mu tiva ku hikuyini a canja gakwe gi nga kala gi nga suki ka n’wina.” 4 Hikwalaho, va no wutisa, vaku: “Zvini hi to rumela kota munyikelo wa nandzu?” Vaku: “Hi kuya hi ntsengo wa tihosi ta vaFilistiya, rumelani a ntlhanu wa zvifananiso zva ouro zva mababyi ya kwilakwila* ni ntlhanu wa makondlo ya ouro,+ hakuva n’wina n’wentlhe ni tihosi ta n’wina mu xanisilwe hi ntungu walowu wa wun’we. 5 Mahani a zvifananiso zva mababyi ya n’wina ya kwilakwila* ni zvifananiso zva makondlo ya n’wina+ lawa ma hlaselako a tiko, mu dzundza a Nungungulu wa Izrayeli. Kuzvilava i ta hehukisa a canja gakwe legi gi nga hehla ka n’wina, ni ka nungungulu wa n’wina, ni ka tiko ga n’wina.+ 6 Mu lava ku ti nonohisela yini a timbilu ta n’wina a ku fana ni Gibhite na Faro lava va nga nonohisa a timbilu tabye?+ A cikhati leci Nungungulu a nga va xanisa nguvhu+ hi kona va nga tlhatlha vaIzrayeli, niku va no suka va famba.+ 7 Mahani a kareta ya yiswa mu teka mapswele mambiri ya tihomu, ma nga ni zvirolana, ma kalako ma nga se tlhatekiwa kanga mu ma panisa laha ka kareta. Kanilezvi a zvirolana zva kona zvi tlheliseni cibaleni, zvi hambana ni vamamani va kona. 8 Tekani a Arke ga Jehovha mu gi pakela lomu kareteni. A zvibya zva ouro lezvi mu zvi rumelako ka Nungungulu kota munyikelo wa nandzu mu ta zvi chela lomu ka kaxa, laha kusuhani ni arke,+ mu gumesa mu tsika a tihomu ti famba 9 na mu ti cuwukela: Loku ti kwela hi ruwa ga kuya Bhet-Xemexe,+ tiya tikweni ga tona, hi ta zvi tiva lezvaku hi Nungungulu a hi vangeleko a kubiha loku ka hombe. Kanilezvi loku zvi nga mahisi lezvo, hi ta zvi tiva lezvaku a hi canja gakwe gi hi xanisileko kanilezvi zvi no halahala zvi humelela.”

10 A vavanuna lavo va no maha zvalezvo. Va no teka mapswele mambiri ya tihomu ma nga hi ni marole va ma panisa laha ka kareta va gumesa va vhalela marole ya kona lomu cibaleni. 11 Andzhako ka lezvo, va no teka a Arke ga Jehovha va gi pakela lomu kareteni, zvin’we ni kaxa legi gi nga hi ni makondlo ya ouro ni zvifananiso zva mababyi yabye ya kwilakwila.* 12 A tihomu ti no famba hi ruwa gi kongomako Bhet-Xemexe.+ Ti no simama ku famba hi ruwa lego na ti bhonga, a ti jikangi tiya cineneni ne hambu cibhabheni. A tihosi ta vaFilistiya ti no sala ti landza hi le ndzhako kala le mbhinganweni wa Bhet-Xemexe. 13 A vanhu va Bhet-Xemexe va wa hi lomu ko tshovela trigo lomu nkoveni. A cikhati va nga ku tlaku matihlo va wona a Arke, va no tsaka nguvhu. 14 A kareta yi no nghena lomu masin’wini ya Joxuwa, a muBhet-Xemexe, yi nyima laha kusuhani ni ribye ga hombe. Hikwalaho, va no pandzelela a mapulango ya kareta, va nyikela a tihomu+ kota munyikelo wa kuhiswa ka Jehovha.

15 A vaLevhi+ va no chisa a Arke ga Jehovha ni kaxa legi gi nga hi lomo, legi gi nga hi ni zvibya zva ouro, va zvi tlhateka laha ka ribye ga hombe. Ka siku lego, a vanhu va le Bhet-Xemexe+ va no maha minyikelo ya kuhiswa ni miphahlo ka Jehovha.

16 A cikhati leci a tihosi leto ta ntlhanu ta vaFilistiya ti nga wona lezvo, ti no tlhela Ekroni hi siku galego. 17 A zvifananiso zva ouro zva mababyi ya kwilakwila* lezvi a vaFilistiya va nga zvi rumela kota munyikelo wa nandzu ka Jehovha+ hi lezvi: Cin’we ca Axdhodhe,+ ni cin’we ca Gaza, ni cin’we ca Axkeloni, ni cin’we ca Gati,+ ni cin’we ca Ekroni.+ 18 A ntsengo wa makondlo ya ouro wu wa ringana ni ntsengo wa madhoropa wontlhe ya vaFilistiya, lawa ma nga fumiwa hi tihosi leto ta ntlhanu — a madhoropa ma nga vhikelwe khwatsi ni zvidhoropana zva le handle.

A ribye ga hombe legi va nga tlhateka ka gona a Arke ga Jehovha ga ha hi kustumunyu kala ni nyamutlha lomu masin’wini ya Joxuwa, a muBhet-Xemexe. 19 Kanilezvi Nungungulu i no hlasela a vanhu va Bhet-Xemexe hi kota ya lezvi va nga cuwuka a Arke ga Jehovha, a daya a 50 070* wa vanhu. A vanhu va no sangula ku rila hakuva Jehovha i wa hihiritile a vanhu vo tala nguvhu.+ 20 Hikwalaho, a vanhu va Bhet-Xemexe va no wutisa, vaku: “Himani a nga tiyako ku yima mahlweni ka Jehovha, a Nungungulu a basileko?+ Kona loku a suka laha ka hina i taya kwihi?”+ 21 Hikwalaho, va no rumela a zvirun’wa zvi ya byela a vahanyi va Kiriyat-Jeyarime,+ zviku: “A vaFilistiya va wuyisile a Arke ga Jehovha. Relelani mu ta gi teka.”+

7 Hikwalaho, a vanhu va le Kiriyat-Jeyarime va nota va ta teka a Arke* ga Jehovha va famba nago ndlwini ya Abhinadhabha,+ le citsungeni, va basisa a n’wana wakwe, Eleyazari, kasi a hlayisa a Arke ga Jehovha.

2 Ku no hundza cikhati co leha — 20 wa malembe — kusukela a siku legi a Arke gi ngata Kiriyat-Jeyarime, niku yontlhe a yindlu ya ka Izrayeli yi no sangula ku hlota* Jehovha.+ 3 Samuweli i no byela vontlhe va yindlu ya ka Izrayeli, aku: “Loku ku hi lezvaku hakunene mo tlhelela ka Jehovha hi timbilu ta n’wina tontlhe,+ fuvisani a vanungungulu va matiko+ ni zvifananiso zva Axtarte+ lezvi zvi nga cikari ka n’wina, mu wuya ka Jehovha hi timbilu ta n’wina tontlhe mu ta tirela yena yece,+ hi kona a to mu tlhatlhisa canjeni ga vaFilistiya.”+ 4 Hikwalaho, a vaIzrayeli va no susa a vaBhaali ni zvifananiso zva Axtarte va khozela Jehovha yece.+

5 Andzhako ka lezvo, Samuweli i te ngalo: “Tlhanganisani a vaIzrayeli vontlhe le Mizpa+ niku ndzi ta mu khongelela ka Jehovha.”+ 6 Hikwalaho, va no hlengeletana le Mizpa, vakha mati, va ma chulula mahlweni ka Jehovha va tlhela va pfhunga* ka siku lego.+ Kuve laho va ngaku: “Hi wonhele Jehovha.”+ Samuweli i no sangula kuva mulamuli+ wa vaIzrayeli le Mizpa.

7 Laha a vaFilistiya va ngazwa lezvaku a vaIzrayeli va tlhangene le Mizpa, a tihosi ta vaFilistiya+ ti no kandziha kasi ti ya vhukela a vaIzrayeli. A cikhati leci a vaIzrayeli va ngazwa lezvo, va no chava vaFilistiya. 8 Hikwalaho, a vaIzrayeli va no byela Samuweli, vaku: “U nga tsiki ku vitana Jehovha, a Nungungulu wa hina, kasi a hi vhuna,+ a hi ponisa canjeni ga vaFilistiya.” 9 Makunu Samuweli i no teka a ciyivhana ci nga ha an’wa a ci nyikela ka Jehovha kota munyikelo wa kuhiswa wa murumba;+ Samuweli i no khongelela a vaIzrayeli ka Jehovha, Jehovha a mu hlamula.+ 10 Laha Samuweli a nga ha nyikela a munyikelo wa kuhiswa, a vaFilistiya va no tshinela ka vaIzrayeli kasi va talwa navo. Ka siku lego, Jehovha i no vanga a kudzindza ka hombe+ hehla ka vaFilistiya, a va vhilinganyisa,+ va hluliwa mahlweni ka vaIzrayeli.+ 11 Makunu a vavanuna va ka Izrayeli va no suka hi Mizpa va hlongolisela a vaFilistiya, va va hihirita kala dzongeni* wa Bhet-Kare. 12 Andzhako ka lezvo, Samuweli i no teka ribye+ a gi yimisa cikari ka Mizpa ni Jexana a gi chula ku Ebhenezera,* aku: “Jehovha wa ha hi vhuna kala lezvi.”+ 13 Hikwalaho, a vaFilistiya va no hluliwa, a va ha wuyangi kambe va ta vhukela tiko ga ka Izrayeli.+ A canja ga Jehovha gi no simama ku vhukela a vaFilistiya masikwini wontlhe ya Samuweli.+ 14 Ahandle ka lezvo, a madhoropa lawa a vaFilistiya va nga tekile ka Izrayeli ma no tlheliselwa ka Izrayeli, kusukela Ekroni kala Gati. A vaIzrayeli va no tlhela va teka a matiko yabye ma nga tekilwe hi vaFilistiya.

Ku nova ni kurula kambe cikari ka Izrayeli ni vaAmori.+

15 Samuweli i no lamula Izrayeli wutomini gakwe gontlhe.+ 16 Lembe ni lembe i wa suka a famba a rendzelekela Bheteli,+ ni Gilgali,+ ni Mizpa+ a lamula Izrayeli ka wontlhe matshamu lawo. 17 Kanilezvi i wa tlhela le Rama,+ hakuva a muti wakwe wu wa hi seyo, a ya tshama seyo kambe a lamula Izrayeli. I no mu akela a alati Jehovha laho.+

8 Laha Samuweli a nga khosahele, i no yimisa a vafana vakwe kota valamuli va Izrayeli. 2 A vito ga n’wana wakwe wa matewula ku wa hi Joyeli, loyi wa wumbiri ku wa hi Abhija;+ hi vona va nga kari va lamula le Bherexebha. 3 Kanilezvi a vana vakwe va wa nga fambi hi tindlela ta papayi wabye; va wa randza a bhindzu go biha,+ va vhumela a ku xavelelwa+ va tlhela va soholota kululama.+

4 Andzhako ka cikhati, a madhota wontlhe ya ka Izrayeli ma no hlengeletana maya ka Samuweli le Rama. 5 Ma te ngalo kakwe: “Wena u khosahele niku a vana va wena a va fambi hi tindlela ta wena. Hi yimisele a hosi lezvaku yi hi lamula a ku fana ni wontlhe a matiko lawa man’wani.”+ 6 Kanilezvi lezvi va nga wula, zvaku: “Hi nyike hosi kasi yi hi lamula”, zvi no mu swira nguvhu Samuweli.* Hi kulandzela, Samuweli i no khongela ka Jehovha, 7 Jehovha aku kakwe: “Ingisa zvontlhe lezvi a vanhu va ku byelako, hakuva a va tsiki wena kanilezvi hi mina va ndzi tsikako kota hosi yabye.+ 8 Lezvi va mahako hi zvalezvi va tako na va maha kusukela a siku legi ndzi nga va humesa tikweni ga Gibhite kala nyamutlha. Va tshama hi ku ndzi tsika+ va ya khozela van’wani vanungungulu;+ hi zvalezvo va mahako ni ka wenawu. 9 Makunu, va ingise. Kanilezvi va tlharihise, u va byela lezvi a hosi leyi yi to va fumela yi tova ni fanelo ya ku zvi londza kabye.”

10 Hikwalaho, Samuweli i no hlawutela a timhaka tontlhe ta Jehovha ka vanhu lava va nga kombela hosi, 11 aku: “A hosi leyi yi to mu fumela yi tava ni fanelo ya ku londza lezvi:+ Yi ta teka a majaha ya n’wina+ yi ma khilelisa lomu ka tikareta ta yona+ yi va maha vakhileli va yona va mahaxi,+ a van’wani va tsutsuma phambeni ka tikareta ta yona. 12 Yi ta yimisa a tihosana ta mitlawa ya 1000 wa vanhu+ ni ya 50 wa vanhu,+ a van’wani va ta rima a masimu ya yona,+ a van’wani va tshovela,+ a van’wani va betha matlhari ya yona ya yimpi ni zvibya zva tikareta ta yona.+ 13 Yi ta teka a vanhanyana va n’wina yi va mahisa tiperfume, a van’wani yi va maha vabhiki ni vamahi va tipawa.+ 14 Ka pfuno wa masimu ya n’wina, ni wa zvivhina* zva n’wina, ni wa miolivha ya n’wina+ yi ta teka lezvi zvazvinene yi nyika a malandza ya yona. 15 Yi ta teka a zva wukhume zva timbewu ta masimu ya n’wina, ni zva zvivhina zva n’wina yi nyika a tihosana ta yona ni malandza ya yona. 16 Yi ta mu tekela a malandza ya n’wina ya cinuna, ni ya cisati, ni mitlhambi ya n’wina ya yinene, ni timbongola ta n’wina yi maha hi zvona a mitiro ya yona.+ 17 Yi ta teka zva wukhume zva mitlhambi ya n’wina;+ n’wina mu ta maha malandza ya yona. 18 Ku ta chikela siku mu to rila hi kota ya hosi leyi mu nga ti hlawulela,+ kanilezvi Jehovha a nga ta mu hlamula ka siku lego.”

19 Kanilezvi a vanhu va no ala ku ingisa lezvi Samuweli a nga va byela, vaku: “A ku na mhaka! Hina ho lava hosi ya ku hi fumela, 20 kasi hinawu hi ta fana ni wontlhe a matiko lawa man’wani. A hosi ya hina yi ta hi lamula, yi hi rangela yi tlhela yi hi lwela tiyimpini ta hina.” 21 Andzhako ka loku Samuweli a zwile magezu wontlhe ya vanhu i noya a ya ma hlawutela tindleveni ta Jehovha. 22 Jehovha aku ka Samuweli: “Va ingise, u va yimisela hosi yi va fumela.”+ Samuweli i no byela a va ka Izrayeli, aku: “A mun’we ni mun’wani wa n’wina i wa tlhele dhoropeni gakwe.”

9 Ku wa hi ni wanuna wa ka Bhenjamini, loyi a vito gakwe ku nga hi Kixi,+ a n’wana wa Abhiyeli, a n’wana wa Zerora, a n’wana wa Bhekorate, a n’wana wa Afiya, a muBhenjamini,+ a nga ganyile nguvhu. 2 I wa hi ni n’wana a nga vitaniwa ku hi Sawule,+ a nga hi jaha go saseka. Ku wa nga hi na wanuna cikari ka vaIzrayeli wa ku saseka ku hundza yena. I wa hundza vontlhe hi kuleha; lava van’wani va wa gama hi lomu makatleni yakwe.

3 A cikhati leci Kixi, a papayi wa Sawule, a nga lahlekelwa hi timbongola,* i no byela n’wana wakwe, Sawule, aku: “Teka a nandza gin’we mu famba mu lavetela timbongola.” 4 Va no hundza hi lomu tikweni ga zvitsunga ga Efrayime, ni tikweni ga Xalixa, kanilezvi a va ti kumangi. Va no tsemakanya hi lomu tikweni ga Xaalima, kanilezvi konawu ti wa nga hi kona. Va no hundza hi lomu tikweni gontlhe ga Bhenjamini na va ti lavetela, kanilezvi a va ti kumangi.

5 Loku va chikele tikweni ga Zufa, Sawule i no byela a nandza legi a nga hi nago, aku: “Hesa, a hi tlhele, papayi a nga sangula ku karateka hi hina a tsika ku karateka hi timbongola.”+ 6 Kanilezvi a nandza gi no mu hlamula, giku: “Lomu dhoropeni legi ku na ni munhu wa Nungungulu, a munhu a dzundziwako. Zvontlhe lezvi a wulako zva maheka.+ A hi mu yele zvezvi, kuzvilava i ta hi komba ndlela ya ku famba hi yona.” 7 Sawule aku ka nandza gakwe: “Hi zvona, kanilezvi hi ta mu fambela ni yini a wanuna loye? Lomu tipasteni ta hina a hi na tipawa, ne a hi na nchumu wa ku ya nyika a munhu loye wa Nungungulu wa lisine. Zvini hi nga nazvo?” 8 Hikwalaho, a nandza gi no byela Sawule kambe, giku: “Ndzi na ni cipandze ca wumune ca xekeli* ga prata canjeni ga mina. Ndzi ta yi nyikela ka munhu wa Nungungulu wa lisine kasi a hi komba ndlela ya ku famba hi yona.” 9 (A kaleloko, le Izrayeli, loku a munhu aya a ya wutisa Nungungulu, i waku: “A hi fambe ka muwoni.”+ Hakuva a kale a muphrofeti i wa vitaniwa ku muwoni.) 10 Makunu Sawule a hlamula nandza gakwe, aku: “Lezvi u wulako hi zvona, a hi fambe.” Hikwalaho, va no suka va famba dhoropeni legi ku nga hi ni munhu wa Nungungulu wa lisine.

11 Na va ha kandziha kuya dhoropeni, va no tlhangana ni vanhanyana va nga kari vaya kukheni ka mati, va va wutisa, vaku: “I kona muwoni+ lomu ke?” 12 A vanhanyana lavo va hlamula, vaku: “Ina, i kona. I leniya. Fambani hi kuhatlisa, i tile nyamutlha lomu dhoropeni hakuva nyamutlha a vanhu va lava ku maha muphahlo+ le wutshan’wini go tlakuka.+ 13 Zvalezvi mu to nghena lomu dhoropeni, mu ta mu kuma na a nga se kandziha wutshan’wini go tlakuka a yaga. A vanhu va nga taga na a nga se chikela, hakuva hi yena a katekisako a muphahlo. Loku a wu katekisile hi kona va gako lava va rambilweko. Hikwalaho, fambani zvezvi mu ta mu kuma.” 14 Hikwalaho, va no kandziha vaya dhoropeni. Laha va nga chikela cikari ka dhoropa, va no wona Samuweli na a huma a va khinga kasi vaya le wutshan’wini go tlakuka.

15 A tolo wa kona, Sawule na a nga se chikela, Jehovha i wa byelile Samuweli, aku: 16 “A mandziko, kwalomu ka cikhati caleci, ndzi ta ku rumelela a wanuna wa le tikweni ga Bhenjamini.+ U ta mu tota kasi ava murangeli wa vanhu va mina, a vaIzrayeli;+ i ta tlhatlhisa a vanhu va mina canjeni ga vaFilistiya. Hakuva ndzi wonile a hlomulo wa vanhu va mina, ni kurila kabye ku chikele ka mina.”+ 17 A cikhati leci Samuweli a nga wona Sawule, Jehovha i no byela Samuweli, aku: “Hi loyi a wanuna loyi ndzi ngaku: ‘Hi yena a to fumela a vanhu va mina.’”+

18 Sawule i no tshinelela Samuweli laha nyangweni, aku: “Hi nga ndzi byela, hi kwihi a kaya ka muwoni?” 19 Samuweli aku ka Sawule: “Hi mina muwoni. Ranga phambeni ka mina hiya wutshan’wini go tlakuka; nyamutlha mu taga na mina.+ A mandziko ni mixo ndzi ta ku tsika u famba ndzi tlhela ndzi ku byela zvontlhe lezvi u lavako ku zvi tiva.* 20 A timbongola leti ti nga ni masiku manharu na ti lahlekile,+ u nga ha karateki hi tona, ti kumilwe. Kasi a titshomba tontlhe ti nga lomu Izrayeli ti lumba mani? A hi ta wena ni yindlu yontlhe ya papayi wa wena ke?”+ 21 Sawule a hlamula, aku: “Kasi a ndzi muBhenjamini, wa lixaka la litsongwani cikari ka tixaka ta ka Izrayeli ke?+ Kona a ngango wa mina a hi wona wa wutsongwani ka mingango yontlhe ya lixaka la ka Bhenjamini ke? Makunu hikuyini u ndzi byelako timhaka leti?”

22 Samuweli i no teka Sawule ni nandza gakwe a famba navo saleni ya ku gela kona, a ya va tshamisa ka matshamu yo hlawuleka mahlweni ka lava va nga rambilwe; laho ku wa hi ni cipimo ca 30 wa vavanuna. 23 Samuweli i no byela mubhiki, aku: “Neha a cipandze leci ndzi nga ku nyika, ndziku: ‘Ci veke hi tlhelo.’” 24 Makunu a mubhiki i no teka a nenge ni lezvi zvi nga hi ka wona, a zvi veka mahlweni ka Sawule. Samuweli aku: “Lezvi u nga vekelwe hi lezvi. Gana, hakuva zvi wa vekelwa wena kasi u taga ka cikhati leci. Hakuva ndzi va byelile ku: ‘Ndzi na ni vapfhumba.’” Hikwalaho, Sawule i noga na Samuweli ka siku lego. 25 Andzhako ka lezvo, va no relela hi le wutshan’wini go tlakuka+ vaya dhoropeni. Samuweli i no simama ku bhula na Sawule na va hi langweni* la yindlu. 26 Va no vhuka ni mixo, niku laha a gambo gi nga tsuwuka, Samuweli i no vitana Sawule a nga hi le langweni, aku: “Ti longisele u ta famba.” Hikwalaho, Sawule i no ti longisela a gumesa a huma lahandle na Samuweli. 27 Na va ha relela, na va hi kusuhani ni ku huma lomu dhoropeni, Samuweli i te ngalo ka Sawule: “Byela a nandza ga wena+ gi ranga phambeni” (hikwalaho, a nandza gi no ranga), “kanilezvi wena nyima laha kasi ndzi ku byela a mhaka ya Nungungulu.”

