Xigonzo 18

Maha Munghana Wa Nungungulu Kala Kupinzuka!

Ku maha wunghana ku lava a ku ti kurumeta; ku gi hlayisa ku lavawo a ku ti kurumeta. A ku ti kurumeta ka wena kasi ku ti maha ni ku simama kuva munghana wa Nungungulu ku ta katekiswa nguvu. Jesu i te ngalo ka lava va nga kholwa ka yena: “Mu ta tiva zinene, ni zinene zi ta mu tlhatlhisa.” (Johani 8:32) Zi wula yini lezo ke?

Kusukela lezi wa zi kota ku kuma kutlhatlheka. Wa zi kota ku tlhatlheka tigonzweni ta mawunwa ni ka mawunwa ma hangalaswako hi Satani. Wa zi kota ku tlhatlheka kungatsumbeni loku ku karatako makume ya mazana ya makume ya mazana ya vanhu lava va nga tiviko Jehova. (Va Le Roma 8:22) Vanghana va Nungungulu va tlhatlhekile hambu ni ‘kuchaveni ka kufa’. — Maheberu 2:14, 15.

Wa zi kota ku kuma kutlhatlheka misaveni yiswa ya Nungungulu. Ku hlamalisa kuyini kutlhatlheka loku u zi kotako a ku ku kuma xikhatini xitako! A Misava ya paradise yi ta ngha yi tlhatlhekile tiyimpini, mababyini ni wugevengeni. Yi ta ngha yi tlhatlhekile wusiwaneni ni tindlaleni. Yi ta ngha yi tlhatlhekile kukhosahaleni ni kufeni. Yi ta ngha yi tlhatlhekile kuchaveni, kuxanisekeni ni kungalulameni. A Biblia gi ngalo hi Nungungulu: “U vulula canja ga wena, u xurisa zontlhe lezi zi hanyako.” — Tisimu 145:16.

Vanghana va Nungungulu va ta hanya kala kupinzuka. A wutomi ga pinzukelwa xinyikiwo xa lisima xa Nungungulu ka vontlhe lava va lavako kuva vanghana vakwe. (Va Le Roma 6:23) Alakanyela lezi a wutomi go kala gi nga mbheli gi to wula ka wena!

U tava ni xikhati xa ku maha zilo zo tala. Kuzilava u ta lava ku gonza kuba xibya xa wucenje. Kutani kuzilava u ta lava ku gonza ku penda makwadru hambu kuva muvatli. Kuzilava u ta lava ku tiva zilo xungetano hi zihari kutani tisinya. Kutani kuzilava u nga lava ku famba u tiva matiko ni vanhu va tsalangeneko. Kuva ni wutomi ga pinzukelwa ku ta maha zontlhe lezo zi koteka ka wena!

U tava ni xikhati xa ku maha vanghana vanyingi. Ku hanya kala kupinzuka ku ta maha lezaku u tiva vanyingi lava va ti mahileko vanghana va Nungungulu. U ta tiva wutlhari ni matshamela ya vona yo saseka, niku na vona va ta maha vanghana va wena. Wena u ta va ranza niku vona va ta ku ranza. (1 Va Le Korinte 13:8) Kuva ni wutomi ga pinzukelwa ku ta ku nyika xikhati xa ku maha munghana wa vontlhe Misaveni! Niku a xa chukwana ka zontlhe: a wunghana ga wena na Jehova gi ta tiya nguvu hi ku hunza ka mazana ya malembe. Ngha wena uva munghana wa Nungungulu kala kupinzuka!