Zviwutiso zva vagondzi

“Maalakanyo” muni lawa Jehovha a to chela timbilwini ta vafumeli zvezvanyana?

Xungetano hi kusangula ka kuxaniseka ka hombe, Kuvhululelwa 17:16, 17 i wula lezvi: “A 10 wa timhondzo leti u nga ti wona, ni civandza, zvi ta venga a cibhayi zvi ci phanga zvi ci maha cimbyiri. Va taga a nyama ya cona va tlhela va ci hisa ndzilweni ciswa ci ku bhi. Hakuva Nungungulu i chelile timbilwini tabye a ku maha maalakanyo yakwe, ina, a ku maha maalakanyo yabye ya man’we, hi ku nyikela a mufumo wabye ka civandza, kala a magezu ya Nungungulu ma tatiseka.” Cikhatini ci hundzileko, a mabhuku ya hina ma wa wula ku a “maalakanyo” lawa Jehovha a to chela timbilwini ta vafumeli ya ku va lovisa wukhongeli ga mawunwa.

Hambulezvo, ku laveka ku ku chukwatisiwa zvokari. A “maalakanyo” lawa Jehovha a to chela timbilwini ta vafumeli ya ku va “nyikela a mufumo wabye ka civandza”. Kasi u zwisisa lezvi zvi to tatisekisa zvona lezvo, wona a zviwutiso zvi landzelako.

Himani a wuliwako ka ciphrofeto leci? “A cibhayi” ci vitaniwa kambe ku i “Bhabhuloni wa Hombe”; ci yimela a mufumo wa misava yontlhe wa wukhongeli ga mawunwa. A “civandza co pswhuka” cikombiso ca hlengeletano yi hlayisako kurula yi wumbilweko hi khati go sangula hi 1919 kota Liga das Nações niku zvezvi yi vitaniwa ku ma Nações Unidas. (Kuv. 17:3-5) A “10 wa timhondzo” ti yimela mifumo yontlhe yi seketelako a civandza.

Kuzwanana muni ku nga kona cikari ka cibhayi ni civandza co pswhuka? A cibhayi ci “tshamile” hehla ka civandza, ci ci katekisa ni ku ci kucetela hambu ku ci fumela.

Zvini zvi to humelela cibhayi? A civandza zvin’we ni 10 wa timhondzo leti ti ci seketelako zvi ta “venga a cibhayi” laha ka kuza zvi phanga a titshomba ta cona tontlhe ni ku paluxa a wubihi ga cona. Zvi ta tatisa kulamula ka Jehovha xungetano hi cona, lezvi zvi wulako ku, ci ta loviswa hi kumbhelela. (Kuv. 17:1; 18:8) Lawo ma tava magumo ya tihlengeletano ta wukhongeli gontlhe ga mawunwa. Kanilezvi, lezvo na zvi nga se maheka, Jehovha i ta kuca vafumeli ku va maha zvilo zva ku zvi wa nga se tshuka zvi maheka matin’wini ya kufuma ka vanhu.

Zvini lezvi Jehovha a to kuca vafumeli lezvaku va maha? I ta chela “maalakanyo” yakwe timbilwini ta 10 wa timhondzo, lezvi zvi wulako lezvaku “ti nyika civandza [co pswhuka] a ntamu wa tona ni wuhosi” — ku nga ma Nações Unidas. (Kuv. 17:13) Ehleketa hi ku lezvo zvi wula yini. Xana a vafumeli va vanhu va to halahala va boha ku nyikela ntamu ni wuhosi gabye ka civandza? A ku kala ni ku vala! A ciphrofeto leci ci komba lezvaku hi Nungungulu wutsumbu a to va kucetela ku va maha lezvo. (Mav. 21:1; fananisa na Isaya 44:28.) A ku a kucica loko ku ta maheka hi kutsongwani-kutsongwani? Ahihi! Zvi wonekisa ku khwatsi zvi tava zva cinghanghalanghangha, hi kuhatlisa. Andzhako ka lezvo, a civandza leci ci to ngha ca ha hi ni mahofuhofu ya ku kuma wukosi, ci ta maha kulamula ka Jehovha hehla ka tihlengeletano ta wukhongeli ga mawunwa hi ku ti lovisa ti ku bhi, ti nga ha tshuki tiva kona kambe.

Zvini hi to rindzela ku zvi maheka hi kulandzela? A hi faneli ku rindzela ku wona mahungu ma wulawulako hi ku a vafumeli va kari va sagula ku seketela a ma Nações Unidas hi kutsongwani-kutsongwani. Lezvi hi nga zvi rindzelako hi lezvi: Hi citshuketi, Jehovha i ta chela timbilwini ta vafumeli a maalakanyo ya ku va nyikela a ntamu wabye ka civandza. A cikhati leci lezvo zvi to humelela, hi ta zvi tiva lezvaku a kuxaniseka ka hombe ku lava ku sangula. Na ha ha rindzela ku lezvo zvi maheka, a hi “tshameni na hi khindlimukile, hi hi ni kupima ku nene”, hakuva a kucica loko ka citshuketi ku ta maheka zvezvanyana! — 1 Tes. 5:6.