10 Makunu Samuweli i no teka botori ga mafura a ma chulula hlokweni ya Sawule,+ a mu pswopswa, aku: “Jehovha i ku totile kota murangeli+ wa tshomba yakwe.+ 2 Nyamutlha, a cikhati u to famba, u ta ya kuma vavanuna vambiri kusuhani ni cilahla ca Rakeli,+ le Zelza, tikweni ga Bhenjamini. Va ta ku byela lezvi: ‘A timbongola leti u nga famba u ti lavetela ti kumilwe, kanilezvi a papayi wa wena i yi rivakelwe a mhaka ya timbongola,+ zvezvi i karateka hi n’wina. I ngalo: “Ndzi ta kuyini hi n’wana wa mina?”’ 3 Andzhako ka lezvo, simama ku famba kala u chikela sinyeni ya hombe ya Tabhora. Laho u ta kumana ni vavanuna vanharu na va kandziha kuya ka Nungungulu wa lisine le Bheteli,+ a mun’we na a hi ni zvimbutana zvinharu, a mun’wani na a hi ni tipawa tinharu, ni mun’wani na a hi ni fuko ya hombe ya vhinyo. 4 Va ta ku losa va ku nyika tipawa timbiri. Ti amukele. 5 Andzhako ka lezvo, famba citsungeni ca Nungungulu wa lisine. Laho u ta kuma ntlawa wa masochwa ya vaFilistiya. Laha u to chikela dhoropeni, u ta kumana ni ntlawa wa vaphrofeti na wu relela hi wutshan’wini go tlakuka na wu kari wu phrofeta, le phambeni kabye na ku hi ni vanhu va bako a zvichaya-chaya zva tingoti, ni mitandanda, ni zvitoliya, ni zvitende. 6 A moya wa Jehovha wu ta ku nyika ntamu+ u phrofeta navo, u cica u maha mun’wani munhu.+ 7 A cikhati leci a zvikombiso lezvi zvi to maheka, maha ni cihi leci a canja ga wena gi to ci kota, hakuva a Nungungulu wa lisine i na wena. 8 Hi kulandzela, relela u ranga uya Gilgali,+ ndzi ta sala ndzi relela ndzita seyo kasi ndzi ta maha muphahlo wa kuhiswa ni miphahlo ya kuhlengela.* Rindzela a 7 wa masiku kala ndzita ka wena. Andzhako ka lezvo, ndzi ta ku byela lezvi u faneleko ku maha.”

9 Zvalezvi Sawule na Samuweli va nga hambana, Nungungulu i no sangula ku cica a mbilu ya Sawule yi ku khwatsi ya munhu mun’wani; a zvikombiso zvontlhe lezvi zvi no tatiseka ka siku galego. 10 Hikwalaho, va no suka hi laho vaya citsungeni, ni ntlawa wa vaphrofeti wu no tlhangana naye. Zvalezvo a moya wa Nungungulu wu no mu nyika ntamu,+ a sangula ku phrofeta+ cikari kabye. 11 A cikhati leci vontlhe lava va nga mu tiva hi kale va nga mu wona na a phrofeta ni vaphrofeti, va no wutisana, vaku: “Kasi zvini zvi nga humelela a n’wana wa Kixi? Kasi Sawule yenawu ova muphrofeti ke?” 12 A mun’we wabye aku: “Himani a papayi wabye?” Hikwalaho, yi no maha vingu a mhaka leyi yaku: “Kasi Sawule yenawu ova muphrofeti ke?”+

13 A cikhati a nga mbheta ku phrofeta, i noya wutshan’wini go tlakuka. 14 Andzhako ka lezvo, a makabye wa papayi wa Sawule i no wutisa Sawule ni nandza gakwe, aku: “Mu wa yile kwihi?” Sawule aku: “Hi wa fambile hi lavetela timbongola,+ kanilezvi a hi ti kumangi, hikwalaho hi noya ka Samuweli.” 15 A tio wa Sawule i no mu wutisa, aku: “Hi nga ndzi byelani: Zvini lezvi Samuweli a nga mu byela?” 16 Sawule i no hlamula a tio wakwe, aku: “I te a timbongola ti kumekile.” Kanilezvi a nga mu byelangi lezvi Samuweli a nga wulile hi mhaka ya wuhosi.

17 Andzhako ka lezvo, Samuweli i no vitanisa vanhu kasi va ta tlhangana mahlweni ka Jehovha le Mizpa,+ 18 aku ngalo ka vaIzrayeli: “Jehovha, a Nungungulu wa ka Izrayeli, i ngalo: ‘Hi mina ndzi nga humesa Izrayeli le Gibhite. Hi mina ndzi nga mu tlhatlhisa canjeni ga Gibhite+ ni canjeni ga yontlhe mifumo leyi yi nga kari yi mu xanisa. 19 Kanilezvi nyamutlha mu tsikile a Nungungulu wa n’wina,+ loyi a mu tlhatlhisileko ka kubiha kontlhe ni kuxanisekeni kontlhe, muku: “A ku na mhaka! Wena yimisa hosi yi hi fumela.” Makunu tshinelani mahlweni ka Jehovha hi tixaka ta n’wina ni tinyangwa ta n’wina.’”

20 Hikwalaho, Samuweli i no vitanisa a tixaka tontlhe ta ka Izrayeli ti tshinela,+ ku se hlawuliwa a lixaka la ka Bhenjamini.+ 21 Makunu i no vitanisa lixaka la ka Bhenjamini hi mingango ya yona, ku se hlawuliwa a ngango wa ka Matri. Hi kugumesa, ku no hlawuliwa Sawule, a n’wana wa Kixi.+ Kanilezvi a cikhati leci va nga mu lavetela a va mu kumangi. 22 Hikwalaho, va no wutisa Jehovha,+ vaku: “A munhu wa kona i chikele ke?” Jehovha aku: “I lahayani. I fihlele lomu ka zvijumba.” 23 Hikwalaho, va no tsutsuma va ya mu teka. A cikhati leci a nga yima lomu cikari ka vanhu, i wa hundza vontlhe hi kuleha; lava van’wani va wa gama hi lomu makatleni yakwe.+ 24 Samuweli i no byela vanhu vontlhe, aku: “Ma mu wona loyi Jehovha a nga mu hlawula?+ A nga kona wo fana naye cikari ka vanhu vontlhe.” A vanhu vontlhe va no banguleka, vaku: “Hosi, hanya nguvhu!”

25 Samuweli i no byela vanhu lezvi a hosi yi to zvi lava kabye+ a tlhela a zvi tsala lomu ka bhuku a zvi veka mahlweni ka Jehovha. Andzhako ka lezvo, Samuweli i no tlhatlha a vanhu vontlhe, a mun’we ni mun’wani a tlhela kaya kakwe. 26 Sawule yenawu i no tlhela kaya kakwe le Gibheya, na a heleketiwa hi masochwa lawa Jehovha a nga khumbile timbilu ta wona. 27 Kanilezvi a vavanuna vo kari va nga vhuniko nchumu va te ngalo: “I ta hi ponisisa kuyini ye inaloyi?”+ Hikwalaho, va no mu chepeta va nga mu nyiki ne cinyikiwo cin’we.+ Kanilezvi Sawule a nga wulangi nchumu ka mhaka leyo.*

11 Nahaxi, a muAmoni,+ i nota a ta gova a vhukela Jabhexe,+ le Gileyadhe. A vanhu vontlhe va Jabhexe va no byela Nahaxi, vaku: “Maha civhumelwano na hina, hi ta ku tirela.” 2 Nahaxi, a muAmoni, aku kabye: “Kasi ndzi maha civhumelwano na n’wina, vhumelani ku ndzi bhoxa wontlhe a matihlo ya n’wina ya cinene. Ndzi ta maha lezvo kasi ndzi poyila vontlhe va ka Izrayeli.” 3 A madhota ya le Jabhexe ma no mu hlamula, maku: “Hi nyike 7 wa masiku kasi hi rumela zvirun’wa tikweni gontlhe ga Izrayeli. Loku ku nga humeleli wa ku hi tlhatlhisa, hi ta ti nyikela ka wena.” 4 Hi kulandzela, a zvirun’wa zvi noya le Gibheya+ wa Sawule zvi ya hlawutela a timhaka leti ka vanhu. A vanhu vontlhe va no rila hi gezu ga hombe.

5 Kanilezvi Sawule i wa wuya hi masin’wini, na a gula a ntlhambi, aku: “Kasi zvini zvi nga humelela? A vanhu lava va rilela yini?” Hikwalaho, va no mu hlawutela a timhaka ta vanhu va Jabhexe. 6 A moya wa Nungungulu wu no mu nyika ntamu Sawule+ a cikhati leci a ngazwa a timhaka leto, a vhura hi zanga. 7 Hikwalaho, i no teka a tihomu timbiri a ti tsemelela hi zvipandze, a zvi rumela tikweni gontlhe ga Izrayeli hi canja ga zvirun’wa, aku: “Hi zvalezvi ti to mahiwa a tihomu ta loyi a to kala ku landzela Sawule na Samuweli!” A vanhu va no chava Jehovha, va huma hi mbilu yin’we.* 8 Sawule i no va hlaya le Bhezeki, a kuma 300 000 wa vaIzrayeli ni 30 000 wa va ka Judha. 9 Makunu va no byela zvirun’wa lezvi zvi nga tile hi Jabhexe, vaku: “Byelani a vavanuna va Jabhexe, le Gileyadhe, muku: ‘A mandziko, hi cikhati leci a gambo gi hisako, mu ta ponisiwa.’” Andzhako ka lezvo, a zvirun’wa zvi noya zvi ya hlawutela a timhaka leto ka vavanuna va le Jabhexe, va se tala hi kutsaka. 10 Hikwalaho, a vanhu va le Jabhexe va te ngalo: “A mandziko hi ta ti nyikela ka n’wina, mu hi maha ni cihi mu to ci wona na ci hi cinene.”+

11 Ka siku gi nga landzela, Sawule i no avanyisa vanhu hi mitlawa yinharu, va nghena cikari ka wugovelo na giya kuceni,* va daya a vaAmoni+ kala a mumu wu hisa. Lava va nga pona va no hangalakela, ku nga sali ne hambu vambiri na va hi zvin’we. 12 Makunu a vanhu va no byela Samuweli, vaku: “Hi vamani lava va ngaku: ‘Kasi hi Sawule a lavako ku hi fumela?’+ Va humeseni hi ta va daya.” 13 Kanilezvi Sawule i te ngalo: “I hava a to dawa nyamutlha,+ hakuva nyamutlha Jehovha i tlhatlhisile a vaIzrayeli.”

14 Samuweli i no gumesa a byela vanhu, aku: “A hi yeni Gilgali+ hi ya tiyisa a wuhosi.”+ 15 Hikwalaho, a vanhu vontlhe va noya le Gilgali. Va noya va ya yimisa Sawule lezvaku a maha hosi mahlweni ka Jehovha le Gilgali. Va no nyikela a miphahlo ya kuhlengela mahlweni ka Jehovha.+ Sawule ni vanhu vontlhe va ka Izrayeli va no kulungela hi kutsaka ka hombe.+

12 Hi kugumesa, Samuweli i no byela vaIzrayeli vontlhe, aku: “Zvontlhe lezvi mu nga ndzi kombela ndzi mahile,* niku ndzi yimisile a hosi kasi yi mu fumela.+ 2 Makunu a hosi leyi yi to mu rangela hi leyi!+ Kanilezvi mina ndzi khosahele niku ndzi na ni wuvhu; a vana va mina va kwalaha na n’wina.+ Mina ndzi mu rangele kusukela wusweni ga mina kala nyamutlha.+ 3 Hi mina loyi. Ndzi kustumunyeleni mu ndzi vhukela mahlweni ka Jehovha ni mahlweni ka a totilweko wakwe:+ Himani ndzi nga mu tekela a homu kutani mbongola ke?+ Himani ndzi nga mu kanganyisa kutani ku mu xanisa? Kona himani ndzi nga vhumela ku a ndzi xavelela kasi a nga kumi nandzu?+ Loku a hi kona, ndzi ta mu tlhelisela zvakwe.”+ 4 Vona vaku ngalo: “A wu hi kanganyisangi kutani ku hi xanisa, ne a wu vhumelangi ku amukela nchumu canjeni ga munhu.” 5 Samuweli aku kabye: “Jehovha i kustumunyu wa ku mu vhukela; ni a totilweko wakwe i kustumunyu nyamutlha wa lezvaku a mu kumangi nchumu wa ku ndzi kona hi wona.”* Vona vaku: “Ina, i kustumunyu.”

6 Hikwalaho, Samuweli i no byela vanhu, aku: “Jehovha, loyi a tirisileko Mosi na Aroni, loyi a humesileko a vakokwani va n’wina tikweni ga Gibhite,+ i kustumunyu. 7 Makunu tanani mu ta yima laha kasi ndzi mu lamula mahlweni ka Jehovha hi kota ya zvilo zvontlhe zvo lulama lezvi Jehovha a nga mahela n’wina ni vakokwani va n’wina.

8 “Zvalezvi Jakobe a nga chikela tikweni ga Gibhite+ ni laha a vakokwani va n’wina va nga sangula ku rila mahlweni ka Jehovha va kombela ku vhuniwa,+ Jehovha i no rumela Mosi+ na Aroni va rangela a vakokwani va n’wina va huma Gibhite kasi va ta hanya ka wutshamu legi.+ 9 Kanilezvi laha va nga rivala Jehovha, a Nungungulu wabye, i no va nyikela*+ canjeni ga Sisera,+ a murangeli wa butho ga Hazori, ni canjeni ga vaFilistiya,+ ni canjeni ga hosi ya Mowabhi,+ lava va ngalwa navo. 10 Va no rila ka Jehovha va kombela ku vhuniwa,+ vaku: ‘Hi wonhile,+ hakuva hi tsikile Jehovha hi ya khozela vaBhaali+ ni zvifananiso zva Axtarte;+ makunu hi tlhatlhise canjeni ga valala va hina kasi hi fela ku ku tirela.’ 11 Andzhako ka lezvo, Jehovha i no rumela Jerubhaali,+ na Bhedhani, na Jefta,+ na Samuweli,+ a mu tlhatlhisa canjeni ga valala va n’wina vontlhe kasi mu hanya kuruleni.+ 12 Laha mu nga wona Nahaxi,+ a hosi ya vaAmoni, na ata a talwa na n’wina, mu no simama muku ngalo ka mina: ‘A ku na mhaka! Hina ho lava hosi ya ku hi fumela’,+ hambu lezvi Jehovha, a Nungungulu wa n’wina, a nga Hosi ya n’wina.+ 13 Hi leyi a hosi leyi mu nga yi hlawula, leyi mu yi kombeleko. Jehovha i mu yimisele hosi.+ 14 Loku mu chava Jehovha,+ mu mu tirela,+ mu ingisa gezu gakwe,+ mu tlhela mu nga tsiki a nayo wa Jehovha, ni loku n’wina ni hosi leyi yi mu fumelako mu landzela Jehovha, a Nungungulu wa n’wina, zvi sasekile. 15 Kanilezvi loku mu nga ingisi a gezu ga Jehovha, mu tlhela mu tsika a nayo wa Jehovha, a canja ga Jehovha gi ta mu vhukela, n’wina ni vapapayi va n’wina.+ 16 Makunu tanani mu ta yima laha, mu wona cihlamaliso ca hombe leci Jehovha a to ci maha mahlweni ka n’wina. 17 Kasi nyamutlha a hi siku ga ku tshovela trigo ke? Ndzi ta kombela Jehovha lezvaku a dzindzisa tilo kuna vhula; mu ta zvi wona mu tlhela mu zvi tiva lezvaku mu mahile kubiha ka hombe mahlweni ka Jehovha hi ku kombela hosi.”+

18 Samuweli i no kombela ka Jehovha, Jehovha a dzindzisa tilo kuna vhula ka siku lego. Hikwalaho, a vanhu vontlhe va no mu chava nguvhu Jehovha na Samuweli. 19 A vanhu vontlhe va no byela Samuweli, vaku: “Kombelela a malandza ya wena ka Jehovha, a Nungungulu wa wena,+ kasi hi ngafi hakuva hi tlhatekele a kubiha kun’wani hehla ka zvontlhe a zviwonho zva hina hi ku kombela hosi.”

20 Hikwalaho, Samuweli i no byela vanhu, aku: “Mu nga chavi. Hakunene mu mahile a kubiha kontlhe loku, ntsena lezvaku mu nga tsiki ku landzela Jehovha+ ni ku tirela Jehovha hi timbilu ta n’wina tontlhe.+ 21 Mu nga hambuki mu landzela zvilo zvi nga vhuniko nchumu,*+ zvi nga hiko na bhindzu,+ lezvi zvi nga ponisiko, hakuva a zvi vhuni nchumu.* 22 Jehovha a nga ta tsika a vanhu vakwe+ hi kota ya vito gakwe ga hombe,+ hakuva Jehovha i mu hlawulile lezvaku muva vanhu vakwe.+ 23 Kanilezvi mina ndzi nga ta wonhela Jehovha hi ku tsika ku mu khongelela; ndzi ta simama ku mu gondzisa ndlela ya yinene ni ya kululama. 24 Ntsena lezvaku chavani Jehovha,+ mu mu tirela hi kutsumbeka* hi timbilu ta n’wina tontlhe, hakuva i mu mahele a zvilo zva hombe.+ 25 Kanilezvi loku mu nonohisa timbilu ta n’wina mu maha zvakubiha mu ta lovisiwa,+ n’wina ni hosi ya n’wina.”+

13 Sawule i wa hi ni . . .* wa malembe a cikhati leci a nga maha hosi,+ niku i no fuma vaIzrayeli a malembe mambiri. 2 Sawule i no hlawula a 3000 wa vavanuna va ka Izrayeli; a 2000 va no tshama na Sawule le Mikmaxe ni le tikweni ga zvitsunga ga Bheteli, a 1000 va tshama na Jonatani+ le Gibheya+ wa Bhenjamini, lava van’wani a va tlhelisa, a mun’we ni mun’wani aya tendeni gakwe. 3 Jonatani i no daya a ntlawa wa masochwa ya vaFilistiya+ lawa ma nga hi le Gebha,+ niku a vaFilistiya va no zvi tiva. Makunu Sawule i no laya lezvaku ku biwa linanga*+ tikweni gontlhe, vaku: “N’wina vaHebheru ingiselani!” 4 Vontlhe a vaIzrayeli va nozwa a mahungu lawa yaku: “Sawule i dele a ntlawa wa masochwa ya vaFilistiya niku zvezvi a vaIzrayeli va vengiwa nguvhu hi vaFilistiya.” Hikwalaho, a vanhu va no vitanisiwa va ta landzela Sawule le Gilgali.+

5 A vaFilistiya vonawu va no hlengeletana kasi valwa ni vaIzrayeli, na va hi ni 30 000 wa tikareta ta yimpi, ni 6000 wa vakhileli va mahaxi, ni masochwa ma nga talisile ku khwatsi tindzhoho ta misava yi nga mbhirini ya bimbi.+ Va no kandziha va ya gova Mikmaxe, hi tlhelo ga mutsuwuka-gambo wa Bhet-Avhene.+ 6 Laha a vaIzrayeli va nga wona lezvaku va kukaratekeni hi kota ya lezvi va nga hi mhangweni ya hombe, va no fihlala lomu ka timhako,+ ni lomu ka mihocho, ni lomu ka maribye, ni lomu ka matshamu ya lomu hasi, ni lomu ka mathangi. 7 A vaHebheru vo kari va zile va tsemakanya Jordhani vaya tikweni ga Gadhi ni Gileyadhe.+ Kanilezvi Sawule i no simama le Gilgali; a vanhu vontlhe va nga kari va mu landzela va wa rurumela hi kuchava. 8 I no rindzela a 7 wa masiku kala ku mbhela a cikhati leci Samuweli a nga ci yimisile, kanilezvi Samuweli a nga tangi le Gilgali, niku a vanhu lava va nga hi na Sawule va no sangula ku hangalaka. 9 Hi kugumesa, Sawule aku: “Ndzi nyikeni muphahlo wa kuhiswa ni miphahlo ya kuhlengela.” I no nyikela muphahlo wa kuhiswa.+

10 Kanilezvi zvalezvi Sawule a nga mbheta ku nyikela muphahlo wa kuhiswa, Samuweli i no chikela. Hikwalaho, Sawule i no huma a mu khinga, a ya mu losa.* 11 Samuweli aku: “Zvini u nga maha?” Sawule aku: “Ndzi no wona ku a vanhu va hangalaka va ndzi tsika,+ niku wena a wu chikeli hi cikhati ci yimisilweko, ni lezvaku a vaFilistiya va hlengeletene+ le Mikmaxe. 12 Hikwalaho, ndzi no ti byela lezvi: ‘A vaFilistiya va ta relela va talwa na mina lomu Gilgali kuveni a ndzi se kombela makatekwa ya Jehovha.’ Hikwalaho, ndzi no wona ku i chukwana ndzi nyikela a muphahlo wa kuhiswa.”

