Nahume
2 Lweyi a hangalasaka a tile swaku a ta lwa na wena.*+
Vonelela tindhawu ta ku tiya
Tshama na u rindze ndlela.
Khoma matlharhi* u lungheka.
2 Hikusa Yehovha a ta yendla swaku Yakobe
Na Israyele va tlhela va hloniphiwa,
Hikusa lava hlaseleka va va hlaselile;+
Va wonhetele tigadja ta vona ta mawuvha.
3 Swivhikelo swa vavanuna va yena va matimba swi pendiwe swi va swa ku pshuka,
Tinhenha ta yena ti yambale mpahla ya ku pshuka.
Tinyolo* ta yena ta nyimpi leti nga yendliwa hi tinsimbi ta phatima ku fana ni ndzilu
Hi siku leli a nga lunghekela nyimpi,
Naswona matlharhi lawa ma nga yendliwa hi nsinya wa yunipa ma rhurhumelisiwa.
4 Ndlela leyi tinyolo ta nyimpi ti tsutsumaka hi yona ka switaratu a yi lawuleki.
Ti ya hansi ni henhla xikarhi ka doropa.
Ti phatima ku fana ni swihunyani swa ndzilu naswona ta hatima ku fana ni ku hatima.
5 A* ta vitana varhangeli va yena va nyimpi.
Va ta rhurhumela hi ku chava nkama va taka.
Va ta tsutsuma va ya ka muru;
Va ya vhikela doropa.
6 Tinyanghwa ta minambu ti ta pfuliwa,
Yindlo ya wuhosi yi ta diliziwa.
7 Ku yendliwe xiboho lexi: Doropa a la ha vhikelelekanga,
Lava tshamaka ka lona va ta yisiwa awukaraweni, vatirhi va xisati lava nga ka lona va ta konya;
Va ta rila ku fana ni matuva na va tiba swifuva.
8 Khale Ninivha+ a a fana ni mati ya ku yenta,
Kambe swoswi vanhu va baleka.
“Nyimani! Nyimani!”
Kambe a ku na munhu lweyi a txuvukaka ndzhaku.+
9 Teketelani prata, teketelani woru!
Ku ni xuma xa xinyingi swinene.
Ku ni minchumu ya ku hambanahambana ya lisima.
10 Doropa a la ha na munhu, li helisiwile, i ndhawu ya ku hohlokela.*+
Timbilu ta vona ta deretera hi ku chava, matsolo ya vona a ma tiyanga, masenge ya vona ma rhurhumela;
Tinghohe* ta vona hinkwavu ti xukuvalile.
11 Ku yendleke yini hi doropa leli a li fana ni ndhawu ya tinghonyama,+ lani swinghonyamani a swi dla kona,
Lani nghonyama a yi fambafamba kona ni n’wana wa yona,
Ti nga chavisiwi hi munhu?
12 Nghonyama a yi hlotela vana va yona nyama ya yinyingi ya swiharhi,
Yi tlhela yi dlayela tinghonyama ta yona ta xisati.
Ndhawu ya yona a yi tshama na yi yo tala hi nyama,
Ndhawu ya yona a yi tala hi swiharhi leswi nga hahluleliwa.
13 “Phela ni lwa na wena,” ku vula Yehovha murhangeli wa tintsumi,+
“Ni ta hisa tinyolo ta wena ta nyimpi hi ndzilu,+
Xipada xi ta heta swinghonyamani swa wena.
Ni ta helisa swiharhi leswi u swi hlotaka,
Lava u va rhumaka a va nga ha ta twakala.”+