Fevereiro

Jehovha i lava ku wontlhe a malandza yakwe ma hanya na ma tsakile. I kusuhani ni mun’we ni mun’wani wa hina niku wa zvi wona loku hi nga xalalangi kutani loku hi mbhelile ntamu. (Lis. 145:18, 19) Alakanyela lezvi Jehovha a nga kombisa zvona kukhatala hi lezvi a nga ti zwisa zvona muphrofeti Elija ni lezvi a nga mu vhunisa zvona. A muphrofeti loyi wo tsumbeka i hanyile ka nguva yo bindza nguvhu matin’wini ya Izrayeli. Ka cikhati leco, a malandza ya Jehovha ma wa kari ma xanisiwa nguvhu, niku Elija hi yena a nga laviwa nguvhu hi vanhu va ntamu nguvhu va nga kala va nga mu randzi Jehovha. (1 Tih. 19:1, 2) A cin’wani kuzvilava ci nga karata Elija ku ti wona na a hi yena yece a nga tirela Jehovha. (1 Tih. 19:10) Jehovha i no tekela ku mu vhuna. I no rumela Ngilozi yi ya ka Elija yi ya mu tiyisekisa lezvaku i wa nga hi yece, ku wa hi ni vaIzrayeli vo tala va nga ha tsumbeka va tirela Jehovha! (1 Tih. 19:5, 18) Jesu i no tiyisekisa vapizani vakwe hi lirandzo aku va ta kuma ngango wa hombe nguvhu wa vakhozeli va Jehovha. (Mar. 10:29, 30) Jehovha, a Papayi wa hina wa le tilweni, i tsumbisa ku i ta va vhuna lava va mu tirelako. — Lis. 9:10. w21.06 8-9 ¶¶3-4

A votala va hi nyenya hi ku ha tirisa Bhibhiliya kasi ku komba vanhu lezvaku a zvin’wani va gondzisiwako lomu tichichini tabye a hi lisine. A varangeli va wukhongeli va gondzisa vanhu lezvaku Nungungulu i tsayisa vakubiha hi ku va hisa le tilweni. A gondzo leyi, va yi tirisa kasi ku fumela vanhu. Kanilezvi, hina kota malandza ya Jehovha, hi khozelako Nungungulu wa lirandzo, hi gondzisa vanhu lezvaku lezvo a hi lisine. A varangeli va wukhongeli kambe va gondzisa lezvaku a muhefemulo a wufi. Loku lezvo zvi wa hi lisine, zvi wa nga ta laveka ku a vanhu va vhuxiwa. Makunu lezvi ma nga mawunwa, hi vhuna vanhu a ku tiva lezvaku a gondzo leyo yi tumbulukela ka wuhedheni, a yi lomu ka Bhibhiliya. Hambu lezvi a wukhongeli go tala gi gondzisako lezvaku lezvi zvi humelelako wutomini ga hina zvi sina zvi tsalilwe kambe hi Nungungulu, hina hi gondzisa lezvaku a munhu i tlhatlhekile ku hlawula leci a ci lavako — a nga hlawula ku tirela Nungungulu loku a zvi lava. Zvini va mahako a varangeli va wukhongeli loku va wona ku ha va paluxa? A kutala ka zvikhati vo zangara va luma ni lowu wa lahasi! Loku hi randza lisine, hi fanele ku kholwa hi tlhela hi ingisa lezvi Nungungulu a wulako. (Joh. 8:45, 46) Hi nga ta tshuka hi tsika lisine, a ku fana na Sathani. A hi tshuki hi maha nchumu wu nga zwananiko ni lezvi hi zvi kholwako. (Joh. 8:44) Nungungulu i lava ku a vanhu vakwe va ‘venga lezvi zva kubiha’ va “namarela ka lezvi zva zvi nene” a ku fana na Jesu. — Rom. 12:9; Mah. 1:9. w21.05 10-11 ¶¶10-11

Ahati loku hi pola lezvaku hi na ni matshandza kutani wunavenave? Hi nga zvi kota ku cica! Mupostoli Pawule i te lava va ‘phasilweko’ hi Sathani zva koteka ku va chukula ntlhan’wini wakwe. (2 Tim. 2:26) U nga rivali ku Jehovha i ni ntamu a ku hundza Sathani. Hikwalaho, loku hi vhumela ku a hi vhuna, hi nga chukula ka ni wihi ntlhamu wa Sathani. Wutshan’wini ga ku chukula ka mitlhamu ya Sathani, zvi lava ku hi fambela kule nayo futsi. Lezvo hi ngo zvi kota ntsena hi ku vhuniwa hi Nungungulu. Hikwalaho, siku ni siku kombela Jehovha kasi a ku vhuna ku pola ku a matshamela lawo yo biha ma sangulile ku mila lomu maalakanyweni ni lomu mbilwini ya wena ni ka lezvi u zvi mahako ke. (Lis. 139:23, 24) Kulula u n’watseka kasi u ngavi ni matshandza ni wunavenave. Ku hundza malembe ya talela ga cima Sathani na a hi muhloti. Kanilezvi, zvezvanyana i ta bohiwa a guma a lovisiwa. (Mav. 20:1-3, 10) Hi ci rindzela hi mahlo yo pswhuka a cikhati leco. Loku gi nga se chikela a siku lego, tshama u ma vhulile, u ti wonela a mitlhamu ya Sathani. Wana u vhuka na ulwa ku u ngavi munhu wa matshandza ni wunavenave. Ti yimisele ku ‘kaneta Sathani i ta ku tsutsuma’. w21.06 19 ¶¶15-17

