Zva vhumeleka a ku a munhu ava ni tshengo?

Hlamulo wa Bhibhiliya

Hi cikhati co kari, Nungungulu i tsikile vanhu va teka vasati vo hlaya. (Genesisi 4:19; 16:1-4; 29:18-29) Kanilezvi, a hi Nungungulu a nga sangulisa tshengo. A cikhati leci a nga maha Adhamu, i mu nyikile a sati mun’we.

I chusile Jesu Kristu lezvaku a tlhelisela zvilo kota lezvi zvi nga tshamisile zvona kusanguleni, lezvaku a munhu a teka sati mun’we basi. (Johani 8:28) A cikhati leci Jesu va nga mu wutisa zvokari xungetano hi kutekana, i te: “loyi a va mahileko kusanguleni i no maha wanuna ni wasati, aku: Hikwalaho a wanuna i ta siya papayi wakwe ni mamani wakwe a namarela ka sati wakwe, lava vambiri va tava nyama yin’we.” — Matewu 19:4, 5.

Hi ndzhako ka cikhati, Nungungulu i no ruma mun’we wa vapizani va Jesu lezvaku a tsala lezvi: “Ngha wanuna mun’we ni mun’wani a hi ni sati wakwe, ni wasati mun’we ni mun’wani a hi ni nuna wakwe.” (1 Va Le Korinte 7:2) A Bhibhiliya kambe gi wula lezvaku a wanuna mun’we ni mun’wani a chadhileko lomu bandleni ga wuKristu, loyi a nyikiwako ntiro wo kari wo hlawuleka, i fanele kuva “nuna wa sati munwe.” — 1 Timote 3:2, 12.