Yeremiya

26 Nkama Yoyakimi+ n’wana wa Yosiya, hosi ya Yuda a nga sungula ku fuma, Yehovha a khulume na Yeremiya, a ku: 2 “Mina Yehovha ni li: ‘Nyima ka kintari* wa yindlo ya Yehovha u gama u vulavula ni vanhu hinkwavu lava nga ka madoropa ya Yuda lava taka va ta gandzela* ka yindlo ya Yehovha. Va byeli hinkwaswu leswi ni ku rhumaka swona; u nga siyi nchumu. 3 Kumbexana va ta yingisa kutani mun’wani ni mun’wani wa vona a tshika ndlela ya yena ya ku biha, se ni txintxa leswi a ni swi pimisa* hi khombo leli a ni lava ku va tisela lona hi mhaka ya mintirho ya vona ya ku biha.+ 4 Va byeli u ku: “Yehovha a li: ‘Loko mi nga ni yingisi hi ku kala mi nga landzeli nawu wa mina lowu ni nga mi vekela wona, 5 hi ku kala mi nga yingisi marito ya vatirheli va mina lava nga vaprofeta, lawa ni va rhumaka swaku va tshamela ku mi byela hi ku phindhaphindha,* marito lawa mi kalaka mi nga ma yingisanga,+ 6 kutani ni ta yendla swaku yindlo leyi yi fana na Xilo+ funtshi ni ta yendla swaku doropa leli li rhukiwa matikweni hinkwawu ya misava.’”’”+

7 Vaprista ni vaprofeta ni vanhu hinkwavu va mu twile Yeremiya nkama a nga vulavula marito lawa ka yindlo ya Yehovha.+ 8 Nkama Yeremiya a nga heta ku khuluma hinkwaswu leswi Yehovha a nga mu rhuma swaku a swi byela vanhu hinkwavu, vaprista, vaprofeta ni vanhu hinkwavu va vhele va mu khoma, va ku: “Wena u ta fa hikakunene. 9 Hi mhaka muni u profete hi vito la Yehovha, u ku: ‘Yindlo leyi yi ta fana na Xilo, naswona doropa leli li ta hohlotiwa* li sala li nga na munhu?” Se vanhu hinkwavu va ta ka Yeremiya va mu rhendzela ka yindlo ya Yehovha.

10 Nkama varhangeli va le Yuda va nga twa marito lawa, va hume ka yindlo ya hosi va ya ka yindlo ya Yehovha va fika va tshama ka nyanghwa wa nyuwani wa yindlo ya Yehovha.+ 11 Vaprista ni vaprofeta va byela varhangeli ni vanhu hinkwavu va ku: “Munhu lweyi a faneliwa hi ku fa,+ hikusa a profete swa ku lwisana ni doropa leli ku nga leswi mi nga swi twa hi tindleve ta n’wina.”+

12 Se Yeremiya a byela varhangeli hinkwavu ni vanhu hinkwavu a ku: “Ni rhumiwe hi Yehovha swaku ni profeta marito hinkwawu lawa mi nga ma twa, lawa ma lwisanaka ni yindlo leyi ni doropa leli.+ 13 Swoswi, txintxani tindlela ta n’wina ni mintirho ya n’wina mi yingisa rito la Yehovha Xikwembu xa n’wina, kutani Yehovha a ta txintxa leswi a swi pimisaka* hi khombo leli a nga vula swaku a ta mi tisela lona.+ 14 Kambe loko ku li mina, ni le mavokweni ya n’wina. Ni yendleni hinkwaswu leswi mi swi vonaka na swi li swinene funtshi na swi lulamile ka n’wina. 15 Kambe swi tiveni swaku loko mi ni dlaya, n’wina ni doropa leli ni hinkwavu lava tshamaka ka lona mi ta va ni nandzu wa ku halata ngati leyi kalaka yi nga na nandzu, hikusa i Yehovha a nga ni rhuma ka n’wina swaku ni ta mi byela marito hinkwawu lawa mi ma twaka.”

16 Se varhangeli ni vanhu hinkwavu va byela vaprista ni vaprofeta va ku: “Phela munhu lweyi a nga faneliwi hi ku fa, hikusa a vulavule na hina hi vito la Yehovha Xikwembu xa hina.”

17 Kutani madoda man’wani ya tiko ma suka ma nyima ma sungula ku byela vanhu hinkwavu lava nga hlengeletana ma ku: 18 “Mikiya+ wa le Morexeti a a profeta hi nkama a ku fuma Hezekiya+ hosi ya le Yuda, kutani a byela vanhu hinkwavu va le Yuda a ku: ‘Yehovha murhangeli wa tintsumi a li:

19 “Indjhe Hezekiya hosi ya le Yuda ni vanhu hinkwavu va le Yuda va mu dlayile? Hosi a yi mu chavanga Yehovha yi gama yi kombela Yehovha hi ku tiveka hansi swaku a yi komba timpsalu, Yehovha a za a txintxa leswi a a swi pimisa a nga ha tisi khombo leli a nga hlaya swaku a ta va tisela lona?+ Se hi le kusuhi ni ku tivangela khombo lalikulu.

20 “A ku ni wanuna mun’wani lweyi a vitaniwaka Yuriya n’wana wa Xemaya wa le Kiriyati-Yerimi,+ lweyi a a profeta hi vito la Yehovha, a profete swa ku lwisana ni doropa leli ni tiko leli na a tirhisa marito ya ku fana ni ya Yeremiya. 21 Hosi Yoyakimi+ ni masonchwa ya yena hinkwawu ya matimba ni varhangeli hinkwavu va ma twile marito ya yena, se hosi yi lava ku mu dlaya.+ Nkama Yuriya a nga swi twa, a vhele a sungula ku chava a gama a baleka a ya Gibita. 22 Kutani Hosi Yoyakimi a rhuma Elinatani+ n’wana wa Akibori ni vavanuna van’wani swaku va ya Gibita. 23 Va fike va khoma Yuriya aGibita va mu yisa ka Hosi Yoyakimi, lweyi a nga fika a mu dlaya hi xipada+ a gama a lahla ntsumbu wa yena ka masirha lawa ku lahliwaka mani na mani.”

24 Kambe Ayikami+ n’wana wa Xafani+ a seketele Yeremiya, a za a nga nyiketiwi ka vanhu swaku va mu dlaya.+