Jehovha wa tsaka loku a munhu a amukela lisine la Bhibhiliya a tlhela a sangula ku bhulela van’wani. (Mav. 23:15, 16) Jehovha a ngo ku tsaka loku a wona vanhu na va chumayela va tlhela va gondzisa hi kuhiseka! Hi cikombiso, hambu lezvi ku nga hi ni ntungu hi lembe ga ntiro ga 2020, ku fambisilwe a 7 705 765 wa zvigondzo zva Bhibhiliya, laha ku nga vhuniwa a 241 994 wa vanhu lezvaku va ti nyikela ka Jehovha va tlhela va bhabhatisiwa. A vapizani lavo va vaswa, vonawu va ta fambisa zvigondzo va maha vapizani van’wani. (Luka 6:40) Handle ko kanakana, Jehovha wa tsaka laha a hi wonako na hi chumayela hi tlhela hi gondzisa vanhu lezvaku vava vapizani. A lisine hi ku a ku maha vapizani i ntiro wo karata. Kanilezvi, hi ku vhuniwa hi Jehovha hi nga maha cipandze ca hina kasi ku vhuna vanhu lezvaku va randza Papayi wa hina wa le tilweni. Zvi ngo yini a ku ti vekela mixuvo ya ku sangula cigondzo u tlhela u fambisa, hambu loku cova cin’we basi! Phela loku ho wutisa vontlhe hi va kumako a ku a va zvi lavi ku gondza Bhibhiliya ke, hi nga tshuka hi hlamala mihandzu ya kona. w21.07 6-7 ¶¶14-16

Hosi Dhavhidha i humesile zvilo zvo tala nguvhu kasi zvi tiriselwa ku aka tempeli. (1 Kro. 22:11-16) Loku hi nga ha hi na ntamu wa ku aka yindlu yo kari ya hlengeletano, hi nga seketela ntiro lowo hi minyikelo ya hina hi laha zvi kotekako hi kona. Hi nga tlhela hi vhuna vaswa kambe hi wutlhari legi hi gi kumileko. Xungetano hi kuhana, wona cikombiso hi vekelweko hi mupostoli Pawule. I rambile Timote kasi va tira zvin’we kota varumiwa a tlhela a mu gondzisa lezvi a nga chumayelisa zvona ni lezvi a nga gondzisisa zvona. (Miti. 16:1-3) Lezvi Pawule a nga gondzisa Timote zvi mu vhunile ku yenawu a zvi kota ku chumayela ni ku gondzisa khwatsi. (1 Kor. 4:17) Timote yenawu i no guma a gondzisa van’wani lezvi a nga gondza ka Pawule. w21.09 12 ¶¶14-15

Zvini hi nga gondzako ka mupizani Apolosi na mupostoli Pawule? A vavanuna lava va vambiri va wa yi tiva khwatsi Mitsalo. Va wa gondzisa khwatsi va tlhela va tiviwa nguvhu. Vontlhe va wa chumayele va maha vapizani vo tala. Kanilezvi, ne mun’we wabye a nga zama ku palisana ni mun’wani. (Miti. 18:24) Hi lisine, loku ku hundzile cikhati co kari Apolosi na a sukile le Korinte, Pawule i no mu kuca ku a tlhela. (1 Kor. 16:12) Apolosi i gi tirisile khwatsi a wutlhari gakwe — a gi tirisela ku kanela mahungu ya ma nene ni ku tiyisa vamakabye. Hi nga tiyiseka ku Apolosi i wa hi munhu wo ti koramisa kambe. Hi cikombiso, lomu ka Bhibhiliya a ci kona ci kombako ku i khunguvanyekile a cikhati leci Akwila na Prisila va nga “mu tlhamusela khwatsi a ndlela ya Nungungulu.” (Miti. 18:24-28) Pawule i wa wu tiva khwatsi a ntiro wa wu nene lowu wu nga mahilwe hi Apolosi. Kanilezvi, i wa nga karateki a alakanya ku va ta zvi wonisa ku i wa paliwa hi Apolosi. Ka wusungukati legi Pawule a nga nyika vamakabye va bandla ga le Korinte, zva woneka khwatsi ku i wa hi munhu wo ti koramisa, wo tiva kugumelwa kakwe, ni wo olova. — 1 Kor. 3:4-6. w21.07 18-19 ¶¶15-17

Adhamu na Evha va tsikile ku ingisa Nungungulu ha womu. Hi cigelo leco, zva ringana futsi lezvi va susilweko ngangweni wa Jehovha. Kanilezvi, ahati vana vabye ke? Hi kota ya lirandzo, Jehovha i mahile malulamiselo kasi a vana vo ingisa va Adhamu na Evha zvi koteka ku a va teka va lumba ngango wakwe. I mahile lezvo hi ku tirisa muphahlo wa N’wana wakwe a belekilweko yece. (Joh. 3:16) Hi ku tirisa muphahlo wa Jesu, Jehovha i hlawula 144 000 wa vanhu vo tsumbeka a va maha vana vakwe. (Rom. 8:15-17; Kuv. 14:1) Ahandle ka lezvo, ku ni vanhu vo tala nguvhu vo tsumbeka va ingisako va maha kurandza ka Nungungulu. A vanhu lavo, va rindzela kuva zviro zva ngango wa Jehovha andzhako ka loku va ringilwe hi khati go gumesa kumbheleni ka 1000 wa malembe. (Lis. 25:14; Rom. 8:20, 21) Hambu zvezvi va wona Jehovha, a Muvangi wabye, kota “Papayi”. (Mat. 6:9) Lava va to vhuxiwa hi ka vafileko kambe va ta nyikiwa cikhati ca ku gondza va tiva lezvi Jehovha a lavako a ku va maha. Lava va to hlawula ku ingisa zvileletelo zvakwe vonawu va ta gumesa vava zviro zva ngango wakwe. w21.08 5 ¶¶10-11