13 Samuweli i no hlamula Sawule, aku: “U mahile zvilo zva wupumbu. A wu ingisangi a cileletelo leci Jehovha, a Nungungulu wa wena, a nga ku nyika.+ Loku u wa ingisile, Jehovha na a tiyisile a mufumo wa wena hehla ka Izrayeli kala kupindzuka. 14 Makunu a mufumo wa wena wu nga ta pindzuka.+ Jehovha i ta kuma munhu a tsakisako mbilu yakwe.+ Hi yena loyi Jehovha a to mu maha murangeli wa vanhu vakwe,+ hakuva wena a wu ingisangi lezvi Jehovha a ku layileko.”+

15 Makunu Samuweli i no suka hi le Gilgali a kwela aya Gibheya wa Bhenjamini. Sawule i no hlaya vanhu lava a nga sele navo a kuma cipimo ca 600 wa vavanuna.+ 16 Sawule, ni n’wana wakwe Jonatani, ni vanhu vontlhe lava va nga sele navo va wa tshama le Gebha+ wa Bhenjamini, kanilezvi a vaFilistiya va wa govile le Mikmaxe.+ 17 Ku wa huma vaphangi hi lomu wugovelweni ga vaFilistiya na va hi mitlawa yinharu. A wun’we wu wa famba hi ruwa gi yako Ofra, wuya tikweni ga Xuwale; 18 a wun’wani wu wa famba hi ruwa gi yako Bhet-Horoni;+ a wa wunharu wu wa famba hi ruwa gi yako mbhinganweni wa tiko gi cuwukeneko ni nkova wa Zebhoyime, hi tlhelo ga ciwula.

19 Lomu tikweni gontlhe ga Izrayeli ku wa nga hi na munhu wa ku betha tisimbi, hakuva a vaFilistiya va waku: “Hi nga tsikeni a vaHebheru va maha zvipadha ni matlhari.” 20 Hikwalaho, vontlhe a vaIzrayeli va wa relela vaya ka vaFilistiya va ya lotisa kona a zvikomu* zvabye, ni zvihloka, ni machapo, ni masikela.* 21 A ntsengo wa ku lotisa zvikomu,* ni zvihloka, ni mafoxola ya matino manharu, ni machapo, ni wa ku lungisa mbhanya wu wa hi pim.* 22 Ka siku ga kulwa, i hava a nga hi ni cipadha kutani tlhari cikari ka vanhu lava va nga hi na Sawule na Jonatani;+ hi Sawule ni n’wana wakwe Jonatani basi va nga hi ni matlhari.

23 A ntlawa wo kari wa masochwa ya vaFilistiya wu wa humile wuya ndzhelelweni wa Mikmaxe.+

14 Ka siku go kari, Jonatani,+ a n’wana wa Sawule, i no byela a nandza legi gi nga khoma a matlhari yakwe, aku: “A hi tsemakanye hiya ka ntlawa wa vaFilistiya wu nga ka tlhelo legiyani.” Kanilezvi a nga mu byelangi nchumu a papayi wakwe. 2 Sawule i wa tshamile mbhinganweni wa Gibheya+ lahasi ka romazeira le Migrone, na a hi ni cipimo ca 600 wa vavanuna.+ 3 (Ahija, a n’wana wa Ahitubha,+ a makabye wa Ikabhodhe,+ a n’wana wa Finiyasi,+ a n’wana wa Eli,+ a mupristi wa Jehovha le Xilo,+ hi yena a nga khomile efodhe.)+ A vanhu va wa nga zvi tivi lezvaku Jonatani i sukile. 4 Cikari ka tindlela leti Jonatani a nga zama ku tsemakanya hi tona kasi a chikela lomu a vaFilistiya va nga hi kona ku wa hi ni ribye go tshamisa ku khwatsi i tino ka tlhelo gin’we, ni ribye go tshamisa ku khwatsi i tino ka tlhelo legi gin’wani; a ribye gin’we gi wa vitaniwa ku Bhozeza, legi gin’wani gi vitaniwa ku Sene. 5 A ribye gin’we gi wa tshamisile ku khwatsi i pilari hi tlhelo ga n’walungu* gi cuwukana ni Mikmaxe. A ribye legi gin’wani gi wa hi tlhelweni ga le dzongeni* na gi cuwukene ni Gebha.+

6 Hikwalaho, Jonatani i no byela a muweleli wa matlhari yakwe, aku: “A hi tsemakanye hiya ka tlhelo legiya ka vavanuna lava vo kala ku mahiwa wukwera.*+ Kuzvilava Jehovha i ta hi lwela, hakuva ci hava ci nga tsandzekisako Jehovha a ku ponisa: Kani hi vanhu vo tala kutani hi vanhu va tsongwani.”+ 7 A muweleli wa matlhari yakwe aku kakwe: “Maha ni cihi leci a mbilu ya wena yi ku rumako. Famba ni kwihi u ku lavako, mina ndzi ta ku landzela ni kwihi lomu a mbilu ya wena yi ku rumako kona.” 8 Jonatani aku: “Hi ta tsemakanya hiya ka vavanuna lava hi ya ti kombekisa ka vona. 9 Loku vaku: ‘Nyimani kwalaho mu nga kona kala hi mu tela!’, hi ta nyima kwalaho, hi nga ta va yela. 10 Kanilezvi loku vaku: ‘Tanani mu talwa na hina!’, hi ta va yela, hakuva Jehovha i ta va nyikela canjeni ga hina. Leco ci tava cona cikombiso ka hina.”+

11 Makunu hi wumbiri gabye va no ti kombekisa ka masochwa ya vaFilistiya. A vaFilistiya vaku: “Hi nga wonani a vaHebheru va humako hi lomu mikeleni, lomu va nga fihlele kona!”+ 12 A masochwa lawa ya vagadhi ma no byela Jonatani ni muweleli wa matlhari yakwe, maku: “Tanani seno ka hina hi ta mu komba kuhanya!”*+ Jonatani i no tekela ku byela a muweleli wa matlhari yakwe, aku: “Ndzi landzele, hakuva Jehovha i ta va nyikela canjeni ga Izrayeli.”+ 13 Jonatani i no kandziha hi mawoko ni minenge, a muweleli wa matlhari yakwe na a mu landza hi le ndzhako. Jonatani i no hlasela a vaFilistiya, a muweleli wa matlhari yakwe a sala hi le ndzhako a va dayela. 14 Ka khati go sangula va nga dhumela, Jonatani ni muweleli wa matlhari yakwe va no daya cipimo ca 20 wa vavanuna ka cipandze ci ringanako a khihlanya ga simu gi rimiwako hi siku hi cipani ca tihomu.

15 A vanhu vontlhe va nga hi lomu wugovelweni, ni vanhu vontlhe va nga gadha, hambu ni mitlawa ya vaphangi+ va no rurumela hi kuchava. A misava yi no sangula ku tsekatseka, Nungungulu a va rurumelisa hi kuchava. 16 A varindzeli va Sawule le Gibheya+ wa Bhenjamini va no wona a pfilupfilu na yi hangalaka matlhelweni wontlhe.+

17 Sawule i no byela lava a nga hi navo, aku: “Hlayani vanhu, mu wona ku hi mani a kiyelako.” Loku va va hlayile, va no kuma lezvaku ku kiyela Jonatani ni muweleli wa matlhari yakwe. 18 Makunu Sawule i no byela Ahija,+ aku: “Neha Arke* ga Nungungulu wa lisine laha!” (Hakuva ka cikhati leco* a Arke ga Nungungulu gi wa tshama ni vaIzrayeli.) 19 Laha Sawule a nga ha wulawula ni mupristi, a pfilupfilu yi noya yi tshinga nguvhu lomu wugovelweni ga vaFilistiya. Sawule a byela mupristi, aku: “Tsika lezvi u mahako.”* 20 Hikwalaho, Sawule ni vontlhe vanhu lava a nga hi navo va no hlengeletana vaya yimpini, va ya kuma ku a vaFilistiya va jikelene hi ca ka vona va dayana hi zvipadha zvabye, ni lezvaku a pfilupfilu yi wa hi ya hombe nguvhu. 21 Ahandle ka lezvo, a vaHebheru lava a kale va nga hi tlhelweni ga vaFilistiya, lava va nga tile navo lomu wugovelweni, va no huma va ya ti patsa ni vaIzrayeli lava va nga hi na Sawule na Jonatani. 22 A vavanuna vontlhe va ka Izrayeli lava va nga fihlele+ le tikweni ga zvitsunga ga Efrayime va nozwa lezvaku a vaFilistiya va tsutsumile; vonawu va noya va ya ti patsa ni vaIzrayeli yimpini va va hlongolisela. 23 Hikwalaho, Jehovha i no ponisa a vaIzrayeli ka siku lego,+ niku a yimpi yi no famba kala le Bhet-Avhene.+

24 Kanilezvi a vavanuna va ka Izrayeli va wa karele nguvhu ka siku lego, hakuva Sawule i wa hlambanyisile vanhu, aku: “I rukatelwe a munhu loyi a toga zvakuga* na gi nga se pela, na ndzi nga se ti photela ka valala va mina!” Hikwalaho, i hava a ngaga nchumu.+

25 A vanhu vontlhe* va no nghena lomu khwatini; ka khwati lego ku wa hi ni wulombe lahasi. 26 A cikhati leci va nga nghena lomu khwatini, va no wona wulombe na gi khulunga, kanilezvi i hava a ngaga, hakuva va wa chava cihlambanyo. 27 Kanilezvi Jonatani i wa nga mu zwangi a papayi wakwe na a hlambanyisa vanhu.+ Hikwalaho, i no nawuluta a nhonga leyi yi nga hi canjeni gakwe a khumba a cihahla ca wulombe hi le magumo ka nhonga. A cikhati leci a nga tlhelisa a canja gakwe non’wini wakwe, a matihlo yakwe ma no vhululeka.* 28 Makunu a mun’we wabye aku ngalo: “A papayi wa wena i va mahisile cihlambanyo co karata a vanhu, aku: ‘I rukatelwe a munhu loyi a toga zvakuga nyamutlha!’+ Hi caleco ci mahako vanhu va karala nguvhu.” 29 Kanilezvi Jonatani i te: “A papayi wa mina i nehile khombo ga hombe lomu tikweni. Hi nga wonani lezvi a matihlo ya mina ma nga vhululekisa zvona* hi kota ya wulombe legi ga gi tsongwani ndzi ngaga. 30 Na zvi te yini nyamutlha loku a vanhu va wa noga na va tlhatlhekile+ lezvi va zvi phangileko ka valala vabye? Loku va wa no maha lezvo, na ku delwe a vaFilistiya vo hundza lava.”

31 Ka siku lego, va no simama ku hlasela a vaFilistiya kusukela Mikmaxe kala Ayijaloni,+ a vanhu va se karala nguvhu. 32 Hikwalaho, a vanhu va no sangula ku tsutsumela a muphango hi makangwa va ya teka tiyivhu, ni tihomu, ni marole va zvi daya lahasi, vaga nyama na yi hi ni nkhata.+ 33 Hikwalaho, a vanhu va no byela Sawule, vaku: “A vanhu va wonhela Jehovha hi kuga nyama na yi hi ni nkhata.”+ Sawule aku: “A mu tsumbekangi. Hatlisani mu wumbuluta a ribye ga hombe gita laha.” 34 A tlhela aku: “Hangalakani cikari ka vanhu, muku: ‘A mun’we ni mun’wani wa n’wina i wate ni homu yakwe ni yivhu yakwe a ta zvi daya laha, aga. Mu nga wonheli Jehovha hi kuga nyama na yi hi ni nkhata.’”+ Hikwalaho, a mun’we ni mun’wani wabye i nota ni homu yakwe ka wusiku galego a ta yi daya laho. 35 Sawule i no mu akela alati Jehovha.+ Lego give gona a alati go sangula legi a nga akela Jehovha.

36 Andzhako ka lezvo, Sawule i te ngalo: “A hi releleni ni wusiku hi landza a vaFilistiya hi ya va phanga kala gica. Hi nga ta siya ne mun’we.” A vanhu vaku: “Maha ni cihi u ci wonako na ci hi cinene mahlweni ka wena.” A mupristi aku: “A hi tshineleni ka Nungungulu wa lisine ka wutshamu legi.”+ 37 Sawule i no wutisa Nungungulu, aku: “Ndzi relela ndzi landza vaFilistiya ke?+ U ta va nyikela canjeni ga vaIzrayeli ke?” Kanilezvi Nungungulu a nga mu hlamulangi ka siku lego. 38 Hikwalaho, Sawule i te ngalo: “N’wina tihosana tontlhe ta vanhu, tanani seno hi ta tiva ku ciwonho muni ci nga mahiwa nyamutlha. 39 Hakuva a ku khwatsi hi lezvi Jehovha a hanyako, loyi a tlhatlhisileko Izrayeli, hambu loku kova n’wana wa mina, Jonatani, i ta dawa.” Kanilezvi i hava a nga mu hlamula. 40 I no gumesa a byela a vaIzrayeli vontlhe, aku: “N’wina mu ta yima hi tlhelo gin’we; mina ni n’wana wa mina, Jonatani, hi ta yima hi tlhelo legi gin’wani.” A vanhu vaku ngalo ka Sawule: “Maha ni cihi u ci wonako na ci hi cinene mahlweni ka wena.”

41 Hi kulandzela, Sawule i no byela Jehovha, aku: “O, Nungungulu wa Izrayeli, hlamula hi Tumima!”+ Ku se khon’wa Jonatani na Sawule, a vanhu lava van’wani va tlhatlhiwa. 42 Sawule aku ngalo: “Banani tihlolo+ kasi mu tiva loyi a nga ni nandzu laha ka mina ni n’wana wa mina Jonatani.” A hlolo yi no khoma Jonatani. 43 Sawule i no byela Jonatani, aku: “Hi nga ndzi byela, kasi zvini u nga maha?” Jonatani a hlamula, aku: “Ndzi no lazva wulombe legi gi nga hi magumo ka nhonga leyi yi nga hi canjeni ga mina.+ Hi mina loyi! A ndzi dawe!”

44 Sawule aku: “Nungungulu i wa ndzi tsayise a tlhela a engeta loku u nga dawi wena Jonatani.”+ 45 Kanilezvi a vanhu va no byela Sawule, vaku: “Jonatani, loyi a nga tisa kuhlula* loku ka hombe+ lomu Izrayeli, i fanele ku dawa ke? Zvi nga ta maheka lezvo! A ku khwatsi hi lezvi Jehovha a hanyako, ne a sisi wun’we wa hloko yakwe wu nga tawa lahasi, hakuva i tirile na Nungungulu nyamutlha.”+ Hikwalaho, a vanhu va no tlhatlhisa Jonatani a nga dawi.

46 Hikwalaho, Sawule i no tsika ku hlongolisela vaFilistiya; a vaFilistiya va no tlhela tikweni gabye.

47 Sawule i no tiyisa wuhosi gakwe lomu Izrayeli, alwa ni valala vakwe vontlhe va nga hi matlhelweni wontlhe. I nolwa ni vaMowabhi,+ ni vaAmoni,+ ni vaEdhomi,+ ni tihosi ta le Zobha,+ ni vaFilistiya;+ kontlhe lomu a ngaya i wo hlula. 48 I nolwa hi ntamu a hlula a vaAmaleki,+ a tlhatlhisa vaIzrayeli canjeni ga vaphangi vabye.

49 A vafana va Sawule kuve Jonatani, na Ixvhi na Malkixuwa.+ I wa hi ni vanhanyana vambiri kambe: a vito ga loyi wa nhondzo ku wa hi Merabhe,+ loyi wa ndzisana ku wa hi Mikali.+ 50 A vito ga sati wa Sawule ku wa hi Ahinowame, a n’wana wa Ahimaza. A vito ga murangeli wa butho gakwe ku wa hi Abneri,+ a n’wana wa Neri, a tio wa Sawule. 51 Kixi+ i wa hi papayi wa Sawule; Neri,+ a papayi wa Abneri, i wa hi n’wana wa Abhiyeli.

52 Ku wa lwiwa tiyimpi to tshisa nguvhu ni vaFilistiya masikwini wontlhe ya Sawule.+ Loku Sawule a wona munhu wa ntamu kutani wo tiya hlanha, i wo mu khoma a mu nghenisa ka butho gakwe.+

15 Samuweli i no byela Sawule, aku: “Jehovha i ndzi rumile ku ndzi ta ku tota kasi uva hosi ya ka Izrayeli.+ Makunu zwana lezvi Jehovha a lavako ku wula.+ 2 Jehovha wa mabutho i ngalo: ‘Ndzi ta tsayisa a vaAmaleki hi lezvi va maheleko vaIzrayeli a cikhati leci va nga va vhukela laha ndleleni na vata hi Gibhite.+ 3 Makunu famba u ya hlasela a vaAmaleki+ u va lovisa+ ni zvontlhe va nga nazvo. U nga va tsetsi;* u fanele ku va daya,+ a vavanuna ni vavasati, a vanana ni tinyamani,* a tihomu ni tiyivhu, ni makameli ni timbongola.’”+ 4 Sawule i no vitanisa vanhu, a va hlaya le Telayime, a kuma 200 000 wa masochwa ma nga famba hi minenge ni 10 000 wa vavanuna va ka Judha.+

5 Sawule i no famba kala dhoropeni ga vaAmaleki a ya fihlala lomu nkoveni a lavelela. 6 Hi kulandzela, Sawule i no byela vaKeni,+ aku: “Sukani, mu huma cikari ka vaAmaleki, kasi mu nga lovisiwi navo.+ Hakuva mu va kombisile lirandzo li nga mbheliko a vanhu vontlhe va ka Izrayeli,+ a cikhati leci va nga huma hi Gibhite.” Hikwalaho, a vaKeni va no suka cikari ka vaAmaleki. 7 Andzhako ka lezvo, Sawule i no hlasela a vaAmaleki+ kusukela le Havhila+ kala Xure,+ ku gamekeneko ni Gibhite. 8 I no khoma Agagi,+ a hosi ya vaAmaleki, na a ha hanya, kanilezvi a vanhu vontlhe lava van’wani i no va lovisa hi cipadha.+ 9 Kanilezvi Sawule ni vanhu vakwe va no tsetsa* Agagi, ni tiyivhu ni tihomu ta tinene ta ku nona, ni tiyivhana, ni zvontlhe zvilo zva zvinene;+ a va lavangi ku zvi lovisa. Kanilezvi zvontlhe lezvi zvo kala ku vhuna nchumu ni lezvi zvo nyenyiwa hi zvona va nga zvi lovisa.

10 A mhaka ya Jehovha yi nota ka Samuweli, yi taku: 11 “Ndza ti laya hi lezvi ndzi nga mu maha hosi Sawule, hakuva i tsikile ku ndzi landzela; a nga mahangi lezvi ndzi nga wula.”+ Samuweli i no bayiseka nguvhu, a rila ka Jehovha a wusiku gontlhe.+ 12 Samuweli i no vindzuka ni mixo a khinga Sawule, kanilezvi i no byeliwa ku: “Sawule i yile Karmeli,+ niku kwaseyo i ti akele cialakanyiso.+ Hi kulandzela, i no jika a relela aya Gilgali.” 13 Laha Samuweli a nga gumesa a kumana naye, Sawule i no mu byela lezvi: “Jehovha i wa ku katekise. Ndzi mahile lezvi Jehovha a nga wula.” 14 Kanilezvi Samuweli i te ngalo: “Makunu a guwa lego ndzi gi zwako ga tiyivhu ni tihomu ga yini?”+ 15 Sawule aku: “Ti tekilwe ka vaAmaleki hakuva a vanhu va tsetsile* a tiyivhu ni tihomu ta tinene kasi va maha hi tona muphahlo ka Jehovha, a Nungungulu wa wena, kanilezvi lezvi zvi nga sala hi zvi lovisile.” 16 Samuweli aku ka Sawule: “Nyima ndzi ku byela lezvi Jehovha a nga ndzi byela matolo.+ Sawule aku: “Wula!”

17 Samuweli i no engeta, aku: “Kasi wena u wa nga hi loyi wa mutsongwani kuwoneni ka wena n’winyi+ a cikhati leci u nga mahiwa hloko ya tixaka ta ka Izrayeli, ni laha Jehovha a nga ku tota lezvaku uva hosi ya Izrayeli ke?+ 18 Hi ndzhako ka cikhati, Jehovha i no ku ruma, aku: ‘Famba ka vawonhi lavaya va vaAmaleki u ya va lovisa.+ Lwana navo kala u va lovisa va ku bhi.’+ 19 Makunu hikuyini u nga kala ku ingisa a gezu ga Jehovha? Kanilezvi u no tsutsumela muphango hi makangwa,+ u maha lezvi zvi bihileko mahlweni ka Jehovha!”

