Mahungu Ya Ku Tsakisa Ya Ku Tsaliwa Hi Yohani

4 Nkama Yesu* a nga vona swaku Vafarisi va swi twile swaku a yendla vadjondzisiwa va vanyingi ku tlula Yohani a tlhela a va tsakamisa,+ 2 (hambileswi Yesu a a nga tsakamisi munhu kambe vadjondzisiwa va yena hi vona a va tsakamisa), 3 a suke Yudiya a tlhelela Galileya. 4 Kambe a a fanele a hundza hi le Samariya. 5 Se a fika ka doropa la Samariya leli vitaniwaka Sikari leli nga kusuhi ni nsimu leyi Yakobe a nga yi nyika n’wana wa yena Yosefa.+ 6 Xihlovo xa Yakobe a xi li ka ndhawu yoleyo.+ Se leswi Yesu a a karhalile hi liyendzo, a fike a tshama kolanu. A ku li kolomuyani ka ma 12.*

7 Kutani ku ta wansati mun’wani wa le Samariya a ta kha mati. Se Yesu a ku: “Ni kombela mati ya ku nwa.” 8 (Vadjondzisiwa va yena a va ye doropeni va ya xava swakudla.) 9 Se wansati wa Musamariya a ku: “Hi mhaka muni u kombela mati ka mina Musamariya, kuve wena u Muyuda?” (Hikusa Vayuda a va nga twanani ni Vasamariya.)+ 10 Yesu a mu hlamula a ku: “Loko a wu yi tiva nyiko ya Xikwembu ya mahala+ ni lweyi a ku byelaka a ku: ‘Ni kombela mati ya ku nwa,’ a wu ta va u mu kombelile mati, se yena a a ta ku nyika mati ya wutomi.”+ 11 Wansati a ku: “Hosi,* hambi xikelelo xa mati a wu na xona, naswona xihlovo xi yentile. Se mati ya wutomi u ma kuma kwini? 12 Wo va mukulu ka vhovho wa hina Yakobe lweyi a nga hi nyika xihlovo lexi, lexi yena ni vana va yena ni swifuyu swa yena va nga nwa ka xona?” 13 Yesu a mu hlamula a ku: “Lweyi a nwaka mati ya xihlovo lexi, a ta tlhela a twa torha. 14 Kambe lweyi a nwaka mati lawa ni nga ta mu nyika wona a nge he tlheli a twa torha,+ hikusa mati lawa ni nga ta mu nyika wona ma ta fana ni mati lama pfelaka ndzeni ka yena ma mu nyika wutomi la ku kala li nga heli.”+ 15 Wansati a ku: “Hosi, ni nyiki mati ya kona, leswaku ni nga ha twi torha naswona ni nga ha tlheli ni ta lani swaku ni ta kha mati.”

16 Yesu a ku: “Famba u ya vitana nuna wa wena mi ta lani.” 17 Wansati a mu hlamula a ku: “A ni na nuna.” Se Yesu a ku: “U hlamule kahle loko u ku: ‘A ni na nuna.’ 18 Hikusa a wu ni 5 wa vavanuna naswona lweyi u nga na yena swoswi a hi nuna wa wena. Leswi u nga swi vula i ntiyiso.” 19 Wansati a ku: “Hosi, na swi vona swaku u muprofeta.+ 20 Vavhovho va hina a va gandzela ka ntshava leyi, kambe n’wina mi li vanhu va fanele va ya gandzela le Yerusalema.”+ 21 Yesu a ku: “Ni ku byela ntiyiso: Nkama wa ta lowu mi nga ta kala mi nga ha gandzeli Papayi ka ntshava leyi kumbe aYerusalema. 22 N’wina mi gandzela xa ku kala mi nga xi tivi;+ kambe hina hi gandzela lexi hi xi tivaka, hikusa ku ta rhanga ku ponisiwa Vayuda.+ 23 Kambe nkama wa ta naswona se wu fikile, lowu vagandzeli va ntiyiso va nga ta gandzela Papayi hi moya* wa ku kwetsima ni ntiyiso, hikusa Papayi a lava ku gandzeliwa hi vanhu va ku tshamisa leswo.+ 24 Xikwembu i Moya*+ naswona lava xi gandzelaka va fanele va xi gandzela na va kongomisiwa hi moya wa xona wa ku kwetsima ni ntiyiso.”+ 25 Se wansati a ku: “Na swi tiva swaku Mesiya lweyi a vitaniwaka Kreste a ta ta. Nkama a nga ta fika, a ta hi tlhamusela swilo hinkwaswu.” 26 Yesu a byela wansati a ku: “Hi mina, mina ni vulavulaka na wena.”+

27 Se vadjondzisiwa va yena va fika hi nkama wolowo, kutani va hlamala hileswi a a vulavula ni wansati. Kambe a nga kona lweyi a nga mu vutisa a ku: “U lava yini ka yena?” kumbe: “Hi mhaka muni u vulavula ni wansati lweyi?” 28 Kutani wansati a siya khuwani la yena la mati a ya doropeni a fika a byela vanhu a ku: 29 “Tanani mi ta vona munhu lweyi a nga ni byela hinkwaswu leswi ni nga tshama ni swi yendla. Devhi hi yena Kreste.” 30 Se vanhu va huma doropeni va ya ka Yesu.