Mupostoli Pawule i wa nyikilwe ntiro wa kuchumayela, niku hi malembe yo tala i wa wona ntiro lowo kota wona wa lisima nguvhu. I wa chumayela “kubaseni ni hi muti ni muti”. (Miti. 20:20) Hi lisine, i wa londzowota ni wihi mole kasi ku chumayela! Hi cikombiso, na a ha rindzela vanghana vakwe le Atensi, i no sangula ku chumayela a mahungu ya manene ka ntlawa wo kari wa vanhu, niku a vokari va no ma amukela. (Miti. 17:16, 17, 34) Hambu a cikhati a nga “bohilwe hi machini,” Pawule i no chumayela lava va nga hi kona laha kusuhani. (Filp. 1:13, 14; Miti. 28:16-24) Pawule i wa ci tirisa khwatsi a cikhati cakwe. I wa tolovela ku ramba van’wani lezvaku va famba naye kuchumayeleni. Hi cikombiso, ka liendzo lakwe lo sangula la wurumiwa, i tekile Johani Marku; ka leli la wumbiri, i tekile Timote. (Miti. 12:25; 16:1-4) Handle ko kanakana Pawule i mahile zvontlhe a nga zvi kota kasi ku va gondzisa ku xaxameta bandla, ku maha tiendzo ta wurisi, ni kuva vagondzisi va vanene.— 1 Kor. 4:17. w22.03 27 ¶¶5-6

A vokari a va kholwi ku a zvilo zvi no vangiwa hi Nungungulu hakuva ve va kholwa lezvi va zvi wonako basi. Hambulezvo, va kholwa ku a zvilo zvokari zvi nga wonekiko zvi kona, zvo kota moya. A kukholwa loku a Bhibhiliya gi wulawulako hi kona ku patsa zvitiyisekiso zva zvilo zvin’wani “zvi nga wonekiko” lezvi ‘hakunene zvi nga kona.’ (Mah. 11:1) Zvi lava cikhati ni kutikarata kasi ku gondza hi tlhela hi hlola lezvi zvi tiyisekisako. Kanilezvi, a kutala ka vanhu a va zvi lavi a ku ti nyika ntiro lowo. Loyi a kalako a nga hloli hi yece, a nga tsutsumela ku ti byela ku Nungungulu a nga kona. Andzhako ka loku a titlhari to kari ta siyensiya ti hlolile khwatsi, ti gumesile ti kholwa ku Nungungulu hi yena a nga vanga zvilo zvontlhe. Va wa ti byela ku a zvilo a zvi vangiwangi hi Nungungulu hi lezvi va nga kala ku gondzisiwa le Univhersidhadhe basi. Hambulezvo, zvezvi va gondzile va tiva Jehovha va tlhela va mu randza. Hi lisine, hontlheni hi fanele ku tiyisa kukholwa ka hina ka Nungungulu, kani hi gondzile zvo kota kwihi. w21.08 14 ¶1; 16-17 ¶¶6-7

Jesu i hlawutele mufananiso wa n’wana a nga pengile kasi ku komba lezvi Jehovha a zvi randzisako zvona ku va mahela wuxinji van’wani. A n’wana loye i wa sukile laha kaya a ya “hangalasa a tshomba yakwe yontlhe hi ku hanya wutomi go biha”. (Luka 15:13) Hi ndzhako ka cikhati i no ti sola hi zvilo zvo biha lezvi a nga maha, a ti koramisa a wuya kaya. Zvini a nga wa ta maha a papayi wa kona? Jesu i te: “Na a ha hi kule, a papayi wakwe i no mu wona a mu zwela wusiwana, a tsutsuma a ya mu bharasara a mu pswopswa.” A madhala wa kona a nga mu dhanisangi a n’wana wakwe. I no mu mahela wuxinji a mu tsetselela a tlhela a mu amukela hi mandla mambiri laha ngangweni wakwe. Phela a n’wana loye i wa wonhile zva tanani mu ta wona. Hambulezvo, lezvi a nga ti solile, papayi wakwe i mu tsetselele. A papayi loye wa tipswalo laha ka mufananiso lowu i yimela Jehovha. Hi mufananiso lowo wo khumba mbilu, Jesu i kombile zvi ku dlunya lezvaku Jehovha i tshama a longile ku tsetselela lava va ti solako hi mbilu yontlhe loku va wonhile. — Luka 15:17-24. w21.10 9 ¶4, ¶6