20 Hambulezvo Sawule i no byela Samuweli, aku: “Kanilezvi mina ndzi ingisile a gezu ga Jehovha! Ndzi yile ntirweni lowu Jehovha a ndzi rumileko, ndzi wuya na Agagi, a hosi ya Amaleki, ndzi tlhela ndzi lovisa a vaAmaleki.+ 21 Kanilezvi a vanhu va no teka a tiyivhu ni tihomu ta muphango, leti ta tinene ta kona ka lezvi zvi nga fanele ku loviswa, kasi va maha hi tona muphahlo ka Jehovha, a Nungungulu wa wena le Gilgali.”+

22 Samuweli aku: “Xana Jehovha i tsakisiwa nguvhu hi minyikelo ya kuhiswa ni miphahlo+ a ku hundza a ku ingisa a gezu ga Jehovha ke? A ku ingisa zvi nene nguvhu a ku hundza a muphahlo,+ ni ku demba ndleve zva hundza a mafura+ ya tiyivhu; 23 hakuva a kuhluwuka+ ku fanana ni ciwonho ca kuvhumba,+ ni matshandza ma fana ni ku tirisa ntamu wa masalamuso ni kukhozela zvifananiso.* Kota lezvi u nga tsika ku ingisa a mhaka ya Jehovha,+ yenawu i ku tsikile, u nga ta hava hosi.”+

24 Sawule i no byela Samuweli, aku: “Ndzi wonhile, hakuva ndzi hambunyetile a nayo wa Jehovha ni magezu ya wena hi ku chava vanhu, ndzi ingisa lezvi va nga wula. 25 Makunu ndza ku kombela, tsetselela ciwonho ca mina, u tlhela na mina kasi ndzi ya khizama mahlweni ka Jehovha.”+ 26 Kanilezvi Samuweli i no byela Sawule, aku: “Ndzi nga ta tlhela na wena, hakuva u tsikile a mhaka ya Jehovha; Jehovha yenawu i ku tsikile; u nga ta ha simama kuva hosi ya Izrayeli.”+ 27 Laha Samuweli a nga hundzuluka kasi a famba, Sawule i no khoma Samuweli hi le magumo ka bhaji gakwe go kala mawoko, gi se handzuka. 28 Samuweli aku ka Sawule: “Nyamutlha Jehovha i ku tekele a wuhosi ga wena ka Izrayeli, i ta gi nyikela ka mun’wani munhu wa munene a ku hundza wena.+ 29 Loyi a Dhumileko wa ka Izrayeli+ a nga hembi+ kutani ku cica maalakanyo yakwe,* hakuva a nga fani ni munhu a cicako a maalakanyo.”*+

30 Sawule aku: “Ndzi wonhile. Kanilezvi ndzi dzundze mahlweni ka madhota ya tiko ga mina ni mahlweni ka Izrayeli. Tlhela na mina kasi ndzi ya khizama mahlweni ka Jehovha, a Nungungulu wa wena.”+ 31 Hikwalaho, Samuweli i no tlhela na Sawule, Sawule a ya khizama mahlweni ka Jehovha. 32 Samuweli aku: “Ndzi neheleni Agagi, a hosi ya vaAmaleki.” Agagi i noya kakwe na a sima* hakuva Agagi i wa ti byela ku: ‘Hakunene ndzi nga ta ha dawa.’ 33 Kanilezvi Samuweli aku: “A ku khwatsi hi lezvi a cipadha ca wena ci nga siya a vavasati vo tala na va nga hi na vana, a mamani wa wena yenawu i ta sala na a nga hi na n’wana.” Makunu Samuweli i no tsemelela Agagi hi zvipandze mahlweni ka Jehovha le Gilgali.+

34 Samuweli i noya le Rama; Sawule a kwela aya kaya kakwe le Gibheya wa Sawule. 35 Samuweli i noza afa na a nga mu wonangi kambe Sawule, hakuva Samuweli i no rila hi kota ya Sawule.+ Jehovha i no ti laya hi lezvi a nga yimisile Sawule lezvaku ava hosi ya Izrayeli.+

16 Hi kugumesa, Jehovha i no byela Samuweli, aku: “Kala rini na wa ha rila hi kota ya Sawule,+ lezvi ndzi mu alileko lezvaku a fuma kota hosi ya Izrayeli?+ Tata linanga la wena hi mafura+ u famba. Ndzi ta ku rumela ka Jese,+ a muBhetlehema, hakuva ndzi ti hlawulele a hosi cikari ka vafana vakwe.”+ 2 Kanilezvi Samuweli i te ngalo: “Ndzi ta fambisa kuyini? Laha Sawule a to zvizwa, i ta ndzi daya.”+ Jehovha i no hlamula, aku: “Teka cihon’wana ca kati u famba naco, u yaku: ‘Ndzita ndzi ta maha muphahlo ka Jehovha.’ 3 Ramba Jese ka muphahlo lowo; ndzi ta gumesa ndzi ku byela lezvi u faneleko ku maha. U ta ndzi totela loyi ndzi to ku komba.”+

4 Samuweli i no maha lezvi Jehovha a nga wula. A cikhati leci a nga chikela le Bhetlehema,+ a madhota ya dhoropa ma no mu khinga na ma rurumela, ma mu wutisa, maku: “Uta hi kurula ke?” 5 A hlamula aku: “Ina, ndzita hi kurula. Ndzita ndzi ta maha muphahlo ka Jehovha. Ti basiseni, hi famba zvin’we muphahlweni.” I no basisa Jese ni vana vakwe, a gumesa a va vitanisa vata muphahlweni. 6 Laha va nga chikela, a wona Eliyabhe,+ i te: “Hakunene loyi hi yena a totilweko wa Jehovha.” 7 Kanilezvi Jehovha i no byela Samuweli, aku: “U nga cuwuki a nghohe yakwe ni kuleha kakwe,+ hakuva mina a ndzi mu lavi. Hakuva lezvi a vanhu va zvi cuwukako a hi zvona lezvi Nungungulu a zvi cuwukako; a vanhu va cuwuka lezvi va zvi wonako hi matihlo, kanilezvi Jehovha i cuwuka mbilu.”+ 8 Makunu Jese i no vitana Abhinadhabha+ ata ka Samuweli, kanilezvi Samuweli i te: “Loyi yenawu, Jehovha a nga mu hlawulangi.” 9 Hi kulandzela, Jese i no neha Xama,+ kanilezvi Samuweli i te: “Loyi yenawu, Jehovha a nga mu hlawulangi.” 10 Hikwalaho, Jese i no neha vafana vakwe va 7 ka Samuweli, kanilezvi Samuweli i no byela Jese, aku: “Jehovha a nga hlawulangi ne mun’we wabye.”

11 Hi kugumesa, Samuweli i no wutisa Jese, aku: “Hi vona vontlhe a vafana va wena lava ke?” Jese aku: “Ka ha sele a ndzisana ya kona;+ i lomu ka ku risa tiyivhu.”+ Samuweli aku ka Jese: “Ruma munhu a ya mu vitana, hakuva hi nga ta tshama higa na a nga se chikela.” 12 Hikwalaho, Jese i no ruma munhu a ya mu vitana, a wuya naye. A mufanyana loye i wa hi wo pswhuka, na a hi ni matihlo yo saseka, lezvo na a sasekile.+ Jehovha aku: “Suka u mu tota, hakuva hi yaloyi ndzi nga mu hlawula!”+ 13 Hikwalaho, Samuweli i no teka a linanga la mafura+ a mu tota mahlweni ka vamakabye vakwe. A moya wa Jehovha wu no sangula ku mu nyika ntamu Dhavhidha, kusukela ka siku lego zviya mahlweni.+ Andzhako ka lezvo, Samuweli i no suka a tlhela le Rama.+

14 A moya wa Jehovha wu no suka ka Sawule,+ niku a moya wo biha wu ngata hi ka Jehovha wu no mu xanisa.+ 15 A malandza ya Sawule ma no mu byela, maku: “Wa zvi wona ku wa xanisiwa hi moya wo biha wu tako hi ka Nungungulu ke? 16 Wena hosi, ruma malandza ya wena lawa ma nga laha, ma famba ma lava munhu a zvi kotako kuba khwatsi citende.+ Laha a moya wo biha wu tako hi ka Nungungulu wu tota hehla ka wena, i taba citende kasi u rula.” 17 Makunu Sawule i no byela malandza yakwe, aku: “Ndzi laveleni munhu a zvi kotako kuba khwatsi a citende mu mu tisa laha ka mina.”

18 A gin’we ga malandza yakwe gi te ngalo: “Ndzi wonile a n’wana wa Jese, a muBhetlehema, na aba khwatsi citende, niku wanuna wo tiya hlanha tlhelo musochwa wa nhenha.+ I wulawula khwatsi, i sasekile+ niku Jehovha i zvin’we naye.”+ 19 Hikwalaho, Sawule i no rumela zvirun’wa ka Jese, zvi yaku: “Ndzi rumelele a n’wana wa wena Dhavhidha, loyi a risako ntlhambi.”+ 20 Jese i no teka mbongola a yi rwexa tipawa, ni nghotso ya vhinyo, ni cimbutana a zvi rumela na Dhavhidha, a n’wana wakwe, ka Sawule. 21 Hikwalaho, Dhavhidha i noya ka Sawule a ya sangula ku mu tirela.+ Sawule i no mu randza nguvhu Dhavhidha, a mu maha muweleli wa matlhari yakwe. 22 Sawule i no rumela mahungu ka Jese, aku: “Tsika Dhavhidha a ndzi tirela hakuva i kumile thomo mahlweni ka mina.” 23 Ni ka cihi cikhati a moya wo biha wu ngata hi ka Nungungulu wu nga nghena ka Sawule, Dhavhidha i wo teka citende aba, Sawule a rula a tlhela a tangala, ni moya wo biha wu suka kakwe.+

17 A vaFilistiya+ va no hlengeleta a mabutho yabye kasi valwa yimpi. Va no hlengeletana le Soko+ wa Judha, va gova cikari ka Soko ni Azeka,+ le Efes-Dhamime.+ 2 Sawule ni vavanuna va ka Izrayeli va no hlengeletana va gova le Nkoveni wa Ela,+ va fola kasi valwa ni vaFilistiya. 3 A vaFilistiya va wa hi ka tlhelo gin’we ga citsunga; a vaIzrayeli va wa hi ka tlhelo legi gin’wani ga citsunga, a nkova wu sala laha cikari kabye.

4 Zvonake ku no huma wanuna wa nhenha hi lomu wugovelweni ga vaFilistiya. A vito gakwe i wa hi Goliyate,+ wa le Gati;+ i wa hi ni 6 wa mikono ni palmo gin’we* a kuleha. 5 I wa bohile kapasete ga kobre ni cikatawu ci nga hi ni magwaru ya kobre. A cikatawu leco ca kobre+ ci wa peza 5000 wa maxekeli.* 6 I wa hi ni zvilo zva kobre zva ku vhikela minenge* ni tlhari+ ga kobre laha hlanheni wakwe. 7 A nhonga ya tlhari gakwe yi wa fana ni nhonga ya valuki,+ ni simbi ya tlhari gakwe yi wa peza 600 wa maxekeli;* a muweleli wa citlhangu cakwe i wa rangile phambeni kakwe. 8 Goliyate i no yima a bangulekela a butho ga Izrayeli,+ aku: “Hikuyini mu humileko mu ta fola kasi kulwa yimpi? Kasi mina a ndzi muFilistiya ke? N’wina a mu malandza ya Sawule ke? Hlawulani wanuna cikari ka n’wina a relela ka mina. 9 Loku alwa na mina, a ndzi daya, hi ta maha malandza ya n’wina. Kanilezvi loku mina ndzi mu hlula, ndzi mu daya, hi n’wina mu to maha malandza ya hina, mu hi tirela.” 10 Hi kulandzela, a muFilistiya loye i te ngalo: “Nyamutlha ndza rukatela* a butho ga Izrayeli.+ Ndzi nyikeni wanuna ndzi talwa naye!”

11 Laha Sawule ni vontlhe a vaIzrayeli va ngazwa a magezu ya muFilistiya, va no chava nguvhu, va rurumela.

12 Dhavhidha i wa hi n’wana wa muEfrata+ wa le Bhetlehema+ wa Judha a nga vitaniwa ku hi Jese,+ loyi a nga hi ni 8 wa vafana,+ niku masikwini ya Sawule, Jese i wa sina a khosahele. 13 A vafana vanharu va Jese, lava va tinhondzo, va wa fambile na Sawule yimpini.+ A mavito ya vafana vakwe va vanharu, lava va nga yile yimpini, hi lawa: A matewula ku wa hi Eliyabhe,+ a wa wumbiri ku wa hi Abhinadhabha,+ ni loyi wa wunharu ku wa hi Xama.+ 14 Dhavhidha i wa hi yena ndzisana;+ a tinhondzo takwe ta tinharu ti wa fambile na Sawule.

15 Dhavhidha i wata na a suka ka Sawule a tlhela a ya risa a tiyivhu+ ta papayi wakwe le Bhetlehema. 16 A muFilistiya i wa huma mixo ni gambo a ya yima kusuhani ni vaIzrayeli. I no maha lezvo a 40 wa masiku.

17 Makunu Jese i no byela a n’wana wakwe, Dhavhidha, aku: “Teka efa* leyi ya tindzhoho to katingiwa ni tipawa leti ta 10 u hatlisa u famba nazvo ka vamakabye va wena le wugovelweni. 18 Teka ni tikeijo leti ta 10* u ya nyika murangeli wa lava va 1000, u kamba ni vamakabye va wena, u wuya ni citiyisekiso ca ku va ha vhuka khwatsi.” 19 Vona va wa hi na Sawule ni vontlhe a vavanuna lava van’wani va ka Izrayeli le Nkoveni wa Ela,+ na valwa ni vaFilistiya.+

20 Hikwalaho, Dhavhidha i no vindzuka ni mixo a siyeta tiyivhu ni munhu mun’wani, a gumesa a longela a suka a famba kota lezvi Jese a nga mu leletele. A cikhati leci a nga chikela le wugovelweni, a butho gi wa kari gi huma giya kulweni, na gi maha guwa ga yimpi. 21 A vaIzrayeli ni vaFilistiya va no fola va cuwukana kasi kulwa. 22 Dhavhidha i no tekela ku nyikela zvijumba ka muhlayisi wa zvijumba, a tsutsuma aya laha a butho gi nga folile kona. Laha a nga chikela, i no wutisa kuvhuka ka vamakabye vakwe.+

23 Na a ha wulawula navo, ku no huma wanuna wa nhenha a nga vitaniwa ku hi Goliyate,+ a muFilistiya wa le Gati. I no huma hi lomu ka butho ga vaFilistiya a wula a magezu lawa a nga rangile a wula,+ Dhavhidha a mazwa. 24 A cikhati leci vontlhe a vavanuna va ka Izrayeli va nga mu wona va no tsutsuma hi kuchava.+ 25 A vavanuna va ka Izrayeli va waku: “Ma mu wona wanuna loyi a tako ke? I tela ku ta rukatela a vaIzrayeli.+ Loyi a to mu daya, a hosi yi ta mu nyika a titshomba to tala; yi ta mu nyika ni nhanyana wa yona+ niku a yindlu ya papayi wakwe yi nga ta ha nyikela lezvi a vaIzrayeli va faneleko ku nyikela ka hosi.”

26 Dhavhidha i no sangula ku wutisa a vavanuna lava va nga yimile kusuhani kakwe, aku: “Zvini lezvi a to mahelwa a munhu loyi a to daya a muFilistiya gayani, a susa ciruko lomu Izrayeli? Kasi ova mani a muFilistiya loyi wo kala ku mahiwa wukwera* a ku kala a rukatela a butho ga Nungungulu a hanyako?”+ 27 A vanhu va no mu byela zvalezvi va nga wulile, vaku: “A munhu loyi a to mu daya i ta mahelwa lezvi ni lezvi.” 28 A cikhati leci a nhondzo yakwe, Eliyabhe,+ a nga muzwa na a wulawula ni vavanuna lavo, i no mu zangarela nguvhu Dhavhidha, aku: “U tela yini laha? U ti siyile na mani a tiyivhu letiyani ta ti tsongwani le ciwuleni?+ Ndza ma tiva khwatsi a matshandza ya wena ni kuxuva ko biha ka mbilu ya wena; u tele ku ta wona yimpi basi.” 29 Dhavhidha aku: “Kasi cini ndzi nga wonha? Mina ndzi no wutisa ciwutiso basi!” 30 Hikwalaho, i no mu fularela aya ka mun’wani a ya mu wutisa zvalezvi a nga rangile a wutisa,+ a vanhu va mu hlamula zvalezvi va nga rangile va mu hlamula.+

31 A magezu lawa Dhavhidha a nga wula ma no zwiwa, va se ya byela Sawule. Hikwalaho, Sawule i no mu vitanisa. 32 Dhavhidha i no byela Sawule, aku: “Ku ngavi ni wa ku tsemeka hlanha hi kota yakwe. A nandza ga wena gi ta famba gi yalwa ni muFilistiya loyi.”+ 33 Kanilezvi Sawule i no byela Dhavhidha, aku: “U nga ta zvi kota kulwa ni muFilistiya loyi, hakuva wena wa hi n’wanana,+ kuveni yena mulwi wa tiyimpi* kusukela wun’wananeni gakwe.” 34 Dhavhidha i no byela Sawule, aku: “Laha a nandza ga wena gi nga kari gi risa a ntlhambi wa papayi wa gona, ku nota nghala+ ni urso zvi ta khoma tiyivhu laha ntlhambini. 35 Makunu ndzi no suka ndzi yi hlongolisela ndzi yi vhukela ndzi namuruta a yivhu yi nga hi non’wini wa yona. A cikhati leci yi nga ndzi jikela ndzi no yi khoma hi malevhu* ndzi yi bayisa, ndzi yi daya. 36 A nandza ga wena gi dele a nghala ni urso; makunu yenawu a muFilistiya loyi wo kala ku mahiwa wukwera i ta fana ni cin’we ca zvona hakuva i rukatele a butho ga Nungungulu a hanyako.”+ 37 Dhavhidha a engeta aku: “Jehovha loyi a nga ndzi ponisa ka zvikamba zva nghala ni zva urso hi yaloyi a to ndzi ponisa canjeni ga muFilistiya loyi.”+ Sawule aku ka Dhavhidha: “Famba, Jehovha i wave zvin’we na wena.”

38 Makunu Sawule i no teka a tinguwo takwe a bohisa Dhavhidha. I no mu bohisa a kapasete gakwe ga kobre ni cikatawu cakwe ca simbi. 39 Dhavhidha i no bohelela a cipadha laha ka tinguwo takwe a zama ku famba, kanilezvi a nga zvi kotangi hakuva i wa nga zvi tolovelangi. Dhavhidha aku ka Sawule: “A ndzi zvi koti ku famba ni lezvi hakuva a ndzi zvi tolovelangi.” Hikwalaho, Dhavhidha i no zvi tlhatlha. 40 Makunu Dhavhidha i no teka a nhonga yakwe, a hlawula a ntlhanu wa maribye ya manene cicongwaneni a ma chela lomu phaketini ga pasta yakwe leyi a nga famba nayo lomu kuriseni, a cipelupelu* cakwe+ na ci hi canjeni gakwe, a tshinelela a muFilistiya.

41 A muFilistiya i no engeta ku tshinela ka Dhavhidha; a muweleli wa citlhangu ca Goliyate i wa rangile phambeni kakwe. 42 A cikhati leci a muFilistiya a nga cuwuka a wona Dhavhidha, i no mu chepeta a mu kanyisa hi lezvi a nga hi jaha go pswhuka ni go saseka.+ 43 Makunu a muFilistiya i no byela Dhavhidha, aku: “Ndzova mbyana mina+ a kuza u ndzi tela ni tinhonga ke?” A muFilistiya i no ruka Dhavhidha hi vanungungulu vakwe. 44 A muFilistiya i no byela Dhavhidha, aku: “Ngone seno. Ndzi ta nyikela a nyama ya wena ka zvinyanyani zva tilo ni ka zvihari zva khwati.”

45 Dhavhidha i no hlamula muFilistiya, aku: “Wena uta ka mina ni cipadha ni paxa ni tlhari,+ kanilezvi mina ndzita ka wena hi vito ga Jehovha wa mabutho,+ a Nungungulu wa butho ga Izrayeli, loyi u mu rukateleko.+ 46 Nyamutlha Jehovha i ta ku nyikela canjeni ga mina.+ Ndzi ta ku daya, ndzi ku tsema hloko; nyamutlha ndzi ta nyikela a zvirumbi zva butho ga vaFilistiya ka zvinyanyani zva tilo ni ka zvihari zva khwati zva misava; niku a vanhu va misava yontlhe va ta zvi tiva lezvaku ku na ni Nungungulu lomu Izrayeli.+ 47 Ni vontlhe va tlhangeneko laha va ta zvi tiva lezvaku Jehovha a nga ponisi hi cipadha kutani hi tlhari,+ hakuva a yimpi ya Jehovha.+ I ta nyikela n’wentlheni canjeni ga hina.”+

48 A muFilistiya i noya a tshinela nguvhu ka Dhavhidha, kanilezvi Dhavhidha i no hatlisa a tsutsuma a khinga muFilistiya kasi kulwa naye. 49 Dhavhidha i no nghenisa a canja gakwe lomu pasteni a teka a ribye a gi chela lomu ka cipelupelu,* a gumesa a gi phanda gi yaba cikandza* ca muFilistiya gi nyupela lomu cikandzeni cakwe awa lahasi hi nghohe.+ 50 Hikwalaho, Dhavhidha i no hlula muFilistiya hi cipelupelu* ni ribye; Dhavhidha i no hlula muFilistiya a mu daya, hambu lezvi a nga kala a nga hi na cipadha canjeni gakwe.+ 51 Dhavhidha i no tsutsuma a ya yima laha ka muFilistiya a hlomula a cipadha ca muFilistiya+ lomu ci nga hi kona a mu tsema hloko kasi a kholwa ku hakunene i file. Laha a vaFilistiya va nga wona lezvaku a nhenha yabye yi file, va no tsutsuma.+

52 Makunu a vavanuna va ka Izrayeli ni va ka Judha va no suka va banguleka va hlongolisela vaFilistiya kusukela le nkoveni+ kala tinyangweni ta Ekroni.+ A zvirumbi zva vaFilistiya zvi no mbambamela hi ndlela ya Xaarayime+ kala le Gati ni Ekroni. 53 Andzhako ka loku a vaIzrayeli va wuyile hi le ko hlongolisela a vaFilistiya, va no ta phanga lomu a vaFilistiya va nga govile kona.

54 Dhavhidha i no teka a hloko ya muFilistiya a famba nayo Jerusalema, kanilezvi a matlhari ya muFilistiya i no ma veka lomu tendeni gakwe.+

55 A cikhati leci Sawule a nga wona Dhavhidha na aya ka muFilistiya, i no wutisa Abneri,+ a murangeli wa butho gakwe, aku: “Abneri, kasi a mufana loyi+ i n’wana wa mani?” Abneri i no hlamula, aku: “A ku khwatsi hi lezvi u* hanyako wena hosi, a ndzi zvi tivi!” 56 A hosi yiku: “Wutisela ku i n’wana wa mani.” 57 Hikwalaho, zvalezvi Dhavhidha a nga wuya hi ka ku daya a muFilistiya, Abneri i no mu teka a famba naye ka Sawule na a khomile hloko ya muFilistiya+ canjeni gakwe. 58 Sawule aku ka Dhavhidha: “U n’wana wa mani?” Dhavhidha aku: “Ndzi n’wana wa nandza ga wena, Jese,+ a muBhetlehema.”+

18 Zvalezvi Dhavhidha a nga mbheta ku wulawula na Sawule, Jonatani+ na Dhavhidha va no bohana va maha vanghana va hombe. Jonatani i no sangula ku mu randzisa a ku khwatsi hi lezvi a ti randzisako zvona.*+ 2 Kusukela ka siku lego, Sawule i no tshama na Dhavhidha; a nga ha mu tsikangi a tlhela kaya ka papayi wakwe.+ 3 Jonatani na Dhavhidha va no maha civhumelwano,+ hakuva i wa mu randzisa a ku khwatsi hi lezvi a ti* randzisako zvona.+ 4 Jonatani i no tlhatlha a nghanju leyi a nga bohile yo kala mawoko a nyika Dhavhidha; i no mu nyika ni tinguwo takwe ta yimpi, ni cipadha cakwe, ni wura gakwe, ni libhandi lakwe. 5 Dhavhidha i no sangula ku huma a yalwa tiyimpi niku ni kwihi lomu Sawule a nga mu rumela kona i wo humelela.+ Hikwalaho, Sawule i no mu yimisa lezvaku a rangela a masochwa.+ A mhaka leyi yi no tsakisa vanhu vontlhe ni malandza ya Sawule.

