Civhuno ka vavasati va xanisiwako

Lawa magezu yo sangula ya ndzima: “As mulheres e a sua segurança – o que diz a Bíblia”, yi nga ka Jw.org. Magumo ka ndzima leyo, ku na ni link ya ku u nga chisa ka yona a PDF wa ndzima leyo niku zvi nga koteka ku u gumesa u gandla mahungu lawo ka ciphephana u ci petsa ci maha mune wa mapajina. A makabye wo kari wa le Estados Unidos, wa ku hi Stacy, i wula lezvi: “Ndzi gandlile tikopiya to kari, niku mina ni makabye mun’wani wa cisati, hi no teka tikopiya hi famba nato ka wutshamu ku nga hanya vavasati va nga lava kuvhikeleka lomu cipandzeni ca bandla ga mina.”

A wokari a nga tira laho i no hi kombela ku hi mu nyika tikopiya to kari kasi a ya avela vavasati va nga hanya ka wutshamu lego. Kota wuyelo ga kona, ku no nyikelwa 40 wa zviphephana ni kuhundza zvin’we ni 30 wa makartawu ya jw.org. Ka khati gin’wani hi nga tlhela ka wutshamu lego, a wahombe wa kona i no komba ku i wa xuva ku a vavasati va nga hanya ka wutshamu lego va kombiwa lezvi a cigondzo ca Bhibhiliya ci mahisiwako zvona.

Stacy ni vamakabye van’wani va vambiri va cisati va noya ka gin’wani wutshamu ku nga hanya vavasati va nga lava kuvhikeleka, niku va nova ni mabhindzu yo fana. Ka wutshamu lego va no nyikela ntlhanu wa tikopiya ta ciphephana leco va tlhela va kombeliwa tin’wani. A mutiri wo kari wa laho i te: “A ciphephana leci ci ta vhuna a vavasati va laha.” A engeta, aku: “Zva hi tsakisa lezvi.” Ka khati gin’wani va nga endzela wutshamu lego, ku no hlengeletana vavasati vo tala kasi va wona lezvi a cigondzo ca Bhibhiliya ci mahisiwako zvona niku a vavasati vambiri va no wula lezvaku va wa tsakela kuya mutlhangan’weni wa bandla Salaweni ya Mufumo, kumbheleni ka vhiki gi nga landzela.

Stacy i wula lezvi: “Zva hi hlamalisa nguvhu lezvi a ndzima leyi yo saseka va nga yi amukelisa zvona. Loku yi gandliwa yi gumesa yi petsiwa, yi maha ndlela ya yinene ya ku chumayela mahungu ya Mufumo, nguvhunguvhu ka vavasati va xanisiwako. A zvo ku hi khumba a ku wona lezvi a vanhu va tsakisako zvona a cikhati leci va amukelako mahungu lawa. Ha tsaka nguvhu hi ku wona lezvi Jehovha a katekisisako zvona a kutikarata ka hina ka ku hlota vavasati lavo hi va chumayela a mahungu ya manene.”