Inyamutlha, a varangeli va wukhongeli go tala va maha zvontlhe va zvi kotako kasi a vanhu va nga zvi tivi ku Nungungulu i na ni vito. Va gi susile ka maBhibhiliya yabye, niku ka zvikhati zvin’wani, va betela ni ku gi tirisiwa tichichini tabye. Hi mani a nga kanetako ku a Vakustumunyu va Jehovha hi vona voce va kombisako cichavo ci faneleko hi vito ga Jehovha va tlhela va gi dzundza ke? Hi vhuna vanhu a ku tiva vito ga Nungungulu a ku hundza ni gihi wukhongeli. Hi ndlela leyo, hi maha zvontlhe zvi nga ntan’wini wa hina kasi hi hanya hi lezvi a vito ga hina gi wulako zvona: A Vakustumunyu va Jehovha. (Isa. 43:10-12) Hi gandlile cipimo ca 240 wa timiliyoni ta Bhibhiliya Wuhundzuluseli ga misava yiswa, legi gi nga ni vito ga Jehovha ka matshamu lawa gi susilweko lomu ka maBhibhiliya man’wani. Hi humesa mabhuku kambe ma seketelwako ka Bhibhiliya hi 1000 wa tirimi ni kuhundza, lawa ma tirisako vito ga Jehovha! w21.10 20-21 ¶¶9-10

Hi khozela Jehovha loku hi vhuna vamakabye va nga ni cilaveko. Jehovha i tsumbisile ku katekisa a vaIzrayeli lava va nga vhuna zvisiwana. (Deut. 15:10) Khati ni khati hi vhunako makabye a nga ni cilaveko, Jehovha i zvi wonisa ku khwatsi hi Yena hi mu nyikako. (Mav. 19:17) Hi cikombiso, a cikhati leci a maKristu ya le Filipi ma nga rumela cinyikiwo ka Pawule na a hi paxweni, yena i ci vitanile ku “muphahlo wo amukeleka wu xalalisako Nungungulu”. (Filp. 4:18) Ehleketa hi vamakabye va bandla ga wena, u ti wutisa lezvi: ‘I kona wa ku ndzi nga mu vhuna?’ Jehovha wa tsaka loku a hi wona na hi tirisa cikhati ca hina, ntamu wa hina, wutlhari ga hina ni titshomba ta hina kasi ku vhuna lava va nga ni cilaveko. Ka yena, lezvo zvi maha cipandze ca ku mu khozela. (Jak. 1:27) A wukhozeli ga lisine gi lava cikhati ni kutikarata. Kanilezvi a gi bindzi. (1 Joh. 5:3) Hikuyini? Hi ku hi zvi maha hi ku randza Jehovha ni vamakabye. w22.03 24 ¶¶14-15

Kasi hi va zwela wusiwana a vamakabye va hina, zvi lava ku hi ehleketa hi zvikarato va kumanako nazvo. Hi cikombiso, a makabye wo kari wa cisati a ngava ni mababyi ya hombe. Hambu loku a nga tshameli ku ti khala, a nga tsaka nguvhu loku hi mu vhuna hi cokari. Hi nga ti wutisa lezvi: Hi nga mu vhuna ku bhika kutani ku basisa laha kaya ke? Xungetano hi makabye wo kari wa wanuna a nga luza ntiro hi nga ti wutisa lezvi: Loku ho mu vhuna hi malana yo kari — hi ndlela ya ku a nga zvi tivi a ku hi hina hi nga mu nyika — a ku zvi nga mu chovhanyana kala kuza a kuma ntiro wun’wani ke? A hi faneli ku rindzela kala a vamakabye va kombela civhuno hi kona hi to va vhuna. A ku fana na Jehovha, hi nga va vhuna na va nga se hi khalela hi nchumu. Phela siku ni siku Jehovha i hi tsuwukisela gambo gakwe ne na hi nga mu kombelangi! A gambo a gi vhuni lava va kombisako kubonga basi, gi vhuna hontlheni. Lezvi Jehovha a hi nyikako lezvi zvi lavekako ka hina, a hi cikombiso ca ku wa hi randza? A ho ku mu randza Jehovha hi lezvi a hi mahelako zvilo zva zvinene a tlhela a hi nyika zvilo zvo tala! w21.09 22-23 ¶¶12-13

A lirandzo li nga mbheliko la Jehovha li mu kuca ku hi tsetselela. Loku Jehovha a wona munhu a mahileko ciwonho na a ti sola a tlhela a tsika ku maha ciwonho, a lirandzo lakwe li nga mbheliko li mu kuca ku a mu tsetselela. Dhavhidha i wulile lezvi hi Jehovha: ‘A nga hi maheli nchumu hi lipimo la zviwonho zva hina, ge hambu ku hi tlhelisela maringano ni zvigoho zva hina.’ (Lis. 103:8-11) Dhavhidha i zvi zwile lezvi zvi bayisisako zvona a ku biwa hi livhalo. Kanilezvi, i tlhelile a zvi wona ku Jehovha i longile ku “tsetselela”. Cini ci kucako Jehovha a ku a hi tsetselela? A hlamulo hi wu kuma ka mutsalo wa nyamutlha. Kunene, kota lezvi Dhavhidha a nga wula ka mukhongelo wakwe, Jehovha i hi tsetselela hakuva a lirandzo lakwe a li mbheli ka lava va mu kombelako ku a va tsetselela. Loku hi maha ciwonho, zvi lavekile niku zvi nene a ku hi tizwa nandzu hi kota ya ciwonho leco. Lezvo zvi nga hi kuca ku hi ti sola hi tlhela hi maha lezvi zvi lavekako kasi ku lulamisa zvihoxo zva hina. w21.11 5-6 ¶¶11-12