6 Laha Dhavhidha ni van’wani va nga wuya hi ka ku hlula vaFilistiya, ku wa huma vavasati hi lomu madhoropeni wontlhe ya Izrayeli va yimbelela+ ni ku kina va khinga hosi Sawule, na va hi ni mitandanda,+ va giya hi kutsaka, vaba zvichaya-chaya zva tingoti. 7 A vavasati lavo va nga kulungela va wa yimbelela, vaku:

8 Sawule i no zangara nguvhu,+ niku a lisimu lelo li no mu swira, hakuva i waku: “Ve Dhavhidha i dele makume ya makume ya mazana, kanilezvi mina ndzi dele a makume ya mazana. Leci ci seleko basi ku va mu nyika wuhosi!”+ 9 Kusukela ka siku lego, contlhe cikhati Sawule i wa nga ha mu tsumbi Dhavhidha.*

10 Ka siku gi nga landzela, a moya wa kubiha wu ngata hi ka Nungungulu wu no nghena ka Sawule,+ a sangula ku hlanyahlanyeka lomu ndlwini, Dhavhidha na a chaya muzka hi citende+ kota lezvi a nga maha ka makhati man’wani. Sawule i wa khomile a tlhari canjeni gakwe;+ 11 i no hoxela tlhari,+ na aku: ‘Ndzi ta tlhava Dhavhidha ndzi mu patsa ni khurisi!’ Kanilezvi Dhavhidha i no huluka makhati mambiri. 12 Hikwalaho, Sawule i no chava Dhavhidha, hakuva Jehovha i wa hi zvin’we naye+ kanilezvi i wa sukile ka Sawule.+ 13 Hikwalaho, Sawule i no susa Dhavhidha mahlweni kakwe a mu maha murangeli wa lava va 1000. Dhavhidha i wa rangela butho lomu tiyimpini.*+ 14 Dhavhidha i no simama ku humelela+ ka zvontlhe lezvi a nga kari a maha, na Jehovha i wa hi zvin’we naye.+ 15 Laha Sawule a nga wona lezvaku Dhavhidha wa humelela nguvhu i no mu chava. 16 Kanilezvi vontlhe a vaIzrayeli ni va ka Judha va wa randza Dhavhidha, hakuva i wa va rangela tiyimpini tabye.

17 Hi ndzhako ka cikhati, Sawule i no byela Dhavhidha, aku: “Ndzi ta ku nyika Merabhe, a nhanyana wa mina wa nhondzo,+ a maha sati wa wena.+ Kanilezvi u fanele ku simama ku tiya hlanha u ndzi tirela, ulwa a tiyimpi ta Jehovha.”+ Hakuva Sawule i waku: ‘A canja ga mina gi nga mu dayi, i wa dawe hi canja ga vaFilistiya.’+ 18 Hikwalaho, Dhavhidha i no byela Sawule, aku: “Kova mina mani, kona a maxaka ya mina, a ngango wa papayi wa mina, mova yini lomu Izrayeli, ko kala mina ndzi maha mwane wa hosi ke?”+ 19 Kanilezvi laha ci nga chikele a cikhati ca ku nyikela Merabhe, a nhanyana wa Sawule, ka Dhavhidha, Merabhe i wa sina a nyikelwe ka Adriyeli,+ a muMehola.

20 Mikali,+ a nhanyana wa Sawule, i wafa hi Dhavhidha, niku va noya va ya byela Sawule, a se xalala hi zvona. 21 Hikwalaho, Sawule i te: “Ndzi ta mu nyika yena, ndzi mu dembela hi yena, kasi a canja ga vaFilistiya giva hehla kakwe.”+ Sawule i no phinda a byela Dhavhidha, aku: “U tava mwane wa mina* nyamutlha.” 22 Ahandle ka lezvo, Sawule i no byela a malandza yakwe, aku: “Wulawulani na Dhavhidha cihundleni, muku: ‘A hosi ya tsaka hi wena, ni malandza ya yona ma ku randza. Makunu vhumela a ku maha mwane wa hosi.’” 23 A cikhati leci a malandza ya Sawule ma nga byela Dhavhidha a timhaka leti, Dhavhidha i te ngalo: “Mu alakanya ku zva olova ku a munhu wa cisiwana ni wo chepetiwa wo kota mina a maha a mwane wa hosi ke?”+ 24 A malandza ya Sawule ma no tlhela ma ya mu hlawutela, maku: “Dhavhidha i wulile lezvi ni lezvi.”

25 Sawule aku: “Byelani Dhavhidha, muku: ‘A hosi a yi lavi mali ya lowolo;+ yo lava ntsena a 100 wa mabhebhe ya le magumo ka zviro zva wubeleki zva vavanuna+ va vaFilistiya, kasi yi ti photela ka valala va hosi.’” Lawo ma wa hi mano ya Sawule kasi Dhavhidha a wela canjeni ga vaFilistiya. 26 Hikwalaho, a malandza yakwe ma noya ka Dhavhidha ma ya mu byela a timhaka leti, Dhavhidha a tsaka hi mhaka leyo ya ku lava ku maha mwane wa hosi.+ Na ci nga se mbhela a cikhati leci a nga nyikilwe, 27 Dhavhidha ni vavanuna vakwe va noya va ya daya a 200 wa vavanuna va vaFilistiya, a wuya ni ntsengo wontlhe wa mabhebhe ya le magumo ka zviro zva wubeleki zva vavanuna lavo a ta nyika hosi, kasi a maha mwane wa hosi. Hikwalaho, Sawule i no mu nyika nhanyana wakwe, Mikali, a maha sati wakwe.+ 28 Sawule i no zvi wona lezvaku Jehovha i wa hi na Dhavhidha+ ni lezvaku a nhanyana wakwe, Mikali, wa mu randza Dhavhidha.+ 29 Lezvo zvi no maha Sawule a mu chava nguvhu Dhavhidha, niku i no maha nala wa Dhavhidha wutomini gakwe gontlhe.+

30 Laha a tihosana ta vaFilistiya ti nga huma ti yalwa, contlhe cikhati Dhavhidha i wa humelela nguvhu a ku hundza a malandza wontlhe ya Sawule,+ ni vito gakwe gi no dzundziwa nguvhu.+

19 Hi ndzhako ka cikhati, Sawule i no wulawula ni n’wana wakwe Jonatani ni wontlhe a malandza yakwe xungetano hi ku daya Dhavhidha.+ 2 Kota lezvi Jonatani, a n’wana wa Sawule, a nga mu randza nguvhu Dhavhidha,+ i no mu byela ku: “A papayi wa mina, Sawule, i lava ku ku daya. Hikwalaho, a mandziko ni mixo ti wonele. Famba ka wutshamu go fihlala u ya tumbela kona. 3 Ndzi ta huma ndzi ta yima kusuhani ni papayi wa mina lomu sin’wini legi u tova ka gona. Mina ndzi ta wulawula hi wena ka papayi wa mina; niku loku ndzi tiva cokari, hakunene ndzi ta ku byela.”+

4 Hikwalaho, Jonatani i no wulawula zvazvinene hi Dhavhidha+ ka papayi wakwe Sawule, aku: “A hosi yi nga wonheli a nandza ga yona Dhavhidha, hakuva a nga ku wonhelangi nchumu; a zvilo lezvi a nga ku mahela zvi ku vhunile. 5 I vekile wutomi gakwe mhangweni* kasi a daya muFilistiya,+ niku Jehovha i no va nyika kuhlula* ka hombe a vaIzrayeli vontlhe. U zvi wonile lezvo, u tsaka nguvhu hi zvona. Makunu hikuyini u lavako ku wonhela nkhata wo kala nandzu hi ku daya Dhavhidha na ku nga hi na cigelo ke?”+ 6 Sawule i no ingisa Jonatani, niku Sawule i no hlambanya, aku: “A ku khwatsi hi lezvi Jehovha a hanyako, a nga ta dawa.” 7 Andzhako ka lezvo, Jonatani i no vitana Dhavhidha a ta mu byela timhaka leto tontlhe. Hikwalaho, Jonatani i no neha Dhavhidha ka Sawule a ta simama ku mu tirela a ku fana ni kale.+

8 Hi kufamba ka cikhati, ku no vhuka yimpi kambe, Dhavhidha a famba a yalwa ni vaFilistiya a hihirita vanhu vo tala, va mu tsutsuma.

9 A moya wa kubiha wu ngata hi ka Jehovha wu no nghena ka Sawule.+ I wa tshamile lomu ndlwini yakwe, na a khomile a tlhari canjeni gakwe, Dhavhidha na a kari a chaya citende.+ 10 Sawule i no zama ku tlhava Dhavhidha hi tlhari a mu patsa ni khurisi, kanilezvi Dhavhidha i no vhika, a tlhari gi sala gi kuma khurisi. Dhavhidha i no tsutsuma a huluka ka wusiku galego. 11 Andzhako ka cikhati, Sawule i no rumela zvirun’wa mutini wa Dhavhidha zvi ya mu rindzela kasi zvi mu daya ni mixo ya kona.+ Kanilezvi Mikali, a sati wa Dhavhidha, i te ngalo kakwe: “Loku u nga tsutsumi* a wusiku legi, a mandziko u tava u file.” 12 Mikali i no tekela ku humesa Dhavhidha hi janela kasi a tsutsuma, a huluka. 13 Mikali i no teka a cifananiso ca terafime* a ci lata laha mubhedhini, a teka a woya ga mbuti a gi veka laha a hloko ya Dhavhidha yi nga kari yi khigela kona, a gumesa a ci fenengeta hi nguwo.

14 Sawule i no rumela a zvirun’wa kasi zvi ya khoma Dhavhidha, kanilezvi Mikali i te ngalo: “Dhavhidha wa babya.” 15 Hikwalaho, Sawule i no rumela a zvirun’wa kasi zvi ya kamba Dhavhidha, a zvi leletela, aku: “Mu rwaleni hi mubhedhi wakwe muta naye seno ka mina a ta dawa.”+ 16 Laha a zvirun’wa zvi nga nghena, zvi no kuma a cifananiso ca terafime* laha mubhedhini ni woya ga mbuti laha a hloko ya Dhavhidha yi nga wa tava kona. 17 Sawule i no wutisa Mikali, aku: “Hikuyini u nga ndzi kalavela, u tsika a nala+ wa mina a tsutsuma a pona ke?” Mikali aku ka Sawule: “Hi yena a nga ndzi byela, aku: ‘Ndzi tsike ndzi famba, loku u nga ndzi tsiki ndzi ta ku daya!’”

18 Makunu Dhavhidha i no tsutsuma a huluka aya ka Samuweli le Rama,+ a ya mu hlawutela zvontlhe lezvi Sawule a nga mu mahele. Dhavhidha na Samuweli va no suka va ya tshama le Nayote.+ 19 Hi kufamba ka cikhati, Sawule i no byeliwa ku: “Dhavhidha i le Nayote, le Rama.” 20 Zvalezvo Sawule i no rumela zvirun’wa kasi zvi ya khoma Dhavhidha. Laha zvi nga wona vaphrofeti vo kumba na va phrofeta, Samuweli na a yimile a va rangela, a moya wa Nungungulu wu nota hehla ka zvirun’wa zva Sawule, zvonawu zvi se sangula ku mahisa ku khwatsi vaphrofeti.

21 A cikhati leci Sawule a nga hlawutelwa a mhaka leyo, i no tekela ku rumela zvin’wani zvirun’wa, zvonawu zvi se sangula ku mahisa ku khwatsi vaphrofeti. Hikwalaho, Sawule i no rumela zvirun’wa kambe, ku nga hi ntlawa wa wunharu, zvonawu zvi se sangula ku mahisa ku khwatsi vaphrofeti. 22 Hi kugumesa, Sawule yenawu i noya le Rama. Laha a nga chikela thangini ga hombe le Seku, i no wutisa, aku: “I kwihi Samuweli na Dhavhidha?” Va hlamula, vaku: “Va le Nayote,+ le Rama.” 23 Laha Sawule a nga hi ndleleni ya kuya le Nayote, le Rama, a moya wa Nungungulu wu nota ka yenawu, a famba ndlela yontlhe na a ku khwatsi muphrofeti kala a chikela le Nayote, le Rama. 24 I no tlhatlha ni tinguwo takwe, a sangula ku mahisa ku khwatsi muphrofeti mahlweni ka Samuweli, a etlela laho a siku gontlhe ni wusiku ga kona, na a hi cimbyiri.* Hikwalaho, a vanhu va te ngalo: “Kasi Sawule yenawu ova muphrofeti ke?”+

20 Makunu Dhavhidha i no tsutsuma Nayote, le Rama, aya ka Jonatani, a yaku: “Kasi cini ndzi nga maha?+ I nandzu muni ndzi nga nawo, kona cini ndzi nga wonhela a papayi wa wena a kuza a hlota a wutomi* ga mina?” 2 Jonatani aku kakwe: “A zvive kule lezvo!+ U nga tafa. Ci hava leci a papayi wa mina a to maha na a nga ndzi byelangi, kani ca hombe, kani ca citsongwani. A papayi wa mina a nga ndzi fihlelela yini a mhaka leyi ke? Zvi nga ta maheka lezvo.” 3 Kanilezvi Dhavhidha i no hlambanya kambe, aku: “A papayi wa wena wa zvi tiva khwatsi lezvaku ndzi kumile thomo mahlweni ka wena,+ hikwalaho i taku: ‘A mhaka leyi yi nga tiviwi hi Jonatani, hakuva a nga kwata.’ Kanilezvi a ku khwatsi hi lezvi Jehovha a hanyako ni ku khwatsi hi lezvi wena* u hanyako, ko kiyela a zambo gin’we basi kasi ndzifa!”+

4 Jonatani i no byela Dhavhidha, aku: “Ni cihi u* to ndzi byela ndzi ta ku mahela.” 5 Dhavhidha aku ka Jonatani: “A mandziko i hweti yiswa,+ niku ku rindzelwa lezvaku ndzi tshama kugeni ni hosi. Makunu ndzi tsike ndzi famba ndzi ya fihlala lomu masin’wini kala mondlwani ni wusiku. 6 Loku a papayi wa wena a ndzi vilela, mu byele ku: ‘Dhavhidha i ndzi kombele ku sukanyana aya dhoropeni gakwe le Bhetlehema,+ hakuva leyo ku na ni muphahlo wa lembe ni lembe wa ngango wakwe wontlhe.’+ 7 Loku aku: ‘Eyo!’ A nandza ga wena gi tava ni kurula. Kanilezvi loku a zangara, zvi tive lezvaku hakunene i bhejile ku ndzi mahela kubiha. 8 Gi kombise lirandzo li nga mbheliko a nandza ga wena+ hakuva u mahile civhumelwano ni nandza ga wena mahlweni ka Jehovha.+ Kanilezvi loku mina ndzi hi ni nandzu+ ndzi daye ha wece. U wa ta ndzi nyikelela yini ka papayi wa wena ke?”

9 Jonatani aku: “A zvive kule na wena a ku alakanya lezvo! Loku ndzi tiva lezvaku papayi i bhejile ku ku mahela kubiha, ndzi nga ta ku byela ke?”+ 10 Dhavhidha a wutisa Jonatani, aku: “Himani a to ndzi byela lezvaku a papayi wa wena i ku hlamulile hi zanga?” 11 Jonatani a hlamula Dhavhidha, aku: “A hiye masin’wini.” Hikwalaho, va no suka hi wumbiri gabye vaya masin’wini. 12 Jonatani aku ka Dhavhidha: “Jehovha, a Nungungulu wa Izrayeli, i wave kustumunyu wa lezvaku a mandziko hi cikhati caleci kutani hi siku ga wunharu ndzi ta zama ku tiva lezvi zvi nga mbilwini ya papayi. Loku a ku xuvela zvazvinene, ndzi nga ta rumela gezu, ndzi ku tivisa ke? 13 Kanilezvi loku a papayi wa mina a lava ku ku mahela zvakubiha, Jehovha i wa ndzi tsayise* a tlhela a engeta loku mina ndzi nga ku tivisi, ndzi ku tsika u famba hi kurula. Jehovha i wave zvin’we na wena+ a ku khwatsi hi lezvi a ngava zvin’we ni papayi wa mina.+ 14 Xana u nga ta ndzi kombisa lirandzo li nga mbheliko la Jehovha loku ndza ha hanya ni loku ndzi file ke?+ 15 U nga tshuki u tsika ku kombisa a lirandzo li nga mbheliko ka ngango wa mina,+ hambu a cikhati leci Jehovha a to lovisa a valala vontlhe va Dhavhidha laha misaveni.” 16 Hikwalaho, Jonatani i no maha civhumelwano ni yindlu ya Dhavhidha, aku: “Jehovha i ta ti photela ka valala va Dhavhidha.” 17 Hikwalaho, Jonatani i no tlhela a hlambanyisa Dhavhidha lezvaku wa mu randza, hakuva i wa mu randza a ku khwatsi hi lezvi a ti* randzisako zvona.+

18 Jonatani i te ngalo kakwe: “A mandziko i hweti yiswa, u ta vilelwa,+ hakuva a wutshamu ga wena gi tava phanga. 19 Hi siku ga wunharu, u ta vilelwa nguvhu. Hikwalaho, tana ka wutshamu legi u nga fihlele kona a siku lego,* u ta tshama kusuhani ni ribye legi. 20 Ndzi ta phanda a mipaxa yinharu hi tlhelo ga gona, a ku khwatsi hi loku ndzi lava ku fula nchumu. 21 A cikhati leci ndzi to ruma a nandza, ndzi taku: ‘Famba u ya lava mipaxa.’ Loku ndzi byela nandza, ndziku: ‘A mipaxa yi seyo tlhelweni ga wena, yi teke’, wena wuya, hakuva a ku khwatsi hi lezvi Jehovha a hanyako, zvi wula ku zvontlhe zvi tshamisekile ka wena, a wu mhangweni. 22 Kanilezvi loku a mufana loye ndzi mu byela ku: ‘A mipaxa yi phambeni ka wena’, famba hakuva Jehovha i lava lezvaku u famba futsi. 23 Xungetano hi citsumbiso leci hi mahileko,+ mina na wena, ngha Jehovha ava cikari ka hina kala kupindzuka.”+

24 Hikwalaho, Dhavhidha i no fihlala lomu masin’wini. Laha ku nga woneka a hweti yiswa, a hosi yi no ya tshama citshan’wini ca yona kasi yiga.+ 25 A hosi yi wa tshamile laha yi tolovelako ku tshama kona kusuhani ni khurisi, Jonatani a tshama a cuwukana nayo; Abneri+ i wa tshamile tlhelweni ga Sawule, kanilezvi a wutshamu ga Dhavhidha gi wa hi phanga. 26 Sawule a nga wulangi nchumu ka siku lego, hakuva i waku: ‘Ci kona ci mu mahileko a nga hlazveki.+ Hakunene a nga hlazvekangi.’ 27 Ka siku gi nga landzela legi ga kuwoneka ka hweti yiswa, hi siku ga wumbiri, a wutshamu ga Dhavhidha gi wa ha hi phanga. Makunu Sawule i no wutisa a n’wana wakwe Jonatani, aku: “Hikuyini a n’wana wa Jese+ a nga kala kuta kugeni a tolo ni nyamutlha?” 28 Jonatani a hlamula Sawule, aku: “Dhavhidha i no ndzi khongotela a kombela kuya Bhetlehema.+ 29 I te: ‘Ndzi tsike ndzi famba hakuva a ngango wa hina wu na ni muphahlo le dhoropeni, niku a makabye wa mina i ndzi vitanile. Hikwalaho, loku ndzi kumile thomo mahlweni ka wena ndzi tsike ndzi tsutsuma ndzi ya wona a vamakabye va mina.’ Hi zvona zvi nga mu maha a ngati mezeni ya hosi.” 30 Sawule i no zangarela Jonatani, aku: “Wena n’wana wa wasati wo kala ku ingisa, u alakanya ku a ndzi zvi tivi ku u yima ni n’wana wa Jese kasi u ti wisa tingana wena ni ku mu wisa tingana a mamani wa wena* ke? 31 Loku a n’wana wa Jese a ha kandzihetela a misava leyi, wena u nga ta tiya, ne a wuhosi ga wena gi nga ta yimiswa gi tiya.+ Hikwalaho, ruma munhu zvezvi a ya mu teka a wuya naye laha ka mina, hakuva i fanele kufa.”*+

32 Kanilezvi Jonatani i no wutisa a papayi wakwe Sawule, aku: “Hikuyini a lavako ku dawa?+ Cini a nga maha?” 33 Zvalezvo Sawule i no mu hoxela tlhari kasi a mu daya.+ Hikwalaho, Jonatani i no zvi tiva lezvaku a papayi wakwe i wa bhejile ku daya Dhavhidha.+ 34 Jonatani i no tekela ku suka laha mezeni na a vila hi zanga; a nga gangi nchumu ka siku ga wumbiri, andzhako ka kuwoneka ka hweti yiswa, hakuva i wa kwatile hi mhaka ya Dhavhidha,+ ni lezvi a papayi wakwe a nga mu wisile tingana.

