Jehovha wa wu nyika lisima a “Amen” wa wena

“VONTLHE VA TA HLAMULA, VAKU: AMEN!”

A gezu “amen” gi wula ku “a zvive zvona,” kutani “hakunene.” Gi sukela ka gezu-tshinya ga ciHebheru gi wulako ku “kutsumbeka.” Ka zvikhati zvin’wani gi wa tirisiwa lomu ka ku xuxa timhaka. Loku a munhu a hlambanyile, i wa wula ku “amen” kasi ku tiyisekisa ku lezvi a zvi wulileko lisine niku i wa rwala nandzu wa lezvi zvi nga wuliwa. (Mitse. 5:22) Loku a wula ku “amen” laha ko tala vanhu, i wo engetela cigelo ca ku a simama ku tsumbeka ka magezu yakwe. — Neh. 5:13.

A cikombiso co hlamalisa xungetano hi kutirisiwa ka gezu “amen”, ci kumeka ka cipimo 27 ca bhuku ga Dhewuteronome. Andzhako ka loku a vaIzrayeli va nghenile Tikweni ga Citsumbiso, zvi lavile ku vaya nyima cikari ka Citsunga ca Ebhali ni ca Gerizima kasi ku ya ingisela a Nayo na wu gondziwa. Va wa nga yeli kuya ingisela basi, kanilezvi va wa fanele ku wula ku va wa wu vhumele kambe a Nayo lowo. Va mahile lezvo hi ku hlamula vaku “Amen!” loku ku leriwa lezvi va nga wa ta tshovela loku va nga wu ingisi. (Dhewu. 27:15-26) Hi nga alakanyela a magezu ya vanhu va tsandza vahlayi — vavanuna, ni va vasati, ni zvivanana — na va kari va hlamula gi gezu ga hombe! (Jox. 8:30-35) Handle ko kanakana a va tshukangi va ma rivakelwa a magezu va nga wula siku lego. A vaIzrayeli lavo va tsumbekile ka magezu yabye, hakuva a Bhibhiliya gi li: ‘Na Izrayeli i no khozela Jehovha wontlhe masiku ya Joxuwa, ni ka masiku wontlhe ya masingalakati lawa ma hanyileko andzhako ka kufa ka Joxuwa, lava va nga wa tiva mitiro yontlhe leyi Jehovha a nga wa yi maha ka vaIzrayeli.’ — Jox. 24:3.

Jesu yenawu i tirisile gezu “amen” kasi ku tiyisekisa ku lezvi a nga zvi wula lisine; kanilezvi i zvi mahile hi ndlela yo hlawuleka. Wutshan’wini ga ku wula ku “amen” andzhako ka magezu ma wulilweko hi wokari, Jesu i tirisile gezu “amen” (gi hundzuluselweko ku “ndza tiyisa”) na a lava ku wula zvilo zvo kari, kasi ku khanyisa ku lezvi a nga lava ku wula lisine. Ka makhati man’wani i wa phinda aku “amen amen.” (Mat. 5:18; Joh. 1:51) Lezvo zvi wa tiyisekisa lava a nga bhula navo lezvaku a magezu yakwe ma wa hi lisine lo mbhelela. Zvi wa ringana ku Jesu a wula zvilo na a tiyiseka hi ndlela leyo hakuva hi yena a nga ni fanelo ya ku tatisa zvitsumbiso zvontlhe zva Nungungulu. — 2 Kor. 1:20; Kuv. 3:14.

‘VONTLHE VAKU: AMEN! VA DHUMISA JEHOVHA’

A vaIzrayeli vonawu va tirisile gezu “amen” loku va kari va dhumisa Jehovha ni loku va maha mikhongelo. (Neh. 8:6; Lis. 41:13) Lava va nga kari va ingisela mukhongelo lowo, loku vaku “amen” va wa komba lezvaku va vhumela lezvi zvi nga wuliwa. Loku vontlhe va nga hi laho va maha lezvo, va wo patseka va tlhela va ti buza hi ku dhumisa Jehovha. Lezvo hi zvona zvi nga maheka a cikhati leci Hosi Dhavhidha a nga neha Arke ga Jehovha le Jerusalema. Ka festa yi nga mahiwa hi kulandzela, i mahile mukhongelo wa ku sukela mbilwini wu nga tsaliwa kota lisimu ka bhuku ga 1 Kronekele 16:8-36. Vontlhe va nga hi kona va kucekile laha ka kuza ‘vaku: Amen! va dhumisa Jehovha.’ Zvi te dlunya lezvaku va wa tsakile hi ku khozela Jehovha na va hi zvin’we.