Jehovha wa gi randza nguvhu a vito gakwe, niku i lava ku vontlhe va gi kombisa cichavo. (Isa. 42:8) Hambulezvo, ku hundza cipimo ca 6000 wa malembe na gi chakisiwa. (Lis. 74:10, 18, 23) Lezvo zvi sangulile a cikhati leci Dhiyabho (zvi wulako ku “Mulumbeti”) a nga lumbeta Nungungulu aku i tsona Adhamu na Evha lezvi va zvi lavako. (Gen. 3:1-5) Kusukela kwalaho, Jehovha i kari a lumbetiwa ku a vanhu wa va tsona lezvi zvi lavekako ka vona kasi va tsaka. Jesu i wa karateka hi lezvi a vito ga Papayi wakwe gi nga kari gi chakisiwa. Jehovha hi yena a nga ni fanelo ya ku fuma laha misaveni ni le tilweni, a ku na mun’wani, niku i fuma hi ndlela ya yi nene a ku hundza vontlhe. (Kuv. 4:11) Kanilezvi, Sathani i kho a zama ku kalavela vanhu kasi va alakanya ku Nungungulu a nga na fanelo ya ku fuma. Na ku nga hi kale, a mhaka leyi yi ta lulamisiwa yi mbhela. Ka cikhati leco, vontlhe va ta zvi tiva lezvaku Jehovha hi yena a zvi kotako ku fuma khwatsi ku hundza vontlhe niku a Mufumo wakwe hi wona woce wu to neha kurula ni kutshamiseka laha misaveni. w21.07 9 ¶¶5-6

Zvi tolovelekile niku zvi nene ku a hloko ya ngango yi lwela ku a sati ni vana vakwe va kuma zvakuga ni tinguwo to enela ni ko tshama kona. A wu na mali yo xava zvo ti hanyisa? Ha zvi tiva ku leco ciyimo co nonoha. Hambulezvo, ni loku a ciyimo leco co bindzisa kuyini, u nga ci londzowota kasi ku tiyisa kukholwa ka wena. Khongela ka Jehovha, u lera magezu ya Jesu ma nga ka Matewu 6:25-34 u tlhela u ehleketa hi wona. Ehleketa hi zvikombiso zva vanhu va masikwini ya hina zvi kombako ku Jehovha wa va hlayisa lava va tshamako na va khomekile ntirweni wakwe. (1 Kor. 15:58) Lezvo zvi ta maha ku u tiyiseka lezvaku Jehovha, a Papayi wa wena wa le tilweni, i ta ku vhuna, a ku fana ni lezvi a nga vhuna van’wani va nga hi ka ciyimo co fana ni ca wena. Laha u to wona lezvaku Jehovha wa ku vhuna wutomini ga wena, a kukholwa ka wena ku ta tiya kasi u zvi kota ku timisela zvikarato zva hombe cikhatini ci tako. w21.11 21 ¶3, ¶6

A maKristu yo tala ma vhukelwa ma tlhela ma kumana ni tixanisa ta tixaka tontlhe wutomini gabye gontlhe. A kutala ka wona ma zvi kota ku timisela ma simama ku chumayela ndzeni ka zviyimo lezvo hi lezvi a kukholwa kabye ku tiyisiwako nguvhu hi hakhelo ya kutlhatlhisa. Wona cikombiso ca mupostoli Johani. I tsumbekile a chumayela lisine hi Kristu ni hakhelo ya kutlhatlhisa hi cipimo ca 60 wa malembe. Laha a nga hi kwalomo ka 100 wa malembe, i wa chaviwa nguvhu lomu Mufun’weni wa Roma laha ka kuza va mu vhalela cihlaleni ca Patmosi. Kasi i wa no wonha yini? A nga wonhangi nchumu, i wo “wulawula hi Nungungulu ni ku nyika wukustumunyu ha Jesu” basi. (Kuv. 1:9) Hi nga wona cikombiso leci ca ci nene mhakeni ya ku kombisa kukholwa ni kutimisela! Ka mabhuku lawa Johani a nga tsala, i kombisa ku wa mu bonga nguvhu Jesu ni ku wa yi nyika nguvhu lisima a hakhelo ya kutlhatlhisa. I maha lezvo hi ku kumbuka a hakhelo ya kutlhatlhisa kutani mabhindzu ya yona hi 100 wa makhati ni ku hundza lomu ka mabhuku lawo. (1 Joh. 2:2) Ha zvi wona khwatsi ku Johani i wa yi nyika nguvhu lisima a hakhelo ya kutlhatlhisa. w21.04 17 ¶¶9-10

