“Hlayisa a wumun’we ga moya”
MUPOSTOLI Pawule i kucile maKristu ya le Efesusi lezvaku ma simama ku “timiselana hi lirandzo, [ma] pinyamela a ku hlayisa a wumun’we ga moya cibohweni ca kurula”. — Efe. 4:2, 3.
A “wumun’we” kutani kubohana loku hi nga nako ka “moya”. Lezvo zvi wula ku i handzu wa ntamu lowu Nungungulu a wu tirisako. Hambulezvo, kota lezvi Pawule a tlhamuseleko, a wumun’we lego gi lava ku hlayisiwa. Himani a faneleko ku gi hlayisa? A muKristu mun’we ni mun’wani i fanele ku maha cipandze cakwe kasi “ku hlayisa a wumun’we ga moya”.
Kasi ku fananisa, a hi zvi veke laha ka ku a wokari i ku nyika movha wa wuswa. Wu wa tava ntiro wa mani a ku wu khatalela kasi wu simama wu hi wunene? A hlamulo wa dlunyateka! U wa nga ta mu nyika nandzu loyi a nga ku nyika movha lowo loku wu wonheka hi ku ngha u nga wu hlayisangi khwatsi.
Hi kufanana, hambu lezvi a wumun’we ga wuKristu gi nga cinyikiwo ci tako hi ka Nungungulu, wutihlamuleli ga mun’we ni mun’wani wa hina a ku gi hlayisa. Loku hi nga zwanani ni makabye wo kari, hi fanele ku ti wutisa ku: ‘Xana ndza maha cipandze ca mina kasi ku hlayisa a wumun’we ga wuKristu hi ku lulamisa mazunga lawa’?
‘PINYAMELA KU HLAYISA’ WUMUN’WE
Lezvi Pawule a nga tsala zvi hi vhuna ku wona ku a hi contlhe cikhati zvi to hi olovela ku hlayisa kurula ni vamakabye va hina, nguvhunguvhu loku a wokari a hi kandzihele citihwana. Xana a ku hlayisa wumun’we zvi wula ku khati ni khati hi khunguvanyisiwako hi wokari hi fanele kuya hi ya bhula naye hi cikarato leco? Ahihi. Ti wutise lezvi: ‘A ku vhuxa ngurumuza hi cikarato leci zvi ta vhuvhumisa wumun’we kutani zvi to vanga tin’wani tiholova?’ Ka zvikhati zvin’wani, zvi ngava chukwana a ku zvi mita ni mari kutani ku tsetselela. — Mav. 19:11; Mar. 11:25.
Ti wutise lezvi: ‘A ku vhuxa ngurumuza hi cikarato leci zvi ta vhuvhumisa wumun’we kutani zvi to vanga tin’wani tiholova?’
Kota lezvi zvi tsalilweko hi mupostoli Pawule, a hi simameni ku “timiselana hi lirandzo”. (Efe. 4:2) A bhuku go kari gi wula lezvaku a magezu lawo ma nga hundzuluselwa maku: “A hi va amukeliseni zvalezvi va nga tshamisa zvona.” Lezvo zvi wula ku hi fanele ku vhumela ku a vamakabye va hina vawonhi a ku fana na hina. Lisine ku hi ti karatela ku ‘ambala munhu muswa’. (Efe. 4:23, 24) Kanilezvi, i hava cikari ka hina a zvi kotako ku maha lezvo hi kumbhelela. (Rom. 3:23) Loku hi vhumela lisine lelo, zvi ta hi olovela a ku kombisa lihlazva-mbilu hi tsetselela van’wani, hi ndlela leyo, hi “hlayisa a wumun’we ga moya”.
A cikhati leci hi lulamisako mazunga, hambu kova hi le mbilwini, hi simama ku ti buza hi ‘ciboho ca kurula’. A gezu ga ciGreki gi hundzuluselweko giku ‘ciboho ca kurula’ ka Va Le Efesusi 4:3 gi hundzuluselwe giku “mahlakala” ka Va Le Kolosi 2:19. A mahlakala misiha yo tiya yi tlhavinyetako marambu. Hi kufanana, a kurula ni lirandzo hi vamakabye zvi ta hi vhuna ku simama hiva ni wunghana navo hambu loku hi tshuka hi khunguvanyisana.
Hikwalaho, loku u khunguvanyisiwa hi makabye, ti karatele ku mu zwela wusiwana wutshan’wini ga ku mu solasola. (Kol. 3:12) Kota lezvi a vanhu vontlhe va nga mbhelelangiko, kuzvilava wenawu u khunguvanyisile wokari ka khati go kari. A ku alakanya lezvo, zvi ta ku vhuna ku maha cipandze ca wena kasi “ku hlayisa a wumun’we ga moya”.