35 Ni mixo, Jonatani i no suka aya masin’wini lomu a nga bhulile ku kumana na Dhavhidha na a hi ni nandza gakwe ga mufana.+ 36 Jonatani i no byela a nandza gakwe, aku: “Tsutsuma u ya rolela a mipaxa leyi ndzi to phanda.” A nandza gi no tsutsuma, Jonatani a phanda paxa wuya phambeni ka gona. 37 Laha a nandza gi nga chikela laha wu nga wele kona a paxa lowu Jonatani a nga phandile, Jonatani i no gi vitana, aku: “A paxa a wu le phambeni ka wena ke?” 38 Jonatani i no byela a nandza gakwe, aku: “Hatlisa! Tsutsuma! U nga hlweli!” Makunu a nandza ga Jonatani gi no rolela a mipaxa gi wuya ka n’winyi wa gona. 39 A nandza gi wa nga tivi nchumu hi mhaka leyo; zvi wo tiviwa hi Jonatani na Dhavhidha basi a ku zvi wula yini lezvo. 40 Jonatani i no teka a matlhari yakwe a nyika a nandza gakwe, aku: “Ma teke u famba nawo dhoropeni.”

41 A cikhati leci a nandza gi nga suka gi famba, Dhavhidha i no huma hi lomu a nga hi kona, kwalaho kusuhani, hi tlhelo ga dzonga,* a yawa lahasi hi nghohe, a korama zvikhati zvinharu. Va no pswopswana, va rilelana, kanilezvi Dhavhidha hi yena a nga rila nguvhu. 42 Jonatani i no byela Dhavhidha, aku: “Famba hi kurula kota lezvi hi nga hlambanya+ vitweni ga Jehovha, hiku: ‘Jehovha i wave cikari ka mina na wena, ni cikari ka pswalo* wa mina ni pswalo* wa wena kala kupindzuka.’”+

Dhavhidha i no suka a famba, Jonatani a tlhela dhoropeni.

21 Hi ndzhako ka cikhati, Dhavhidha i noya Nobhe,+ ka mupristi Ahimeleki. A cikhati leci Ahimeleki a nga kumana na Dhavhidha i no sangula ku rurumela hi kuchava, aku kakwe: “Hikuyini u tako wece na u nga hi na munhu mun’wani?”+ 2 Dhavhidha a hlamula mupristi Ahimeleki, aku: “A hosi yi ndzi leletele a ku maha zvilo zvo kari kanilezvi yi te: ‘U nga byeli munhu lezvi ndzi ku rumelako zvona ni lezvi ndzi ku leletelako.’ Ndzi bhulile ni majaha ya mina kasi hi ya kumana ka wutshamu go kari. 3 Makunu loku u hi ni ntlhanu wa tipawa kutani cin’wani cilo, ndzi nyike.” 4 Kanilezvi a mupristi i no hlamula Dhavhidha, aku: “A ku na pawa yi ringanako ku giwa hi vanhu, leyi yi nga kona hi leyi ya ku basa.+ A majaha ya wena ma nga nyikiwa loku ku hi ku a ma ti tlhanganisangi* ni vavasati.”+ 5 Dhavhidha a hlamula a mupristi, aku: “Hakunene a hi ti tlhanganisangi ni vavasati a ku fana ni zvikhati zvin’wani hi kalako hi nga ti tlhanganisi navo loku hi huma hiya yimpini.+ Loku a mimiri ya majaha yi tshama yi basile loku hi lava ku maha mitiro leyi hi tolovelako ku maha, a ndza ha wuli hi nyamutlha, yi basile nguvhu!” 6 Hikwalaho, a mupristi i no mu nyika a tipawa to basa,+ hakuva ku wa nga hi na tin’wani saseka leti ta munyikelo, leti ti nga susilwe mahlweni ka Jehovha ti vhaletiwa hi tin’wani ta tiswa ka siku legi ku nga susiwa leti ta kale.

7 Ka siku lego, ku wa hi ni nandza ga Sawule gi nga kurumetilwe ku yima mahlweni ka Jehovha. A vito ga gona ku wa hi Dhowegi,+ a muEdhomi,+ a nga hi murangeli wa varisi va Sawule.

8 Dhavhidha i te ngalo ka Ahimeleki: “U na ni tlhari kutani cipadha laha ke? A ndzi tekangi a cipadha ca mina kutani matlhari ya mina, hakuva a hosi yi ndzi rumile zva cihatla.” 9 A mupristi aku: “Laha ku na ni cipadha ca Goliyate,+ a muFilistiya, loyi wena u nga mu daya le Nkoveni wa Ela,+ ci tsondzelweko hi nguwo le ndzhako ka efodhe.+ Loku u ci lava ku teka, teka, hakuva hi cona coce ci nga kona.” Dhavhidha aku: “Ndzi nyike caleco, hakuva a ku na cin’wani co fana naco.”

12 Dhavhidha i no ehleketa hi magezu lawo, a sangula ku mu chava nguvhu Akixi,+ a hosi ya le Gati. 13 Hikwalaho, i no ti cica mahlweni kabye a mahisa ku khwatsi munhu wo hlanya kasi va nga mu poli,+ a sangula ku tsaletela a tivati ta nyangwa, a tsika a mari yakwe ma xililika hi cilevhu. 14 Akixi i no gumesa a byela a malandza yakwe, aku: “A mu zvi woni ku loyi munhu wo hlanya? Muta naye laha ka mina ndzi ta mu maha yini? 15 Ndzo vhumala tihlanyi a kuza mu ndzi tela ni munhu loyi wo hunguka a ta ndzi hlanyela ke? A munhu wo kota loyi a nga nghena lomu ndlwini ya mina ke?”

22 Hikwalaho, Dhavhidha i no suka hi laho+ a ya fihlala lomu mhakweni ya Adhulamu.+ A cikhati leci a vamakabye vakwe ni yontlhe a yindlu ya papayi wakwe va nga zvi tiva, va no relela vaya kakwe. 2 Vontlhe lava va nga hi ni zvikarato, ni mangava, ni lava va nga kala va nga tsaki hi wutomi gabye* va noya kakwe, a maha murangeli wabye. A vavanuna lava va nga mu landzela va wa hi kwalomu ka 400 wa vona.

3 Hi kufamba ka cikhati, Dhavhidha i no suka hi laho aya Mizpa, le Mowabhi,+ a ya wulawula ni hosi ya Mowabhi, aku: “Ndzi kombela ku mu tshama ni papayi wa mina ni mamani wa mina kala ndzi tiva lezvi Nungungulu a to ndzi mahela.” 4 Hikwalaho, i no va siya ni hosi ya Mowabhi, va tshama nayo, contlhe cikhati leci Dhavhidha a nga tshama lomu khokholeni.+

5 Hi ndzhako ka cikhati, muphrofeti Gadhi+ i no byela Dhavhidha, aku: “U nga ha tshami lomu khokholeni. Suka uya tikweni ga Judha.”+ Hikwalaho, Dhavhidha i no suka aya khwatini ga Herete.

6 Sawule i nozwa lezvaku Dhavhidha ni vavanuna vakwe va kumilwe. Sawule i wa tshamile le Gibheya,+ lahasi ka sinya,* laha ka wutshamu go tlakuka na a hi ni tlhari canjeni gakwe, niku a malandza yakwe wontlhe ma wa yimile ma mu randzela. 7 Sawule i no byela a malandza yakwe, lawa ma nga mu randzele, aku: “N’wina va ka Bhenjamini, ndzi ingiseleni. A n’wana wa Jese+ i ta mu nyikawo a masimu ni zvivhina* n’wina n’wentlhe ke? I ta yimisa n’wina n’wentlhe lezvaku muva varangeli va mitlawa ya 1000 wa vanhu ni ya 100 wa vanhu ke?+ 8 N’wentlheni mu ndzi xuxele cikungo co biha! A cikhati leci a n’wana wa mina a nga maha civhumelwano ni n’wana wa Jese i hava ni mun’we wa n’wina a nga ndzi byela!+ I hava ni mun’we wa n’wina a nga ndzi zwela wusiwana a ndzi byela ku a n’wana wa mina i kucetele a nandza ga mina lezvaku gi ndzi vhukela ni ku ndzi xiyelela, khwatsi hi lezvi zvi mahekako nyamutlha.”

9 Dhowegi,+ a muEdhomi, loyi a nga rangela a malandza ya Sawule, i no hlamula,+ aku: “Ndzi mu wonile a n’wana wa Jese le Nobhe na ata ka Ahimeleki, a n’wana wa Ahitubha.+ 10 Ahimeleki i no mu wutisela ka Jehovha a tlhela a mu nyika timbuva. I no mu nyika ni cipadha ca Goliyate, a muFilistiya.”+ 11 Zvalezvo a hosi yi no vitanisa Ahimeleki, a n’wana wa Ahitubha, ni vontlhe a vapristi va yindlu ya papayi wakwe, lava va nga hi le Nobhe. Hikwalaho, vontlhe va nota ka hosi.

12 Sawule aku: “Ndzi ingisele, wena n’wana wa Ahitubha!” Yena aku: “Ndza kuzwa, hosi yanga.” 13 Sawule aku kakwe: “Hikuyini wena ni n’wana wa Jese mu nga ndzi mahela cikungo ca ku ndzi vhukela? Hikuyini u nga mu nyika zvakuga, ni cipadha u tlhela u mu wutisela ka Nungungulu ke? Yena wa ndzi vhukela a tlhela a ndzi xiyelela, khwatsi hi lezvi zvi mahekako nyamutlha.” 14 Ahimeleki i no hlamula hosi, aku: “Himani cikari ka malandza ya wena wontlhe a tsumbekileko a ku fana na Dhavhidha ke?+ I mwane wa hosi+ ni murangeli wa vagadhi va wena niku wa dzundzeka lomu ndlwini ya wena.+ 15 Ndzo gondza hi nyamutlha a ku mu wutisela ka Nungungulu ke?+ A zvive kule na mina lezvi u wulako! A hosi yi nga ndzi nyiki nandzu mina nandza ga yona ni yindlu yontlhe ya papayi wa mina, hakuva a nandza ga wena gi wa nga tivi nchumu hi mhaka leyi.”+

16 Kanilezvi a hosi yi te ngalo: “Hakunene u tafa,+ wena Ahimeleki, ni yontlhe a yindlu ya papayi wa wena.”+ 17 A hosi yi no byela a vagadhi* lava va nga yimile va yi randzela, yiku: “Hundzulukani mu daya a vapristi va Jehovha hakuva va yima na Dhavhidha. Va wa zvi tiva ku Dhavhidha o tsutsuma, hambulezvo a va ndzi byelangi nchumu!” Kanilezvi a malandza ya hosi ma no ala ku tlakusa canja gabye ma daya a vapristi va Jehovha. 18 A hosi yi no gumesa yi byela Dhowegi,+ yiku: “Hundzuluka u daya a vapristi!” Zvalezvo Dhowegi, a muEdhomi,+ i no suka a ya daya a vapristi. Ka siku lego i no daya 85 wa vavanuna va nga bohile a efodhe ya wukene.*+ 19 I no hihirita na Nobhe,+ a dhoropa ga vapristi, hi cipadha, a daya a vavanuna ni vavasati, ni vanana ni tinyamani,* ni tihomu, ni timbongola, ni tiyivhu hi cipadha.

20 Kanilezvi a mun’we wa vana va Ahimeleki, a n’wana wa Ahitubha, loyi a vito gakwe a nga hi Abhiyatari,+ i no huluka a tsutsuma a landza Dhavhidha. 21 Abhiyatari i no byela Dhavhidha, aku: “Sawule i dele a vapristi va Jehovha.” 22 Dhavhidha aku ka Abhiyatari: “Ndzi tekele ku zvi tiva ka siku lego+ lezvaku lezvi Dhowegi, a muEdhomi, a nga hi kona i wa ta mu byela Sawule. Hi mina ndzi nga ni nandzu wa vontlhe* va delweko va yindlu ya papayi wa wena. 23 Tshama na mina. U nga chavi, hakuva loyi a hlotako a wutomi* ga wena i hlota ni wutomi ga mina; ndzi ta ku vhikela.”+

23 Hi kufamba ka cikhati, va no byela Dhavhidha, vaku: “A vaFilistiya valwa ni tiko ga Keila+ va tlhela va phanga lomu ka matshamu yo hulela kona timbewu.” 2 Hikwalaho, Dhavhidha i no wutisa Jehovha,+ aku: “Ndzi famba ndzi ya hlasela a vaFilistiya lavo ke?” Jehovha aku ka Dhavhidha: “Famba u ya hlasela a vaFilistiya u tlhatlhisa Keila.” 3 Kanilezvi a vavanuna va Dhavhidha va te ngalo kakwe: “Hambu ku hi lomu Judha+ hi chavako, a ha ha wuli hi kuya le Keila hi yalwa ni vaFilistiya!”+ 4 Hikwalaho, Dhavhidha i no tlhela a wutisa Jehovha.+ Jehovha a hlamula, aku: “Suka, u relela uya le Keila hakuva ndzi ta nyikela a vaFilistiya canjeni ga wena.”+ 5 Makunu Dhavhidha i no suka aya Keila ni vavanuna vakwe, a yalwa ni vaFilistiya. I no teka a zvifuyo zvabye, a daya a vaFilistiya vo tala, a tlhatlhisa a vahanyi va le Keila.+

6 Makunu a cikhati leci Abhiyatari,+ a n’wana wa Ahimeleki, a nga tsutsuma a landza Dhavhidha le Keila, i wa hi ni efodhe. 7 Va no byela Sawule, vaku: “Dhavhidha i le Keila.” Sawule aku: “Nungungulu i mu nyikele* canjeni ga mina,+ hakuva i ti phasile ha yece hi ku nghena lomu dhoropeni gi nga ni tinyangwa ni zvikwinyaro.” 8 Hikwalaho, Sawule i no vitanisa a vanhu vontlhe vaya yimpini, kasi va relela vaya Keila va ya randzela Dhavhidha ni vavanuna vakwe. 9 Laha Dhavhidha a nga tiva lezvaku Sawule i lomu ko mu xuxela cikungo, i no byela mupristi Abhiyatari, aku: “Tana ni efodhe laha.”+ 10 Dhavhidha aku: “O, Jehovha, Nungungulu wa Izrayeli, a nandza ga wena gi zwile lezvaku Sawule i lava kuta seno Keila a ta lovisa a dhoropa hi kota ya mina.+ 11 A varangeli* va Keila va ta ndzi nyikela canjeni gakwe ke? Kona Sawule hakunene i ta relela ata, khwatsi hi lezvi a nandza ga wena gi zvi zwileko ke? O, Jehovha, Nungungulu wa Izrayeli, hlamula a nandza ga wena.” Jehovha aku: “I ta relela.” 12 Dhavhidha a wutisa, aku: “A varangeli va Keila va ta ndzi nyikela ni vavanuna va mina canjeni ga Sawule ke?” Jehovha aku: “Va ta ku nyikela.”

13 Zvalezvo, Dhavhidha i no suka ni vavanuna vakwe, va nga hi kwalomu ka 600 wa vona,+ va huma lomu Keila vaya ni kwihi va nga ku kuma. Laha Sawule a nga byeliwa lezvaku Dhavhidha i tsutsumile le Keila, a nga ha mu landzangi. 14 Dhavhidha i no tshama lomu ciwuleni, ka matshamu yo karata ku nghena, lomu tikweni ga zvitsunga ga ciwula ca Zife.+ Sawule i wa tshama hi ku mu hlota+ kanilezvi Jehovha a nga mu nyikelangi canjeni gakwe. 15 Dhavhidha i no tiva lezvaku* Sawule i humele a ta hlota wutomi* gakwe a cikhati leci Dhavhidha a nga hi lomu ciwuleni ca Zife, le Horexe.

16 Jonatani, a n’wana wa Sawule, i noya ka Dhavhidha, le Horexe, a ya mu vhuna ku kuma ntamu* ka Jehovha.+ 17 I te ngalo kakwe: “U nga chavi, hakuva a papayi wa mina Sawule a nga ta ku kuma. U tava hosi ya Izrayeli,+ mina ndziva wa wumbiri andzhako ka wena. Hambu papayi wa mina Sawule wa zvi tivawu lezvo.”+ 18 Hi wumbiri gabye va no maha civhumelwano+ mahlweni ka Jehovha; Dhavhidha i no tshama le Horexe, Jonatani aya kaya kakwe.

19 Hi ndzhako ka cikhati, a vavanuna va le Zife va no kwela vaya ka Sawule, le Gibheya,+ va yaku: “Dhavhidha i fihlele kusuhani na hina,+ lomu ka matshamu yo karata ku nghena, le Horexe,+ citsungeni ca Hakila,+ leci ci nga dzongeni* wa Jeximone.*+ 20 Ni ka gihi siku legi wena* hosi u to lava ku relela, ngone, hi ta mu nyikela canjeni ga wena hosi.”+ 21 Sawule aku: “Jehovha i wa mu katekise hakuva mu ndzi zwele wusiwana. 22 Fambani mu ya zama ku tiva lomu hakunene a nga kona, mu tiva ni loyi a nga mu wona, hakuva ndzi byelilwe lezvaku i tlharihile nguvhu. 23 Cuwukisani khwatsi kontlhe lomu a fihlalako kona, mu gumesa mu wuya ka mina ni cikombiso. Makunu ndzi ta famba na n’wina, ni loku a hi lomu tikweni, ndzi ta mu lavetela cikari ka mazanazana wontlhe ya Judha.”

24 Hikwalaho, va no suka vaya Zife,+ va ranga mahlweni ka Sawule, Dhavhidha ni vavanuna vakwe na va hi ciwuleni ca Mawone,+ le Arabha,+ dzongeni wa Jeximone. 25 Andzhako ka lezvo, Sawule ni vavanuna vakwe va nota va ta mu hlota.+ A cikhati leci Dhavhidha a nga byeliwa, i no tekela ku relela aya ribyeni+ a ya tshama ciwuleni ca Mawone. Laha Sawule a ngazwa lezvo, i no hlongolisela Dhavhidha ciwuleni ca Mawone. 26 Laha Sawule a nga chikela ka tlhelo legi ga citsunga, Dhavhidha ni vavanuna vakwe va wa hi ka tlhelo legi gin’wani ga citsunga. Dhavhidha i wa hatlisa a tsutsuma+ Sawule, kanilezvi Sawule ni vavanuna vakwe va wa tshinela kusuhani ka Dhavhidha ni vavanuna vakwe kasi va va khoma.+ 27 Kanilezvi ku nota cirun’wa ka Sawule, ci taku: “Hatlisa u wuya, hakuva a vaFilistiya va dhumele tiko!” 28 Zvalezvo Sawule i no tsika ku hlongolisela Dhavhidha+ a yalwa ni vaFilistiya. Hi zvalezvo zvi nga maha ku a wutshamu lego gi chuliwa ku i Ribye ga Kuhambana.

29 Dhavhidha i no suka hi laho a ya tshama ka matshamu yo karata ku nghena le En-Gedhi.+

24 Zvalezvi Sawule a nga wuya hi le ko hlongolisela a vaFilistiya, i no byeliwa ku: “Dhavhidha i le ciwuleni ca En-Gedhi.”+

2 Hikwalaho, Sawule i no hlawula a 3000 wa vavanuna va zvi kotako khwatsi kulwa cikari ka vaIzrayeli vontlhe, va famba va hlota Dhavhidha ni vavanuna vakwe lomu maribyeni ya timbuti ta khwati. 3 Sawule i no chikela marangeni ya maribye ya tiyivhu, ma nga hi kusuhani ni ruwa, laha ku nga hi ni mhako. I no nghena lomo kasi a ti ruma, kuveni Dhavhidha ni vavanuna vakwe va wa fihlele le magumo ka mhako leyo.+ 4 A vavanuna va Dhavhidha, vaku kakwe: “Nyamutlha Jehovha i ngalo ka wena: ‘Ndza nyikela a nala wa wena canjeni ga wena,+ mu mahe ni cihi u ci lavako.’” Hikwalaho, Dhavhidha i no suka a xiyelela a ya tsema le magumo ka nghanju ya Sawule yo kala mawoko. 5 Kanilezvi, andzhako ka lezvo, a mbilu* ya Dhavhidha yi no simama ku muba+ hi lezvi a nga tsemile le magumo ka nghanju ya Sawule yo kala mawoko. 6 Dhavhidha i no byela vavanuna vakwe, aku: “A zvi ringani mahlweni ka Jehovha lezvaku ndzi maha lezvo ka hosi ya mina, a totilweko wa Jehovha, a ku ndzi tlakusa a canja ga mina ndzi mu vhukela, hakuva i a totilweko wa Jehovha.”+ 7 Dhavhidha i no betela* a vavanuna vakwe hi magezu lawo, niku a nga va tsikangi va vhukela Sawule. Makunu Sawule i no huma lomu mhakweni, a ti fambela.

8 Andzhako ka lezvo, Dhavhidha i no huma hi lomu mhakweni a vitana Sawule hi gezu ga hombe, aku: “Hosi yanga!”+ Laha Sawule a nga hundzuluka a cuwuka ndzhako, Dhavhidha i no khizama, a korama lahasi hi nghohe yakwe. 9 Dhavhidha aku ka Sawule: “Hikuyini u ingisako a magezu ya vanhu lava va nge: ‘Dhavhidha i hlota ku ku mahela zvahava ke’?+ 10 Nyamutlha wa ku nyamutlha, u zvi wonile hi matihlo ya wena lezvaku Jehovha i wa ku nyikele canjeni ga mina lomu mhakweni. Kanilezvi a cikhati leci a wokari a ngaku ngha ndzi ku daya,+ ndzi no ku zwela wusiwana, ndziku: ‘Ndzi nga ta tlakusa a canja ga mina hehla ka hosi ya mina, hakuva i a totilweko wa Jehovha.’+ 11 Makunu, papayi wa mina, wona a nguwo leyi yi nga canjeni ga mina ndzi nga tsema laha ka nghanju ya wena yo kala mawoko; hakuva a cikhati leci ndzi nga tsema le magumo ka nghanju ya wena yo kala mawoko, a ndzi ku dayangi. Makunu zvi wone, u zvi tiva lezvaku a ndzi na cikungo co biha hi wena, ne hambu ca ku ku vhukela. A ndzi ku wonhelangi,+ hambu lezvi wena u hlotako a ku teka wutomi* ga mina.+ 12 Jehovha i wa lamule cikari ka mina na wena;+ Jehovha i wa ndzi photele ka wena,+ kanilezvi a canja ga mina gi nga ta ku vhukela.+ 13 Khwatsi hi kuwula ka vingu ga kale, gaku: ‘A wakubiha i humesa zvakubiha’, kanilezvi a canja ga mina gi nga ta ku vhukela. 14 A hosi ya Izrayeli yi famba yi lavetela mani? U hlongolisela mani ke? U hlongolisela a mbyana ya kufa, kutani chuwani ke?+ 15 Jehovha i wave mulamuli, a lamula cikari ka mina na wena. I ta hlola a mhaka ya mina a ndzi yimela,+ a ndzi lamula, a tlhela a ndzi tlhatlhisa canjeni ga wena.”