Jehovha i wa lava ku a vanhu vakwe va kombisa wunene ka lava va nga ni wulima go kari. Hi cikombiso, i byelile vaIzrayeli ku va nga rukateli munhu wofa tindleve. A kurukatela loko ku wa patsa ku mu dzukisela kutani ku mu xuvela zvakubiha. Phela i wa nga ta zvizwa lezvi va wulako hi yena, maku i wa nga hi na ndlela ya ku ti wulela cokari. Hikwalaho, a ku maha lezvo yi wa tava xapi ya hombe nguvhu ka munhu wofa tindleve! Ahandle ka lezvo, ka Levi 19:14 hi kuma lezvaku Jehovha i byelile malandza yakwe ku ma wa nga faneli ku ‘veka a cikhunguvanyiso mahlweni ka cikhumu’. A bhuku go kari gi wula lezvi xungetano hi vanhu va nga hi ni wulima go kari: “Le Oriente Médio a vanhu [lavo] va wa tolovela ku xololiwa va tlhela va xanisiwa.” Kuzvilava a vanhu vo kari va xapi va wa veka nchumu kasi wu phinganyeta munhu wa kufa matihlo a tawa a ti bayisa kutani na va fela ku awa va ta hleka basi. A hi kubiha ka zvona! Ka nayo lowu wu nga ka Levi 19:14, Jehovha i wa vhuna vanhu vakwe a ku wona lezvaku va wa fanele ku va zwela wusiwana lava va nga hi ni wulima go kari. w21.12 8-9 ¶¶3-4

Laha Jakobe a nga hi kona, i wo karateka hi ku alakanya ku dhevhi a makabye wakwe wa ha hi ni civiti. Hikwalaho, i no khongela ka Jehovha hi mbilu yontlhe xungetano hi mhaka leyo; a guma a rumela zvinyikiwo zvo tala ka Esawu. (Gen. 32:9-15) Hi kugumesa, Jakobe i no ranga hi yena a kombisa cichavo ka makabye wakwe a cikhati leci va nga kumana. I no khizama, a korama mahlweni ka Esawu — a nga koramangi khati gin’we, ne mambiri, mave ntlhanu wa makhati! Jakobe i no ti koramisa, a maha zvilo zvi nga vhuxa kurula ni makabye wakwe! (Gen. 33:3, 4) Hi gondza cokari ka lezvi Jakobe a nga ti longiselisa zvona kasi a ya kumana na Esawu ni ka lezvi a nga maha a cikhati va nga kumana. I rangile hi ku ti koramisa a kombela Jehovha kasi a mu vhuna. A nga khongelangi a guma a kondla mawoko, i no maha zvontlhe a nga zvi kota kasi a tlhangana ni makabye wakwe hi ndlela ya kurula. Laha va nga kumana, a nga zamangi ku komba Esawu a ku hi mani a nga ni razawu laha ka vona. Leci Jakobe a nga ci lava, kuva ni kurula ni makabye wakwe. Zvi ngo yini a ku u pimanyisisa cikombiso ca Jakobe? — Mat. 5:23, 24. w21.12 25 ¶¶11-12

Loku u alakanya lezvaku Jesu i file kasi ku susa zviwonho zva wena, u nga tshuka u ti byela lezvi: ‘Ye mina! Ndzova mani mina a kuza Jesu a fela mina?’ Cini ci nga mahako ku u ti zwisa lezvo? A mbilu ya hina yo kala ku mbhelela yi nga hi kalavela, hi tizwa na hi nga vhuni nchumu kutani zvi nga ringani a ku hi randziwa. (1 Joh. 3:19) Loku hi ti zwisa lezvo, zvi lava ku hi ti alakanyisa lezvaku “Nungungulu wa hombe a ku hundza timbilu ta hina”. Hambu loku hi ti kalavela hi ku Jehovha a nga hi randzi niku a nga ta hi tsetselela, yena wa hi randza niku i ta hi tsetselela zvi mbhela. Zvo lava ku hi ti kholwisa basi lezvaku Jehovha wa hi randza. Hi nga maha lezvo hi ku gondza a Mhaka yakwe, hi khongela ni ku ti tlhanganisa ni vamakabye, zvontlhe lezvo hi zvi maha hi kukhandzakanya. Hikuyini zvi nga zva lisima a ku maha lezvo? Zvi ta maha ku uya u ma zwisisa khwatsi a matshamela ya ma nene lawa Jehovha a nga nawo. U ta zvi zwisisa ku wa ku randza nguvhu. Loku u ehleketa hi Mhaka ya Nungungulu siku ni siku, zvi ta ku vhuna ku u wona zvilo hi ndlela ya yi nene, u ‘lulameta’ mawonela ni mbilu ya wena.— 2 Tim. 3:16. w21.04 23-24 ¶¶12-13

Kasi hiva ni kukholwa ko tiya, ku laveka zvo hundza kuva ni wutivi. Hi fanele ku ehleketa hi lezvi hi gondzako. Wona cikombiso ca mutsali wa Lisimu 77. I wa karatekile hakuva i wa pimisa ku yena ni vaIzrayeli-kuloni va wa nga ha tsakelwi hi Jehovha. Lezvo zvi wa maha ku ni wurongo a nga gi kumi. (Vhesi 2-8) Zvini a nga maha? I no byela Jehovha aku: ‘Ndzi ta ehleketa hi mitiro ya wena yontlhe, ndzi alakanyela hi zvimaho zva wena.’ (Vhesi 12) A mutsali wa lisimu leli i wa zvi tiva khwatsi lezvi Jehovha a nga mahele vanhu vakwe cikhatini ci hundzileko, kanilezvi makunu i wa ti wutisa lezvi: “Nungungulu i rivele kuva ni tipswalo ke? Kutani i tsikile ku hi hawukela hi kota ya zanga yakwe ke?” (Vhesi 9) A mutsali wa lisimu i no ehleketa hi mitiro ya Jehovha a tlhela a alakanya lezvaku Nungungulu i kombisile wuxinji ni tipswalo cikhatini ci hundzileko. (Vhesi 11) Give gihi wuyelo ga kona? A mutsali wa lisimu i no tiyiseka lezvaku Jehovha i wa nga ta tsika vanhu Vakwe. (Vhesi 15) w22.01 30-31 ¶¶17-18

