Yobo

 2 “Ni vavisekile, hi leswo swi ni yendlaka ni lava ku hlamula,

Hikusa ni karhatekile.

 3 Ni twe marito ya ku laya lama ni tlhavaka;

Ni ta hlamula hi ku ya hi mavonelo ya mina.

 4 Na tshemba swaku wa yi tiva mhaka leyi,

Hikusa a yi tshamise xiswoswi ku sukela munhu* a tumbuluxiwa lani misaveni,+

 5 Swaku ku tsaka ka lava yendlaka swa ku biha ku hantla ku hela

Ni ku tsaka ka lava va kalaka va nga chavi Xikwembu i ka nkamanyana.+

 6 Hambiloko wukulu la yena lo fika ni matilweni

Nhloko ya yena yi fika ka marhefu,

 7 A ta nyamalala a nga ha vi kona ku fana ni nsila* ya yena;

Lava a va talisa ku mu vona va ta ku: ‘A kwini?’

 8 Va ta hantla va mu khohlwa ku fana ni leswi munhu a swi lorhaka, a va nge he mu khumbuki;

A ta nyamalala ku fana ni leswi munhu a swi lorhaka niwusiku.

 9 Lweyi a nga tshama a mu vona a nge he tshuki a mu vona,

A nge he tlheli a voniwa kaya ka yena.+

10 Vana va yena va ta kombela ku pfuniwa hi swisiwana,

Mavoko ya yena ma ta tlhelisa xuma lexi a nga xi tekela van’wani.+

11 Marhambu ya yena a ma tiyile ku fana ni ya jovhem,

Kambe a ta lahliwa na wona.

12 Loko swa ku biha swi tsokotsa ka nomo wa yena,

Loko a swi fihla hansi ka lirimi la yena,

13 Loko a swi munya a nga swi tshiki

Kambe a swi fundza ka nomo wa yena,

14 Swakudla swa yena swi ta sungula ku bava ndzeni ka yena;

Swi ta fana ni vhenenu* la tinyoka ndzeni ka yena.

15 A minte tshomba, kambe a ta li hlanta;

Xikwembu xi ta li humesa ka khwirhi la yena.

16 A ta yan’wa vhenenu la tinyoka;

A ta dlayiwa hi matinyu* ya nyoka.

17 A nga ha ta tshuka a vona swinambyana swa mati,

Swinambyana leswi nga ni wulombe ni mantega.

18 A ta tlhelisa minchumu ya yena na a nga yi tirhisanga;

A nge tikhorisi hi tshomba leli a nga li kuma ka manegosiyu* ya yena.+

19 Hikusa a hluphe swisiwana, a swi siya na swi nga na nchumu;

A teke yindlo leyi a kalaka a nga yi yakanga.

20 Kambe a nge kumi ku rhula;

Tshomba la yena a li nga ta mu ponisa.

21 A ka ha na lexi a nga ta xi dla;

Leswo swi ta yendla swaku tshomba la yena li hantla li hela.

22 Loko tshomba la yena li sungula ku tala hintamu, a ta karhateka;

A ta kumana ni makhombo ya manyingi.

23 Nkama a dlaka,

Xikwembu xi ta mu kwatela,

Ku kwata ka xona ku ta mu nela, anze ku ya fika ka marhumbu ya yena.

24 Nkama a nga ta baleka matlharhi ya nsimbi,

A ta tlhaviwa hi mimpaxwa* leyi txopiwaka hi ligubu la kobre.

25 A tlomula mpaxwa lowu nga mu tlhava ka nhlana,

Tlharhi la ku phatima leli nga mu boxa nyongwa,

A sungula ku chava.+

26 Tshomba la yena li ta mbhonyiwa hi munyama;

A ta hisiwa hi ndzilu lowu kalaka wu nga pfurhetiwanga hi munhu;

Lava nga ta pona ka tende la yena va ta kumana ni khombo.

27 Tilo li ta gwavula xidjoho xa yena;

Misava yi ta mu djikela.

28 Yindlo ya yena yi ta kokiwa hi ndhambi;

Ku ta va mpfula yayikulu hi siku leli Xikwembu xi nga ta kwata hi lona.

29 Leswi hi leswi Xikwembu xi nyikaka munhu lweyi a yendlaka swa ku biha,

I tshomba la yena leli a nga nyikiwa hi Xikwembu.”