16 Zvalezvi Dhavhidha a nga mbheta ku wula magezu lawo, Sawule i te ngalo: “I gezu ga wena lego, n’wananga, Dhavhidha?”+ Makunu Sawule i no sangula ku rila hi gezu ga hombe, 17 aku ka Dhavhidha: “Wena u lulamile nguvhu ku hundza mina, hakuva wena u ndzi mahele zvazvinene, kanilezvi mina ndzi ku tlhelisele hi zvakubiha.+ 18 Nyamutlha, wena u ndzi byelile a wunene legi u nga ndzi mahela hi ku kala u nga ndzi dayi a cikhati leci Jehovha a nga ndzi nyikela canjeni ga wena.+ 19 Hakuva himani a tshukileko a kuma nala wakwe, a gumesa a mu tsika a famba na a nga mu mahangi nchumu ke? Jehovha i ta ku chachazela hi zvazvinene+ hi kota ya lezvi u nga ndzi mahela nyamutlha. 20 Ndza zvi tiva lezvaku hakunene wena u tava hosi,+ ni lezvaku a mufumo wa Izrayeli wu ta pindzuka canjeni ga wena. 21 Makunu hlambanya hi Jehovha+ lezvaku u nga ta sala u lovisa a pswalo* wa mina andzhako ka mina, ni lezvaku u nga ta fuvisa a vito ga mina lomu ndlwini ya papayi wa mina.”+ 22 Hikwalaho, Dhavhidha i no hlambanya ka Sawule. Andzhako ka lezvo, Sawule i noya kaya,+ kanilezvi Dhavhidha ni vavanuna vakwe va no kwela vaya khokholeni.+

25 Hi kufamba ka cikhati, Samuweli+ i nofa; ni vaIzrayeli vontlhe va no hlengeletana kasi va mu rila ni ku mu lahla mutini wakwe, le Rama.+ Makunu Dhavhidha i no suka a relela aya ciwuleni ca Parani.

2 Ku wa hi ni wanuna le Mawone+ a nga tira le Karmeli.*+ A wanuna loye i wa ganyile nguvhu; i wa hi ni 3000 wa tiyivhu ni 1000 wa timbuti, niku i wa hi le Karmeli a tsema woya ga tiyivhu takwe. 3 A vito ga wanuna loye ku wa hi Nabhali;+ a sati wakwe ku wa hi Abhigayili.+ A sati wakwe i wa tlharihile na a sasekile, kanilezvi a nuna wakwe, loyi a nga hi muKalebhi,+ i wa hi munhu wa xapi na a bihile.+ 4 Dhavhidha i no zvizwa le ciwuleni lezvaku Nabhali i lomu ka ku tsema a woya ga tiyivhu takwe. 5 Hikwalaho, Dhavhidha i no rumela a 10 wa majaha ka Nabhali, aku: “Fambani Karmeli. Loku mu chikela ka Nabhali mu loseni hi vito ga mina, 6 mu gumesa muku: ‘Hanya nguvhu, uva ni kurula. A ngango wa wena wonawu a wuve ni kurula zvin’we ni zvontlhe u nga nazvo. 7 Ndzi zwile lezvaku u lomu ka ku tsema a woya ga tiyivhu ta wena. A cikhati leci a varisi va wena va nga hi na hina, a hi va mahangi zvakubiha,+ ne a va lahlekelwangi hi nchumu a cikhati contlhe leci va nga hi le Karmeli. 8 Wutisa a majaha ya wena, ma ta ku byela. A majaha ya mina ma wa kume thomo mahlweni ka wena hakuva hi tile hi siku ga ginene. Ndzi kombela ku u nyika a malandza ya wena ni n’wana wa wena Dhavhidha ni cihi u to ci wona.’”+

9 Hikwalaho, a majaha ya Dhavhidha ma noya ka Nabhali ma ya mu hlawutela zvontlhe lezvi hi vito ga Dhavhidha. A cikhati leci ma nga mbheta, 10 Nabhali i no hlamula a malandza ya Dhavhidha, aku: “Himani Dhavhidha, kona himani a n’wana wa Jese? Nyamutlha ma tele a malandza ma tsutsumako a venyi va wona.+ 11 Ndzi nga teka a tipawa ta mina, ni mati ya mina, ni nyama leyi ndzi nga dayela lava va tsemako a woya ga tiyivhu ta mina ndzi nyika a vanhu va ku ne a ndzi ku tivi lomu va tako hi kona?”

12 Makunu, a majaha ya Dhavhidha ma no tlhela ma ya mu hlawutela tontlhe a timhaka leti. 13 Dhavhidha i no tekela ku byela a vavanuna vakwe, aku: “A mun’we ni mun’wani wa n’wina i wa tlhome a cipadha cakwe laha nyongeni!”+ Hikwalaho, vontlhe va no tlhoma a zvipadha zvabye, Dhavhidha yenawu a tlhoma a cipadha cakwe. Ku no suka a cipimo ca 400 wa vavanuna va famba na Dhavhidha, lava va 200 va sala ni zvijumba.

14 Ka cikhati caleco, a gin’we ga malandza gi no byela Abhigayili, a sati wa Nabhali, giku: “Dhavhidha i rumele a zvirun’wa hi le ciwuleni zvi ta losa a hosi ya hina, kanilezvi a hosi yi no zvi rukatela.+ 15 A vavanuna lavo va hi mahele zvazvinene nguvhu. A va tshukangi va hi mahela nchumu wo biha, ne a hi zangi hi lahlekelwa hi nchumu contlhe a cikhati leci hi nga hi zvin’we navo le khwatini.+ 16 Va wa ku khwatsi libhiyo ka hina, va hi vhikela wusiku ni mumu, contlhe a cikhati leci hi nga hi navo hi risa a ntlhambi. 17 Makunu wona ku u ta ku yini, hakuva ku bohilwe ku tisiwa khombo ka hosi ya hina ni ka yontlhe a yindlu yakwe.+ Yena a nga vhuni nchumu,+ niku i hava waku a nga wulawula naye.”

18 Hikwalaho, Abhigayili+ i no hatlisa a teka a 200 wa tipawa, ni tifuko timbiri ta hombe ta vhinyo, ni ntlhanu wa tiyivhu ti longiselweko, ni ntlhanu wa tiseya* ta tindzhoho to katingiwa, ni 100 wa tibholu* ta mauvha yo woma, ni 200 wa tibholu ta makuwu yo woma a rwexa timbongola.+ 19 I no gumesa a byela a malandza yakwe, aku: “Rangani phambeni ka mina; mina ndzi ta mu landzela hi le ndzhako.” Kanilezvi a nga mu byelangi nchumu a nuna wakwe, Nabhali.

20 Na a ha relela hi mbongola, na a fihletelwe hi citsunga, i no tlhangana na Dhavhidha ni vavanuna vakwe va nga kari va relela vata kakwe. 21 Dhavhidha i waku: “Hakunene ndzi zvi hlayisile mahala zvontlhe a zvilo zva inaloyi le ciwuleni. A ku na nchumu ni wun’we wakwe a nga wu vilela,+ kanilezvi yena i ndzi tlhelisela wunene hi kubiha.+ 22 Nungungulu i wa tsayise a valala va Dhavhidha* a tlhela a engeta loku goca ni mixo na ka ha hi ni wanuna* mun’we wa ka Nabhali ndzi mu tsikileko a hanya!”

23 Laha Abhigayili a nga wona Dhavhidha, i no hatlisa a chika laha mbongoleni a yawa lahasi hi nghohe mahlweni ka Dhavhidha, a korama lahasi. 24 I no khizama mikondzweni yakwe, aku: “Hosi yanga, a nandzu wa kona a wuve wa mina; tsika a nandza ga wena ga cisati gi wulawula na wena, u ingisela a magezu ya nandza ga wena ga cisati. 25 Hosi yanga, u nga cheli kota hi wanuna loyi, Nabhali,+ a nga vhuniko nchumu, hakuva i fana ni vito gakwe. A vito gakwe hi Nabhali* niku a wupumbu gi na yena. Kanilezvi, mina, nandza ga wena ga cisati, a ndzi ma wonangi a majaha ya hosi ya mina, lawa u nga ma rumile. 26 Makunu, hosi yanga, a ku khwatsi hi lezvi Jehovha a hanyako ni lezvi wena* u hanyako, hi Jehovha a nga ku vhalela+ a kuva ni nandzu wa nkhata+ ni ku ti photela* hi canja ga wena. A valala va wena ni lava va ku hlotako, hosi yanga, va wa kote Nabhali. 27 Makunu a cinyikiwo leci+ a nandza ga wena ga cisati gi ci nehileko ka hosi ya mina ci wa nyikelwe ka majaha lawa ma landzelako a hosi ya mina.+ 28 Tsetselela a cihambunyeto ca nandza ga wena ga cisati, hakuva hakunene Jehovha i ta yimisa a yindlu ya hosi ya mina yi tiya kala kupindzuka,+ hakuva a hosi ya mina yilwa a tiyimpi ta Jehovha,+ niku a ku kumiwangi kubiha mahlweni ka wena masikwini wontlhe ya wena.+ 29 Loku a munhu a suka a ku hlongolisela na a hlota a wutomi* ga wena, a wutomi* ga hosi ya mina gi ta phutselwa khwatsi lomu cikhwameni ca wutomi ca Jehovha, a Nungungulu wa wena, kanilezvi a wutomi* ga valala va wena gi ta hoxiwa kule a ku fana ni maribye ma phandiwako hi cipelupelu.* 30 Laha Jehovha a to ku mahela zvontlhe a zvilo zva zvinene lezvi a tsumbisileko hosi ya mina, a tlhela a ku yimisa a kuva murangeli wa Izrayeli,+ 31 u nga ta tizwa nandzu kutani ku ti sola* mbilwini ya wena hi kuva u halatile a nkhata wu nga hiko na nandzu ni kuva u ti photele* hi canja ga wena,+ hosi yanga. A cikhati leci Jehovha a to katekisa hosi ya mina, alakanya a nandza ga wena ga cisati.”

32 Dhavhidha i no byela Abhigayili, aku: “I wa dhumiswe Jehovha, a Nungungulu wa Izrayeli, loyi a ku rumileko u ndzi khinga nyamutlha! 33 Gi wa katekiswe a wutlhari ga wena! Nungungulu i wa ku katekise hi lezvi u nga ndzi vhalela a kuva ni nandzu wa nkhata+ ni ku ti photela* hi canja ga mina. 34 Loku zvi wa nga hi lezvo, a ku khwatsi hi lezvi Jehovha a hanyako, a Nungungulu wa Izrayeli, loyi a nga ndzi betela a ku ku mahela kubiha,+ loku u wa nga hatlangi u ndzi khinga,+ gi wa taku gica ni mixo na ku nga salangi ne ni wanuna* mun’we wa ka Nabhali.”+ 35 Dhavhidha i no amukela lezvi Abhigayili a nga mu tele nazvo, aku kakwe: “Tlhela hi kurula ndlwini ya wena. Ndzi zvi zwile lezvi u nga wula, ndzi ta maha lezvi u nga kombela.”

36 Andzhako ka lezvo, Abhigayili i no tlhela ka Nabhali a ya mu kuma na a maha mubuzo wo khwatsi i hosi lomu ndlwini yakwe. Nabhali* i wa tsakile nguvhu na a popilwe zva ku ne a nga ha ti tivi. Abhigayili a nga mu byelangi nchumu kala gica ni mixo. 37 Ni mixo, a cikhati leci a byala gi nga hangalakile, a sati wakwe i no mu byela a timhaka leto. A mbilu ya Nabhali yi no fana ni ya munhu wa kufa, a woma a ku khwatsi i ribye. 38 Loku ku hundzile cipimo ca 10 wa masiku, Jehovha i noba Nabhali afa.

39 A cikhati leci Dhavhidha a ngazwa lezvaku Nabhali i file, i te ngalo: “I wa dhumisiwe Jehovha loyi a nga yimela a mhaka ya mina+ ya ku rukatelwa hi Nabhali+ a tlhela a betela a nandza gakwe a ku maha zvilo zva kubiha.+ Jehovha i mu tlhelisele a kubiha kakwe Nabhali!” Makunu Dhavhidha i no rumela gezu ga ku ya gangisa Abhigayili kasi a maha sati wakwe. 40 Hikwalaho, a malandza ya Dhavhidha ma no chikela ka Abhigayili, le Karmeli, maku kakwe: “Dhavhidha i hi rumile kasi hi ta ku teka u ya maha sati wakwe.” 41 Abhigayili i no tekela ku suka a korama lahasi hi nghohe, aku: “Hi mina loyi, ndzi longile a kuva nandza ga ku hlambisa a mikondzo+ ya malandza ya hosi ya mina.” 42 Abhigayili+ i no hatlisa a suka a khilela a mbongola yakwe, a landzelwa hi ntlhanu wa malandza yakwe ya cisati, a famba ni zvirun’wa zva Dhavhidha a ya maha sati wakwe.

43 Dhavhidha i wa chadhile kambe na Ahinowame,+ wa le Jezreeli.+ Vontlhe va vambiri va no maha vasati vakwe.+

44 Kanilezvi Sawule i wa nyikele a n’wana wakwe, Mikali,+ a sati wa Dhavhidha, ka Palti,+ a n’wana wa Layixa, wa le Galima.

26 Hi ndzhako ka cikhati, a vavanuna va le Zife+ va nota ka Sawule le Gibheya,+ va taku: “Dhavhidha i fihlele le citsungeni ca Hakila, ci cuwukeneko ni Jeximone.”*+ 2 Hikwalaho, Sawule i no suka a relela ciwuleni ca Zife na a hi ni 3000 wa vavanuna va ka Izrayeli va zvi kotako khwatsi kulwa, va ya hlota Dhavhidha le ciwuleni ca Zife.+ 3 Sawule i no gova citsungeni ca Hakila, ci cuwukeneko ni Jeximone, kusuhani ni ruwa. Dhavhidha i wa tshama lomu ciwuleni niku i no tiva lezvaku Sawule i tile lomu ciwuleni a ta mu hlota. 4 Hikwalaho, Dhavhidha i no rumela a zvipiyawu kasi zvi ya wona ku hakunene Sawule i tile ke. 5 Dhavhidha i no suka aya laha Sawule a nga govile kona. I no ya wona laha Sawule na Abneri,+ a n’wana wa Neri, a murangeli wa butho ga Sawule, va nga etlele kona; Sawule i wa etlele hi laha cikari na a randzelwe hi masochwa yakwe. 6 Dhavhidha i no wutisa Ahimeleki, a muHiti,+ na Abhixayi,+ a n’wana wa Zeruya,+ a makabye wa Jowabe, aku: “Himani a to relela na mina wugovelweni ga Sawule?” Abhixayi a hlamula, aku: “Ndzi ta relela na wena.” 7 Hikwalaho, Dhavhidha na Abhixayi va no relela wugovelweni ni wusiku va ya kuma Sawule na a etlele laha cikari ka wugovelo, a tlhari gakwe na gi zimilwe tihlokweni takwe; Abneri ni masochwa va wa etlele va mu randzela.

8 Abhixayi i no byela Dhavhidha, aku: “Nyamutlha Nungungulu i nyikele a nala wa wena canjeni ga wena.+ Ndzi tsike ndzi mu tlhava khati gin’we basi hi tlhari ndzi mu patsa ni misava, zvi nga taza zvi lava ku ndzi phinda ga wumbiri.” 9 Kanilezvi Dhavhidha i no byela Abhixayi, aku: “U nga mu mahi nchumu wa kubiha, hakuva himani wa ku a nga tlakusa a canja gakwe a vhukela a totilweko wa Jehovha+ a nga kumi nandzu ke?”+ 10 Dhavhidha i no simama, aku: “A ku khwatsi hi lezvi Jehovha a hanyako, Jehovha ha yece i ta mu daya,+ kutani ku chikelelwa hi siku gakwe+ afa, kutani i taya yimpini a ya lova.+ 11 A zvi ringani mahlweni ka Jehovha lezvaku ndzi tlakusa a canja ga mina ndzi vhukela a totilweko wa Jehovha!+ Teka a tlhari legi gi nga tihlokweni takwe ni nghotso yakwe ya mati hi famba.” 12 Hikwalaho, Dhavhidha i no teka a tlhari ni nghotso ya mati zvi nga hi tihlokweni ta Sawule va ti fambela. I hava a nga va wona+ kutani ku vazwa, ne hambu ku khindlimuka. Vontlhe va wa etlele hakuva Jehovha i wa va etlelisile a wurongo ga tshongotshongo. 13 Dhavhidha i no tsemakanya aya ka tlhelo legi gin’wani a ya nyima hehla ka citsunga, ku sala pfhuka wa hombe cikari kabye.

14 Dhavhidha i no vitana a masochwa na Abneri,+ a n’wana wa Neri, hi gezu ga hombe, aku: “Abneri, a wu hlamuli?” Abneri a hlamula, aku: “Hi wena mani u bangulekelako hosi?” 15 Dhavhidha aku ka Abneri: “Kasi a wu wanuna wena ke? Himani a fanako na wena lomu Izrayeli? Makunu hikuyini u nga kala ku gadha a hosi ya wena? Hakuva ku wa tile a musochwa lomu wugovelweni a ta lava ku daya a hosi ya wena.+ 16 A hi zvona u nga maha. A ku khwatsi hi lezvi Jehovha a hanyako, mu fanele kufa hakuva mu tsikile ku gadha a hosi ya n’wina, a totilweko wa Jehovha.+ Makunu cuwuka lomu matlhelweni! Gi kwihi a tlhari ga hosi ni nghotso ya mati+ lezvi zvi nga hi tihlokweni takwe?”

17 Sawule i no gi tiva a ku i gezu ga Dhavhidha, aku: “I gezu ga wena lego, n’wananga, Dhavhidha?”+ Dhavhidha a hlamula, aku: “Ina, i gezu ga mina, hosi yanga.” 18 A engeta aku: “Hikuyini a hosi ya mina yi hlongoliselako a nandza ga yona?+ Cini ndzi nga maha, kona i nandzu muni ndzi nga nawo?+ 19 Hosi yanga, maha wuxinji u ingisela a magezu ya nandza ga wena: Loku ku hi Jehovha a ku kuceteleko a ku ndzi vhukela, i wa amukele a munyikelo wa mina wa tindzhoho. Kanilezvi loku ku hi vanhu va ku kuceteleko,+ va wa rukatelwe mahlweni ka Jehovha hakuva nyamutlha va ndzi hlongolile va ndzi hambanisa ni tshomba ya Jehovha,+ vaku: ‘Famba u ya khozela van’wani vanungungulu!’ 20 Makunu u nga tsiki a nkhata wa mina wu halaka laha misaveni kule ni mahlo ya Jehovha, hakuva a hosi ya Izrayeli yi fambile yi hlota a chuwani,+ a ku khwatsi hi loku yi hlongolisela hwari lomu zvitsungeni.”

21 Sawule aku: “Ndzi wonhile.+ N’wananga Dhavhidha, wuya, ndzi nga ta ha ku maha nchumu wo biha, hakuva nyamutlha u kombile lezvaku wa gi nyika lisima a wutomi* ga mina.+ Ndzi mahile wupumbu ni cihoxo co tshisa.” 22 Dhavhidha aku: “Hi legi a tlhari ga hosi. Ruma a jaha gin’we gi ta teka. 23 Jehovha hi yena a to tlhelisela a kululama+ ni kutsumbeka ka mun’we ni mun’wani, hakuva nyamutlha Jehovha i wa ku nyikele canjeni ga mina, kanilezvi mina a ndzi zvi lavangi a ku tlakusa a canja ga mina hehla ka a totilweko wa Jehovha.+ 24 A ku khwatsi hi lezvi ndzi nga gi nyika lisima a wutomi* ga wena nyamutlha, a wutomi* ga minawu a give ga lisima mahlweni ka Jehovha, a ndzi tlhatlhisa kuxanisekeni kontlhe.”+ 25 Sawule a hlamula Dhavhidha, aku: “Nungungulu i wa ku katekise, n’wananga, Dhavhidha. Hakunene u ta maha zvilo zva hombe u tlhela u hlula.”+ Dhavhidha i no suka a famba, Sawule a tlhela kaya kakwe.+

27 Hambulezvo, mbilwini yakwe, Dhavhidha i waku: “A siku gin’wani ndzi ta dawa hi Sawule. I chukwana ndzi tsutsumela+ tikweni ga vaFilistiya kasi Sawule a tsika ku ndzi hlota lomu tikweni gontlhe ga Izrayeli,+ ndzi pona canjeni gakwe.” 2 Hikwalaho, Dhavhidha ni 600 wa vavanuna+ lava a nga hi navo va no suka vaya ka Akixi,+ a n’wana wa Mawoke, a hosi ya le Gati. 3 Dhavhidha i no tshama na Akixi le Gati, zvin’we ni vavanuna vakwe, a mun’we ni mun’wani ni ngango wakwe. Dhavhidha yenawu i wa hi ni vasati vakwe va vambiri: Ahinowame,+ wa le Jezreeli, na Abhigayili,+ a muKarmeli, loyi a nga felwe hi nuna wakwe Nabhali. 4 A cikhati leci Sawule a nga byeliwa lezvaku Dhavhidha i tsutsumile aya le Gati, i no tsika ku mu hlota.+

5 Makunu Dhavhidha i no byela Akixi, aku: “Loku ndzi kumile thomo mahlweni ka wena, va wa ndzi nyike wutshamu ka gin’we ga madhoropa ya le handle, ndzi ya tshama kona. A nandza ga wena gi wa ta tshamela yini na wena lomu dhoropeni ga wuhosi ke?” 6 Hikwalaho, Akixi i no mu nyika Ziklagi,+ ka siku lego. Hi zvona zvi mahako ku Ziklagi a lumba tihosi ta ka Judha kala nyamutlha.