Jehovha i ti zwisa kuyini hi malandza yakwe yo tsumbeka lawa ma fileko? I va xuva nguvhu; i zvi lava nguvhu a ku va wona kambe! (Joba 14:15) Hi nga alakanyela lezvi a mu xuvisako zvona a munghana wakwe Abrahama! (Jak. 2:23) Kutani Mosi, loyi a nga wulawula naye “na va cuwukene”! (Ekso. 33:11) Ne a ha ha wuli lezvi a zvi xuvisako zvona a kuzwa Dhavhidha ni van’wani na va yimbelela tisimu tabye ta sasekela ga cima ta ku dhumisa Jehovha! (Lis. 104:33) Hambu lezvi a vanghana lava va Nungungulu va fileko, a nga va rivali. (Isa. 49:15) Wa va alakanya khwatsi ni wumunhu gabye gontlhe. Ka siku go kari i ta va vhuxa, a yizwa kambe a mikhongelo yabye yo huma mbilwini a tlhela a tsaka hi ku va mu khozela. Loku u felwe hi munhu u nga mu randza, hi xuva ku a ku tiva lezvo zvi ku chavelela ni ku ku tangalisa. A cikhati leci a zvilo zvi nga wonheka le Edheni, Jehovha i wa zvi tiva ku na a nga se lulamisa ciyimo, a zvilo zvi wa ta ranga hi ku bindza nguvhu. Phela Jehovha wa gi nyenya wubihi, wukanganyisi, ni xapi yontlhe yi nga kona laha misaveni. w21.07 10 ¶11; 12 ¶12

Loku hi randza vamakabye, ho kombisa kubonga hi hakhelo ya kutlhatlhisa. Hikuyini? Hi ku Jesu i nyikele wutomi gakwe kasi ku vhuna hina ni vamakabye va hina kambe. Lezvi a nga vhumela kufa hi kota ya vona, hi ku va lisima nguvhu ka yena. (1 Joh. 3:16-18) Hi kombisa lirandzo ka vamakabye va hina hi lezvi hi hanyisako zvona navo. (Efe. 4:29, 31–5:2) Hi cikombiso, ha va vhuna loku va babya kutani loku va hi zvikaratweni, a ku patsa ni loku va welwe hi khombo ga ntumbuluko. Hambulezvo, zvini hi faneleko ku maha loku a makabye wo kari a hi khunguvanyisa hi lezvi a nga maha kutani ku wula? U tolovela ku mu vekela civiti ke? (Levi 19:18) Loku ku hi ku wa veka civiti, ingisa wusungukati legi: “Simamani ku timiselana ni ku tsetselelana hambu loku a munhu a hi ni cigelo ca ku sola mun’wani. A ku fana ni lezvi Jehovha a nga mu tsetselela, n’winawu mahani zvalezvo.” (Kol. 3:13) Khati ni khati hi tsetselelako makabye, hi komba a Papayi wa hina wa le tilweni lezvaku ha yi nyika lisima a hakhelo ya kutlhatlhisa. w21.04 18 ¶¶12-13

Zva koteka ku na hi tira yi nga chayi ntirweni wa Jehovha, niku zva koteka ku na hi gondzisile votala kala kuza va bhabhatiswa. Kanilezvi, ha zvi zwisisa ku ni cihi ci nga hi fambela khwatsi, hi no vhuniwa hi Jehovha. Ka cikombiso ca Apolosi na mupostoli Pawule hi gondza nchumu wun’wani, waku: Loku hi hi ni wutihlamuleli ga hombe lomu bandleni, hi ni ndzhwalo wa hombe wa ku vhuvhumisa kurula. Lisine futsi, ha bonga nguvhu loku a madhota ni malandza ma hi vhuna ku hanya hi kurula hi tlhela hi zwanana laha bandleni hi ku hi nyika wusungukati gi seketelwako lomu ka Mhaka ya Nungungulu ni ku yisa kupima ka Kristu Jesu, na ku nga hi ka vona venyi! (1 Kor. 4:6, 7) Mun’we ni mun’wani wa hina i na ni wutlhari go kari a nyikilweko hi Nungungulu. Hambulezvo, hi nga tshuka hi ti zwisa ku lezvi hi mahako ne a zvi vhuni nchumu. Kanilezvi, a zvilo zva zvitsongwani lezvi u zvi mahako kasi laha bandleni kuva ni kurula zvi fana ni lihindza li rungileko a nguwo yo saseka yi tiya. Ngha hontlheni hi ti karatela ku susa ni yihi ndzhohwana ya moya wa mapalisana. A hi maheni zvontlhe hi zvi kotako kasi ku a bandla gi hanya hi kurula gi tlhela gi zwanana. — Efe. 4:3. w21.07 19 ¶¶18-19