A maKristu ya zana ga malembe go sangula wonawu ma wa tirisa a gezu “amen” a cikhati ma nga kari ma dhumisa Jehovha. A vatsali va Bhibhiliya va gi tsalile makhati yo tala ka mapapilo yabye. (Rom. 1:25; 16:27; 1 Ped. 4:11) A bhuku ga kuvhululelwa gi tlhela gi kombisa tingilozi na ti hi le tilweni na ti dhumisa Jehovha tiku: “Amen! Dhumisani Jehovha!” (Kuv. 19:1, 4) A maKristu yo sangula ma wa tolovela ku wula ku “amen” andzhako ka mikhongelo yi nga mahiwa mitlhanganweni yabye. (1 Kor. 14:16) Hambulezvo, va wa nga gi phindaphindi kota mukhuwo, va wa ranga hi ku zvi pimisa khwatsi.

HIKUYINI A “AMEN” WA WENA WU NGA NI LISIMA?

Andzhako ka loku hi wonile lezvi a malandza ya Jehovha ma nga kari ma gi tirisisa zvona a gezu “amen”, makunu ha zvi zwisisa ku hikuyini zvi nga zva lisima a ku gumesa mukhongelo hi ku “amen”. Loku hiku “amen” a cikhati hi gumesako a mukhongelo wa hina wutsumbu, hi komba lezvaku lezvi hi nga wula a hi hlakani. Loku hi kuceka ku wula ku “amen” ka mukhongelo wu mahiwako hi mun’wani — hambu loku hi nga zwati gezu — hi komba lezvaku ha zvi seketela lezvi zvi nga wuliwa ka mukhongelo lowo. Wona cin’wani ci mahako ku a “amen” wa hina wuva wa lisima.

Wu komba ku a hi hlakani ne a hi endzi hi maalakanyo loku hi kari hi khozela. A cikhati ku mahiwako mukhongelo ho khozela Jehovha. A hi mu khozeli hi ku wula ku “amen” basi, kanilezvi ni hi lezvi hi dembisako zvona ndleve loku ku mahiwa mukhongelo. Loku hi lava ku a “amen” wa hina wuva wa lisine, zvi ta hi kuca ku kombisa cichavo a cikhati ku mahiwako mukhongelo hi tlhela hi ingisela khwatsi lezvi zvi wuliwako.

Wu hi boha hiva nyandza yin’we kota vakhozeli. Ka mukhongelo wu mahiwako mahlweni ka vanhu, a bandla gontlhe gizwa zvilo zvalezvi zva zvin’we. (Miti. 1:14; 12:5) A cikhati hi kucekako ku hlamula zvin’we ni vamakabye va hina hi ku “amen”, hi tiyisa wumun’we ga hina. Kani hi wula zvi zwala, kutani hi wulela mbilwini, a “amen” wa hina wu maha ku Jehovha a zvi lava nguvhu a ku hi mahela lezvi hi mu kombelako.

Hi dhumisa Jehovha. Jehovha wa zvi wona zvontlhe hi mahako kasi ku mu khozela — hambu zvova zvi tsongwani nguvhu. (Luka 21:2, 3) Wa zvi wona ku cini ci hi kucako niku zvini zvi nga mbilwini ya hina. Hambu loku ho ingisela mutlhangano hi telefone, a “amen” wa hina wa wuzwa Jehovha. A cikhati hi wulako ku “amen,” hi patsana ni lava va nga bandleni hi dhumisa Jehovha.

A “amen” wa hina wu nga wonekisa ku khwatsi a hi wa nchumu, kanilezvi wu na ni lisima la hombe nguvhu. A encyclopedia yo kari ya Bhibhiliya yi li: “Hi gezu legi ga gin’we, a malandza ya Nungungulu ma nga kombisa kutsumba, ku seketela, ni lezvi hi le mbilwini ma zvi rindzelako.” Hi xuva ku contlhe cikhati a “amen” hi wu wulako wu tsakisa Jehovha. — Lis. 19:14.