7 A ntsengo wa masiku lawa Dhavhidha a nga mbheta na a tshama tikweni ga vaFilistiya i lembe ni mune wa tihweti.+ 8 Dhavhidha ni vavanuna vakwe va wa suka va ya dhumela a vaGexure,+ ni vaGirze, ni vaAmaleki,+ hakuva va wa akile ka tiko gi nga sukela Telama kala Xure,+ zvi relela kala Gibhite. 9 Laha Dhavhidha a nga dhumela tiko, i wa nga siyi wa ku hanya,+ kani wanuna, kutani wasati, kanilezvi i wa teka a tiyivhu, ni tihomu, ni timbongola, ni makameli, ni tinguwo a tlhela nazvo ka Akixi. 10 Makunu loku Akixi a mu wutisa, aku: “U hlasele kwihi nyamutlha?” Dhavhidha i waku: “Ndzi hlasele le dzongeni* wa Judha”,+ kutani ku: “Ndzi hlasele le dzongeni wa Jerameeli”,+ hambu ku: “Ndzi hlasele le dzongeni wa vaKeni.”+ 11 Dhavhidha i wa nga tsiki ne mun’we wo hanya cikari ka vavanuna ni vavasati, kasi va nga tekiwi vaya Gati, hakuva i waku: “Kasi va nga hi wuleti, vaku: ‘Dhavhidha i mahile lezvi ni lezvi.’” (Hi zvalezvo a nga kari a maha contlhe a cikhati leci a nga tshama le tikweni ga vaFilistiya.) 12 Hikwalaho, Akixi i wa tsumba Dhavhidha, na aku: ‘Hakunene wa vengiwa nguvhu hi* vanhu vakwe, a vaIzrayeli; makunu i ta maha nandza ga mina kala kupindzuka.’

28 Masikwini lawo, a vaFilistiya va no hlengeleta a mabutho yabye kasi va yalwa ni vaIzrayeli.+ Hikwalaho, Akixi i no byela Dhavhidha, aku: “Wa zvi tiva khwatsi lezvaku wena ni vavanuna va wena mu ta famba na mina yimpini.”+ 2 Dhavhidha aku ka Akixi: “Hakunene wa zvi tiva lezvi a nandza ga wena gi to maha.” Akixi aku ka Dhavhidha: “Hikwalaho, ndzi ta ku maha guardhakosta wa mina contlhe cikhati”.*+

3 Makunu Samuweli i wa file, niku vontlhe a vaIzrayeli va wa mu rilile va tlhela va mu lahla le Rama, dhoropeni gakwe.+ Sawule i wa fuvisile a tin’anga ni vavhumbi lomu tikweni.+

4 A vaFilistiya va no hlengeletana, va suka va ya gova Xunemu.+ Hikwalaho, Sawule i no hlengeleta a vaIzrayeli vontlhe, va gova le Gilbhowa.+ 5 Laha Sawule a nga wona a wugovelo ga vaFilistiya, i no chava, ni mbilu yakwe yi rurumela nguvhu.+ 6 Hambu lezvi Sawule a nga wutisa Jehovha,+ Jehovha a nga zangi a mu hlamula, ne hi miloro, kutani hi Urima+ hambu hi muphrofeti. 7 Hi kugumesa, Sawule i no byela a malandza yakwe, aku: “Ndzi laveleni wasati wa n’anga+ kasi ndzi famba ndzi ya wutisa.” A malandza yakwe ma mu hlamula, maku: “Ku na ni wasati wa n’anga le En-Dhora.”+

8 Hikwalaho, Sawule i no ti cica, a boha tinguwo tin’wani, kasi va nga mu poli a famba ka wasati loye ni wusiku na a hi ni vavanuna vakwe va vambiri, a yaku: “Ndzi kombela u ndzi hlahluvela hi ku tirisa a wun’anga ga wena,+ u ndzi humesela loyi ndzi to ku byela.” 9 Kanilezvi a wasati loye i te ngalo kakwe: “Wa zvi tiva wena lezvi Sawule a nga maha, lezvaku i fuvisile a tin’anga ni vavhumbi lomu tikweni.+ Makunu hikuyini u ndzi dembelako ntlhamu* kasi ndzi dawa?”+ 10 Sawule i no hlambanya kakwe hi Jehovha, aku: “A ku khwatsi hi lezvi Jehovha a hanyako, u nga tava ni nandzu ka mhaka leyi!” 11 A wasati aku: “U lava ku ndzi ku humesela mani?” Aku: “Ndzi humesele Samuweli.” 12 Laha a wasati a nga wona “Samuweli”,*+ i no banguleka hi gezu gakwe gontlhe, aku ka Sawule: “U wa ndzi kalavelela yini? Hi wena Sawule!” 13 A hosi yiku kakwe: “U nga chavi, cini u ci wonako?” A wasati aku ka Sawule: “Ndzi wona munhu wo khwatsi i nungungulu, a humako hi lomu misaveni.” 14 Zvalezvo i no mu wutisa, aku: “I tshamisile kuyini?” A wasati aku: “Cikhosana ci humako na ci bohile a bhaji go kala mawoko.”+ Sawule i no zvi tiva lezvaku hi “Samuweli”, a se korama lahasi hi nghohe yakwe, a khizama.

15 Makunu “Samuweli” i te ngalo ka Sawule: “U ndzi karatela yini hi ku ndzi maha ndzi huma ke?” Sawule aku: “Ndzi lomu hlomulweni wa hombe. A vaFilistiya va ndzi hlomele yimpi, kanilezvi Nungungulu i sukile ka mina, a nga ha ndzi hlamuli nchumu, ne hi vaphrofeti kutani hi miloro;+ hi zvalezvo zvi ndzi mahako ndzi ku vitana kasi u ndzi byela lezvi ndzi faneleko ku maha.”+

16 “Samuweli” aku: “U ndzi wutisela yini lezvi makunu Jehovha a sukileko ka wena,+ a maha nala wa wena? 17 Jehovha i ta maha lezvi a nga phrofeta hi nomu wa mina: Jehovha i ta teka a mufumo canjeni ga wena a wu nyikela ka muakelani wa wena, Dhavhidha.+ 18 Hakuva a wu ingisangi a gezu ga Jehovha niku a wu chululangi a zanga yakwe yi vhurako hehla ka vaAmaleki;+ hi zvalezvo zvi mahako Jehovha a ku mahela lezvi nyamutlha. 19 Jehovha i ta tlhela a nyikela a vaIzrayeli na wena canjeni ga vaFilistiya,+ niku a mandziko wena+ ni vana va wena+ mu tava na mina. Jehovha i ta nyikela ni butho ga vaIzrayeli canjeni ga vaFilistiya.”+

20 Zvalezvo Sawule i nowa lahasi a ku ba hi ku chava nguvhu hi kota ya magezu ya “Samuweli”. I wa mbhelile ntamu hakuva i wa nga gangi nchumu gontlhe a siku lego ni wusiku ga kona. 21 A cikhati leci a wasati a nga tshinela ka Sawule a wona lezvaku i karatekile nguvhu, i te ngalo kakwe: “A nandza ga wena gi ingisile lezvi u nga wula; ndzi vekile a wutomi* ga mina mhangweni,+ ndzi maha lezvi u nga ndzi ruma. 22 Makunu wenawu ingisa lezvi a nandza ga wena gi lavako ku wula. Khwatsi ndzi ku nyika pawa uga kasi u kuma ntamu wa ku famba.” 23 Kanilezvi Sawule i no ala aku: “Ndzi nga taga nchumu.” Kanilezvi a malandza yakwe ni wasati va no simama ku mu kurumeta. Hi kugumesa, i no va ingisa, a suka lahasi, a tshama laha mubhedhini. 24 A wasati i wa hi ni cihon’wana co nona laha kaya, hikwalaho i no hatlisa a ci daya, a gumesa a teka mapa a vhuva, a woca tipawa to kala comelo. 25 I no phamela Sawule ni malandza yakwe vaga. Andzhako ka lezvo, va no suka va famba ni wusiku.+

29 A vaFilistiya+ va no hlengeleta a mabutho yabye wontlhe le Afeka, a vaIzrayeli na va wa govile kusuhani ni cibuka ca Jezreeli.+ 2 A tihosi ta vaFilistiya ti wa kari ti hundza ni mitlawa ya tona ya 100 ni ya 1000, niku Dhavhidha ni vavanuna vakwe va wata hi le ndzhako na Akixi.+ 3 Kanilezvi a tihosana ta vaFilistiya ti te ngalo: “A vaHebheru lava va lava yini laha?” Akixi a hlamula a tihosana ta vaFilistiya, aku: “Loyi hi Dhavhidha, a nandza ga Sawule, a hosi ya Izrayeli. Ndzi na ni lembe ni ku hundza na ndzi tshama naye.+ A ndzi se kuma cisolo ne cin’we kakwe, kusukela siku legi a nga tsutsuma ata ka mina kala nyamutlha.” 4 Kanilezvi a tihosana ta vaFilistiya ti no mu zangarela, tiku kakwe: “Tlhelisa a wanuna loyi.+ I wa tlhele ka wutshamu legi u nga mu nyika gona. U nga mu tsiki a relela na hina yimpini, a nga tshuka a ya hi jikela na hi kari hilwa.+ Hakuva hi yihi yin’wani ndlela ya ku a tsakelwa hi hosi yakwe loku ku nga hi hi tihloko ta vavanuna va hina ke? 5 A hi yena Dhavhidha loyi va nga yimbelela hi yena, na va kina, vaku:

6 Hikwalaho, Akixi+ i no vitanisa Dhavhidha, aku kakwe: “A ku khwatsi hi lezvi Jehovha a hanyako, wena u lulamile niku ndzi tsakile hi lezvi u ngata ni butho ga mina yimpini,+ hakuva a ndzi se kuma cisolo ne cin’we ka wena kusukela siku legi u nga chikela hi gona kala nyamutlha.+ Kanilezvi a tihosi leti a ti ku tsumbi.+ 7 Hikwalaho, tlhela hi kurula, u nga mahi nchumu wu to swira tihosi ta vaFilistiya.” 8 Kanilezvi Dhavhidha i te ngalo ka Akixi: “Hikuyini? Cini ndzi nga maha? Cisolo muni u ci kumileko ka nandza ga wena kusukela a siku legi ndzi nga chikela hi gona kala nyamutlha? Hikuyini ndzi betelwako a ku famba na wena ndzi yalwa ni valala va hosi ya mina ke?” 9 Akixi i no hlamula Dhavhidha, aku: “Kuwoneni ka mina, wena u lulamile a ku fana ni ngilozi ya Nungungulu.+ Kanilezvi a tihosana ta vaFilistiya ti ngalo: ‘U nga mu tsiki a famba na hina yimpini.’ 10 Makunu vhuka ni mixo nguvhu, wena ni malandza ya hosi ya wena lawa u ngata nawo, mu phindzula mu tlhela zvalezvi gi to n’we.”

11 Hikwalaho, Dhavhidha ni vavanuna vakwe va no phindzula ni mixo va tlhela tikweni ga vaFilistiya. A vaFilistiya va no kandziha vaya Jezreeli.+

30 Laha Dhavhidha ni vavanuna vakwe va nga chikela Ziklagi+ hi siku ga wunharu, va no kuma lezvaku a vaAmaleki+ va wa dhumele le dzongeni* ni Ziklagi, niku va wa hlasele a dhoropa ga Ziklagi va gi hisa hi ndzilo. 2 Va wa khomile a vavasati+ ni vontlhe va nga hi lomu dhoropeni va famba navo, kusukela ka wa mutsongwani kala ka wahombe. A va dayangi munhu, kanilezvi va no va khoma va famba navo. 3 A cikhati leci Dhavhidha ni vavanuna vakwe va nga chikela lomu dhoropeni, va no kuma lezvaku gi hisilwe ni lezvaku a vasati vabye, ni vafana vabye, ni vanhanyana vabye va khomilwe va famba. 4 Hikwalaho, Dhavhidha ni vavanuna vakwe va no sangula ku rila hi gezu ga hombe vaza va karala va vhumala ni ntamu wa kurila. 5 Ku wa khomilwe ni vasati va Dhavhidha va vambiri, Ahinowame, wa le Jezreeli, na Abhigayili, loyi a nga felwe hi nuna wakwe Nabhali, a muKarmeli.+ 6 Dhavhidha i wa karatekile nguvhu hakuva a vavanuna vakwe va waku va lava ku mu gandla hi maribye, hakuva vontlhe* va wa bayisekile nguvhu hi lezvi a vafana vabye ni vanhanyana vabye va nga khomilwe. Kanilezvi Dhavhidha i no ti tiyisa hi Jehovha, a Nungungulu wakwe.+

7 Andzhako ka lezvo, Dhavhidha i no byela mupristi Abhiyatari,+ a n’wana wa Ahimeleki, aku: “Hi ngata ni efodhe laha.”+ Hikwalaho, Abhiyatari i no neha a efodhe ka Dhavhidha. 8 Dhavhidha i no wutisa Jehovha,+ aku: “Ndzi landza a ntlawa lowu wa vaphangi ke? Kona ndzi ta va kuma?” Nungungulu a mu hlamula, aku: “Wu landze hakuva u ta wu kuma, u tlhatlhisa zvontlhe lezvi zvi tekilweko.”+

9 Zvalezvo Dhavhidha i no suka ni 600 wa vavanuna+ lava a nga hi navo, va famba kala nkoveni wa Bhesora. Ku no sala vavanuna vo kari laho. 10 Dhavhidha i no simama ku va landza na a hi ni 400 wa vavanuna, kanilezvi lava va 200 va nga karele nguvhu laha ka ku va tsandzeka ni ku tsemakanya a nkova wa Bhesora va no sala.+

11 Va no kuma muGibhite lomu mafusini va famba naye ka Dhavhidha. Va no mu nyika zvakuga ni mati ya kunwa, 12 ni cikhemu ca bholu* ya makuwu yo woma, ni tibholu timbiri ta mauvha yo woma. Loku a gile i no tlhela a kuma ntamu hakuva ku wa hundza a masiku manharu ni wusiku ginharu na a nga sega nchumu ne kunwa mati. 13 Dhavhidha i no mu wutisa, aku: “U nandza ga mani? Kona uta hi kwihi?” A hlamula aku: “Ndzi muGibhite. Ndzi khumbi ya muAmaleki, kanilezvi a n’winyi wa mina i ndzi tsikile hakuva ndzi wa babya ka masiku manharu ma hundzileko. 14 Hi dhumele le dzongeni* wa vaKereti,+ ni le tikweni ga Judha, ni le dzongeni ga Kalebhi+ hi tlhela hi hisa Ziklagi hi ndzilo.” 15 Hikwalaho, Dhavhidha aku kakwe: “U ta ndzi heleketa ka ntlawa lowu wa vaphangi ke?” A muGibhite aku: “Loku u hlambanya ka mina hi Nungungulu lezvaku u nga ta ndzi daya, ni lezvaku u nga ta ndzi nyikela ka n’winyi wa mina, ndzi ta ku heleketa ka ntlawa lowu wa vaphangi.”

16 Hikwalaho, i no mu heleketa aya lomu va nga hangalakile kona va tata tiko, na vaga ni kunwa va kulungela hi kota ya muphango wontlhe wa hombe lowu va nga phangile tikweni ga vaFilistiya ni tikweni ga Judha. 17 Makunu Dhavhidha i no va hlasela kusukela ni mixo na ga ha te phum kala gi pela; a ku ponangi munhu+ saseka a 400 wa vavanuna va nga tsutsuma hi makameli. 18 Dhavhidha i no tlhatlhisa zvontlhe lezvi a vaAmaleki va nga tekile,+ a tlhatlhisa ni vasati vakwe va vambiri. 19 A ku na cilo cabye ci nga kiyela, kusukela ka ca citsongwani kala ka cahombe. Va no tlhatlhisa a vafana vabye, ni vanhanyana vabye, ni muphango;+ Dhavhidha i no tlhatlhisa zvontlhe lezvi va nga tekile. 20 Hikwalaho, Dhavhidha i no teka a tiyivhu tontlhe ni tihomu tontlhe. A vavanuna vakwe va no teka a tiyivhu leto ni tihomu leto va ti rangisa phambeni ka zvifuyo zvabye, vaku: “Lowu muphango wa Dhavhidha.”

21 Dhavhidha i no wuya ka vavanuna lava va 200, lava va nga karele nguvhu laha ka ku va tsandzeka ku famba naye, va sala le nkoveni wa Bhesora.+ A vavanuna lavo va no khinga Dhavhidha ni lava a nga hi navo. Laha Dhavhidha a nga chikela kabye i no va wutisa kuvhuka kabye. 22 Hambulezvo, a vavanuna vontlhe vo biha ni vo kala ku vhuna nchumu, lava va nga hi cikari ka lava va nga famba na Dhavhidha, va te ngalo: “Kota lezvi va nga kala ku famba na hina hi nga ta va nyika nchumu ka muphango lowu hi wu tlhatlhisileko. A mun’we ni mun’wani wabye i wa teke a sati wakwe ni vana vakwe basi a famba.” 23 Kanilezvi Dhavhidha i te ngalo: “Vamakabye, mu nga mahi lezvo hi zvilo lezvi Jehovha a hi nyikileko. I hi vhikele a tlhela a nyikela canjeni ga hina a vaphangi lava va nga hi vhukela.+ 24 Himani a to yima na n’wina ka zvezvo? A ciavelo ca loyi a nga yile yimpini ci ta fana ni ca loyi a nga sele ni zvijumba.+ Vontlhe va ta kuma ciavelo.”+ 25 Kusukela ka siku lego, i no yimisa a mhaka leyo kota cileletelo ni nayo lomu Izrayeli kala nyamutlha.

26 A cikhati leci Dhavhidha a nga tlhela Ziklagi, i no pambula zvokari ka muphango a rumelela a madhota ya Judha, lawa ma nga hi vanghana vakwe, aku: “Amukelani a cinyikiwo* leci ca muphango wa valala va Jehovha.” 27 I no rumelela lava va nga hi Bheteli,+ ni lava va nga hi Ramote wa Negebhe,* ni lava va nga hi Jatiri,+ 28 ni lava va nga hi Arowera, ni lava va nga hi Sifmote, ni lava va nga hi Extemowa,+ 29 ni lava va nga hi Rakale, ni lava va nga hi madhoropeni ya vaJerameeli,+ ni lava va nga hi madhoropeni ya vaKeni,+ 30 ni lava va nga hi Horma,+ ni lava va nga hi Bhoraxane, ni lava va nga hi Ataka, 31 ni lava va nga hi Hebroni,+ ni ka wontlhe a matshamu lawa Dhavhidha ni vavanuna vakwe va nga fambela ka wona.

31 Makunu a vaFilistiya va wa kari valwa ni vaIzrayeli.+ A vavanuna va ka Izrayeli va no tsutsuma a vaFilistiya, ku dawa a vanhu vo tala Citsungeni ca Gilbhowa.+ 2 A vaFilistiya va no hlongolisela Sawule ni vana vakwe va tshinela kusuhani kabye. Va no daya Jonatani,+ na Abhinadhabha, na Malkixuwa, a vana va Sawule.+ 3 A yimpi yi no hisa nguvhu ka Sawule, a kumiwa hi vaphandi va mipaxa niku i no bayisiwa nguvhu hi vaphandi va mipaxa.+ 4 Makunu Sawule i no byela a muweleli wa matlhari yakwe, aku: “Hlomula a cipadha ca wena u ndzi tlhava hi cona, kasi a vavanuna lava vo kala ku mahiwa wukwera*+ va nga ndzi tlhavi, va ndzi maha zvilo zva xapi.* Kanilezvi a muweleli wa matlhari yakwe a nga vhumelangi, hakuva i wa chava nguvhu. Hikwalaho, Sawule i no teka a cipadha a ti hoxela ka cona.+ 5 Laha a muweleli wa matlhari yakwe a nga wona lezvaku Sawule i file,+ yenawu i no ti hoxela laha ka cipadha cakwe, afa naye. 6 Hikwalaho, Sawule, ni vana vakwe va vanharu, ni muweleli wa matlhari yakwe, ni vontlhe a vavanuna vakwe va nofa zvin’we ka siku lego.+ 7 Laha a va ka Izrayeli lava va nga hi le nkoveni ni lava va nga hi le tikweni ga Jordhani va nga wona lezvaku a vavanuna va ka Izrayeli va tsutsumile ni lezvaku Sawule ni vana vakwe va file, va no sangula ku huma lomu madhoropeni va tsutsuma.+ Andzhako ka lezvo, a vaFilistiya va nota va ta nghena va tshama ka wona.

8 Ka siku gi nga landzela, laha a vaFilistiya va ngata kasi ku ta phanga a zvilo zva vanhu lava va nga file, va no kuma Sawule ni vana vakwe va vanharu na va file Citsungeni ca Gilbhowa.+ 9 Hikwalaho, va no mu tsema hloko, va teka a matlhari yakwe, va rumela vanhu tikweni gontlhe ga vaFilistiya lezvaku va famba va hangalasa mahungu lawo+ lomu tindlwini* ta zvifananiso zvabye+ ni ka vanhu. 10 Hi kulandzela, va no veka a matlhari yakwe ndlwini ya zvifananiso zva Axtarte, va gumesa va hayeka a cirumbi cakwe khurisini ga Bhet-Xane.+ 11 A cikhati leci a vahanyi va Jabhexe-Gileyadhe+ va ngazwa lezvi a vaFilistiya va nga mahile Sawule, 12 a tinhenha tontlhe ti no suka ti famba a wusiku gontlhe ti ya teka a cirumbi ca Sawule ni zvirumbi zva vana vakwe lezvi zvi nga hi laha khurisini ga Bhet-Xane. Va no wuya Jabhexe va ta zvi hisa kona. 13 Andzhako ka lezvo, va no teka a marambu yabye+ va ya ma lahla lahasi ka sinya* le Jabhexe,+ va pfhunga* a 7 wa masiku.