31 Hi nkama wolowo, vadjondzisiwa va yena a va mu kombela va ku: “Rabi,*+ dlana swakudla.” 32 Kambe a va hlamula a ku: “Ni ni swakudla swin’wani leswi mi kalaka mi nga swi tivi.” 33 Se vadjondzisiwa va vutisana va ku: “Ko va ni lweyi a nga mu tisela swakudla?” 34 Yesu a ku: “Swakudla swa mina i ku yendla ku rhandza ka lweyi a nga ni rhuma+ ni ku heta ntirho wa yena.+ 35 A hi n’wina mi vulaka swaku ka ha sale 4 wa tiwheti swaku ku sungula ntshovelo ke? Yingisani! Na mi byela: Tlakusani matihlo mi txuvuka masimu, ma lunghekile swaku ma tshoveliwa.+ 36 Lweyi a tshovelaka wa hakeliwa naswona a hlengeleta mihandzu ya wutomi la ku kala li nga heli leswaku mubyali ni lweyi a tshovelaka va tsaka xikan’we.+ 37 Hikusa ma tiyisile marito lama nge: Mun’we i mubyali kasi mun’wani i mutshoveli. 38 Ni mi rhume swaku mi ya tshovela lomu mi kalaka mi nga tirhanga kona. Van’wani va tirhile, kutani n’wina ma pfuneka hi ntirho wa vona.”

39 Vasamariya va ku tala va doropa lolelo va ve ni lipfumelo ka yena hi mhaka ya wansati lweyi a nga fakaza a ku: “A ni byele hinkwaswu leswi ni nga tshama ni swi yendla.”+ 40 Nkama Vasamariya va nga ya ka Yesu, va mu kombele swaku a tshama na vona; kutani a tshama na vona masiku mambirhi. 41 Se vanhu va ku tala va kholwa hi mhaka ya leswi a a va djondzisa swona, 42 kutani va byela wansati va ku: “A ha ha pfumeli hi mhaka ya leswi u nga swi vula ntsena; kambe hi pfumela hi mhaka ya leswi hi nga swi twa naswona ha swi tiva swaku wanuna lweyi a ta ponisa misava.”+

43 Loko se ku hundze masiku mambirhi, a suke a ya Galileya. 44 Kambe Yesu a vule swaku muprofeta a nga hloniphiwi ka tiko la yena.+ 45 Kutani nkama a nga fika Galileya, vanhu va ndhawu yoleyo va mu yamukelile hikusa va vone swilo hinkwaswu leswi a nga swi yendla ka fexta aYerusalema,+ hikusa na vona a va yile.+

46 Se a tlhelela ka doropa la Kana aGalileya, lomu a nga tshama a txintxa mati ma va vhinyu.+ A ku ni mutirhi mun’we wa hosi aKapernawume lweyi a a vabyeliwa hi n’wana. 47 Nkama wanuna lweyi a nga twa swaku Yesu a sukile Yudiya a ya Galileya, a mu yelile swaku a ya mu kombela kuva a hanyisa n’wana wa yena hikusa a a li kusuhi ni ku fa. 48 Kambe Yesu a mu hlamula a ku: “A mi nge tshuki mi kholwa loko mi nga vonanga masingita ni swihlamaliso.”+ 49 Se mutirhi wa hosi a byela Yesu a ku: “Hosi, a hi fambi, na n’wana wa mina a nge se fa.” 50 Yesu a ku: “Muka; n’wana wa wena a hanyile.”+ Kutani wanuna yelweyo a tshemba leswi Yesu a nga mu byela swona, kutani a muka. 51 Na a ha li ndleleni, vatirhi va yena va mu tlhangaveta va mu byela swaku n’wana wa yena se a hanyile.* 52 Se a va vutisa nkama lowu a nga sungula ku yampsa hi wona. Va mu hlamula va ku: “A hanye tolo kolomuyani ka ma 13.”* 53 Kutani papayi lweyi a swi twisisa swaku swi yendleke hi nkama lowu Yesu a nge te: “N’wana wa wena a hanyile.”+ Se yena ni ndjangu wa yena hinkwawu va kholwa ka Yesu. 54 Leli a ku li singita la wumbirhi+ leli Yesu a nga li yendla nkama a nga suka Yudiya a ya Galileya.