Wenawu u nga tiyiseka lezvaku u ta tlhela u ma wona maxaka ya wena. A kurila ka Jesu a cikhati leci a nga chavelela vanghana vakwe va nga felwe cikombiso ca ku wa zvi lava nguvhu ku vhuxa vafileko! (Joh. 11:35) U nga tiyisa lava va felweko. Jesu i rilile na Marta na Mariya a tlhela a va ingisela ni ku va tiyisa. (Joh. 11:25-27) Hinawu hi nga maha zvezvo ka lava va karatekako. A dhota go kari ga ku hi Dan gi tshamako le Austrália, gi wula lezvi: “Andzhako ka ku felwa hi sati wa mina, ndzi wa lava ku tiyisiwa. A vamakabye vo tala ni vasati vabye va wa tshama na va longile ku ndzi ingisela. Va wa ndzi tsika ndzi rila, niku va wa nga karateki loku va ndzi wona na ndzi rila. Va ndzi vhunile hi zvilo zvo kongoma, zvo kota ku hlazva movha wa mina, ku ndzi xavela zvakuga, ni ku ndzi bhikela ka zvikhati lezvi ndzi nga kala ndzi nga zvi koti. Niku va khongele nguvhu na mina. Va kombile lezvaku vanghana va lisine tlhelo vamakabye va ‘pswalelweko ku vhunetela kuxanisekeni’.” — Mav. 17:17. w22.01 16 ¶¶8-9

Jehovha i lava ku zvi hi fambela khwatsi wutomini. (Mav. 4:20-22) Loku a hi nyika wusungukati hi ku tirisa Mhaka yakwe, mabhuku ya hlengeletano kutani makabye wo buvha, o kombisa lezvaku wa hi randza. (Mah. 12:9, 10) Veka kupima ka wusungukati ga kona, na ku nga hi ka lezvi u nga nyikisiwa zvona. Ka zvikhati zvin’wani, hi nga ti zwisa ku a wusungukati legi hi nga nyikiwa a hi nyikiwangi hi ndlela ya yi nene. Lisine ku loyi a nyikako wusungukati yenawu i fanele ku zvi maha hi ndlela ya ku zvi olova ku gi amukela. (Gal. 6:1) Hambulezvo loku hi nyikiwa wusungukati, i chukwana ku hi veka kupima ka wusungukati ga kona, hambu loku hi ti zwisa ku i wa fanele ku hi nyika hi ndlela ya yi nene. Hi nga ti wutisa lezvi: ‘Hambu loku ndzi nga xalali hi lezvi a nga ndzi nyikisa zvona, a ku ci kona ndzi nga gondzako ka lezvi a nga wula? A ku ndzi nga tsika cihoxo ca loyi a nga ndzi nyika wusungukati, ndzi maha lezvi a nga wula ke?’ Zvi wa tava zvi nene nguvhu ka hina a ku zama ku vhuneka hi ni gihi wusungukati hi nyikiwako. w22.02 12 ¶¶13-14

Jehovha wa zvi tiva ku zvi teka cikhati niku zvi lava kutikarata kasi ku tsika maalakanyo ni mahanyela ya hava. (Lis. 103:13, 14) Hambulezvo, hi ku tirisa Mhaka yakwe, ni moya wakwe, ni hlengeletano yakwe, Jehovha wa hi nyika wutlhari ni ntamu a tlhela a hi vhuna kasi hi zvi kota ku cica. Tirisa Bhibhiliya kasi u ti hlola khwatsi. A Mhaka ya Nungungulu yi fana ni woni; yi nga hi vhuna ku hlola lezvi hi zvi pimisako, lezvi hi wulawulako ni lezvi hi mahako. (Jak. 1:22-25) Jehovha i tshama a longile ku ku vhuna. Wa yi tiva a ndlela ya yi nene ya ku ku vhuna niku wa zvi tiva lezvi zvi nga mbilwini ya wena. (Mav. 14:10; 15:11) Hikwalaho ti tolovete ku khongela ni ku gondza Mhaka yakwe siku ni siku. Tiyiseka lezvaku a milayo ya Jehovha yi nene nguvhu. Zvontlhe lezvi Jehovha a hi kombelako ku maha zva hi vhuna. Lava va hanyako hi milayo yakwe va tizwa khwatsi, va hanyela co ci tiva niku va na ni litsako la lisine. — Lis. 19:8-11. w22.03 4 ¶¶8-10

A cikhati hi akako ni ku hlayisa matshamu ya ku khozela ka wona, ho khozela Jehovha. A Bhibhiliya gi wula lezvaku a ntiro wa ku aka tabhernakeli ni zvibya zva gona wu wa hi ntiro wo basa. (Ekso. 36:1, 4) Ni nyamutlha, Jehovha i wona ntiro wa hina wa ku aka tiSalawu ta Mufumo ni miako yin’wani kota ntiro wo basa. A vamakabye vo kari va mbheta cikhati co tala na va hi ka mitiro leyo. Ha wu bonga nguvhu a ntiro lowu va wu mahako! Hambulezvo, va tlhela va tira kuchumayeleni kambe. A vokari va nga ha lava ni ku teka wuphayona. A madhota ya bandla ma nga komba ku ma wu seketela a ntiro lowo hi ku kala ma nga mahi mihoni ya ku yimisa vamakabye lavo vo ti tsitsirita kota maphayona loku va ringanelwa. Kani hi na ni wutlhari ga kuaka kani a hi nago, hontlheni hi nga vhunetela ku hlayisa ni ku basisa miako leyo. w22.03 22 ¶¶11-12